طريقي للشفاء التام من الرهاب ونوبات الهلع

طريقي للشفاء التام من الرهاب ونوبات الهلع

بسم الله والصَّلاة والسّلام على اشرف خلقِ الله نبيّنا مُحَمَّد صَلَّى اللهُ عَلَيْه وَسَلَّم

اما بعد،، اتمنى من رسالتي هذه ان تصل لكل شخص يعاني ، لكل شخص احبه الله فإبتلاه لكل شخص ضاقت به الحيله ولم يجد الطريق ، لكل شخص ارهقه الأمر وظن انه عاجز وانه مقيد اليدين .. اود ان اعتذر مقدماً عن اي سوء تعبيري او كتابي قد يحصل و اود ان تعذروني للكتابة بطريقة بسيطة وباللهجه العاميه لعل المعنى يصل للعقل والقلب بطريقة اسهل وفٓعّاله وأغلب القُراء وانا منهم نفضل القراءة باللهجة العاميه لان مايطرح ويكتب هنا هي حالة صحيه وتجربة شخصيه بعيدة عن الاحصائيات الرسميه والنصائح الطبية ، فأنا مجرد شخص عادي لست بطبيب ولا بممارس صحي فقط شخص مر بمشكلة او لنسميه ابتلاء من الله لحكمه لايعلمها الا هو سبحانه وتعالى ، وبعد ان من الله علي بالشفاء وتجاوز الابتلاء اردت ان اشارككم تجربتي الشخصيه مع هذا العارض اللذي يعاني منه بعض الاشخاص وكيف منّ الله علي بالشفاء .. لا اطيل عليكم ولكن اريد ان اوضح بعض الامور قبل ان ابداء بسرد حالتي لكي لا تختلط الامور مع بعضها البعض وتكون عند القارئ فكرة واضحة عن كيفيّة التعافي .. ماتقراءه هنا لا يصف لك اي دواء طبي ولا ينصحك بتجربة اي مستحضر وقد اذكر بعض الادوية المساعدة لي في حالتي ولاكن لاانصحك بتناول اي دواء من غير استشارة طبيه ، وبالاصل انا تشافيت ولله الحمد بدون الاستعانه بأدوية طبيه معقدة .. تنتهي هنا المقدمة الان اسمحوا لي بالكتابة باللهجة العاميه ليسهل وصول معاني الكلمات للشخص القارىء الكريم ..

