محمد تأكد اانك بتطيب في يوم من الايام بس الانسان يحز بخاطره ان اجمل سنين عمره تروح كذا لكن بيعوضك ربي بشي اجمل بهالدنيا صدقني ..
السحر والعين هذولا مذكورين بالقران محد يقدر ينكرهم حسبي الله على من يتسبب بمضرة انسان .. يا الله وربي اسأل نفسي اقول الواحد مايفدر يضر نمله هذولي كيف يطاوعهم قلبهم يلعبون بحياة ومصير انسان ؟ ماقال الرسول ان السحر من الموبقات المهلكات الكبائر من شي قليل . صدقني ربي ماراح يضيع صبرك ابد ربي يشفيك ويرفع عنك ما ابتلاك فيه يارب ويرزقك السعاده من حيث لاتحتسب

صاااااااااااااادقة يا قطرات

اذا ماتت العقيدة في الانسان صدقيني يفعل كل شي هذولي ناس ماتت عندهم العقيدة والنخوة مات الاسلام من دمهم وروحهم

ما اقول غير حسبي الله ونعم الوكيل

شكرا قطرات على مشاعرك الطيبة

السلام عليكم

أسعد الله جميع أوقاتكم اخواني أخواتي الكرام

يارب تكونون دوم بخير اخوي محمد و أبو نجلا و متارجح و قطرات الندا و الجميع

يارب يرزقكم بسعادة و رضا و نعيم ينسيكم كل ما مررتم به

الله يرفع عنك و يكتب أجرك اخوي محمد و اخوي أبو نجلا

ايه المسكن هذا ممتاز بس لا تكثر منه او تأخذه فترات طويلة لأنه يؤثر على الكلى سلامتك


بالنسبة القطة البيضاء ما تتخيل قد أيش أثرت فيني ، أول شي هي صماء ما تسمع لأن عويناتها كل وحدة لون و هذولي عرضة لحوادث السيارات الله يستر عليهم ، كيف أجل لا صارت قطة مستوردة من النوع المنزلي ، هذا النوع تجي قوائمه الأربعة قصيرة بعكس البلدي اللي نشوفه بالشارع ، تخيل أن بسبب القوائم القصيرة ما يستطيعون القفز للحاويات لالتقاط الطعام المتعفن و يموتون صبرا بالجوع ، غير أن شخصيتهم الخوافة تخليهم يتجنبون الاحتكاك مع قطط الشارع البلدية و لا يقدرون على الاقتراب من أي طعام طايح حوله قطط أخرى

حسبهم الله و نعم الوكيل في المستغلين عبدة الدرهم و الدينار اللي يجيبونهم من البلاد الباردة و ينتجون فيهم هنا في الحر و شعورهم تقل بطانيات ما يتحملون اجواءنا و لا حرارة الأسفلت الملتهب و يبيعونهم

حسبهم الله و نعم الوكيل في اللي يشرونهم صغار و يشجعون التجار المجرمين ثم لا كبروا رموهم بالشوارع مع أن الرسول صلى الله عليه و سلم نهى عن بيعهم و شرائهم

تدري أبو نجلا إذا شفت هذا النوع مرمي بالشارع ضميري ما يخليني أتركه للعذاب لأني أدري أنه يبي يموت جوع ، و الحمد لله يوم كتب لي ربي إني اتبنى كذا واحد منهم حصلته قدامي مرمي

تدري أنهم ضعوف لا جاء الظهر ما يطيقون أنفسهم من شعورهم الكثيفة و أنواع الكآبة لين أشغل لهم المكيف و يقعدون يتبطحون و يتقلبون على البلاط البارد ضعوف ، لذلك لازم تحلق شعورهم كل صيف

للحديث بقية

و جزاك الله خير يوم إنك توليت الضعيفة ، هذا خير ربي ساقه لك لأنه يبي يفرج عليك مثل ما فرجت عليها

و حاول مع ابوك الله يهديه أنه ما يشوتها و ذكره بذنبها و الواحد مو ناقص ذنوب ، تدري أن ركلهم يسبب لهم نزيف داخلي و مع الوقت يموتون

وش يجي حجمهم اللي ما يتجاوز كيلوين ثلاثة جنب حجم رجل الإنسان اللي بعشرات الكيلوهات


