|
و الله ما أدري وين أوجّه و وين أروح
الكون ضيقٍ من الجهات الأربعة أحبابي اللي بين قلب و بين روح أقفوا و خلوني بوسط المعمعه الصدر يا هندا كما المرجل يفوح و العين يا هندا لهيبه تدمعه يا هند و الله ما بقى عندي طموح و لا بالدواء بأمراض جسمي منفعة يا كثر صدقان السوالف و المزوح و يا قل صدقان الظروف الموجعه إقبال لأحزاني .. و لأفراحي نزوح همٍ يباشرني و الآخر يتبعه و إن البنآدم لو يعيش بعمر نوح يا قرب ساعة مولده من مصرعه https://www.youtube.com/watch?v=dYB8rvxFzvs |
اقتباس:
زين لقيته الحمدلله طيب محمد ليش ودك تخفض جرعة السيروكسات دام وضعك على الجرعة 37 طيبة أبفهم يعني عشان الهوس و الهلاوس زايدة على جرعة 37 و الا إيش ؟ مردها تزين يالجنرال ما عليك و الليركا إن شاء يفيدك كثير و يهدّيك الله يسمح دروبك و أمورك مردها تزين مردها تزين و الله يكتب لك الخير الجزيل و يوفقك و يسعدك يا محمد الغالي |
ما عليش أبنام
قبل ما أنوم هاكم الإهداء يا رب يعجبكم ماجدة الرومي- كلمات https://www.youtube.com/watch?v=02zIthIEauE |
|
اقتباس:
السلام عليكم الحمد لله على كل شيء وخير إن شاء الله بالتوفيق دائما |
السلام عليكم صباح الخير على الجميع نتمنى لكم يوم جميل بالتوفيق دائمــا |
هلا اخوي ابو نجلاء نورت المنتدي ..والحمد لله على سلامتك ..انا الحمد لله الركبه في تحسن بس العركوب عجزوا يلقون له طب الله يفرجها يارب والحاله النفسيه دمار ضيقه وخوق ولي اسبوعين راجعه لدواء الاكتئاب برينتلكس بس امس واليوم ضيقه وخوف شديد وانا اقول يمكن البدايه يبي له صبر ...وكان الليركا مريحني بس حسيت اني بديت ادمنه وتركته وتعبت مره وقلت بدل ماتخبط مره ليركا ومره ترامادول للالم ابترك كل شي وارجع لدواء الاكتئاب يمكن يفيد بس مدري متي يبدا مفعوله صح ويعدل النفسيه شوي ....
|
صحيح الليركا ممتاز للقلق ويعدل المزاج شوي بس اليوم اللي مااخذه اتعب وقلت ماابغي ادمنه لانه يسبب رجفه بالاطراف مع استمرار اخذه والله يعين بس ويشفينا جميعا ...
|
غمضوا عيونكم
راح أقولكم بشارة جدا حلوة إفتحوا عيونكم اقتباس:
شكرا إدارتنا الحصيفة و الكريمة بيض الله وجيهكم |
النور نورك و الله يا أختي الغالية نجمة الفلك
هلا و حياك و بياك يالغالية إلا أنتي الحمدلله على سلامتك و زين شفتك أنتي غالية و عزيزة على قلوبنا و الله يعينك الله يعينك الله يعينك على ما تلاقينه و يرزقك قوة على قوة و تواجهين أوجاعك بكل إبتسامة و صبر و رضا يا رب يا كريم ما أدري وش أقولك و الله و مقدر حالتك كثير و ياليتني و الله إستشاري و أعرف علاج للعرقوب و أخلصك من وجعه و ألمه لكن كوني على يقين إن الله راح يكتب لك و يقدر لك مالا تحتسبينه من المحبة و الأجر و المنزلة العالية الرفيعة و إن عظم الجزاء من عظم البلاء راجع لك يا نجمة الفلك و ما ودي أروح عنك و الله لأن جاني ظرف حاليا هلا بكم جميعا إخوتي أبو علي صالحوف و قطرات الندا و شعاع الروح و فهد صالح و ولد عطا و الجنرال راجع لكم بإذن الله قريب بس عطونا أخباركم مشتاقين لكم كثير الله يسمح أموركم و يدبرها على أفضل مما تتوقعونه و لا يخطر على بالكم |
