مرحبا باختي صامده يالله حيها اهلا برجعتج

ابو نجلا لا والله مارحت لا لكوريا ولا روسيا بس ودي اروح كوريا لولا هالخوف من الطياره اللي حاني وكبلني .. كنت في بريطانيا وابشرك ايه حجيت يارب لك الحمد الله ينولك حجه مقبوله ان شاء والله وتقضيها وانت ماشي على رجيلاتي وركبتك طيبه ومتعافيه قل امين

صامده حبيبتي الله يفرج كربك وتعدين النوبه وتعدين هالمرض بكبره مافي شي بعيد عن الله .. فرجي عن مسلم وبيفرج لك ربي اسعي بكل الطرق والله مايضيع سعي مخلوق . طمنينا عنك

اهلين ابو نجلاء انت االي اخبارك
انا مرضت وجاني وسواس كل شوي اوسوس بمرض
مره اقول اشبه وجهي منتفخ شكل معاي كذا ومره اتوهم ان يدي متغير لونها واقول شكل فيني كذا هههههه
ماقول غير يااااللله الشفاء من عندك يارب

لوليتا كان عندي موعد اليوم مع الدكتور النفسي يقول مشكلة الناس القلقين تركيزهم على اجسادهم ٩٥ بالميه ويراقبون اجسادهم وينسون العالم الخارجي تماما وكل ماراقبو كل مازادت الاعراض وكأنكم تنادونها .. صحيح كلامه انا من اصحى وانا اترقب وافكر حتى باظافري 🤣

الـسـلام عـلـيـكـم

لابـأس عـلـيـكـم طـهـوراً ان شـاء اللـه

اسـألُ اللـه لـي ولـكـم جـمـيـعـاً

الـعـافـيـه والأجـر والـسـعـاده والـتـوفـيـق

🌹

اخوي بدر اللهم امين لنا ولك يارب

حياك يا شاكر حي الله طلتك

يا رب يا بو حميد ما أستغني عن دعواتك يالغالي و دعواتكم جميع :( يا رب يشيلون الورم أنا اللي مقروشني الورم كل ما جتني نهمه و همة إني أسوي تمرين عقبها توجعني الركبه و تغدي مثل الصبه و أهون و أنقهر ، الله يبعدها عن الخشونه و الإحتكاك يا رب يا كريم

موعدي في 23 / 8

يعلم الله الطيحه و الفجأة قاهرتني يا بو حميد و من إيش من مستشفى الأمل أبوي قالي نشتكيهم قلت وش الفايده السالفة اني قلت لهم عندي أفكار إنتحاريه و سالفة التفكير بالإنتحار يحتاج تنويم لو ما كان بالطوع فراح يكون جبري و أنا ما ودي بالتنويم أبد ودي بعلاج سحري يوخر فكرة الإنتحار

و الله لو ما طحت بالشارع كان الحين مدهوس تحت عجلات أحد السيارات و التريلات إما ميت و الا مشلول لاني كنت أركض و ودي بالضفة الأخرى من المستشفى و لا راح توصل الضفة الأخرى الا لما تقطع الشارع و شارع أبو حدريه معروف ما يفتر من السيارات كنت أركض ركض الجن ما همني شي لأن التفكير في عواقب الهروب حينها مشيوله من راسي و صرت عقبها أضرب راحتين يديني ببعضهم من الندم !! تصدق حاليا أشوف الفخذ صخفت صارت صخيفه عكس الأخرى

اعوذ بالله بس

أنت بشر يالذيب كم وصل رصيدك الحالي من بيع السبح :)

إي و الله بسمه غايبه ما هي بعادتها و كذلك شاطي الله يبشرنا بعودتهم سالمين غانمين




عليكم السلام بالأمير حياك يا خالد الغالي

الدنيا ما تدور دوايرها الا ع صنفين من الناس اللي هم الشجعان والطيبين

يا رجال انا أشك ان الأدويه النفسيه تسبب ضعف و تلين في العظام مو بالدرجة اللي تدخل تحت مسمى مرض هشاشة العظام لكن الأدويه تلين العظام ما كنت كذا قبل ما أستخدم الأدويه كانت عظامي قويه و من دخلت في دوامة الأدويه ضعفت

عليكم السلام مرحبا بك يا صامدة الحمدلله على سلامتك و ما تشوفين شر يالغاليه الله يخفف عليك و يهون عليك

صامدة أضيفي مع أدويتك مضاد صرع و شوفي اللي يضبط معك أي واحد منهم و داومي عليه

الله المستعان و يشفيك و يقويك و ينصرك و يسعدك

ما في شي يخوف من الطيارة قولي دعاء الركوب و السفر و تطمني
ما شا الله الله يكتب أجرك بالحجه و عقبالي على ما قلتي الله يجزاك خير آمين يا رب العالمين

اللهم آمين الله يقويها صامدة و الله كلنا الشفق على حالتها

هلا لولو الغاليه أخباري على حطة يدك يا قميلة ركبه و مزاج و نفسيه في الحضيض مرة و مرة طبيعي شكلي بحول من أبو نجلا إلى أبو ركبه :)
أنتي شلونك عساك طيبه كيف الطبخ معك أنا من قبل شوي صاحي قلت يا ولد لولو زعلانه مني و الا إيش و الحمدلله رديتي :)

