قالوا احلام ..

قالوا احلام ..

رائعة للشاعر الجرىء أحمد فؤاد نجم (باللغة العامية)


قصيده / كأنك مفيش

اداء / مصرى طالع عينه


كأنك مفيش

برغم إن صورك فـ كل الدواير

وكل المداخل وكل المحاور

ومليا الشوارع على كل حيط ..

مطنش علينا وعامل عبيط ..

كأنك مفيش ..

***

يا فرحة قلوبنا رئيسنا ظريف ..

فُكهي ..

إبن نكته ودمه خفيف

فـ عهدك سيادتك فَرَشنا الرصيف

وآخر مُنانا الغُموس والرغيف

وكل أمَّا تُخنُق ندوَّر ..

مفيش !!

***
مسيِّب علينا عصابة حبايبك

فضايح وسرقة ونهب بسبايبك

مابين حزب نجلك ... وهانم جلالتك

وجيش الغوازي إللَّي داير يجاملك

وناملك وقاملك .... وحارسك وأمنك

شبعنا مهانه ... شبعنا لطيش ..!

وأنت .. مفيش !!

***
باعونا فـ حضورك ...

ببركة عِبـيدك وغالي وسرورك

باعوا الأراضي .... وكل المصانع

وباعوا البنوك ....

وقدَّام عِنيك .... صوتنا إتـنبح ..

ننادي عليك ..

إلحق يا ريس : ده باعوا الحديد !!

وأنت منشِّف دماغك عنيد !!

.. كأنك مفيش !!

***
دوشتوا دماغنا " بجمال " طلعتك

ومن يومها وإحنا عَبـيد حضرتك

ما تزعلش إني مواطن أبيح

ورافض كلابك فـ شعبك تطيح

فسادهم يا ريِّس واضح .. صريح

قوم بينا صلّح وفتَّش .. وثور

ح نكتب تاريخك ياريِّس بنور

مش تبقى عايش كأنـَّك مفيش !!

***
ورحمة أبوك .. مادام أنت قاعد

عيب لمَّا عُصبة نَـوَر يسحبُوك

م تُقبض عليهم .... م تقطع إيديهم ..

م تعمل عليهم يا ريِّس شاويش

بدل م انت ساكت وقاعد مفيش

***
ياريس علىّ الطلاق تعبانين !!

ياريس علىّ الحرام كفرانين !!

صبرنا سنين ..

سيادتك مسلطن

وشعبك وناسك بتاكل مسرطن

وتشرب مجاري وميت سم هاري ..

ومش دريانين !!

ما تنهض يا ريس تلم الديابه ؟!!

ده شعبك غلابه ....

ومليان طيابه ...

وهوَّ الشفاعة ف يوم الحساب

وهما البطانة الحُثاله الكلاب

ما يملاش عنيهم غير التراب

وليهم ضوافر

وميت ألف ناب

وواقفين لشعبك ورا كل باب

لإمتى ح تسكت وليه الغياب ؟

ده ياما ممالك طواها التراب

حياتنا ياريس تعب فوق عذاب

يا ريس " شريفك " ماهوَّاش شريف !!

" نظيفك " يا ريس ماهوَّاش نظيف !!

وحتى " حبيبك " ماهواش حبـيب !!

وأنا غصب عني ... خلاص إستويت ..

بـ غـُلبي إنحنيت ...

وطلعان عنيا ... وصعبان عليا

بحسبة بسيطة ومن غير خريطه ..

وكونك مفيش .. لقيت متساويش

ومش فارقه أعيش ...

نويت أشتكيك للِّي فوقي وفوقك

وأصلي الفرايض ....عسى يفـُك طُوقـك

قالولي إللي يسجد عدو النظام !!

حاولت أحكي حالي ...!!

قالولي الحكاوي نميمة وحرام !!

فكرت أكتب ..

لقيتكم سيادتك منعتوا الكلام !!

فقررت أحلم ..

هاحلم سيادتك وأفُك اللِّجام

ولو مش هيعجب سيادتك يا فندم

وصِّي العساكر .... تاخُدني أمَّا انام !!

***
حلمت إني شعب ....!

حلمت إني شعب ومصلوب بطولي

على أرض سمرا

ودمي بينـزف ومليان جروح

وفوق صدري جمرة

يميني مربّط على أرض طابا

شمالي ممسمر فـ "أولاد علي"

ورجلي على جزع نخلة فـ "حلايب"

ومرتاح براسي على حِجْر مصر

وشوفتك ياريس ....كأنك ولي ..

كأنك نبي ..

فـ إيدك عصاية وليك معجزات

وشايل صليبي وبتفـُكني ..

وانا فـ جنَّه خضره .. وتحتي جداول ..

ومن فوقي نور ... وريحة بخور ..

همست ف ودانك بآخر وصيّة :

إنسى إللي فاتك ...

هننسى الأسية ... !!

أمانه عليك ..

حُط الوطن جُوَّه نِنِّي عينيك

كرامة عيالنا أمانة ف إيديك

بحق إللي بينّا يا ريِّس وبـينك

وحَق اليَمِين و" ألكتاب " فى يمينك

بحق الشهيد .. إللي رافع جبينك

وجيش إنتصارك فى يوم العبور

وجيل حُر طالع .... وعدته بدور

لملم عيالك ... وجمَّع فـ مالك

وإسحب " جمالك " وسيبنا وغور

المصدر: نفساني

استعــباط

يوماتي بفطر أمل واتعشي بالإحباط

خيبتي بتركب جمل ودمي ريحته شياط

فيه خير كتير في البلد لكنه مش للبلد

وإش ياخد ابن البلد من مجلس الظباط

وحشاني يا مُتعبه في الحرب أو في السلم

يا بعيده وقريبه وحبيبه قوي للعلم

انا وأنتي يا طيبه معمول علينا الفيلم

وأنا حيلتي إيه غير حلم والدعوه في الصلوات

يوماتي بفطر أمل واتعشي بالإحباط

أنا في التاريخ بتعرف ماضي ومش حاضر

وانا ع الورق بعترف ماضي ومش حاضر

ولما جيت اختلف كتبوني قال حاضر

حاضر لأمتي بقي ده الريح مسبش بلاط

ما تسيبوا حبة فرح يتسرسبوا فينا

نصبتوا ليه الفرح وفرحتوا ليه فينا

دم الشهيد اتمسح بس الجراح فينا

فينا مكفينا فبلاش بقي استعباط

يوماتي بفطر أمل واتعشي بالإحباط


محمــد المهــدي

أسيبك لمين ؟؟؟!!!


