اتمنى تساعدوني في حياتي :(

اتمنى تساعدوني في حياتي :(

السلام عليكم

مشكلتي احس انها معقده ما ادري من فين ابدأ وهل المفروض اشرح الوضع الحالي ام اني اشرح كل المشاكل الي مريت فيها والي وصلتني لهذه الحالة من وانا صغير وحتى الحين

فقلت خلني اكتب المشاكل كلها يمكن يكون لها اتصال او شيء

اولاً أجيب على سألتكم

العمر لكلا الطرفين
انا عمري 26 و زوجي 35

عدد سنوات الزواج أو الخطوبة
8 سنوات

عدد الأطفال
لا يوجد

المستوى التعليمي للطرفين والتخصص
كلانا جامعيين
زوجي خريج جامعه الامام تخصص شريعة درس في معهد الإدارة بس مدري ايش بالضبط بس يقول انه يعادل الماجستير
وانا خريجة جامعه الملك سعود تخصص علوم الحاسب وتقنية المعلومات


مجال العمل للطرفين
زوجي يعمل عمل حكومي ( ما اقدر اقول المسمى او جهة العمل لأني اخاف يطلع الكلام خاصه ان المنتدى مو آمن مره )

انا لا اعمل بسبب رفض زوجي لفكره العمل :( احاول تكوين عملي الخاص من خلال تصميم المواقع لكنه مو ماشي تمام :(

المنطقة التي ولد فيها كل طرف

انا ولدت في الرياض
زوجي الصراحة ما قد فكرت أسأله مكتوب في البطاقة عفيف لكن اعتقد انه مولود في الرياض


المنطقة الحالية التي يقيم بها صاحب الحالة
الرياض

هل يوجد زواج سابق لأحد الطرفين
لا

( للزوجة ) هل أنت الزوجة الثانية
لا

ما هو ترتيب الزوج أو الزوجة بين الأخوة وعددهم
عدد الأخوة لزوجي 3 بنتين و ولد - زوجي الثالث في الترتيب و الاول من الذكور - والده توفى واظن كان عمره 3 سنوات
عدد الأخوة لي من ابوي17 - 10 ذكور و 7 اناث
عدد الأخوة لي من امي 3 - بنت و ولدين - انا البكر لأمي و الطفل التاسع من ابوي - ابوي و امي انفصلوا وكان عمري سنتين و عشت مع امي



راح ابدأ قصتي

الطفولة
امي كانت تخاف علي بشكل كبير لدرجه ما تخليني العب مع الاطفال كانت تقول لي اني حركتي كثيره مو زي الاطفال الي بعمر ولا كنت اخاف من شيء ما اتذكر مره رحنا لحديقة ولا ملاهي كانت تخاف علي هي و جدتي لدرجه فضيعه
تزوجت امي و عمري 9 سنوات وكانت الزوجة الثانية ما كان زوجها يجلس عندنا كثير كان ساكنين عند جدتي وكان الي يرعان خوالي
كبرت وانا ما احب اجلس مع الناس اكره الروحات و اذا جانا ناس اجلس بغرفتي ولا اسلم عليهم ، حتى بعض خوالي ما احب اسلم عليهم ولا اجلس مع اولادهم
كانت امي تمنعني ازور صديقاتي او اروح معاهم الملاهي حتى لو هي معي وانا استحي اعزمهم عندنا في البيت لأنه كان على قد الحال :(
كان ابو يزورني مره في السنه ويعطيني 12000 او 10000 ريال مصروف وما يجلس اكثر من 5 دقائق
كان اذا جاء اجلس اصيييح ( ابكي ) ما ابغى اسلم عليه كانت امي تسحبني له بالغصب - كنت اكره ابوي -
كنت اروح واجي المدرسة بالباص وكان مرات ما يجي فاضطر اروح مشي للمدرسة ، مره رجعت للبيت مشي من المدرسة ايام المطر اتذكر كان الشارع غرقان ولازم امر منه كنت امشي بالمويه وكانت موصله الى نص بطني - كنت في المتوسط - طلبت من ابوي يجيب لي سواق قالي ( اذا تتزوجينه جبته )
كرهته عقب هالكلمة !! هو ما يضره يقدر يجيب لي بدل السواق عشره بس ما ادري وش فيه علي :(