في البداية انا شخص بالعشرينات من عمري ،، شخص سليم ولا اعاني من شي انهيت دراستي الثانويه والفرحة والمعنويات عاليه .. ما راح اذكر اي شي عن حياتي قبل دخول الكلية لانها كانت طبيعية جداً مثل اي شخص ثاني ما كنت اعاني من اي شي ولله الحمد طبيعي جداً وعندي طموح اكمل دراستي الجامعية ،، وكانت الكلية اللي ابغاها خارج منطقتنا وبعيدة عن اهلي يعني كنت بأغترب عن اهلي عشان الدراسة وما كنت افكر بأي شي غير اني اروح اجرب حياة جديدة ودراسة جديدة اشخاص جدد كل يوم ،، وكل همي اني انبسط واخلص دراستي واخذ شهادة الهندسة ، كانت امنيه من الثانوي .. حصل وانقبلت بالكلية وشديت الرحال وابتدات الدراسة طبعاً للعلم انا قعدت اربع سنوات من اول يوم بالكلية لحد ماوصلت لنوبات القلق والهلع اللي نغصت علي حياتي قبل الشفاء لاكن حبيت اني اسرد قصتي بالتفصيل عشان تكون للقارئ فكرة كاملة عن نوبات الهلع وليش تصير وكيف نقدر نسيطر عليها .. نرجع لحياة الكلية بداءت الدراسة مرت الشهور الثلاث الاول طبيعية ،، وفي يوم قمت الصباح للكلية وداومت ورجعت الظهر ونمت الى العصر وبعد ما قمت قلت بروح اكل رحنا المطعم مجموعة من الشباب اكلنا وبعد الاكل كنا نسولف ونضحك مع شدة الضحك حسيت بشي اعلى المعدة وتحت القلب احساس غريب كانه شي يظغط على القلب تعوذت من الشيطان قلت مافي واستمريت بالسوالف ورجعنا للشقة ولكن الاحساس ماراح حنى الحين بعد العشاء تقريباً الموضوع مايطمن قلت بنام واقوم الصبح ان شاء الله يرجع كل شي طبيعي .. نمت وقمت على الم واحساس بشي ظاغط بقوة على القلب قمت اتحرك وامشي بالشقة شوي لحد ما زال الالم والظغط طبعاً التفسير لهذا الشي هو القولون بعد الاكل صار له انتفاخ وصار يضغط على الحجاب الحاجز اللي بين المعدة والقلب وسبب كل اللي حسيت فيه طبعاً انتهت هذي المشكلة بوقتها لاكن هي كانت مجرد سبب للي بيصير بعد اربع سنوات من نوبات هلع عارف البعض بيقول وش دخل الشي هذا بالنوبات اللي بدت بعد اربع سنوات انا اقولك لا تستعجل وهو السبب اللي خلاني اكتب التجربة هذي لاني قاعد اقراء في هذا المنتدى ومنتديات كثير عن مواضيع الناس اللي فيها هذي المشكلة وماهي عارفه ليش تصير معاهم وماهم عارفين كيف يسيطرون عليها .. نرجع لموضوع القولون بعد ما راح الالم بعد ايام صارت تجيني وخزات جهة القلب استمرت كم يوم وبديت اقلق ، اخر يوم قلت بروح المستشفى افحص طبعاً تخطيط وفحص وقالو لي مافيه شي .. طلعت وقلت مافي شي ان شاء الله، مر تقريبا كم شهر والنغزات تجي وتروح وطبعاً كانت من القولون لانه تجي بعد الاكل والجوع احيانا استمر الوضع هذا لمدة سنتين حياتي فيها جداً طبيعية مجرد وخزات وانتهى الموضوع وكان فيه سبب عضوي اللي هو القولون فقط وهذي شي ما يسبب اي خطر على الصحة .. وبنفس الوقت كان يجيني دوار (دوخة) مستمرة ماكنت عارف من ايش برضو بطبيعة شخصيتي القلقه قلت بروح افحص وفعلاً رحت لعيادة المخ والاعصاب وسويت رنين مغناطيسي على الراس والنتيجه الحمدلله مافيه شي والسبب اني سويت رنين مغناطيسي لان الدوخة طولت معي حوالي 9 شهور بعد ماتطمنت انه مافيه شي خطير بدا يختفي الدوار لحد ما انتهى نهائي ..طبعاً فالسنه الثالثه صارت بعض الظروف مالها علاقة بالحالة الصحيه في الكلية اجبرتني اني اطلع من الكلية واروح لكلية ثانيه بمنطقة ثانيه ظروف صعب اشرحها هنا .. عموماً نقلت للكلية الجديدة بمنطقة جديدة ما اعرف فيها الا كم شخص . مرت الايام وفي يوم من الايام اكلت اكله دسمه ونمت بعدها على طول قمت الساعة 2 بالليل على نبضات قلب سريعة جداً جلست اتعوذ من الشيطان حاولت اهدي نفسي وهديت شوي ورجعت كملت نومي وصحيت الفجر تقريباً على نفس الوضع ضربات قلب سريعه قلت الوضع يبغى له مستشفى انطلقت للمستشفى وكنت خايف بشدة دخلت الطوارئ سوو لي فحص وتخطيط قلب وكل شي بعد نصف ساعة قالو لي مافيك شي سليم بس ممكن غازات وقولون طبعاً هذا تشخيص سليم مو تسليك بس انا ماقتنعت للاسف ودخلت بدوامة ان قلبي فيه مشكلة ومن هالكلام طبعاً الى اللان انا طبيعي ما ابدت قصة نوبات الهلع ولا القلق الاشياء اللي ذكرتها فوق مجرد ذكر اسباب وكيفية اصابتي بنوبات الهلع لاحقاً .. طبعاً رجعت طبيعي كم شهر مافيه نبضات ولا شي بعدين في يوم اكلت ونمت وصحيت على سرعة نبضات القلب كملت نومي وقلت بكرى بروح للدكتور ،، رحت للعيادة قابلت طبيب عام شرحت له المشكلة وانها صارت تجيني بشكل يومي تقريباً ،، سوا لي تخطيط وبرضو مافي شي التخطيط يقول القلب سليم قالي بصرف لك علاج اسمه اندرال هذا يزيل النبضات السريعة اخذت العلاج اكلت منه لمدة شهر المدة اللي ذكرها الطبيب وراحت النبضات بشكل نهائي وقفت الاندرال وقلت الحمدلله طبعاً انا عالجت العرض وليس السبب اللي هو القولون والقولون ماله علاج مباشر لكن بعض الادوية المساعدة وزيادة تنظم اكلك ونومك انا سحبت على الاشياء ذي كلها وماسويتها وهذا كان خطاء طبعاً في موضوع الدراسة انا مستمر بالكلية الجديدة خلصت السنه التحضيريه وبديت بدراسة الهندسة وكان هذا اول ترم لي بالهندسة اكرر لحد الان ما بداءت معاناتي مع الهلع .. مرت الايام عايش طبيعي مالي من الشر طاري ومع التقدم بالدراسة بدت تزيد الظغوط علي من ناحية صعوبة الدراسة، كان عندي مادة تسوي عرض على شاشة الفصل وتقعد تتكلم اللي هو (برزنتيشن ) كنا نسويه باللغة