الله يشفيك و يقويك و يسعدك ما تشوفين شر



عليكم السلام

هلا بك بدر الله يسعدك يالغالي و يرزقك الشفاء العاجل و القوة و النصر و السعادة

أنت أذكر تستشيرنا في الذهاب لمستشفى الأمل أو لا

أنا أشد على يدك نعم إذهب للأمل و خل واحد يكفلك يطلعك عقب شهر و إن شا الله تشوف العافيه

إعتبرها نزهه مرة في العمر و إن شا الله تضبط أمورك

هزت غصون الشوق بالنوح ورقا

و أنا سريت الليل بنوحها و اسهرتني

قبل الفجر و الناس بالنوم غرقا

سامرتها بلحونها و ابتلتني

طرّت علي وقت مضى راح شرقا

أثر الليالي بالفرح خالفتني

يا ورق زدتي جرحي العام حرقا

و أنا همومي من زمن محرقتني

أضيق بعض أحيان من القاع و أرقا

فوق الجبال الراسيه لا أخنقتني

كم مرة عديت في راس مرقا

من جمرة بأقصى ضميري كوتني

هذي هي الدنيا على كل طرقا

ما أحدٍ سلم منها و أنا اللي زوتني

يا ورق كانك تسجع الصوت فرقا

ما جاك من فرقا المحبين جتني

https://www.youtube.com/watch?v=cdiNpanRFUI

صباح الخير ..
عسى اخباري تفيدكم لو واحد بالميه جبت لكم خبر ومدري ليه حسيت انه فيه شي من الصحه لاني جربته ..
فيتامين بي قرأت تو تقرير انه نقص هذا الفيتامين يسبب عدم توازن وتنميل في الاطراف وضعف والاهم انه يسبب اكتئاب واضطراب نفسي .. قريت بالمنتدى كثير هالمعلومه لكن مدري ليه اليوم حسيتها حقيقه لان قبل مايجيني الهلع ماكنت اخذ فيتامين بي وبعد ماجاني صرت اخذه يوميا على شكل حبوب لي اربعه شهور واحس ان النوبات تقريبا اختفت وبقى الاكتئاب المتوسط وحسيت اختفى التنميل الحمدلله .. لكن تذكرت موقف كمان والدة صاحبتي كانت تعاني من اكتئاب وبكاء مستمر وهي كبيره بالسن وكنا نحسب انه خرف قام الدكتور اعطاها فيتامين بي ابر جرعات مكثفه وبعد كم شهر رجعت وش زينها الحمدلله .
عاد يوم قريت تو وتذكرت هالاشياء قمت ابحث بمواقع اجنبيه وابحث ليش فيتامين بي يساعد في الاكتئاب ؟ لان فيتامين بي يختص بالاعصاب والاعصاب متصله بالمخ يقوم يحسن اداء الاعصاب والكيمياء في المخ لذلك يتحسن من هو مريض بالاكتئاب لكن الفيتامين مو زي الادويه النفسيه بسرعه تبين النتائج لا . الفيتامين يشتغل على فترات اطول ويعالج خلايا واعصاب ويبيله وقت .
اللهم اقسمت عليك بقوتك وضعفنا انك تشفي كل مريض وتفرج كرب كل مهموم انت ولي ذلك والقادر عليه وحدك يا الله

ابو نجلا صبحك بالخير ..
تمنيت لك منتجع صحي نفسي لمدة شهر في سويسرا يشرح الصدر وتطلع منه كن ماجاك هالاكتئاب ابد بحول الله 😀
تو شفت اعلان عنه ودخلت اشوفه قلت هذي جنة الارض كله اطباء ومعالجين نفسيين يشخلونك شخل لين تطيب ليت عندنا مثل هالمنتجعات لا ومن زود الزين على قمة جبل اخضرررررررر وهالورد وهالانهار تحتك والبحيرات وووه بس

جـزاكـم اللـه خـيـر جـمـيـعـاً

واسـعـد ايـامـكـم

وفـرج هـمـومـكـم

قـبـل سـاعـتـيـن وتـحـديـداً بـعـد اذان الـفـجـر بـقـلـيـل

جـاتـنـي بـدايـة اعـراض الـهـلـع

وحـسـيـت بـخـوف شـديـد

لـكـن الـفـضـل للـه مـن قـبـل ومـن بـعـد

انـنـي تـمـالـكـت نـفـسـي

وبـدأت تـدريـجـيـاً تـخـف الأعـراض

لابـد مـن الـعـلاج الـسـلـوكـي

عـاجـلاً بـإذن اللـه .

المحبة نعمة
والإطمئنان على أحوال الأحبة رحمة
‏قد نقصِّر قليلاً ...
وقد تلهينا كثرة الهموم
ولكن يبقى القلب لا ينسى الأحبة...
وتبقى الذكرى الجميلة هي أفضل ما نردّدها
جعلنا الله و إياكـم من أهل المودة والقبول في السموات والارض ...
‏آمين يارب...

صباحكم شفاء وعافية يا غوالي
❤🌹

ما تشوف شر يا بتال و الله يقويك و يشفيك و ينصرك على الهلع

و إياك يالغالي 🌹

صباحك جنة يا قمر المنتدى و شمسه و ظله و فيه

صدقتي و ما حصل منك قصور يالغاليه لكن حضورك يعلم الله ان له رونق خاص جدا فلا تغيبي الا في الشديد القوي

الله يحفظك و يسعدك 🌼🌹