المراهقة
كبرت وبدو الخطاب يجون انا ما كنت ادري لان امي كانت ترفضهم ولا تعطيني خبر ، وكنت ما افكر بالزواج أبدا كنت ابي اكمل دراستي الى الدكتوراه
في اولى ثانوي جتني امي وقالت فلان ( زوجي ) بيتزوجك وش رايك جلست اضحك. جلست امي تمدح فيه وتقول وظيفته زينه و امه حبيبه فـ وافقت وتملكت عليه وانا في اولى ثانوي
بعدين اكتشفت ان امه خاطبتني من يوم عمري 9 سنوات وكان حتى هو ما يدري وعشان كذا امي رفضت ناس خطبوني ولو خيرتني اخترتهم هم على زوجي :(
صحيح مستواهم مو زي مستوى زوجي المادي لكن عقليتهم قريبه من عقليتي ، و اشوف زوجاتهم الحين مبسوطات معاهم، دايم يسافرون و رزقوا بأطفال واصلاً يبان على الواحد اذا كان مبسوط او يتصنع !

تملكنا بس ما كان فيه زواج ولا شيء ولا حتى مكالمات
ذيك السنه كانت صعبه علي كنت بترك الدراسة بس الحمد لله امي وقفت معي
مرت الامور بسلام حتى وصلت ثالث ثانوي بالتحديد الترم الثاني صارت الامو جد صار زوجي يجي يزورنا وصرنا نكلم بعض وعطاني ابوي المهر
طبعا المهر من ابوي لأنه رفض يأخذ من زوجي فلوس
المهم كان زوجي يضغط علي يبغى نتزوج في اجازه الحج من ذيك السنه ( يعني يكون الزواج في نصف الترم الثاني )
انا رفضت عشان اكمل دراستي
كانت ام زوجي تحاول تضغط على امي بس الحمد لله امي وقفت معي كانت تقول لأمي ايش تبغى بالدراسة البنت مردها بيت زوجها ومن هالكلام


المكالمات
صار زوجي يكلمني كل يوم حتى في الاختبارات النهائية مع اني قلت له لا تكلمني بس يرجع ويكلم :(
كنت بعد اغلب المكالمات اصيح كان ما يعجبني !! متشدد ، افكاره ما تعجبني :(

كان يقول لي ان بالحب حتى لو ناكل كل يوم رز مسلوق بيصير زي العسل
كنت اقول له لا بتمل ( انا ما كنت مقتنعة بسالفه الحب ) وكان يقول لي ان حتى الوردة البلاستك يكون لها معنى بالحب
كنت احسه يقول كلام مو منطقي ( للمعلومية الى اليوم ما شفت منه لا ورده بلاستك ولا ورده حقيقيه وكل فتره زواجي ما قال لي احبك الا مره وحده واظنها بالغلط لأننا كنا بوضع حميمي )
اتذكر قالت له مره بعد الزواج ليه ما تقول لي احبك قال لي : ليه حنا مغزلجية :? يعني اذا قلت لك احبك بتصدقين :(

المهم نرجع للمكالمات
كان يتحكم في كل شيء دخلتي وطلعتي وش البس ! خلاني اترك النقاب و البس غطوة كنت اقول له ايه بس البس من وراه النقاب لأني ما اشوف بالغطوة وهو يحسبني اكذب بس ابغى اطلع عيوني للناس
حتى فستان الزواج رفض اسويه ابيض ولا اي تدرج من درجات البيض و اضطريت البس في زواجي فستان عادي مو فستان زواج :(

قال لي وين تبغين شهر العسل قلت له دبي او ماليزيا قالي انسي خارج المملكة !! طيب ليه تسألني اصلا :(
كل يوم كنت اكرهه اكثر وهذا كله بس بالمكالمات :( كانت امي تقول اذا تزوجتيه تغيرينه . كل الرجال كذا . ومن ذا الكلام