الانقليزيه اول مرة اسوي عرض قدام الطلاب وقفت وانا متوتر بدات دقات قلبي تزيد اول مابديت بالعرض اشد التوتر ماقدرت اتكلم واتلعثم بالكلام واعرق حاولت اكمل العرض على السريع وجلست وانا خلاص متوتر للاخر خلصت المحاضرة وطلعت ورجعت طبيعي ،، طبعاً من هنا كانت الشرارة لبداية نوبات الهلع بس مو على طول ،، عموما جت الاختبارات وخلص الترم،، ابتداء الترم الثاني وزادت علي الظغوط وابتدت المواد تصعب وشايل هم اني تاخرت كثير في الدراسة بدات فترة الاختبارات النصفيه للترم الثاني وكان عندي اختبار الصبح رحت اول ما جلست على الكرسي ولحظة توزيع الورق حسيت بتوتر عالي بدون سبب يزيد وشوي بداء قلبي يخفق بسرعة مدري وش فيه طبعاً هذي اول نوبة هلع رسميه وكانت قاسية لانها جات بدون اي مقدمات وما كنت اعرف وش يعني هلع وكل تفكيري ان فيه مشكلة صحيه وبموت هاللحظة واني فقدت السيطرة على نفسي والعالم بيشوفني بهالحالة المزريه طبعاً وقتها ماحد كان داري عني بس اللي يمر بنوبه هلع يتخيل ان الناس تراقبه ويتوهم امور كثيرة جداً خلال ثواني الهلع وهذا اللي يزيد نوبة الهلع سوء لحد ما ترهقك النوبه وتوقف من نفسها بالغالب ،، قاعد اقاوم النوبة واصبر نفسي استمرت يمكن خمس دقائق وكانت اطول خمس دقائق بحياتي بعدين بديت اهداء شوي شوي لحد ما راحت كملت اختباري وطلعت وانا مرهق واضرب اخماس في اسداس وش اللي صار لي قبل شوي وليش صار ماكنت عارف اي شي غير اني احس اني متوهق طبعاً الاختبار ماقدرت احل فيه زين وهذا زاد الطين بله ،، اختبرت ثاني يوم وكنت ناسي كل شي تقريباً عن اللي صار امس دخلت اختبرت وطلعت كل شي كان تمام وعدا على خير كان باقي عندي اختبارات زيادة رحت الاختبار الثالث اول ماجلست تذكرت احداث الاختبار الاول والشي الغريب اللي صار لي فيه لحد الان ماكنت فاهم انها نوبات هلع ومع التفكير زاد التوتر وجت النوبة دقات قلب سريعة وكتمه بالصدر وتعرق ونفس الكلام استمرت كم دقيقه وانتهت لاكن ماكنت قادر اركز بالاختبار ولاقدرت احل صح طلعت من الاختبار ،، دخلت النت وقعدت ابحث عن تفسير لحالتي واكتشفت انها نوبات هلع لاكن كنت خايف قريت الكثير الكثير من المواضيع لحالات مشابهه ومن المواضيع اللي قريتها فيه طبيب ذكر لواحد عنده نفس الشي انه ياخذ عقار اندرال وقت الضرورة قلت انا قد جربته اول ونفع معي وقت النوم خلني اخذ منه حبه وقت الاختبار الرابع واشوف .. قبل الاختبار الرابع اخذت الحبه ورحت للاختبار كنت متوتر شوي دخلت جلست حسيت ان الامور طبيعيه واني مسيطر على الوضع طول الوقت خلصت الاختبار بسلام وكان بفضل الله ثم بفضل الاندرال خلصت الاختبارات استمر كل شي طبيعي لحد الاختبارات النهائية مع مرور الوقت حسيت ان فيني ثقه وقلت بدخل الاختبارات بدون اندرال دخلت اول اختبار وكنت متوتر وكانت نوبة الهلع بالمرصاد لاني داخل متوتر وزاد الطين بله انه كان نفس المادة اللي صار لي فيها اول نوبة وماقدرت احل بالنهائي ورسبت بالمادة وبرضو رسبت بمادة ثانيه لاني ماكنت قادر اركز باختباراتي ولا بالمذاكرة وبنهاية الترم لقيت نفسي معدلي طايح والكلية نظامها صارم وفصلوني مؤقت لمدة ترم كانت الصدمة ثقيلة علي جداً حلمي وطموحي بالشهادة راح هباء منثور بسبب حالة غريبه غبيه خربطت لي كل شي ماكنت عارف عن الهلع الا انه شي ينغص عليك حياتك ويفقدك السيطرة طبعاً انا اقول هذا الكلام قبل ما افهم ايش هو الهلع وكيف السيطرة عليه ،، لقيت نفسي شخص مغترب عن اهله من اربع سنين عشان بالسنه الرابعه ينفصل من الكلية ! تحطمت نفسياً ومن شدة الندم والحسرة صارت تصير معي اعراض نفسوجسدية بمعنى ان الجسم واعضائه تتاثر بالحالة النفسية السيئة مثلاً يصير معك خفقان بالقلب رعشة بالجسم عدم القدرة على النوم (ارق) كلها صارت معي وماكنت عارف وش فيني صرت لما ابي انام اول ما احط راسي وتغفي عيني افز من النوم واقعد على هالحالة ساعتين تقريباً لحد ما انام ،،طبعاً بعد ما انفصلت من الكلية خلال الترم اللي كنت مفصول فيه كنت جالس في شقتي واهلي ماكانو يعرفون اني مفصول وهذا لحاله ظغط نفسي رهيب .. في يوم من الايام رحت المسجد اصلي دخلت بعد ماخلص الامام اقمت الصلاة وصليت جات جماعة وراي سجدت لحظة السجود جاتني خفقه بالقلب من القولون وانفجعت وتحولت لنوبة هلع قوية كملت الصلاة بالقوة المشكلة كنت انا الإمام موقف لا احسد عليه بعدها زاد معي موضوع الهلع وصرت اخاف اروح المسجد وللاسف صرت اتجنب الصلاة بالمسجد عشان ماتجيني نوبات الهلع ومن هذاك اليوم حق المسجد بداءت معي نوبات الهلع لاتفه الاسباب صرت اخاف من كل شي صرت اخاف من اي شي ممكن يثير نوبة الهلع واشياء جدا بسيطه صارت عندي معقدة مخيفه ومقلقه منها السفر بالسيارة الصلاة مع جماعة كبيرة المجمعات والاسواق الكبيرة كل شي تقريباً وهذا سبب لي حالة يأس تطور الامر لدرجة انه صارت تجيني نوبات هلع من لاشي وهذي كانت المشكلة الاكبر يعني وانا جالس بمكان مو المفترض يقلقني فجاءة القى نفسي بحالة قلق واتذكر نوبات الهلع ثم تبداء النوبة وتنتهي خلال دقيقه او اثنين.. بالنهاية صار اي شي ابغى اسويه واقلق على شانه اصاب بنوبة الهلع بسببه وهذا الشي عقد علي حياتي كثير ..
ااسف على الاطالة بسرد القصة بس عشان يتضح للي يعاني ان الهلع له اسباب والكلام اللي فوق فقط القصة راح اتكلم عن كيفية الشفاء بعد شوي ،

