نفساني - تخلصي من نوبات الهلع بهذه الطريقه تعالي شوفي

تجربتي مع نوبات الهلع panic attacks حتي الشفاء بحمد الله
السلام عليكم يا قمرات

حبيت اعرض تجربتي عليكم من البداية وحتي الشفاء و لله الحمد لعلها تكون سبب في شفاء اي حد بيعاني من العرض ده بأذن الله

قبل ما اذكر الاسباب اول شيء احب اقوله لاي وحده تمر بالنوبات دي ان عدد المبتلين بيها اكبر بكتير مما تتخيلي و دي نقطة ايجابية جدا في العلاج انك تعرفي انك مش لوحدك

تاني نقطة ان العرض ده مهما تسبب في صعوبة التنفس او سرعة ضربات القلب فهو ليس قاتل و لا يسبب اي خطر علي الصحة او القلب و كل دي اعراض نفسية يسببها عقلك لجسمك ليس الا

اعرفي و تأكدي ان اسوأ نوبة هي الاولي الي حصلت و انتي مش عارفة ايه اللي بيحصلك بالضبط - بعد القراءة و البحث و الاطمئنان علي طبيعة النوبات هتتحسن معاكي كتير

الاسباب :

الارهاق هو عدوك الاول وهو ما اوصلك لهذا الحال - سواء ارهاق جسمك - مشاعرك تفكيرك
قلة النوم - الارق - عدم الاهتمام بالغذاء - التفكير الكتييييير دول كلمات لازم تنتهي من حياتك الان

اول اجراء يتعمل لتحسين النوبات و الاقلال منها نامي علي الاقل 8 ساعات يوميا
عندك ارق تدرجي من اللبن الدافيء- النعناع - حبوب kava من الصيدلية و هي اعشاب و امنة تماما و طبعا اسألي طبيبك و الصيدلي عنها كما تشائين - اخر حاجة panadol night وكل دي ادوية امنة لا تتطلب روشتة
و زيادة في الامان اسألي عنها طبيبك و كأي دواء لا تصلح للحامل او المرضعة
في كمان حقن ديبوفيت دي فيها فيتامين b بتقوي الاعصاب جدا و بتساعد كتير في تقليل النوبات

في اسباب عضوية زي الامساك مثلا و نقص الفيتامينات ممكن تؤدي لاعراض مشابهة من ضيق نفس و خلافه ثم يلعب الهلع دوره في تصوير الامر علي انه نوبة قلبية مثلا و العياذ بالله

كمان من اهم اسباب الشفاء استبعاد الاسباب العضوية

يعني ايه ؟

لما تكشفي و تعملي رسم قلب مثلا
و تطمني علي نفسك ده هيقنعك اكتر و اكتر ان السبب نفسي و هيعرفك حقيقة الاعراض اللي عندك مما يسهل الشفاء و التخلص منها نهائي ان شاء الله

الاعراض :

اهم عرض هو ضيق التنفس و سرعة ضربات القلب - الاحساس بالدوخة او التنميل في الاطراف
و الفكرة المسيطرة عليكي وقتها انك لا قدر الله بتموتي و روحك بتتسحب منك - برودة في الاطراف - عرق في الكفوف بذات

العلاج :

في اجراءات كتير هتعمليها لتجنب النوبات و في اجراءات تانية هتعمليها اثناء النوبة لو حصلت عشان تخلص بسرعة الاهم فيها كلها الدعاء لنفسك و تخلي كل المقربين منك يدعولك - اولادك - زوجك والدتك كه يعني

- زي ما قلنا النوم الكافي و تجنب الارهاق تماما و تاخدي كل حاجة ببساطة - مش سهل تغيري نفسك طبعا لكن مش مستحيل برضه

احرصي علي افراغ القولون بانتظام ولو عندك قولون عصبي خدي الدواء بتاعه - القولون لما يضغط علي الحجاب الحاجز و يعوق التنفس ده من اكتر الحجات اللي ممكن تطلق النوبة فورا

اثناء النوبة - اتصلي أي حد من معارفك يكون عارف الموضوع و ابدأي احكي ما تشعري به و خليهم يطمنوكي
الاجراء ده ممكن ينهي المسألة في ثواني

غيري مكانك - لو واقفة اقعدي او قومي اتمشي في المكان
تغيير المكان اللي عايشة فيه برضه لو في امكانك يبقي هايل
ممكن حتي تتصفحي النت و تشوفي اماكن جميلة زي حدائق - زهور الخ اي منظر مريح للعين

ابدأي لاحظي اي نمط فني حواليكي و اشرحي في سرك الالوان - ده لون كذا ده شكل مربع و جواه ورده
كده يعني - الاستغراق في شرح اي موضوع بسيط هيساعدك في التخلص من النوبة بسرعة و تخفيفها

شرب الماء - لا تنسي شرب كميات مناسبة يوميا من الماء لتنشيط الدورة الدموية و المساعدة علي تخفيف اثار الارهاق

*الحمد لله الان الاعراض لا تظهر معي اطلاقا و احيانا اشعر باقترابها لمدة ثواني لو ارهقت نفسي لكن في كل الاحوال لم تعد تشكل عندي اي مشكلة و لله الحمد و المنة

منقوووول من احد المواقع