هلا والله ابو نجلاء
37.5 مغ من سيروكسات حلوة بس انا ابي اوصل ل 25 مغ لاني اشكو من التبلد في المشاعر |
اقتباس:
هههههههههههه الله يسعدك ابو نجلا فطستني ضحك والله الله على ابو هيثم له وحشه والله الله يوفقه ويستر عليه |
اقتباس:
هلا وغلا ابو نجلا بشرني عنك ي بعدي وين الغيبه وين كنت يافتى الذهبي الله يسمع منك نتزوج كلنا وانت اولنا :) بس انا لا اخفيك عن قريب بخطب انشاءالله لولا مرض ابوي والسفر معاه في الخارج يمكن كنت خاطب منذ مبطي الله كريم |
أسلم عليكم بأكمل و أحلى و أزهى تحية
تحية أهل الإسلام تحية أهل الجنة السلام عليكم و رحمة الله و بركاته نجمة الفلك يا رب يالطيبة يكون البرنتلكس عليك برد و سلام على جميع أحوالك بس بسأل أنتي جربتي قبله علاجات غيره أو لاا ؟ الليركا حلو تقننينه وقت الأزمات الله يصبرك يا نجمة الفلك ما عليه يا أختي الحمد لله إن لنا رب و العاقبة جنة و خلود فيها و حياة الدنيا ما هي إلا رمشة عين ( و إن البنآدم لو يعيش بعمر نوح :: يا قرب ساعة مولده من مصرعه ) تأثرت لمصابك كثير و حاس بخنقتك سواء من الناحية النفسية أو الناحية الجسدية و ودي و الله أشيل عنك أوجاعك كلها بس اللي يهون الوجع في حالتك إن لك رب ، و المصابين قلوبهم أشد قرباً إلى [ الله ] من أي أحد سواهم و كل ما عظم المصاب فهي دليل على عظم المحبة من الله فتكفين لا تضجري أنا لا أخفيك يالغالية عندي حالة و هي إني ما صرت أترقب أي فرج كائنا ما كان و صرت أتقبل لأي شيء سيء بل الأشد سوادا و سوءا ، إلا سوء الكارثة بـ ( التفكير بالإنتحار القهري )! و أعرف هذي الحالة من إيش و لا أحب أن أذكر الإجابة عليها إلا بكلمة [ تعبت ] و أعذر نفسي بتعبها و ليعذرني رب البرايا رب العالمين فهو أعلم بنفسي من نفسي ..! فهو خالقها و مسويها ! نجمة الفلك يا رب إن الخنقة تتلاشى كليا و يفرح قلبك بتلمس هذا التلاشي على قلبك و عقلك [ و بشر الصابرين ] |
اقتباس:
https://4.top4top.net/p_13614jo8x1.jpg هلا بأخوي يا مية هلا كيف أصبحت اليوم أدق لك تحية و تستاهل يا لجنرال ولد زايد الله يخليك لنا مشكلة كبيرة و عويصة التبلد في المشاعر تهرب من إكتئاب المزاج و تطيح بإكتئاب المشاعر ! :/ أنت و الله يا محمد أسطورة بالمشاعر و شهادتي مجروحة بذا الشي و يا رب ترجع لك مشاعرك مثل ما كنت و مثل ما تحب بإذن الله و لا على الله شيء عسير إهداء أنا عليل الدهر و الحزن مدهالي سقيم صرف الزمن و الحال منسمي أصرخ بوادي به الناس و تقل خالي وشلون أوصل نداي البكم و الصم الناس يا كثرهم رٍجلي و خيّالي مير البلا الكيف ضاع بكثرة الكمِ ... بيه تعب بيه عتب https://www.youtube.com/watch?v=twem7bgPlnI |
اقتباس:
إن شاء الله إنه مستانس و مهتني هذا أهم شيء و صراحة فرحنا بزواجه الله يسعده و نعمة كبيرة الزواج و ما تقدر بثمن إي و الله مو حنا اللي مبهذلين و بهذلتنا البهاذيل بأم عينها و قطعتنا أربع أربع الله يعينه و يسعده أخونا أبو هيثم و يا رب تلحقه يا شعاع الروح هههههه ما عليه يقولون كل مطرود ملحوق .) تصدق و الله و الا بلاش خلني ساكت :/ دوم دوم الضحكة يا شعاع القلب و الروح الله يحفظك يا بعد راسي أنت https://2.top4top.net/p_1361u9ol22.jpg ربي إني مستصرخ فيك يا نعم الولي و النصير أرزقني صفاء المزاج و روعته ! أنفخ الروح فيني يا ربي من جديد و إنزع مني ما يؤلمني و يؤلم أحبابي .. إنزع ما يؤلمنا كما تنتزع الروح من الجسد ! لا أراكم الله كريهة أنتم و من تحبون ! |
اقتباس:
لله دركم و در صمودكم و قوتكم و أخوتكم يا بعد راسي أنت و أبوك الله يشفيه و يهيء له أسباب الشفاء في القريب العاجل أقديت و الله بمخاواته و فرج الله قريب يالغلا و يا رب يفتح لك بركاته يا خالد و يحقق لك أشياء ما خطرت على بالك من أمنيات من أفضلها و أحسنها و أبركها و الجميع يا رب الله يزوجك الله يزوجك الله يزوجك و حلو إن عندك إرادة لهالشيء و فرحتني و عجبتني الله ييسرها لك و مقدما ألف ألف مبرووووووووووووووك و الله يجمع بينكم في خير يا رب أنا يا خوي خالد بعد إذن شعاع الروح لأني قلت له خلني ساكت طيب بعلمكم بسالفتي في الغياب تخبطت و خربطت في العلاج عشان السمنة و خوف الإصابة بالسكر و لما تركت الزبركسا و كان في ظني اللارجكتيل و التربتيزول يكفون صارت حالتي باقيه عليها شوي و أصير زومبي صرت أقعد بالمجلس و أفتح ملفات في مخي و أنقهر ثم أطلع من البيت و أمشي من البيت للمحطة للديوانية و أسوي حركات بيدي و حالتي كسيفه و أنا أمشي ما أطالع بأحد أبد مع إن في ناس حولي بس ما أطالع فيهم أبدا شوفي قدام رجلي بس المهم كنت ماشي و الدورية تصفط عندي و خذوا بطاقتي و فتشوني ثم ركبوني بالدورية قلت لهم وش فيه قالوا بعدين تعرف و قاموا يقطون كلام و حطوا الكلبشات بيديني ودوني للمركز ثم ودوني النيابة العامة [ هيئة التحقيق و الإدعاء العام ] حققوا معي بعدين شلوني على مستشفى الأمل قالوا تحليل حللوني بعدين دخلوني ع الدكتور علمته الصحيح قال طيب تتنوم قلت لا و الله ما أريد التنويم أبد قلت له أنا طيب قال طيب في أحد يكفلك و يآخذك و الا ببتنوم بالقوة الجبرية كلمت أخوي قال طيب جايك جاء مع أبوي أبوي حاول فيني بالتنويم مع الدكتور و أنا رفضت بكل برود قلت لهم برجع لعلاجي و ألتزم فيه ما أحتاج للتنويم أبدا المهم طلعت من السالفة ذي الحمدلله من دون تنويم رحت البيت إلا أبوي و أخوي يآخذوني على جنب قاموا عطوني سالفة هم يشوفونها إنها حل و أنا في داخلي منها غصة الله أكبر ما أحد يعرف وش اللي بداخلي و أنا ما عرفت نفسي أصلا قالوا بكل سذاجة ... يا عالي حنا بنشتريلك إبل و غنم ترعاها و تولدها و تمشي وراها و تتاجر فيها و من هذا الكلام ! قاموا على راسي مسويين نفسهم كبار الإستشاريين و قالوا يا عالي صدقني إن اللي فيك راح تنساه و تنسى شيء إسمه مرض نفسي و تكب العلاجات بس بشرط