طريق التشافي ،،
انت كشخص مصاب بنوبات قلق حادة واللي هي نوبات الهلع لازم تكون عارف امرين مهمين الاول انك مهما حسيت ان النوبات قويه تاكد انك تقدر تسيطر عليها وتنهيها الامر الثاني ان التشافي من نوبات الهلع ياخذ وقت طويل راح تمر في ما اسميها نكسات لا ولكن تقدر تقول مقاومه للهلع ومحاولته التغلب عليك .. لاكن تذكر انك انت اقوى لانك انت المتحكم بافكارك ومشاعرك ،،

ماهو الهلع او الرهاب؟ الهلع هو بكل بساطة فقدان الثقه بالنفس وبعيد عن التفسيرات الطبيه هو اندفاع عالي للمشاعر والاحاسيس والافكار ،، يعني انت شخص مصاب بالهلع كيف تبداء معك النوبة لو تلاحظ تلقاك حسيت بحاجة غريبه بجسمك كأنه خوف او قلق او شعور غريب ما تقدر توصفه احياناً ثم الشعور هذا ينتبه له عقلك ثم تبداء تفكر فيه انت ثم تبداء تقلق ثم يزيد القلق ثم يبداء القلب بالخفقان نتيجة لزيادة القلق بشكل مفاجاء وكرد طبيعي للجسم يبداء يخفق القلب بسرعة يجيك شعور بالكتمه بالصدر ودوخه طبعاً الدوخة والكتمه مو حقيقه ولازم تفهم هذا الشي لان فهمك ان هذي الاشياء غير حقيقه وانما هي نتيجة القلق الزائد هنا يكون اول طريق التشافي وتقدر تنهي النوبه خلال زمن قصير مرة ،، طبعاً نوبات الهلع غالباً ماتتعدى ثلاث دقائق لاكن بالنسبه للي يمر بالهلع يحسها ساعات ،، هذا تعريف كافي للهلع ان شاء الله ،، ارجع لذكر طريقتي بالتشافي من الهلع والرهاب ،، بالبداية وبعد مرور كم شهر من تكرار نوبات الهلع نفس اي شخص مصاب بالهلع كنت اقول هذا الشي ماله علاج كيف اتعالج من شي مادري وشهو يعني مو مرض عضوي تتعالج منه بالادويه فكنت اقول هذا ماله علاج واني راح اقعد طول عمري عايش مع هذي النوبات اللي تنغص عليك الحياة ،، طبعاً البعض بيقول وش وضع الطبيب النفسي والادويه النفسيه ! راح اقولكم وش سويت بالظبط ،، انا لما شفت الموضوع بداء يزيد ومثل ماذكرت سابقاً اني ومع الاسف وصلت لمرحلة ما قدرت اصلي مع جماعة المسجد عشان ماتجي نوبة الهلع بالصلاة وبنفس الفترة اللي كنت جالس بشقتي وما ادرس (ايام الفصل المؤقت من الكلية) قلت ليش ما اروح لطبيب اعصاب لاني مع الارق اللي كان يجيني وقت النوم كان تجيني فزات اول ما تغمض عيني للنوم عموماً رحت لعيادة الاعصاب واول ما جاء اسمي للدخول على الطبيب مايحتاج اقولكم ان القلق عندي واصل مليون وكنت متوتر واعصابي متنرفزه ( مرحلة ماقبل نوبة الهلع) دخلت على الطبيب حاولت استجمع قواي واشرح له مشكلتي طبعاً سمع كلامي وسألني اسأله عن حالتي ثم وضح لي ان علاجي بالعيادة النفسيه واعصابي سليمه عموماً هذا اللي قاله لي اني ما اعاني من شي باعصابي ولكن هذي اعراض نفسوجسدية يعني اعضاء الجسم تتاثر بالحالة النفسيه وتسبب اشياء غريبه مثل الفزات بالليل والارق والرجفه ،، طلب لي تحويل للعيادة النفسيه وقالي بتلقى علاجك هناك ،، اخذت الموعد طلعت .. جاء موعد العيادة النفسيه وطبعاً قبل لا يجي اسمي كنت متوتر بشدة ووصل اسمي ودخلت وكان التوتر واصل حده شرحت حالتي للطبيب وبعد حوالي الاربعين دقيقه مقابلة وسؤال وجواب قالي عندك حالة رهاب تسبب لك نوبات هلع وانا كنت عارف حالتي بالاساس قبل لا اروح للعيادة لاني شخص احب اقراء عن اي شي غريب يصير لي واقراء كثير كثير عموماً قالي انت مستعد تتعالج بالادوية انا في هذي اللحظة كنت مكسور ومحبط وخايف ادخل عالم الادوية النفسيه قلت له مافي حل ثاني غير الادوية قالي العلاج السلوكي لكن بياخذ وقت ولازم تكون عندك الارادة القوية، بيني وبينكم اخذت العلاج الدوائي اللي صرف لي وهو سيبراليكس وانا ماني مقتنع وعطاني الخطه العلاجية وقلت له مشكور وطلعت ،، صرفت العلاج من الصيدليه ورحت الشقه ،، طبعاً كشخص فضولي قعدت اقراء عن العلاج عن كل شي يتعلق فيه طبعاً العلاج كان عقار سبراليكس عشرة ملغ ،، قعدت اقلب فيه يمين يسار وبعد ماقريت عن ناس كثير تشافو من الهلع بدون ادوية فقط عن طريق المواجهه والعلاج السلوكي قلت خلني أجرب لو مانفع معي ابداء بالعلاج الدوائي ،، حطيت العلاج بالدرج وقفلت عليه وقلت ببداء بداية قويه بالعلاج السلوكي ،، العلاج السلوكي عبارة تعويد النفس على شي تخافه ،، مثلاً انا كانت بدايتي بالعلاج السلوكي عن طريق المسجد انا ما اتكلم عن الدين لا هذا شي بين العبد وربه ، انا اتكلم عن كيفية مقاومة نوبة الهلع اللي تصير لي لما اصلي بالمسجد ،، انا بعد اصابتي بنوبات الهلع كنت اول ما ادخل المسجد واكبر مع الامام للصلاة تبداء افكار القلق تدور براسي افكار ماهي منطقيه مثلاً تجيني افكار ان بعد شوي بينزحم المسجد ثم بتصيبني نوبة هلع ثم ما راح اقدر اهرب لاني اصلي مع جماعة ثم بتستمر معي نوبة الهلع والناس اللي حواليني بتحس اني مو طبيعي وراح انحرج قدامهم ثم شوي شوي القى نفسي حقيقي بداءت بنوبة هلع وقاعد اصارعها عشان تتوقف وخلال المقاومه وبنهاية الصلاة الاقي نفسي مرهق ثم لما يجي وقت الصلاة الثانية احاول اجتنبها واصلي بغرفتي ، وهذي مشكلة نوبات الرهاب او الهلع انها اذا سيطرت عليك تعزلك عن العالم الخارجي وتحرمك لذة الحياة ،، مثال ثاني تجيني نوبة هلع وقت ما ادخل للاختبار بالكلية ، لما ادخل المبنى يبداء القلق يشتغل معاي وتبداء الافكار السخيفة تعبي راسي اني راح ادوخ او اتعب بالفصل وقت الاختبار او حتى راح اصاب بنوبة الهلع نفسها ثم ما ان اجلس على طاولة الاختبار الا وتكون نوبة الهلع قد بداءت وارهقتني عشان اوقفها وضيعت علي وقت الاختبار .. الامثله والمواقف اللي تسبب الهلع كثير ولكل شخص مصاب بالرهاب اوضاع معينه تهاجمه فيه نوبات الهلع وعلى فكرة نوبات الهلع هذي لها اسم علمي وهو الرهاب او القلق المتعمم يعني عام لكل شي يعني تخاف من اي وضع ممكن يسبب لك نوبة هلع ،، مثال اخير انا قبل نوبات الهلع كنت احب السفر بالطائرة وقبل الرهاب كنت اسافر كثير وبدون خوف ورحلات طويلة 10 ساعات بالطائرة بدون ما يصيبني ذرة خوف لاكن بعد الرهاب صار لي موقف وهو كان عندي سفرة على الخطوط الداخليه وطبعاً من وصلت المطار وانا خايف تصيبني نوبة الهلع بالطيارة وللاسف ركبت الطيارة وكنت على غير العادة خايف مرة وما ان جلست على المقعد الا واصابتني نوبة هلع قوية وحاولت اسيطر عليها وكما ذكرت بالسابق اني قد جربت عقار الاندرال لازالة نوبة الهلع مؤقتاً استخدمته بالطيارة وزالت النوبة لان الاندرال يسيطر على سرعات نبضات القلب ويخليك اكثر سيطرة على النوبة لاكن حزنت حزن شديد لاني بالسابق اسافر بالطيارة لدول بعيدة بدون ما اخاف والحين لازم اندرال !
عموماً كل المواقف اللي ذكرتها وسوا احتجت فيها للاندرال او لا ،، احب ابشركم اني سويتها بدون اندرال كلها فإنتظروا شوي لا تستعجلون ،، العلاج السلوكي اللي استخدمته للمواقف اللي ذكرتها مثلاً لمشكلة الصلاة مع الجماعة اول شي لازم تتدرج تدرج شديد بالعلاج السلوكي فمثلاً كنت لما تقام صلاة العصر ما ادخل المسجد بالبداية استنى ركعتين تعدي ثم ادخل المسجد لما اوقف مع الجماعة يجي في بالي فكرت الهلع بس اقول في عقلي لا ما راح اخليها تجي كلها ركعتين مع الامام ثم بيسلم الامام قبل تجي نوبة الهلع وانا بكمل الركعتين الباقي على راحتي ولو جت بقدر اسيطر عليها لاني اصلي بدون جماعة ،، استمريت على هالوضع كم شهر بالبداية كنت احس اني قلق وبتجيتي نوبة الهلع بس بعد فترة حسيت ان الامر صار روتيني يعني بلحق على اخر ركعتين اول ما اكبر للصلاة بقلق شوي ثم بينتهي الموضوع بسلام بدون نوبة هلع وعلى هالحالة لحد ما حسيت اني بديت استعيد الثقه بنفسي شوي شوي ثم بديت اعدل الوضع شوي يعني مثلاً الحق على ثلاث ركعات مو ركعتين واستمريت كم شهر على هالوضع لحد ما اكتسبت الثقه الكاملة بنفسي وعرفت انه مهما بديت بالصلاة مع الجماعة وحسيت بالقلق اكون عارف انه مجرد شعور وقادر اتعامل معه واخليه بحاله ويخليني بحالي واكمل صلاتي كامله مع الجماعة والان الحمدلله اقدر اصلي مع اي جماعة من اول الصلاة بدون مشكلة ولله الحمد المنه ،، يعني خلاصة الموضوع اذا رجعت لك الثقه بنفسك بتقدر تسوي الاشياء اللي حرمك منها الرهاب بشكل طبيعي جداً زي اول وزي الناس الطبيعية .. واعيد واكرر الهلع هو فقدان الثقه بالنفس متى ما رجعت لك ثقتك بنفسك معناته انت تشافيت من الهلع .. ف انا كنت قبل نوبات الهلع واثق اني بدخل المسجد واصلي واطلع بدون اي مشكلة بس بعد نوبات الهلع صرت ماني واثق بنفسي هل راح اقلق او لا ، هل راح تجيني الاحاسيس والمشاعر اللي تسبب الهلع او لا ، هل راح اشعر بدوخة او وبخوف وانا اصلي مع الجماعة او لا وعلى هذا المنوال ،، فالرهاب او الهلع يعني انت مانت واثق من قدرتك على السيطرة على احاسيسك ومشاعرك وخوفك من حدوث امر طارىء ،، ومتى ما صرت واثق ان لو جاتك الاشياء ذي بتسيطر عليها تكون تشافيت وبدون ادوية طبيه بإذن الله ..