الانترنت
بعد كم شهر ركبت انترنت في ببيتنا وصرت ادخل مع صديقاتي شات ومسنجر تعرفت على ولد و حبيته وعطيته رقمي صرت اكلمه كل يوم
انبسط اذا كلمته مو زي اذا كلمت زوجي مع اني كنت عارفه انه يكلمني عشان الفلوس بس ما همني لان اول مره القى احدد أسولف معه براحه ما همني وش بيفكر عني اذا قلت له هالكلام
ولا بيعلم علي امي اذا قلت له هالسر علاقتي فيه ما تعدت الشهرين
كنت اقول له كل شيء واي شيء خاصه انو ما كان فيه علاقه قويه بيني وبين امي كانت امي مشغولة في البيت وانا بدراستي
بعد كم اسبوع قبل الاختبارات النهائية وكان زواجي بعدها
دقيت على امي وكانت بالعمل وجلست اصيح واقول لها ما ابغى اتزوج قالت هدي واذا جيت نتفاهم
وصلت البيت قلت لها كل شيء عن الولد الي اعرفه . انصدمت وعصبت علي وقالت غصب بتتزوجين واخذت مني الجوال والانترنت
كانت بس تعطيني الجوال اذا دق زوجي وصارت تجي تأخذني من المدرسة ما تخلي الباص يجيبني
كنت اكلم الولد وهي ما تدري الى يوم دقت ام الولد على امي وقالت بعدي بنتك عن ولدي امي انصدمت وعصبت علي وصارت ما تكلمني وتقول لي متى تتزوجين ونفتك منك
بعدها ما كلمت الولد خاصه ان امي علمت خالي ودق عليهم وهزئهم
صرت اتمنى اني اتزوج عشان ابعد عن امي لان معاملتها لي صارت سيئة :(


يوم الزواج

يوم زواجي كان مأساوي كنت خايفة مره وكان باين على شكلي لان زوجي بعد كم شهر يقول لي ان كان شكلك كأنك مغصوبه تتزوجين
المهم رحنا للفندق انا وزوجي ، جلسنا نسولف شوي بعدين جلس زوجي يبكي لأنه تذكر ابوه ( حسيت اني تزوجت معقد في ذاك الموقف ) بعدين لما جينا ننام
فرض نفسه علي وكنت اصيييح من الالم طبعان ما صار شيء لكن الم كان فضيع :(
نمت وانا ابكي انتظرت اهلي يجون الصباح ولما جو حاولت امسك نفسي بس ما قدرت
جلست اصيح وهم جالسين وزوجي يصب العصير
اخذتني امي لغرفه النوم وجلست تهديني وانا اقول تكفين خذيني معك ما ابغى خلاص وهي تقول كل الناس كذا اهدي
بعدين راحوا وخلوني معه كان ودي اموت كرهت حياتي محد واقف معي جلست ادور على شبابيك الغرفة ابي انط !! كلها مقفله ( كنا ساكنين برج المملكة )
اليوم الثاني غيرنا الفندق لان طيارتنا تأخرت وحاول فيني مره ثانيه لكن نفس الشي ما قدرت اتحمل الألم
اليوم الثالث قبل ما نسافر وداني اسلم على اهلي وكانت خالتي فيه ترجيتهم اجلس بس ما رضو وخلوني اسافر معه


جده
رحنا لجده وصارت الدخلة هناك طبعا بالغصب وصار السرير كله دم ما قد شفت دم زي كذا
كانت حياتنا الجنسية كلها بالغصب وكانت مؤلمه جدا كنت اكرهها :(

جلسنا اول 3 اشهر في جده منها شهر عسل ومنها شغله ينتدبونه هناك في الصيفية
مرت الايام حاولت اغير فيه زي كلام امي ما رضى بديت بالنقاب اقوله ما اشوف بدونه ، لكنه رافض الفكرة لدرجه ان مره طحت في الشارع لأني ما اشوف الطريق من الغطوة
قال لي : هذا الي تمشي ورافعه خشمها بالهواء :( يقول لي هالكلام وحنا مالنا كم اسبوع متزوجين :( )

كان ولا زال ما يوديني اي مكان عنده التمشية انك تركبين السيارة ويدور فيك في الشارع اذا احتجت شيء من السوق يسوي لي مشكله لأنه اذا شاف منظر ما يعجبه او شباب يعاكسون بنات يجلس يهاوشني انا
او اذا رجال طلع فيني يجلس هاوشني انا طيب انا وش دخلني ما اقدر اقول للناس لا تطالعون :(
وانا ما كان يطلع مني شيء ، متغطيه وعباءتي على الراس وامش سيدا ما اتلفت وما ادري ايش يبغاني اسوي :(
اتذكر يقول لي مشيتك كنك تقولين للناس طالعوني ( صدق مريض )

