انفلونزا الضرب صارت تؤرقني !

انفلونزا الضرب صارت تؤرقني !

ياجماعة الخير لاتستغربون من الموضوع ترى اليوم ابي اتكلم بشغلة حقيقة أثرت فيه نفسياً وحتى أسريا ً
بمعنى اني صرت قليلة نوم واحلم بكوابيس من يوم الحادثه ، وجسمي يعرق وحرارتي ترتفع فجأة واحياناً دوار في راسي كني معلقه بمروحه حقت السقف !
مابي اطولها عليكم احسن هي قصة طويله عريضه والعالم الله يمكن لها نهاية ماتسر الخاطر !
اسمعو وياي القصة بس عاد ابي فعلا ً تقولون مشاعركم من داخل << ها من داخل مو شد عضلات !!
الله يذكرك بالخير يابو مروان ماذكرك الا بالشر ههههههههه << اقصد بالمواقف اللي تنشف الدم !!
ويوم اضحك اذكر الحوراني الطيب ومقالاته <<<< شي يوسع الصدر !
المهم :
ب.ش بنت ساكنة بشقة قريبه مني ومتزوجة شاب وسيم وعلى باب الله الكل حاسدنها عاللبس ..الخ ،، تفاجأت صباح يوم الاثنين الاقشر الا بصراخ البنت وتنادي ( يمه لحقوني ...خلصوني اه اه اه ) ،، قلت حشا كل هذا رومنسيه ، وش القصه ؟! ..شكل الموضوع كايد ( يعني بشع ) ! ،، فزيت من سريري ورحت وفتحت النافذه ( ترى الشغله مو شغلة فضول بس شي يعور القلب ) ، قلت : ياساتر استر علينا من الصبح ! ، ورحت وفتحت الباب شوي سمعت صريخ الشاب واشياء تتكسر ( صابني رهاب يمه ) << متأثره بالافلام البوليسيه !!
مالقيت الا البنت تحاول فتح الباب ونص الجيران طالعه والدم سابح بملابسها << قلت الله يغربله وش ذه شققها نتفه نتفه !!!!!! ، مالقيت الا اهلها جايين ياخذونها طلعت ابي استفسر قلت ويش القضية << عاد النسوان ياحبهم حق الثرثره !!
قالت لي وحده : تقول عنها ام زوجها انها وسخه وماتهتم بولدها وانها على علاقة مع شاب وتخونه ،، لطمت خدي وعدلت روحي وقلت ياساتر استر علينا وعليها ، بس عاد مو لدرجة الضرب ، ياخي كلشي بالتفاهم حلووووووو !!
وفي اليوم الثاني مالقيت الا الخناقة ( رجال شابكة ببعض على نفس الموضوع ) ، قلت : ابي افهم ويش السالفه ؟!
اتصلت على فلانه بنت فلان ( الجاره الصحفيه ههه ) قالت لي : يوووووووه مادريتي طلعت القضية اعظم ، زوجها مدمن مخدرات وسكير وراعي سهرات وخرابيط ويبون يرمونه بالسجن ، قلت : اللهم صلي عالنبي وش هالخبر ؟!
طبعاً أنا تفاجأت البنت رجعوها باليوم الثالث مع عايلتها له ولا كأنه شي صاير، قلت : عز الله لهم قلب يعرفون عنه كل هذا ويرجعونه
ورحت وسويت زيارة ( طق طق طق ..) فتحت ام الزوج الباب وقالت لي : نعم ويش تبين ؟! << امبين انها قشره ومجرمه !