مشكلتي مثلاً مع قاعات الامتحانات ،، قبل نوبات الرهاب ما كانت عندي اي مشكلة ادخل الاختبارات واطلع بدون اي مشكلة لكن بعد نوبات الهلع انعدمت عندي الثقه بنفسي وصرت لما ادخل واجلس على الطاولة تبداء معي نوبات الهلع ف كيف تخلصت من هالمشكلة؟ انا اقولكم اول شي كنت ما اعرف كيف اسيطر على قلقي وخوفي وكنت اخاف يصير لي شي بقاعة الامتحان وما اقدر اهرب وهذا اسمه رهاب الاماكن المغلقه، عموماً ببداية نوبات الهلع كنت اخذ حبه اندرال قبل الاختبار فكنت ادخل الاختبار وانا مسيطر على قلقي وخوفي وكنت ادخل واخلص الاختبار بدون قلق عالي صحيح فيه قلق لاكن خفيف ومسيطر عليه مع مرور الايام والاختبارات قلت بدال ما اخذ حبه كامله اندرال ليش ما اخذ نصف حبه وفعلاً بالاختبار اللي بعده اخذت نصف حبه وكانت الامور جيدة خلصت فترة الاختبارات وجات مرة ثانيه وكنت مرتاح نفسياً اكثر لاني قدرت ادخل الاختبارات الاولى بدون ماتيجيني نوبة الهلع فهذا شي مهم وهو (الثقه) بمعني اني بديت استعيد ثقتي بنفسي شوي شوي طبعاً قلت بجرب اخذ ربع حبه اندرال هالمرة وبسبب ان ثقتي كان تتحسن كانت الربع حبه كافيه جداً ،، وانتهت فترة الاختبارات النهائية وبداء ترم جديد واختبارات جديدة وحسيت اني اكثر ثقه وقلت بدخل بدون ما اكل اندرال ابداً وفعلاً اخذت حبة الاندرال ووضعتها في جيبي كاحتياط وتوكلت على الله ودخلت الاختبار حسيت بقلق شوي لكن بسبب ان (الثقه) كانت اعلى بكثير قلت لنفسي قد دخلت اختبارات قبل وحسيت بالقلق وما صار شي ف ما راح يصير شي الحين ولا راح تجي نوبة الهلع لان حتى لو جت بخليها تجي وخلال كم ثانيه بتروح وما بتسبب لي اي مشكلة ولو مرة خرج الموضوع عن السيطرة بستخدم حبة الاندرال اللي بجيبي والحمدلله اختبرت وخلصت بدون نوبة هلع وطلعت من الفصل كنت بنفجر من الفرح بغض النظر عن الاختبار ولكن لاني استعدت شي كبير من ثقتي اللي فقدتها وقدرت اسوي شي كنت اشوفه مستحيل من بعد الهلع ،، تخيلوا يعني قبل كنت اصاب بنوبة هلع كاملة على طاولة الاختبار والان ولله الحمد والمنه قدرت ادخل قاعة الامتحان واختبر واطلع بدون اي ادويه يعني رجعت لوضعي الطبيعي قبل ما اصاب بالرهاب ،،
الاهم بالموضوع انك ما تيأس وتكون متوقع انه بتجيك ما احب اسميها نكسات ولكن اختبار من الشخص الكريه المسمى هلع بعد فترة تحصله يختبرك يجيك فجاءة بس تاكد انك اقوى منه وحط في بالك دائماً ان احساس الخوف والهلع ما يضر ابداً ولو جاك لا تحاول تقاومه خله يسري في جسدك بدون مقاومة لكن عطه مهله دقائق معدودة واصرف انتباهك عنه اشغل بالك باشياء ثانيه حتى لو كانت غبيه شوي مثلاً انا بالاختبار لما احس بالقلق بداء يزيد كنت احاول اشغل بالي عنه احاول اعد الطلاب او احاول استرجع مادة الاختبار او شي يشغلك عن احساسك بالقلق .. واكرر المسألة مسألة ثقه متى مارجعت لك ثقتك بنفسك بتنتهي مشكلة الهلع والثقه عشان ترجع لازم تمارس الشي اللي تخافه لازم تواجهه وتاكد لعقلك انه يفكر غلط لما يخوفك من شي مايسبب اذى لك .. على سبيل المثال الواحد اذا مايعرف يسبح عقله يقوله انك بتغرق لو رحت للمنطقه العميقه وانك ما راح تقدر تعوم لكن مجرد ما انه يحاول ويروح للعميق ويتعلم كيف يعوم خلاص يكون اثبت لعقله انه كان غلطان وانه قدر يعوم وما غرق ! ف انت تقدر تاكد لعقلك انه ما فيه شي يستدعي القلق اذا جلست على طاولة الامتحان وانه حتى لو تعبت او صار لي اي شي بقدر اطلع من القاعة بدون مشكلة واذا الامر مو مستاهل اني اطلع عشانه كنوبة الهلع بثبت لعقلي اني اقدر انهيها او حتى بالاساس ما اخليها تجي لان صار عندي استراتيجيه اني اشتت ذهني وما افكر فيها وحتى لو جت ما راح تضرني وبتنتهي خلال ثواني ..