صرت ما احب الاسواق ولا احب اروح لها حتى لو مع اهلي صرت اخلي امي تشري لي ملابسي الي يومك وانا اكره السوق مع اني كنت احبه قبل الزواج حتى كنت اروح بس عشان اتمشى مو لازم اشتري شيء


الرياض
رجعنا الرياض واحنا ساكنين فوق امه وكان يجبرني انزل كل يوم لها من اول ما اصحى لين ما يجي حتى يخليني أتغدا معها و اتعشى معاها
هو يداوم من الساعة 9 الصباح الى الساعة 3:30 بعدين من قبل العشاء الى 10 او 11
كنت اتضايق حتى اذا بيمشيني نتمشى بعد ما تنام امه يعني على 12 او 1 بالليل :(
صرت اروح للسوق مع اهلي عشان اشتري اغراضي كان حتى يحرمني من اني ازور اهلي يوم الاربعاء لان يبغاني اشوف اخواته
وانا اروح الاربعاء لأهلي لان كل خوالي يجتمعون هناك
كان حتى المستشفى امي توديني و امي الي تدفع هو ما قد سوى لي شيء


رمضان
في رمضان كنت ما اشوفه ابدا الا وقت الفطور كان يا يداوم يا عند امه يا نايم
صرت اجلس على النت كثير ورجعت شفت الولد الي ايام الثانوي
ورجعت الدنيا حلوت في عيني :)
ما قلت له اني متزوجه قلت له ان ابوي اخذني وصدق كلامي
صرنا نكلم بعض يوميا وصرت ما اهتم اذا هاوشني زوجي او غصبني على شيء لان فيه احد اشكي له ويسمع لي بدون ما يطلع لزوجي اعذار
كان يجي بعض الايام عندي في البيت اذا راح زوجي الدوام بس ما كان يصير شيء بيننا كانت صداقه بحته وكنت مبسوطة


جده
لما رجعنا لجده السنه الي بعدها تدهور الحال
زوج امي يتعامل مع سحره يقول لهم اسم الشخص ويجيبون له حاله
من سوء حظي قالهم اسمي وقالو له اني اعرف الولد
قال لأمي عشان يتأكد وامي الله يهديها قالت له كل السالفة الي صارت لي بالثانوي
انجن زوج امي لأنه زوجي يصير ولد اخته
وجو عندي في جده وانا ما كنت ادري وش السالفة
كانوا يراقبوني وانا ما ادري وتأكدوا اني رجعت اكلم الولد
امي رجعت للرياض مع اخواني لان خلصت اجازتها وجلس عندنا زوجها ( زوجي غريب يرفض ان اخواني من ابوي يزوروني اذا ما صار بالبيت ويوافق ان زوج امي يجلس عندنا مع انه ما قد شاف وجهي الا بعد ما تزوجت )
لما راحت امي في اليوم الثاني قال لي زوجها كل شيء وقال انا عارف انه يهددك عشان كذا رجعتي له ومن هالكلام وانا بساعدك
هو صدق الولد كان عنده صور لي بس ماكنت خايفة ولا قد هددني
بس مشيت مع زوج امي لأني كنت خايفة يعلم زوجي
كنت ادق على امي ولا ترد علي و تخلي اخواني يصرفوني
وفي يوم جلس زوجها يكلمني كيف انه كان معجب فيني وانصدم لما عرف اني اكلم الولد ومدري كيف و حاول يغتصبني وكان زوجي بالدوام بس الحمد لله قدرت افك منه وقفلت على نفسي
دقيت على امي وعيت ترد جلس اصيح على اخواني وخافت امي وكلمتني قلت لها السالفة طلع زوجها مفهمها انو انا قليله ادب واسوي قدامه حركات وانه اذا جاء ينام يقفل الغرفة على نفسه لان يخاف اجي بالليل وانام معه ( حسبي الله عليه )

جلست ادعي عليه ذاك اليوم و الحمد لله انسجن بعد يومين لان كان عليه ديون
كلمت الولد وقلت له بتزوج وابغى انهي العلاقة وكان متفهم وقال بسلامتك

بس زوج امي لما زاره زوجي بالسجن قال له كل شيء عن الولد بس اظن زوجي ما صدق لأنه ما قال لي شيء