قلت لها ابد ابي اتحمد بالسلامه على رجوع البنت ان شالله الامور ترجع لمجاريها ، مالقيتها الا بصراخها : أي ترجع غصب عن اللي خلفوها ، قلت : وش ذه ؟! راعية مصارعه ثيران عالعضلات !!
المهم راحت تسوي الشاي وقابلت البنت وحاولت اتخبي وجهها عني وهي مستحيه ، قلت لها : ياحبيبتي الدنيا ماتخلى من المشاكل ان شالله ازمتك تنحل ،، قالت : ابي اتطلق بس اهلي مو راضيين ! ،، قلت لها : شلون تعيشين مع هالحيوان واهلك يرضوا بهالشي ؟! وين امك ؟! ، قالت امي بالمستشفى جت لها ازمه قلبيه من القصه وانا بريئه وقاعد يطعن بشرفي، واخواتي مؤيدين الطلاق واخواني يبون يذبحونه ،، بس كبير العيله يقول : ماعندنا بنات تتطلق !
قلت : لاحول ولاقوة الا بالله .. صارت تبكي فجأة وانا بكحلها عميتها صرت ابكي زيها ( عظم الله اجوركم عالمصيبه ههه بمزح ) !!
وجت ام زوجها وصارت تقول الها : جهزي الغدى بعد شوي راجع زوجك ماتقعدين تسوين فيها عظامي وجسمي تعبان !!!!! ،، قلت لها : حرام عليكِ البنت جد نص جمالها راح من البوكسات اللي اخذتها من ولدك !
قالت ببرود قولي لي ويش اسوي ؟! ..يعني لازم تتحملوا ..ترى انا مو عاجبني الشغل بس اكيد هي اللي خلت ولدي يدمن عالخرابيط ادري فيها السوسه ، قلت لها استغفر ربك يامره ! ..ترى البنت بنت عز ماهي محتاجه لاي شي منكم سوا الستر .. مالقيتهاالا عصبت بوجهي وقالت لي : اقول مع السلامه ترى شاي مامعنا ! <<< ول عليها عالبخل هههههههههه !!
المهم رجعت بيتي وقلت يمكن الامور تتيسر ، مالقيت الا صراخ البنت وام الشاب تحاول تهديه ، قلت : يالطيف الطف ، ترى حدي وقف قلبي <<< ظنيت اني عايشه بلوس انجلوس عالاجرام !!
ماسمعت الا الباب ينفتح والام تدعي عليه ( حسبي الله عليك ..الله لايوفقك ) << طرد امه من البيت عشان فلوس !!!!!!!!!
وانا اسمع من الباب واولادي تحت تأثير الصدمه خايفين ويسئلون مية سؤال وانا معصبه وماني عارفه ويش اسوي بعمري !!!
صرت اقول ( البنت راحت من راح يخلصها ) .. عاد بقيت ادق على 3 تسعات ههه < اللي خبركم ..
اخاف يجون الدفاع المدني هههه .. !!
يوم شفت الاولاد صابتهم انفلونزا الضرب حاولت اشغلهم بشي وابعدهم عن الموضوع ...ورحت اسوي العشا ماسمعت الا الاولاد كل واحد يخبر الثاني بالواقعه << ماشالله ينمو الخيال من الحين مع انهم مع بعض بس زيادة ثرثره وتعبير عن الذات !!!!!