مشكلتي مع الطيران كمثال وبعد ما اصبت بنوبات الهلع
صار عندي خوف من الطيران ،، خوفي مو ان الطيارة تطيح او يصير فيها مشكلة لا بالعكس انا عاشق لعالم الطيران وعارف ان الطيارات بإذن الله امنه جداً ،، لكن خوفي من ردة فعلي لان بعد ما انعدمت (ثقتي) بنفسي صرت اخاف تجيني نوبة هلع بالطيارة وحدث فعلاً كما ذكرت بالسابق بعد ما بدأت معي نوبات الهلع كنت في رحلة داخليه وعلى غير العادة اول ما ركبت الطيارة وجلست في مقعدي بدأت افكار القلق تنهال علي من كل مكان ( بتجيني دوخة، احس بدوخة ، قلبي بيدق بسرعة، احس بكتمه ، ما اقدر أتنفس ، بتجيني نوبة هلع ) وبالنهاية مع شدة القلق جتني نوبة الهلع ضربات قلب سريعه وكتمه بالنفس وتعرق وطبعاً كلها اشياء عادية رد فعل الجسم لكمية القلق الهائل ، كانت معاي حبوب الاندرال حاطها احتياط اكلت حبه بسرعة راح القلق راحت نوبة الهلع ارتحت نفسياً كملت اقلعت الطيارة وكملت رحلتي بدون مشاكل لكن ماكنت راضي عن نفسي لاني سافرت كثير بدون قلق وهلع ف قلت لنفسي لازم اوجهه قلقي ،، بعد بفترة حجزت رحلة وقلت باخذ معي حبوب الاندرال لكن ما راح اكلها الا اذا فلتت الامور من يدي ، رحت المطار جلست انتظر الرحلة كنت قلق شوي جاء الباص حق الطيارة ركبت الباص زاد القلق شوي بس كنت اطمئن نفسي ان معي حبوب الاندرال لو زاد القلق باخذ حبه ، المهم نزلت من الباص وركبت الطيارة زاد القلق حبه قلت لنفسي انا سافرت عشرات المرات على الطيارة وما جاني قلق وخوف ف ليش يجيني الحين وبديت اشغل عقلي عن التفكير بالقلق نفسه وقعدت اسولف مع مضيف الطيران ولما جلست بمقعدي شبكت سماعة الراس وشغلت قران وقعدت العب لعبه بالجوال ،، طبعاً ما اكلت حبة الاندرال وقلت ما راح اكلها المهم كنت شاغل بالي بالقران واللعبه وتناسيت القلق ،، اقلعت الرحلة ووصلت ونزلت وكنت الحمدلله في قمة السعادة اني قدرت ارجع للسفر بالطيارة بدون نوبات هلع وبدون اندرال حتى ونفس النظام سويته في رحلة العودة وكانت ناجحه جداً ولله الحمد والمنه.. خلاصة الموضوع ان القلق اللي يسبب هلع بالنهاية كل ما تفكر فيه وتشغل بالك فيه يزيد ويسبب لك نوبة هلع وكل ما تتناساه وتشغل بالك بشي غيره تلقاه يقل يقل لحد ما مايروح حتى لو كان الموقف اللي انت تسويه كان يسبب لك هلع مثل ركوب الطائرة ، المولات التجارية، المدرسة والكلية والاختبارات ، الصلاة جماعة ، التحدث امام الجمهور ، والكثير كل شخص وله حالاته الخاصه وكلها تشترك في شي واحد وهو انعدام (الثقه) ممكن انت تكون قبل ماتصاب بنوبات الهلع من الاماكن المغلقه مثلاً ثقتك قوية وما كنت تخاف من انك تجلس بمكان مغلق بس بعد نوبة الهلع صارت ثقتك بنفسك ضعيفه وصارت تجيك نوبات الهلع ،، العلاج عن طريق المواجهه او التعويد او العلاج السلوكي تقدر تستخدمه مع اي نوع من انواع الرهاب وبس تكون استعدت ثقتك انك قادر تسوي هالشي بدون ماتجيك نوبة هلع اعرف انك تشافيت ،، في حاجة ابغى اتكلم عنها وهي نوبات الهلع اللي بدون مثير يعني نوبات هلع تجي وانت جالس بغرفتك في بيتكم او مع اهلك او على جلسة طعام المقصد انه النوبة اللي تجي وانت المفترض انك تكون بأمان ، هذي امرها بسيط فقط لو حسيت انها بتبداء معك خلها تبداء لا تحاول تقاومها لا تحاول انك تمنعها بالعكس خلها تجي وتطمن وتأكد انها بتقعد دقيقه او دقيقتين بالكثير وبتنتهي مرة مرتين ثلاث عشر بعدين بتصير شي عادي وبتضحك على نفسك تقول كيف كنت معطيها اكبر من حجمها لانك بعد ما تتعود عليها بتصير تنهيها لا إرادياً يعني خلال ثانيه او ثانيتين تصاب بخوف فجاءة بس عقلك خلاص صار ( واثق) انه انذار خاطئ وبينهيها بدون ما تعاني منها ..

ارجع اكرر واقول اذا تحسنت بإذن الله من الطبيعي انك بعد فترة تهاجمك نوبة قلق او هلع لكن اعتبرها مجرد مزحة من الهلع يقولك فيها يوم من الايام كنت شايل همي والحين انت اقوى بكثير ،، وتأكد انك بتكون افضل من ناس كثير لانك عرفت وش يعني هلع ورهاب وانك قدرت تتغلب عليه ومتى ما عاودك ما راح يضرك او يعطل حياتك لانك قدرت تنتصر عليه ..

عارف ان الاغلب يعتقد في عقله ان القلق والهلع شي صعب انك تتعالج منه خصوصاً اللي عانوا منه لفترة طويلة
لكن انا وغيري كثير ولله الحمد قدرنا ننتصر عليه ، صحيح عانينا منه لفترة طويلة لكن بالنهاية انتصرنا عليه ،،
كتبت قصتي وتجربتي وطريقتي بالتشافي من الرهاب والهلع عشان اطمئن كل اللي يعانون من هذي المشكلة انه في أمل للعلاج وترجع طبيعي مثل اول واحسن،، والله اني احزن اذا شفت احد يعاني منه وانقهر اذا وصل لمرحلة انه يخرب حياته ويعزل نفسه عن الناس وينحرم يعيش حياة سعيدة ،، ويحزنني لما اقراء قصص اللي يعانون منه والمشكلة انهم وصلوا لمرحلة اليأس لانهم ممكن ماقدروا يفهمون طبيعة مشكلتهم وانها مجرد ازمة (ثقه) والمشكلة ان فقدان (الثقه) بالنفس عند اللي يعانون نوبات الهلع جاتهم بشكل مفاجاء وهذا اللي يزيد الطين بله لكن اقولهم لاتيأسون الموضوع بسيط بإذن الله ..