الرياض
بعد كم شهر طلع زوج امي من السجن ورجع الرياض ، راح زوجي له وسأله وخلى امي تحلف اني ما اعرف الولد بس زوجي ما صدق امي وجاء وسألني تعرفين الولد واما قلت لا
بس زاد الشك عنده
صار يراقب كل شيء جوالي، الآبتوب، المنتديات الي ادخلها، كل شيء كرهت عيشتي مع اني ما كنت اسوي شيء بس كنت خايفة صارت ما اكتب بالمنتديات لأنه يهاوشني اذا رد على موضوعي ولد
صرت ما اكلم كثير بالجوال وهو صار يكره امي وخوالي وله الحين 6 سنوات ما سلم على امي :( حتى لما ماتت جدتي ما عزى امي
حتى امه تغيرت على امي ولا صارت تكلمها واذا شافتها بعزيمه ما تبدء بالسلام لازم امي تبدء


رمضان
رجعت نفس حاله رمضان الي قبله ورجعت كلمت الولد وهالمرة قلت له كل السالفة الحقيقة
انصدم وزعل شوي اني كذبت عليه بس سامحني بالأخير


بداية النهاية
بعد ما خلصت اجازه الصيف رجعت للرياض بدري لان بدت الدراسة وكنت سجلت في الجامعة وزوجي بقى في جده
جلست في بيتي لان ما قدرت اروح لأمي عشان زوجها موجود
وفي يوم جاء الولد عندي وكان زوجي راجع من السفر ولا قال لي ودخل و انا و الولد جالسين وطلع السلاح علينا
وكان بيرمي الولد وقفت بوجه ودفني وجلس يهاوشني ويقول تبين تتزوجينه ؟؟!! (هو كان مسوي نفسه اخوي قدام الولد )
بعد كم ساعه من التهديدات وهدد الولد اذا قرب مره ثانيه مني يا ويله ، واخذ جواله وطرده من البيت بملابسه الداخلية
بعدين رجع لي وجلس يهاوشني
رفض يطلقني يقول عشان ابوك عاملني زين وكنت اتمنى انه يطلقني
صار ما يوديني للجامعة وينام في الصالة ويرفض اني انام بغرفه النوم يبغاني انام جنبه بالصالة
صار يقومني من النوم في الليل ويفتح معي نقاش عن الولد كيف عرفته ويسألني اذا صار بيننا شيء
استمرينا على هالحال سنين
وكان كل فتره يوديني عند اهلي ويتركني بعدين يرجع يأخذني
سافر برا يأخذ لغة ولا اخذني


الحياه عند اهلي
مره تركني عند اهلي
كانت فتره صعبه لأنه كانت اداوم في الجامعة وسواق الباص الي يودي لحي اهلي مزاجي يوم يجي و10 لا
طلبت من ابوي يعطيني احد السواويق الي عنده قال لي ما راح اقدر اعطيك الا سواق علي ( احد اخواني له سواق خاص ) بس بأسئل امه اول
و اشوف ، وافقت ام علي وصار يوديني للجامعة وكنت احرص اني ما أتأخر عليه عشان ما يتأخر على اخوي
لكن في يوم من الايام ما جاني دقيت عليه قال انا مسافر مع ماما قلت له ليه ما قالت لي قال ان اختي الكبيرة قايله لي ما اقول لك
طبعا انا ما صدقته ومشيت الموضوع
بعد ما رجع السواق للرياض قالت له تعال ودني للجامعة قال ما اقدر لان اختي الكبيرة قايله له ما يوديني
قلت بابا يقول وديني ، قال اوكي بكرا بجيك
وجاء بكرا ولا جاء السواق وكان علي اختبار نهائي
دقيت عليه قلت وينك قال ما اقدر اختي قايله له ما عليك من بابا لا تروح لها

من بعدها كرهتم ما ادري وش مسوية لهم عشان يكرهوني لهالدرجه و ابوي واقف معاهم ولا كلف على نفسه يساعدني حتى لو بالفلوس مع ان له منصب وفلوسه ما شاء الله
وكل اخواني مستفيدين حتى المتزوجين
الا انا ما يساعدني
من بعد هالسالفة صرت اقلل مكالماتي لأبوي كنت بعد الزواج اكلمه بالأسبوع مره بسبب ضغط زوجي علي لأنه كان يبي يتقرب لأبوي
صرت اكلمه مره بالأسبوعين و مره بالشهر الا ان قطعته الحين وكل اهلي الي من جهته ما اكلمهم واذا ذكروني ودقو ما ارد عليهم