يكون عندك إقتناع لهذي الهواية :( إيه أقنع نفسي أربي غنم و إبل و أنا ما عندي أصلا إرادة أنتم دايم تجون في الوقت الضايع ! أقول في نفسي أنا فاضي لخرابيطكم ذي يعني بدال ما تشوفون إن أخواني الصغار سبقوني و تزوجوا و الواحد منهم معه ذرية و أنا صرت العم و الخال و للحين عزوبي منتف كان تعملون خير فيني و تخططون لتزويجي ، تقولون هذا الكلام الفاضي هذي آخرتها حسبي الله و نعم الوكيل أهم شيء قالوا لي عن إقتناع هههههه لا و الله و لا واحد بالمية مقتنع دام راح حبيب الروح فعلى الدنيا السلام ! ما ندمان صدكني https://5.top4top.net/p_1361npc0p1.jpg |
الشامخة الرائعة و الطيبة الغالية
( الأمّ ندى ) قطرات الندا يا قطورة إيش أخبارك و علومك كيف هي نفسيتك من زمان عنك و الله و متلهفين لسوالفك البلسم إهداء لك أيتها الأم العطوف https://www.youtube.com/watch?v=nc3xSZEBh4A |
اقتباس:
العتب على النظر و التركيز لا تؤاخذني إي و الله كل ما يكتبه ربك خير حتى لو كان في منظور البشر شر و بلاء دون العسل لسع النحل ولا فيه ورد بدون شوك ! اقتباس:
الله يوفقكم كيف أجواء الجزائر الحبيبة كيف الأوضاع عندكم نحن على مشارف الأجواء الشتوية بإذن الله :) |
|
لا تأمنن غدرَ الزمان العادي
من بعد نازلةٍ بخير عمادِ هيهاتَ أنْ يصفُو الزمان وخَلقه سقمَ الكرامُ وصحّة الأوغادِ https://6.top4top.net/p_136185c4l1.jpg |
اقتباس:
ي لبى والله ي عالي مشكور على دعواتك لي ولك بالمثل يبعدي الله يابو نجلا كل هذا اجل تكفا الا العلاج فاهم تركته خوفك من سكر من ناحيه السكر استشير دكتورك عنده حل ولابد بيلقى لك البديل ابوك واخوك معذورين مايحس بالنار غير واطيها صدقني انا اغلب العرب كذا عبالهم البر والحلال علاج لكل الامراض العضويه والنفسيه وحتى الروحيه هههههه تفكيرهم طاق ريوس للصين عالي ورب البيت انا انقهرت وين تفكيرك وين تفكيرهم انت تفكر بزواج وذريه وتربي عيالك هم تفكيرهم تربي حلال عالي تبي الحقيقه انا اشوف فيك زوج ناجح وحنون للزوجك وخاصه عيالك ازوجك وانا مغمض عالي تكفا طوف والنصيب محد يقدر يمنعه لا انس ولا جن كله على الله عسى الله يرزقك كل ماتمناه ويشفبك ويسعدك بالدنيا والاخره |
اقتباس:
السلام عليكم الحمد لله إنك بخير ونرجو من الله ان يرزقك الصحة والعافية والزوجة الصالحة والذرية الطبية الأجواء عندنا كل منطقة بجوها.. أمطار على رياح على جو معتدل والأوضاع عادية جدا.. ولا تنسى الدعوة مفتوحة لزيارتنا في أي وقت بالتوفيق دائما |
السلام عليكم
ارحبوا جميع يالله حي الوجيه الطيبة ابونجلاء لا تنساني ب بالمجاهيم والوضح اقدر شوفتهم مع اني افضل الغنم عليهم احس انه في تربيتهم رحمة المهم انه اخوانك مولين مدري يمكن فيوزهم انفصلت اجل ترعى ابل ههههه ما تدري يمكن جالسين يوم خميس وفله وجوهم حلو وناقشوا قضيتك يا رجال لا اهل ولا اصحاب يقدرون مثلك تماما اهلي معطيني اشكل كبر خشمي لنا رب رحيم تدري ما عاد افكر بالزواج ولا الوظيفة ولا الفلوس ببس افكر كيف ارد الصاع صاعين لكل واحد ما قدر وضعي |