بالنهاية اختم بثلاث نصائح
الاولى اذا كنت قد ذهبت لطبيب نفسي وصرف لك علاج ومستمر عليه لا تتوقف عن العلاج تقدر تمارس العلاج السلوكي مع العلاج الطبي وبالعكس راح يجيب نتائج اسرع واحسن بإذن الله بس بشرط انك تحط في بالك ان العلاج الطبي يعتبر مساعد للعلاج السلوكي بمعنى لو تقول انا شخص بتعالج بالادوية فقط انا اجزم انه ما راح يفيدك فلازم تلتزم بجدول علاج سلوكي تواجه فيه مخاوفك وقلقك ،، اضرب لك مثال ، انت بسفينه وسقطت بالبحر وماتعرف تسبح اعتبر البحر هو مخاوفك وقلقك وجاك واحد ورمى لك سترة نجاة اعتبر سترة النجاة هي العلاج الدوائي انت بتتعلق بسترة النجاة ما راح تغرق بس لو ما بديت تجدف بيدينك ورجولك ما راح توصل للسفينه ،، الخلاصة العلاج الدوائي مجرد مساعد للتغلب على الهلع لاكن العلاج الرئيسي هو المواجهه وتحقير مشاعر الخوف والقلق ،، مثال اخر زي الدراجة الهوائية ( السيكل) اول ماتتعلم لما كنت صغير كان فيه عجلات صغيرة يمين ويسار عشان ماتطيح ولما تعلمت كيف تسوق استغنيت عن العجلات الصغيره ،، الخلاصة العلاج الدوائي عبارة عن العجلات الصغيرة اللي تساعدك لحد ما تقدر تتغلب على الهلع والخوف وتفك العجلات (تترك الدواء تحت اشراف طبي )..

والامثلة كثيرة ،،

الان اعتقد الاغلب صار عنده صورة واضحة عن القلق ونوبات الهلع وكلنا عرفنا انها شي تافهه يروح بالتهميش واضرب على نفسي اكبر مثال لاني في يوم من الايام كنت اقول مستحيل اتخلص من نوبات الهلع لكن ولله الحمد طلعت غلطان لاني بعد ما فهمتها وعرفت وشلون اسيطر عليها بفضل الله استطيع اجزم واقول اني تشافيت بنسبة 100 ٪‏ ولله الحمد حتى انه احياانا اقلق شي بسيط وهذا شي طبيعي عند كل الناس بس الفرق لاني كنت مصاب اول بنوبات الهلع كنت اكبر الموضوع حبتين بس بثواني اعرف اسيطر على القلق قبل يصير نوبة هلع وهذا بالاساس طبيعة الانسان السليم يمر بقلق بس لانه ماقد صار له هلع ينتهي القلق هذا بدون مشاكل وبالاحرى هو مايعرف انه قلق اساساً ف عشان كذا انا أوكد اني تشافيت 100 ٪‏ ولله الحمد وبإذن الله كل من يقرأ موضوعي هذا يستفيد حتى لو الشيء البسيط مع اني اجزم لو انه فهم الهلع زي ما انا فهمته بيتشافى ميه بالميه وبيضحك على زمن النوبات وحزنها ..

طبعاً احب ابشركم انه زي ما كانت القلق ونوبات الهلع سبب لمشاكلي الدراسية بالكلية ابشركم اني بعد ماتغلبت على الهلع تخرجت ولله الحمد وهذا بإذن الله يعطي دافع للاشخاص المصابين ويدرسون او يعملون انهم ما يخلون القلق والهلع يأثر على مجال دراستهم او عملهم بالعكس يحاولون انهم يخلون العمل والدراسة نقطه مهمه للقضاء على القلق والهلع زي ما سويت انا ، كنت اقول مدام اني قدرت اجلس بالمحاضرة العادية وبدون هلع ومسيطر عليه بقدر اني ادخل الاختبار بدون هلع وهذا اللي صار وايضاً كنت اقول مدام اني قدرت اجلس بالاختبار ساعتين بدون هلع وسيطرة تامه عليه ف بقدر اني احجز طيارة و اسافر زي ما كنت اول اسافر بدون خوف وعلى هذا المنوال ، حول نقاط ضعفك لنقاط قوة تهاجم فيه النوبات وتسيطر عليها مع الوقت بتكون انسان اكثر من طبيعي وبالعكس بتكون عندك حصانه مستقلبيه ضد القلق ونوبات الهلع وبتكون بمكان الطبيب للأشخاص اللي ممكن تواجههم في حياتك مصابين فيه ..

الموضوع كُتب على فترات طويله ف أسف اذا كان غير مرتب او فيه تشتيت للافكار بس حاولت قدر الامكان اني اوصل فكرتي للجميع بشكل مبسط وسهل ..

أخيراً وليس اخراً اختم الموضوع بالتمنيات للجميع بالشفاء بإذن الله و أي استفسار انا راح احاول ارد على كل الاستفسارات .

والسلام عليكم ورحمة الله وبركاته

المصدر: نفساني

مرحبا بك

نفس حالتي ونفس الاعراض مع اختلاف الظروف .. كانت اول نوبة هلع كنت في عمرك بالضبط .. عموما الفرق بيني وبينك انك ما اخذت ادوية وانا اخذت ادوية ومن يومها واهنيك ماشاءالله على هالقرار .. عموما انا من بدأت الدواء والامراض تتهاجم علي من رهاب الى قلق الى اكتئاب الى خمول واختلال انيه الخ

الفتره الاخيره قررت وبعون من الله ترك جميع السموم هذي وجعل الدماغ يستعيد طبيعته

لا اراكم الله مكروه

بدوون ادوويه لن تتعالج لانك تحاول تخدع نفسك ولن تطول وترجع مثل اول

المشاركة الأصلية كتبت بواسطة طيب الفاال

مرحبا بك

نفس حالتي ونفس الاعراض مع اختلاف الظروف .. كانت اول نوبة هلع كنت في عمرك بالضبط .. عموما الفرق بيني وبينك انك ما اخذت ادوية وانا اخذت ادوية ومن يومها واهنيك ماشاءالله على هالقرار .. عموما انا من بدأت الدواء والامراض تتهاجم علي من رهاب الى قلق الى اكتئاب الى خمول واختلال انيه الخ

الفتره الاخيره قررت وبعون من الله ترك جميع السموم هذي وجعل الدماغ يستعيد طبيعته

لا اراكم الله مكروه

اخي انت قادر بإذن الله انك تتشافى انت بس اعقد النيه وتوكل على الله وتأكد ان طريق الشفاء مو سهل وبتمر بنكسات واحباط بس استمر لان قوة العلاج السلوكي المعرفي تكون بالاستمرار وعدم الإحباط وبنفس الوقت طالما انك تستخدم ادوية طبية راجع طبيبك وتفاهم معاه على انك بتوقف العلاج تدريجي وتبداء العلاج السلوكي المعرفي لان ضروري يسوي لك خطة طبية لوقف العلاج انتبه توقفه مرة وحدة .. وفقنا الله وإياك ومتعك بالصحة والعافية

المشاركة الأصلية كتبت بواسطة ابو ياسمين

بدوون ادوويه لن تتعالج لانك تحاول تخدع نفسك ولن تطول وترجع مثل اول

الله يهديك يا ابوياسمين المفروض انك ترفع المعنويات مو تحطمها ،
طيب اقولك شي لعلها ترتفع معنوياتك انت اول ،، تراني كاتب الموضوع هذا عام 2017 تقريبًا بمعنى اني تشافيت ولله الحمد والمنه عام 2017 والى الان منذ 4 سنوات والى الابد بإذن الله ودعت القلق ونوبات الهلع الشديدة وامارس حياتي طبيعي جداً جداً بدون اي ادوية ولا شي وهذا دليل انك اذا عرفت في قرارة نفسك انك تشافيت خلاص تشافيت وردت لك الثقة المفقودة ايام الرهاب والقلق والهلع .. اللي صار لي اكبر دليل انه الشفاء اللي راح تحصل عليه شفاء حقيقي وليس مؤقت الحمدلله بس ضروري ترجع الثقة لنفسك وتحارب فكرة القلق من منشأها.. عافنا الله وإياك .. شكراً لمرورك

