حساسيتي من المجتمع وشكي في كل ما يدور حولي هل هذا رهاب ؟؟

حساسيتي من المجتمع وشكي في كل ما يدور حولي هل هذا رهاب ؟؟

السلام عليكم و رحمة الله و بركاته
املي فيكم و في ربنا تساعدوني اني اتخلص من مشاكلي دي الي حاسس اها ممكن توديني للجحيم و بجد هكون شاكر جدا
في البداية اعرفكم بنفسي انا سني 21 سنة في كلية فاشلة ملهاش اي مستقبل حالتي المادية الحمد لله متوسطة احسن من غيري بشرب حشيش في بعض الاحيان عشان بتعملي دماغ حلوة و بتخرجني من المود الوحش .
انا دايما دايما بحس اني مش اجتماعي و ان الناس مش بتحبني و مش بتحب تقعد معايا و دي لباحظها كتير فعلا بالاضافة اني ممكن يكون معنديش شخصية او شخصيتي ضعيفة بحسها فعلا لأني بحاول اقلد الناس و مليش شخصية ثابتة ليا انا بس و لكن معظم افعالي هي تقليد لواحد صاحبي بحبه او لوالدي او لأي حد و دا مش بعمله متعمد بس بعمله تلقائيا .. واحد صاحبي مرة قالي انت مش بتفرد شخصيتك معانا في الشلة ليه يعني ساكت مش بتفتح مواضيع ؟؟ غير احساسي الدائم بالفشل و اني فاشل و مليش اي لازمة و اني مش هعرف اعمل مستقبل كويس مع اني متفائل بس دايما بحس اني فاشل مش عارف انا متفائل ليه هههههههههههه .
انا كمان من النوع الي اي حد يقولي كلمة باخدها بتفكير وحش او يفتح معايا موضوع شخصي فيا باخدها على انه بيهزأ بيا او ان الحاجة دي وحشة و كتير بحس ان اصحابي بيقولو عليا كلام وحش من ورايا و بشك في اي حاجة و في اي كلمة تتقال حتى لو كانت هزار باخدها انها تريقة عليا او استهزاء او ان الناس مكدبيني
و زي ما قولت لحضراتكو انا مش من النوع الاجتماعي يعني بتكسف نوعا ما بس مش اوي و مش بحب اختلط اوي بالناس و ببعد عن اني اتعرف على حد بحس ان كدا احسن اني اكون في حالي .
و راسم لنفسي طبقة اجتماعية معينة نفسي اكون منها و مكونش اقل منها بس انا مش كدا فعلا لأني من اسرة بسيطة والدي متوفي و مليش قرايب مهمين و لما بفكر في الحكاية دي و اكتشف اني مش من الطبقة دي بتضايق اوي اوي اوي و بحس ان انا .... و لا يسوى و اقول هم احسن مني في ايه .. دا كان اول موضوع
تاني موضوع يخصني انا و صديقتي او حبيبتي بحبها جدا بجد هي الحاجة الحلوة الي في حياتي بنت كويسة جدا و محترمة جدااا يعني صعب الاقي بنت في طيبتها و احترامها و حبها ليا في الزمن دا بقالنا تقريبا سنة مع بعض .. بس المشكلة اني بغير عيلها جدا جدا جدا و مش بطيق حد يبصلها بصة و حتى لو كانت نظرة عابرة كمان المشكلة الاكبر الي مسببالي قفلة نفسية بجد اني بشك فيها يعني لو خارجة بقعد اقول يا ترى لو حد عاكسها هتبتسمله ؟؟ يا ترى ممكن تكون بتكلم حد من ورايا لو لقيت موبايلها مشغول اتضايق جداا و اقول بتكلم مين في الوقت دا لو مش اتصلت بيا اقول هي حبها ليا قل و لا ايه ممكن اكون انا مش فارس احلامها ؟! ياترى ؟؟ يا ترى ؟؟ يا ترى ؟؟ اسئلة كتيرة بتيجي في بالي و الشيطان بيشوف شغله صح الحقيقة .. مع انها محترمة جدا و كويسة جدا و مش بتكلم اي شاب غيري و انا اول شاب تكلمه بس الشيطان يلعب ياترى كانت بتحب حد قبلي و مش عايزة تقولي حاجات كدا و دايما حاجة في دماغي بتقولي يا عم زيها زي غيرها زي اي بنت وحشة مفيش بنت مخلصة و اخلاقها كويسة فعلا هي تلاقيها بتمثل عليك .
قولت لواحدة قبل كدا كنت بتكلم معاها على الشات و اتكلمت معاها في الموضوع دا و قولتلها بحس بكذة و كذة قالتلي انت عندك عقدة نقص و انت مش واثق في نفسك و عدم ثقتك في نفسك و عدم ثقتك انها بتحبك و انك الوحيد الي في حياتها هي الي مخلياك تحس بكدا يا ترى كلامها صح ؟؟
كمان هي المشكلة الكبيرة الي فيها انها طيبة جدا و اجتماعية جدا ما شاء الله عليها بس انا حكاية انها اجتماعية دي بتضايقني مكنتش عايزها في البنت الي انا عايزها مش بتخرج و مش بحبها تروح الجامعة ابتديت احس اني اناني جدا معاها و اني عايزها ليا لوحدي من غير هي ما تستمع بحياتها ؟؟

انا قولت لحضراتكم مشاكلي بجد بجد بجد هتكونو انقذتو حياتي لأني بجد ابتديت اتعب نفسيا جدا من مشاكلي دي و ابتديت احس بالاكتئاب و عدم التوازن لأني انا كدا انسان مش طبيعي بجد
متشكر ليكم جداااا ..

و اعذروني ان كلامي كان باللهجة العامية بس قولت كدا احسن عشان تكون من الفلب للقلب . ودمتم .

جزاكم الله خير و اكرمكم و فرج همومكم[/font][/font]

المصدر: نفساني