صار يقول الاوسط : اي شفته سكران وهو ماسك حزام البنطلون و معه مسدس اصلا هو مايحبها ،، رد عليه اخوه الكبير وقال : ماعنده مسدس انت كذاب اصلا هو بياخذ حبوب مخدرات وبيشم بودره انا شفتها بالتلفاز بالاعلان ......... صرت اراقب الحديث واقول : يالهوي الاولاد عرفوا هالاشياء اكيد يعرفون اكثر امممممممم ..بكره يقولون زوجينااا ..
طبعا انا غيرت السكن قلت يمكن الاجواء تتحسن معي << شي يرفع الضغط .

المصدر: نفساني

الله يكفينا شر ازواجنا ... المشكله عامه ياختي وانا اعاني منها .. بس للاسف مااقدر احكي لاحد من اهلي او اهله لاني اخاف الانتقادات وانتي تعرفين الناس وحبهم للحكي .. بس الله يفرجها ويلهمنا الصبر والسلوان

حياك الله ام عبدالله منورة برجوعك

مالكِ إلا الرقيقة يا أم عبدالله يقولون عنها منطقة هادية..
وإلا أقولكِ : حليكِ في المبرز أحسن ترى أهلها سمحيين بالحيل ..

موضوع ضرب الزوجة مصيبة والله وأشوف ان الزوجة الضعيفة الشخصية تتحمل جزء كبير من هذه القضية ،، لإنه بالأساس ليس هناك إمرأة قوية شخصية ،، ولكن هناك رجل ضعيف شخصية ..

أنا لو منها كان ضربته بالملاس على خشمه عشان يعرف أن أمي تعرف تضرب هريس صح ..

موضوع ضرب الزوجة مصيبة والله وأشوف ان الزوجة الضعيفة الشخصية تتحمل جزء كبير من هذه القضية ،، لإنه بالأساس ليس هناك إمرأة قوية شخصية ،، ولكن هناك رجل ضعيف شخصية ..

شو ممكن تعمل لواحد بهذا الحال ؟؟ في مثل هذا الوضع المرأه ضحيه وليست مسألة ضعيفه وقويه

سالي يا ام عبدالله انتِ كيف استطعتي البقاء في البيت لا وتروحي الى عندهم ماشاء الله عليكِ ..

ماودي اقول شي

أخاف تقولين وين كلامك قبل تتزوجين خليني ساكته احسن

لكن فيه خطوط حمراء ماينسكت عليها

قلناها كثيرا أن البحث عنحلول لمشكلات أساسية ورئيسية في حياتنا الزوجية لاتكون عن طريق كتابة المشكلة وسماع آراء العامة من الناس ،، ولكن يجب مواجهة المشكلة مع النفس أولا ثم مع أهل الحلّ والعقد والتريث في أتخاذ حل يرضي الله عزوجل ثم يرضي من أصابه الضرر ..
أما عن الفضفضة في الكلام فهذا تنفيس عن الألم السلوكي والروحي للحالة التي لاترغب بالعلاج أصلا ..

كلامي هذا عمومي وليس لحالة معينة ..

استاذ ابو مروان لو استطاعت المرأه ان تشتكي لسهل الامر اكثر المشاكل الاسريه التزام المرأه بالصمت وتكرار راح يتغير ...تتعلق بامال وهميه والاغلب لانها تعلم ردة الفعل الغير منصفه في كثير من الاسر ..تذهب تشتكي لمين ..؟؟!!

قبل فتره جاءت احدى الجارات تطلب الهاتف واراها تتصل على فلان وعلى الاخر والثالث وتعيد نفس الشكوى وكأن الموضوع اكثر من مره تكرر وبعدها بايام عادة مرة اخرى يعني المشكله كانت قائمه فلمن تشتكي من ينصفها ؟؟!!

مثل ماذكرت الاخت ام عبدالله في القصه هذه المرأه تشتكي لمن ؟؟!!

لذالك تلجأ كثير من النساء للفضفضه حتى تخفف قليلا من معاناتها التي لايشعر بها احد حولها ..

مثل ماذكرت الاخت ام عبدالله في القصه هذه المرأه تشتكي لمن ؟؟!!
لذالك تلجأ كثير من النساء للفضفضه حتى تخفف قليلا من معاناتها التي لايشعر بها احد حولها ..

يا أختي الكريمة إن ردود بعضكنّ عليها ماهي إلا بندول مؤقت لايستأصل المشكلة من أساسها ،، ماتلبث المصيبة أن تعود غدا أو بعد غد ..
نوصي دوما ان تكون المراة قوية جدا في تفكيرها لطبيعة وحجم المشكلة ،، وأن تعالج الأمر بعقلانية وليست بعاطفة مرتبكة ،، والتربية لها دور كبير في تقارب المشكلة مع أصحاب الحلّ والعقد ،، وإشراك أحد افراد السرة شيء مهم في مثل هذه القضايا ،، وما بهدل كثير من النساء إلا السكوت على ضيم الزوج والحفاظ على الأولاد بحجة السمعة وعدم ظهور المشكلة لبيت أهلها أو اهله ،،
يا ماما قيب للصبر حدود كثيرة وليس صبرا واحدا ،، وللمشكلة ايضا حلولا كثيرة وهذه لاتأتى بالفضفضة عن طريق النت ولكن مع أصحاب الشأن للإرشاد عن الحل الصحيح ،، ومن يستطيع المساعدة فيمدّ يده للمساعدة ومن ليست لديه حلول فلا يجتهد بكتابة أحرف قد تضر ولا تفيد صاحبة المشكلة ..
أيضا هذا الكلام بالعموم وليس لمشكلة معينة ..