اخترقت إيميلات خواتي واكتشفت ان ابوي يعطيهم فلوس ويسفرهم كل سنه على حسابه حتى الي مو متزوجين يعطيهم فلوس الا انا :(
ولقيت بعض خواتي اخلاقهم مو زينه وارسلت لأبوي الصور الي لقيتها بس طبعا ما يدري انها انا بس شكله ما صدق

وهددت وحده من خواتي وحاولت اصل لزوجها واقول له عنها بس ما قدرت واظن انها عرفتني بس مني متأكدة والحين انا خايفة :(


اول فكره للطلاق
بعد هالأحداث قررنا نتطلق لأني انا دقيت على ابوي وقلت له دايم يسوي لي هالحركة وما يبغاني اتعالج واجيب اطفال ويشك فيني و ما يرضى اعزم احد في البيت حتى امي وخوالي
و ابوي وقف معي وكلمه بعدين قلب علي ابوي ، قال لي اذا هو طلقك معليش بس أنت لا تطلبين الطلاق
وكلمني زوجي وجلس يبكي يبغاني ارجع له ورجعت
وقالي بشرط ما تطلبين اوديك للمستشفى تعالجين ولا تجيبين طاري الاطفال ( وانا فيني تكيس مبايض )

حياتي
وافقت على امل يغير رأيه بس ما غيره
قلب حياتي جحيم وعشت حياه كئيبة
ما اشوفه الا يمكن نص ساعه في اليوم ، يا يكون بالدوام يا بالاستراحة يا ينزل عند امه
حتى مستواي بالجامعة نزل :(

صرت اكره حياتي اتمنى الموت يوميا ادعي عليه واكرهه لدرجه اني كنت احط خل في قطره العيون حقته اتمنى انه يموت او ينعمي أو ينشل
صرت اكره بيتي
ما انظفه ولا اهتم به الا في الشي الضروري
والي زاد هالشي ان اذا خرب شيء في البيت ما يصلحه زوجي لأنه يرفض انا العامل يدخل البيت
ويقول مني فاضي
حتى شكلي ما صرت اهتم فيه بعد ما كان اللبس ما يشوفه علي مرتين في الاسبوع صرت البس لبس واحد طول الاسبوع
حتى وزني قام يزيد من ضيقه الصدر
صار وقتي يروح وانا جالسه على الانترنت حتى لو ما اسوي شيء المهم ما ابغى اسوي شيء للبيت
حتى اهلي صرت اكره اروح عندهم لان ما ابغى مشاكل واهلي كثيره مشاكلهم لان امي تطلقت من زوجها وعندها مشاكل معه
فأموت قهر ولأني قادره اسوي شيء
وهو بعد ما طلق امي صار يمشي ويعلم الناس عن سالفتي مع الولد ويزيد كلام من عنده
حتى اهل زوجي ما صرت ازورهم هم اول شيء زعلوا علي لأني ما حظرت حفله مسوينها وكنت انتظر يرضون عشان ازورهم
لكن اكتشفت انهم يتكلمون علي قدام الناس
فقررت اقطع العلاقة

صديقاتي قطعتهم وقفلت جوالي لان دايم يكلموني عن احوالهم و يطلبون احظر معهم حفلات ولا يصدقون لما اقول لهم ان زوجي يرفض اني اروح اي مكان الازم معي امي
هذا اذا وافق يوديني اصلا
غير كذا اغار لما اسمع الناس تسولف عن حياتها وانها بسوطه وروحاتها وسفرتها ارجع البيت اصيح من القهر
صرت بس احب اجلس لحالي حتى زوجي بعض الاحيان ودي ما يرجع البيت
حتى دوامه الحين تغير صار يطلع من 9 الصباح الى 6 المغرب بعدين ينام الى العشاء ثم يقوم يشرب شاي ويطلع لا صدقائه ولا يرجع الا 12 بالليل
يعني الي اشوفه فيها بس مده شربه الشاي حتى ما يسولف معي يمسك الآبتوب وبس

و اروح عند اهلي الاربعاء واجلس الى الجمعة واذا طلبت منه يجيني الخميس دايم يتعذر اما انه تأخر بالاستراحة ولا نام بدري
وانا ادري انه يكذب لأني اشوف جهاز الآبتوب حقه واعرف متى يرجع للبيت
كل خميس يرجع الساعة 12 بالليل ويجلس يشوف مقاطع إباحية الى الفجر
حتى مره لقيت له سي دي كله مقاطع إباحية وكتبت مكانه نوته ( ليه كذا انا احبك ) ولا رد علي ولا كأنه شاف النوتة

