عاجل يادكتور عبدالله السبيعي للأهميه

عاجل يادكتور عبدالله السبيعي للأهميه

السلام عليكم
ياخوان انا عندي طفل عمره الان 7 سنوات وهو داخل هالسنه ثانيه ابتدائي والطفل الحمدلله ذكي جدا ومؤدب ويسمع الكلام ولاكنه ياخوان فيه خوف غير طبيعي من المدرسه والاطفال وغير اجتماعي تقريبا ويخاف من الاماكن المغلقه ومايبغي احد من والديه يتركونه في كثير من الاحيان مو دايم يعني بكل اختصار عنده مشاكل نفسيه وودي الاقيلي طبيب نفسي متخصص في الاطفال اراجعه ويكون بالمنطقه الشرقيه انا من سكان الجبيل ومثل ماتعرفون عمره صغير وابي الحق اعالج هالمشاكل قبل مايكبر وتتفاقم , وصدقوني ان ماعمري اتخذت معه اي موقف عنف او تهزيء بالعكس انا بكل معنى الكلمه صديقه0
انا رحت لمستشفى سعد بالخبر بس من اول ماطبيت المستشفى لقيت ان الدعوه كلها استنزاف فلوس يعني دخلنا عند الطبيب مصري حتى ماكلم الولد اخذ مني المشكله يمكن في دقيقتين كلام وبعدين قلي خلاص انت راح تواصل جلسات مع الاخت فلانه وكانت سعوديه والجلسات راح تكون اسبوعيه او مرتين بالاسبوع ماذكر وكل جلسه ب(300)ريال والدكتور هذا مراجعته ب(300)ريال واعطانا وصفه ادويه قال عطها الولد فأنا على طول يعني شفت الموضوع غير ماتوقعته انا قلت الان بيجلس مع الطفل ويكلمه وياخذ ويعطي معه لاكن عكس هذا كله وبالعكس وصدقوني مابالغ بالكلام هذا اني قعدت اتكلم مع الطبيب بكل اخلاق واقوله يعني الان انتهى الموعد معك قالي نعم وكان يتكلم بكل نفس شينه وناقشته شوي وقلتله يعني ماجلست مع الولد او ناقشته وعلى طول تعطيني علاجات ( وكلها ياخوان حبوب نفسيه ) على طول عصب وقالي انت تعلمني شغلي احنا ادرى ومن هالكلام انا على طول خذت هالوصفه ورميتها بالزباله وانتو بكرامه ومارجعت لهالطبيب , معليش ياخوان انا اللي اعرفه ان اي طبيب مايصرف دوا الا يعرف الحاله المرضيه لمريضه ويمكن تصل لتحاليل حتي يصرف الدوا . لاكن صار اللي صار فياليت ياخوان اللي يعرفلي طبيب او طبيبه نفسي مشهور ومعروف بخبرته الطبيه يدلني ياخوان ولكم مني جزيل الشكر لاني دورت ودورت مالقيت .
ياخوان من كثر ماشوف بمجتمعنا من مشاكل نفسيه تكون في البدايه تافهه او صغيره بنظر البعض ولايلقي لها بال ولاكن مع الوقت صدقوني تأثر بحياته الشخصيه والنفسيه ويمكن تتطور لعلاقته العائليه بالمستقبل0
انا ولدي الله يحفظ لنا ولكم هو الأول في ترتيب الاولاد وجاء بعد طفلين توفوا بعد الولاده مباشرة ولله الحمد (الله لايحرمني ووالدتهم الأجر وشفاعتهم يوم القيامه) فكل الحب والحنان اعطيناه ويمكن مايقدر احد يلومنا في هالشي لو كان بمكاننا وكانت رغباته متحققه تقريبا ولاكن مو بالدلع او التدليل الزايد عن الحد يعني بشكل منطقي 0
والولد في البدايه كان بعمر 4 سنوات كان جريء ويدخل عند الرجال اذا كانو عندي وماتلاحظ عليه اختلاف في كل تصرفاته وبعدين جانا مولود ثاني وهو بسن 4 سنوات ونص تقريبا وفي فترة ماكانة امه بالمشتشفى كنت احطه عند عائلة جارنا فترة الدوام يعني كم ساعه لاني اطلع بدري وعلى طول اخليه معي واروح عند امه واحاول اعوضه عن امه ولاكن بعدين وبعد كم سنه وانا اسولف معاه تفاجئت ان الحادثه هذي ماغابت عن ذهنه وسألني فجأه بابا اذا جابت ماما نونو ثاني تحطوني عند جارنا وانا تأكدت من الولد وسولفت معاه كثير عن جارنا واطفاله قلت يمكن صار اعتداء على الولد لاكن بطرق غير مباشره والولد اكدلي انه ماصار شي ببرائته وعلما ان الشخص هذا جارنا مافيه بيننا زيارات عائليه كثير لاني انتقلت من المكان لمكان ثاني بس الولد ملاحظت عليه اي كره او خوف من هالجار او اطفاله علما ان عنده بنات وولد واحد بس ابدا ماكان يشتكي او يتكلم عنهم واذا قابله مافي اي خوف 0
وبعد كذا لموقف صار من احد الرجال الله يهديه تكلم على الولد بالمجلس عندي بالبيت وماكان فيه الا انا و هالرجال وأولاده يعني كلام تريقه ومزح حسيت الولد بعدها كره هالرجال ولا يدانيه ومن بعدها الولد صار عنده خجل ومايبي يدخل بمان فيه تجمع رجال وهذا بالتالي ادى الى انه مايكون اجتماعي ياعني مايحب تجمع فيه اطفال ويخاف منهم ومايرتاح الا مع بعض الاطفال اللي جلس معهم فترات طويله مثل اطفال الجيران او عيال عمه ومن هالقبيل صار يتجنب اي احتكاك مع اي طفل حتى بالشارع اذا مشى معي للمسجد تلاقيه لاصق بثوبي وبطريقه لاشعوريه تحصله يمسك ثوبي ولازم اكون بجنبه بالمسجد , الان بدأت المدرسه وبس جبت له سيرة الباص واني باخليه يروح معاه ومو انا اللي بأوديه انجن وقام يبكي وانا اخاف من الباص يابابا ولايضيعني الباص ومايعرف بيتنا وكلام طويل0
والولد جربنا معه القراءه وعند مشايخ والحمدلله ماعنده الولد شي وبعدين يعني انا ولله الحمد بالبيت ماعندي لاقنوات فيها موسيقى او اغاني ولاحتى بالبيت او بالسياره اشغل معازف لانها من اكبر اسباب جلب الشياطين للبيوت0

المصدر: نفساني

annm263

إن أردت الإجابة فقط من الدكتور عبدالله السبيعي فهو لايتواجد في هذا المنتدى بل منتدى آخر ,,

السلام عليكم
noooor ممكن تفيدني عن موقع الدكتور عبدالله لاني بحثت بعدة منتديات مالقيت منتدى خاص بالدكتور عبدالله ومع البحث وجدت ان هالمنتدى مشرف عليه الدكتور
لاكن تفاجأت الان انه مو بهالمنتدى0
وإذا فيه احد يقدر يدلي بدلوه بهالمشكله اللي امامكم له منا الدعاء
ودمتم سالمين

أختي الفاضلة

بإذن الله سيجيب المستشارين على تساؤلكِ , والدكتور السبيعي ليس المشرف على هذا الموقع بل يشرف على موقع النفسي معاً لبر الأمان , ومنتدى نفساني يشرف عليه الأستاذ إبراهيم الحوراني ,,