طيب راحت المرأه واشتكت لاهلها قالولها اتحملي واصبري لاتجيبي لنا مشاكل راحت لاهل الزوج قالوا لها والله يابنت الحلال نحن نعرف ولدنا من زمان اسألي نفسك لي صار هيك ان راحت اشتكت للمحاكم تعرضت للضغوط في سحب المشكله ولفت ودارت ورجعت تندب حظها وتتحسر وتفضفض على الال لتسمع من اللذين يواسونها ولو تأيد ليس شرطا حل للمشكله لان في نظرها اصبحت المشكله مستعصيه ..

طبعا حتى انا كلامي لعموم المشاكل وليس لمشكله معينه والمشاكل درجات ليست اي مشكله قامت تنشرها امام الجميع ولكل من هب ودب ..

في هذه الحالة يا أختي أم عبدالله عليها أن تحتسب الأجر وتعلم أن ما أصابها لم يكن ليخطئها ،، وأن تكثر الأستغفار وتدعوا الباري الكريم أن يأجرها في مصيبتها ويخلفها خيرا منها وتعتبر نفسها مريضة مرض يمكن علاجه بالمداومة والصبر والأحتساب ،، فإذا تخلى عنها الأهل والأصحاب فلتعلم أن خالق البشر لايتخلى عن عباده ولا تأخذه سنة ولا نوم ،،

والعاقلة هي من ترى قريناتها من النساء من أصبنّ بامراض نفسية وعضوية وتوحدية عقلية ،، وتسترجع لله وتقول الحمد لله الذي عافاني مما ابتلاهنّ به وفضلني على كثير منهنّ تفضيلا كثيرا ..
والدنيا دار بلاء للأصحاء ــ فكيف للمبتلين ؟
وفقكِ الله ورعاكِ .. عند هذا الحدّ جاء وقت الراحة والنووووم ،،، للجميع تصبحون على خير

المشاركة الأصلية كتبت بواسطة عضوة جديدة

الله يكفينا شر ازواجنا ... المشكله عامه ياختي وانا اعاني منها .. بس للاسف مااقدر احكي لاحد من اهلي او اهله لاني اخاف الانتقادات وانتي تعرفين الناس وحبهم للحكي .. بس الله يفرجها ويلهمنا الصبر والسلوان

الله يفرجها عليكِ ان شاءالله والله شي يقهر ..بس اهم شي لازم تعرفين سبب العلة قد ماتقدرين وتحلي اللغز اللي مخليه كذا ..

هذه عينة المجتمع الذي نعيشه يا ابو مروان ..

لا اكاد اجلس مجلس نسائي الا وهذه تتذمر وهذه تتسخط وهذه تكتم العبره وووو ..لكن ماباليد حيله سوى الفضفضه على الرغم اني لا انصح بها يعني عليها ان تبحث عن حلول تلجأ الى الله ليصلح الحال لعل الله يحدث بعد ذالك امرا ..

شكرا جزيلا لك ..

المشاركة الأصلية كتبت بواسطة فاتن عسيري

حياك الله ام عبدالله منورة برجوعك

بنورك حبيتي والله مانسيتكم بالقلب ...

الله يحفظك وين متكوني

المشاركة الأصلية كتبت بواسطة أمورة نفساني

ماودي اقول شي
أخاف تقولين وين كلامك قبل تتزوجين خليني ساكته احسن
لكن فيه خطوط حمراء ماينسكت عليها

الله يرزقك بابن الحلال اللي يوسع صدرك ويصونك ويقولك تدللي صبح ومسيه ههه..على طاري الخطوط الحمراء كل واحد بجبهته خط مشابه لذلك بس السعيد اللي يخليه مربع متماسك