ثاني فكره طلاق
قبل شهر وقف لي خالي وقال مو مقبول وضعك
أنتِ معك شهاده ولك مستقبل
لا أنت جبتي اطفال ولا انت توظفتي ولا أنت كملتي دراستك وابوك ما درى عن حالك وزوجك موقف حالك
لازم تتطلقين حتى امي وافقته الراي
وانا ما كان ودي لأني تأقلمت مع حياتي ولا ابي اتغير
لأني خايفة اني ما اتوفق ، خايفة من كلام الناس ، خايفة ما يعجبني الوضع عند اهلي ، او مين بيصرف علي. باختصار خايفة من التغير !!

بعد تفكر قدرت اقول هالكلام لزوجي
قلت له تعال معي للمستشفى نسوي تحاليل قال لا !! أنت بس روحي
قلت الدكاترة ما يقبلون . بس يسون لي كورس علاج واحد ولا يفيد ويطلبون انك تسوي التحليل ( وكان يرفض )
رحت لـ 3 دكاترة وكلهم نفس الكلام
صحيح ان فيني تكيس لكن كل خواتي فيهم وكلهم حملوا
وهو رفض حتى فكره طفل الانابيب رافضه. قلت طيب نكفل يتيم ورفض

قلت له خلني طيب اتوظف عشان اذا كبرت يصير لي دخل لو انت تخليت عني او تزوجت او توفيت
قال المشاكل الي بتجي من الوظيفة بتخليني اتمنى اطلقك
وقعت اصيح لأني احاول اقدم له حلول لأني ما ابغى اتطلق وهو يرفض
قلت يعني لازم نتطلق؟ جلس يبكي :(
يقول اعرف اني مو احسن رجال ويمكن اكون من اسوء الرجال واعرف ان مالك ضمانات معي يمكن انهبل بعد كم سنه واتزوج عليك
بس فكري استشيري اهلك
قلت اهلي لو اقولهم بيقولوا تطلقي !

بعد كم اسبوع امي كلمت زوجه ولد عم زوجي
قالت لها خلي زوجك يكلمه يتعالج
قالت انه مكلمه من زمان ورافض الفكرة و ما يقدر يكلمه مره ثانيه بس لا تخلين بنتك تطلب الطلاق لأنه بتضيع حقوقها ( ما ادري اي حقوق تقصد لأنه حتى مهر ما عطاني ) وخليها تقرى قرآن
يمكن ربي يهديه
امي اقتنعت وانقلبت 180 درجه بعد ما كانت واقفه معي بسالفه الطلاق وبعد ما اقنعتني الحين تقول لي لا تطلقين
قلت لها اجل انسي سالفه الاطفال ولا تطلبين مني شيء انا بعيش معه الي ان اموت

و رجعت امي تجيب لي من خلطات الحريم تبغاني انا وزوجي ناكلها وانا رافضه لأني طفشت
احس اني العب بجسمي والعيب مو فيني

ما ادري ايش اسوي بحياتي
ما عندي احد استشيره لا ام ترسي لها على بر وابوي ما درى عني و اصلا احس انه ما همه كل همه حريمه و اولاده الثانين
حتى لما ماتت جدتي الي كنت عايشه عندها ما كلف نفسه يعزيني ولا واحد من عماني عزاني مع اني عزيتهم لما مات لهم قريب حتى زوجه ابوي عزيتها لما ماتت جدتها
كل هذا عشان اكسب رضى ابوي لكن لا حياه لمن تنادي


ادري الكلام كثير انا نفس ما اعرف فين المشكلة

الي اعرفه ان نفسيتي تعبانة
وحياتي مو عاجبتني
ما ادري ايش اسوي

المصدر: نفساني

اهلا بك يبنتي
يمكنك التواصل معنا عن طريق البريد الإلكتروني المرفق في توقيعنا

مع التحية ،،

شكرا دكتور
ارسلت لك ايميل

الملتقى لا يتوفر به طبيب في هذا الوقت ، وسوف نقوم إن شاءالله بتوفير طبيب او اخصائي للقيام بالرد على المشاكل

الدكتور هاني لم يرد علي الى اليوم :(

هل يوجد احد يساعدني غيره :(
مللت الإنتظار