صامدة رغم المحن معجب بهذا

حمدالله على سلامتك يا خوي عقبالنا يا رب

[QUOTE=سبحااان الله;1408952] مبرووك عليك بالشفاء وماشاء الله عليك اللهم اشفي كل من يعاني
حبيت اقولك شي انه قصتك اللي حكيتها من بداية المرض حتي تطور معك مثل قصتي بالضبط كل التصرف اللي كنت تسويها سوته انا حتي بالصلاه وبكل شي سويته انا وكانك تتحدث عني انا مو عن نفسسك مجرد شفت القصه ارتحت وتحمست وان شاء الله بتعافي بعد بس في اعراض ماذكرتها انت او انه ماجاتك وحبيت اسالك لكي اطمن اكثر 1هل كان يجيك قلة صبر لو رحت مكان اخر ماتقدر تجلس فيه نافي صبر2هل كان يجي لك نبض متنقل في جسسمك والثالث والاهم هل يجي لك تشنج خاصه من الارجل وتحس نفسك متشنج او متوتر وماترتاح لهاذ التشنج يعني مثلا انت جالس في كنبه ماتقدر تجلس مرتاح تحس انك متحمل للكنبه ماهي تحملك او تجلس ماسك في الكنبه مثلا انت راكب بالسياره ماتقدر تجلس بالسياره وانت مريح جسسمك الي ماسك بالحديد او بالكرسي وكانك بتطيح لومامسكت اتمني تجاوبني علي هذا والله يحفظك ويزيدك من فضله لدرجه اني امسك بالجوال احس بتوتر ومومرتاح

[QUOTE=عمر الردماني;1413865]

المشاركة الأصلية كتبت بواسطة سبحااان الله

مبرووك عليك بالشفاء وماشاء الله عليك اللهم اشفي كل من يعاني
حبيت اقولك شي انه قصتك اللي حكيتها من بداية المرض حتي تطور معك مثل قصتي بالضبط كل التصرف اللي كنت تسويها سوته انا حتي بالصلاه وبكل شي سويته انا وكانك تتحدث عني انا مو عن نفسسك مجرد شفت القصه ارتحت وتحمست وان شاء الله بتعافي بعد بس في اعراض ماذكرتها انت او انه ماجاتك وحبيت اسالك لكي اطمن اكثر 1هل كان يجيك قلة صبر لو رحت مكان اخر ماتقدر تجلس فيه نافي صبر2هل كان يجي لك نبض متنقل في جسسمك والثالث والاهم هل يجي لك تشنج خاصه من الارجل وتحس نفسك متشنج او متوتر وماترتاح لهاذ التشنج يعني مثلا انت جالس في كنبه ماتقدر تجلس مرتاح تحس انك متحمل للكنبه ماهي تحملك او تجلس ماسك في الكنبه مثلا انت راكب بالسياره ماتقدر تجلس بالسياره وانت مريح جسسمك الي ماسك بالحديد او بالكرسي وكانك بتطيح لومامسكت اتمني تجاوبني علي هذا والله يحفظك ويزيدك من فضله لدرجه اني امسك بالجوال احس بتوتر ومومرتاح

بدايةً اعتذر عن التأخر بالرد كنت ناسي المنتدى الصراحة المعذرة مجددًا..

الله يبارك فيك ويعجل بشفائك التام بإذنه تعالى ،

بالنسبة لملاحظاتك برد عليها وحدة وحدة ان شاء الله :

اول شي بخصوص الصبر القليل وانك ماتقدر تجلس بمكان واحد وممكن تتوتر او تتضايق هذي طبيعية ومرت علي بكثرة لانها علامة قوية لدرجة القلق اللي تمر فيه تزداد خصوصًا بالاماكن الجديدة والطلعه من البيت مثلاً للسوق او المدرسة او المسجد اي مكان جديد يسبب قلق اللي ينتج عنه هذي الحالة عدم الصبر والتوتر فوضعك طبيعي وليس شي غريب او جديد.

العلامة الثانية : النبض المتنقل بالجسم ، عشان اريحك هذا كان اكثر شي مسوي لي قلق وكنت اتوتر منه ويجي على جميع مناطق الجسم فعليًا لكنه شي تافهة وبسيط لان اكتشفت انه مامنه ضرر وبيني وبينك هو موحود للحين وشي طبيعي مرة صحيح خفيف النبض ويجي على شكل نوبات بس طبيعي مرة ومتعايش معاه لابعد حد ولا همني لانه مجرد توتر وارتجاف بعضلات الجسم مامنه اي خطر ابداً بإذن الله، وطبعاً هي عرض قوي للقلق ولو تلاحظ انها تزيد احياناً مع القلق وتخف بوقت الراحة النفسية ولما تكون مشغول بشي ثاني فلاتشيل هم ابدا ابدا تعايش معها انا متشافي لي قريب ال 5 سنوات ولا اهتم لاي شي يحصل لانه خلاص صارت اشياء عادية بالنسبة لي ومش مقلقه .. توكل على الله وشد الهمه وبإذن الله بيتحسن وضعك كثير مع الوقت الموضوع ياخذ وقت هذا اهم شي لازم تحطه ببالك .

خلنا نسمع منك بعد فترة علمنا وش يصير معك انا كل فترة بدخل المنتدى واشيك على الردود ..

حفظك الله

المشاركة الأصلية كتبت بواسطة حور العليلي

حمدالله على سلامتك يا خوي عقبالنا يا رب

الله يبارك فيك اخت حور ، بإذن الله الكل قادر بس يشتغل على نفسه ويحارب القلق والرهاب لانها والله العظيم حرب فعليه لاكن بدون اسلحة حرب داخلية بين العقل والروح والمنطق ، العقل يتخيل والروح تتأثر والمنطق يعرف انه هذا غير صحيح وماكان ابدا بيوم من الايام صحيح ، الرهاب والقلق والتوتر مجرد وهم وفكرة اذا حاربتها وانتهت ترجع انسان طبيعي بكل ماتعنيه الكلمة من معنى ،، عجل الله بشفائك خلينا نسمع منك بعد فترة ..

حفظك الله

ياحبيي الناس تختلف زي المرض الوراثي لازم ادويه اذا مان احد الابوين مريض لاكن الي جاته من موقف معين اوصدمه معينه علاجها سهل جدا واسف لم اكن اقصد احباطك ولاكن هذي الحقبقه ولي عشريت سنه على الادويه بسبب الوراثه وحسب كلام الدكتور لازم ادويه مدى الحياه

الف شكر لعل الكل يستفيد