|
مادمت تنشد يارفيقي .. عن الحال
مالي على .. كتمانها عنك .. حيله الصبر عن بوح الاحاسيس .. قتاّل والبوح في بعض المواقف ، فشيله لو كل مايطري على البال ينقال ماكانت أحس ان الثقيله .... ثقيله ابطيت اكافح ضيقة البال بالبال وادفع بلا .. هاجوسها كل .. ليله |
يا عالي .. ماني عال .. لو صحتي عال
شفني من الصدمات نفسي عليله اشيل حملٍ .. لو يشيلنه .. جبال الله ، ومانه .. غير تصبح نثيله |
ملعون ابو الرخوم الى صارو علينا رجال
لا ولو الحالة والماساة كان الرخوم رخوم ورجال رجال |
هلا شباب اليوم رجعت لسيروكسات بجرعة 25 مغ حبة واحدة
والدكتور يقول حبة 25 مع حبة 12.5 مع احترامي يا دكتور لو فيك خير كان عالجتني 12 سنة عندك انا من اليوم دكتور نفسي ماني مستخدم الا حبة واحد 25 مغ اما عيشة وترجع الاحاسيس والمشاعر ولا نقصت الجرعة اكثر بعد انا بايع نفسي خلاص راح راح العمر طز طز |
|
هذي صوره بمنآسبة اليوم الوطني .. http://www.mysmiley.net/apple/apple_...smiley.net.png تخليداً لذكرى مشروب سَـن كَـولآ .. |
اااااااااااااااااااارحب يا صديقي سن كولا
اخباااااري الحمد الله تخبر لا عمل ولا اي شي ملل وطفش غير كذا ما فيه انت اخبارك وش مسوي بدنياك |
سوف نبقى هنا كي يزول الألم
سوف نحيا هنا سوف يحلو النغم |
ااااااااااااااااااااااااااااااااااااهداء الى امي الغالية جدا جدا جدا
فضلكم يا والديَّ عمني حتى اللجم كل هما قد اصبنا زادكم بالطبع هم ان كل ماجنينا من جهودكم نجم والدي ياخير عون كان لى عند المحن انت يامن تملكين جنة تحت القدم كل ألفاظ لسانى كل شكر قد رنم اجمعوا كل المعانى من عُراب او عجم لا توافي شكركن لاتجاوز العدم |
رغم كيد العدا رغم كل النقم
سوف نسعى إلى أن تعم النعم سوف نرنو إلى رفع كل الهمم بالمسير للعلا ومناجاة القمم |
|
|
اقتباس:
والله يعينك اخوي والله حالتنا صعبه وحنا هنا نواسي بعض ينفع نوعا ما والله يفرح قلبك ويسعدك على شعورك النبيل فعلا اخ عزيز |
للأسف جتني حالة صمت رهيب و حصة من الذهول و أفكار و دعاوي :/
يا رب خلصنا مما نعانيه و صب علينا راحة البال و هدوءه و صلاحه بصراحة تمنيت الليل يتمدد وقته و يطول ياليتني جني كل ما جاء النهار أهرب منه و بغضمة عين أكون في الجهة الأخرى من العالم يعني تقدرون تقولون ألاحق الليل مثلا الحين عندنا طلوع النهار فأهرب من عندنا ثم أروح لعندكم تقولون وين أقولكم بين عيونكم و مساء الخير أمسي بالخير عليكم عشان أثبت لنفسي و أثبت لكم إن الليل باقي مستمر ما إنتهى https://www.youtube.com/watch?v=Ofbl1pPb-r8 |
| الساعة الآن 05:25 AM |
Powered by vBulletin® Version 3.8.11
Copyright ©2000 - 2024, vBulletin Solutions, Inc.
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2024 DragonByte Technologies Ltd. Runs best on HiVelocity Hosting.
المواضيع المكتوبة لاتعبر بالضرورة عن رأي الموقع رسميا