مهما حاولوا يبعدوني .....و يقولولي عنك كلام

انت مصر نور عيوني ....مهما زاد فيكي اللئام

طيب أهاجر و أسيبك لمين ؟

و لسه صبية و نيلك حزين

و لسه لبكره ماليكي الحنين

أسيبك لميييييييييييييين؟

و مين راح يرد لتاريخك صباه ؟

ويمشى طريقك لاخر مداه؟

ومين من حياته يجيبلك حياه؟

ومين راح يكبر فى وقت الصلاة؟

ومين يبقى مغرم بحبك صبابه؟

و مين يحمى طيبتك يا ام الطيابه؟

و مين يبقى ضله فى شمس الغلابة؟

و مين يبقى شوكة فى حلق الديااابه؟

أسيبك لمين ؟....




محمد عباس ..

خلي بكره احلي


حالفين لنمحي المستحيل

ماهو يا الامل يا مفيش بديل

لو مهما قالوا الليل طويل مفيش فى وقت الجد نوم

خلي بكره احلي قوم بايديك هتتحدي الغيوم

خلي بكره احلي قوم دي الشمس بتطلع كل يوم

قادرين نخلي الضلمه نور

ونعدي من فوق اعلي سور

كل التروس لازم تدور مفيش فى وقت الجد نوم

خلي بكره احلي قوم بايديك هتتحدي الغيوم

خلي بكره احلي قوم دي الشمس بتطلع كل يوم

من انهارده مفيش سكات

و بكره احلي من اللى فات

الحب يعمل معجرات مفيش فى وقت الجد نوم

خلي بكره احلي قوم بايديك هتتحدي الغيوم

خلي بكره احلي قوم دي الشمس بتطلع كل يوم

اول نزيف الأمل حبات ياقوت نوار
احمد وسامي وسيف نبض وعروق احرار
فجر وضمير اندبح طرح الوجع ثوار
*.....*...........*.....*
قالو حقوق الناس ترجع لاصحابها
متقولوا يا اهل لبلد مين الي خاربها
اللي ما ضاق اللضى وللا اللي ناهبها
اللي يجيب حقها وللا اللي يسلبها
عشاق تراب الوطن وللا اللي قلِبها
لا هما هيسلموا ولا هوا هيسبها
ولا هما ملاك لها ولا هوا صاحبها
*.....*...........*.....*
احنا ولاد البلد والارض دي ارضنا
هما اللي باعوا البلد وشربوا من دمنا
قالوا الشموس تنطفي يمكن يعيش هُوا
قفلوا بيبان الوطن وعششوا جُوا
فرعون يقول اضربوا والضرب فالمليان
زغرت النشان وفلح واتفجر البركان
صوت العيال اندبح من قبل ميسموا
لا لحقوا يتشهدوا كانو لسه هيغنوا
ويقولوا بِسم العلم اتمرمغوا فدمه
*......*..........*......*
يا دباحين الوطن , قتلتوا ليه حلمنا
و بإيه يفيد العوض , وشبابنا ضاع مننا
لا تقول بقى مغفره , ولا عفو عند المقدره

اصل الخراب منهم ... وهما اربابه
حزب الدمار حزبهم ... والكل نوابه
يوم ما البِغال برطعِت ...وظهرلنا نابه

فين العداله بقى ... ياللي انتوا بتساوموا
ولا الضمير اتخرس والحق ضاع دمه
يتحاكموا اه كلهم والافعى اولهم
راس الفساد تنقطع هتموت شياطنهم
لكن نسبهم كده !!!
هنشوف غيلان غيرهم

فمفيش مُصالحه بين حيا و بين انكسار
و مفيش مَصالحه بين هزيمة و انتصار
و مفيش ورا ظهرك حرس ولا فيش جرس
ولا فيش جدار
ومفيش عبيد هيقدمولك الاعتذار
فمفيش خلاص
ومفيش قصادنا الا القصاص نبض الشوارع
حسها بيقول
خـــــــــــــلاص
نور الامل والحلم مش هتوقفه طلقات رصاص
ومفيش قصادك اختيار
ومفيش خيار ولسه دايره المعركه
فاهمين امور الفبركه فمفيش حوار

مفيش حوار


ايمان بكرى ..

قــالوا أحـــلام،،،،
الحلم قـــد يتحقـق في يــوم من الأيـــام،،،،
لمــا رآه وقاسى الكثيـر من الظــلاّم،،،
لمـا يكـون هناك الإرادة لطلب العيش بسلام،،،
طبعـاً هو حصــل على الكثيــر من الآلام،،،
ولكن في قلبـه الحب الهيـــام،،،،
وزيــادة عليـــه الغـــرام،،،
وعشقه للأهـــرام،،،
ولوطنـــه الذي قيــل عنه ما قيـل من الكـلام،،،
أحـــلام،،،،؟؟؟؟
نعـم أحـــلام،،،
وستتحقق إن شاء الله في يــوم من الأيـــام،،،،