أنت تدري أن الأمانة تسعى حتى إلى حرمانهم من الحاويات ذات الطعام المتعفن و تموتهم صبرا عن طريق مشروع وطن بلا حاويات و بدؤوا يطبقون المشروع بالرياض ، بحيث انهم يسلمون كل بيت حاويتين صغار وحدة للطعام و الثانية لغير الطعام من القمامة الصلبة ثم تدور السيارات على البيوت تأخذها منهم كل صباح

لهم الله فوق أنهم صابرين على الطعام المتعفن اللي يقتلهم ببطء

و غير أن السنوريات من اللاحمة اللي غذائها اللحوم ، و الناس ما ترمي إلا العظم و الخبز و الخضار و الرز مما لا يؤكل بالنسبة لهؤلاء الضعوف

سبحان الله كنت أسمع و أنا صغيرة قصص من الجدات أن فلان من جماعتنا انعمى لأنه قتل قط عند حمامه يوم شافه يتبع غريزة البقاء و الجوع و أكل حمامة ، و حجتهم أن القط بوه جني او أنه جني في صورة قط ، و فلان الثاني انشلت أطرافه لنفس السبب ، و الثالث مرض و مات لنفس السبب

و السبب الحقيقي هو حوبة الضعوف ، إذا المرأة اللي قتلت القطة استحقت النار في الآخرة ، كيف أجل يستكثرون على أنفسهم عذاب الدنيا المتمثل في العمى أو الشلل او المرض في الدنيا

كله بسبب أنانية و تكبر الإنسان ، يتوقع أن ربي ما راح يعاقبه عشان قط ضعيف او روح مسكينة لا تستطيع الكلام او الشكوى بينما ربها يراها و يسمع انينها و شكواها

جميلة مشاعرك تجاه الحيوانات يا عيون و يدل هالشي على طيبتك و نقاء روحك و رحمتك

لا تشعرين بالذنب او الحزن الشديد كل ما شفتي قط بحالة سيئة لأن هذي سنة الكون اختي الغالية .... الكائنات الضعيفة تموت و تبقى الأقوى و هالشي يفيد المخلوقات و يقويها ...و مقابل كل مخلوق يموت ينولد غيره و هذي سنة الحياة للحيوان او البشر

اكيد ان الحيوانات المعذبة تحزننا و نحاول قدر استطاعتنا نساعد ...لكن في النهاية ما راح نقدر ننقذ الكل

الله يكتب اجرهم اختي عيون

قطرات وينها ؟ خايف تكون فهمتني غلط و قلقت او تضايقت ؟؟

هذا انا متأرجح 😄
لاتخاف علي سألت الدكتور بالواتس اب وقال مافيك الا العافيه .. ابثرت هالدكتور الله يجزاه خير 😅

لازم و انا اخوك تكسرين حلقة الوسواس و تبدين تتركين طلب التطمين

اذا شعرتي فكرة مقلقة تلح عليك لا تستجيبين لها و تروحين تطلبين التطمين ولا تتعمقين بهالوسواس و بنفس الوقت لا تهربين منها ....الحل الاسلم انك تخلينها تمر ...يعني تقولين لنفسك ( اللي كاتبة ربي بيصير) و تصرفين تفكيرك لشي ثاني

غالباً الافكار الوسواسية الملحة اذا ما استجبنا لها ما تطول اكثر من 15 دقيقة و اذا رجعت مستقبلاً ترجع بصورة اضعف

حسب قراءتي ...من اكثر الاساليب المفيدة للقلق و الوساوس هي التأمل meditation ...طريقة قريبة من التنفس لكنها اقوى تأثير و تستمر من 10 الى 60 دقيقة و في اليوتيوب شرح تفصيل لها و هي جداً سهلة و مفيدة

https://youtu.be/58kPiNcaqu8

جديد سناب أحمد عمارة عن الطاقة

وش الحل مع ذا القلق و الهلع و توقع المكروه ؟

معقول الواحد يا إنه يرجع للبروزاك او غيره و ينام عشرين ساعة من الأربع و عشرين

او يظل كذا باقي عمره

معقول ما في عقار ما يسبب غيبوبة أو زيادة وزن


كل شي واظبت عليه فترة من الفيتامينات التعويضية و كبسولات سانت جونز و لا أدنى تحسن


أخاف أفقد الوالدة لا قدر الله او أهلي او أبنائي بالتبني

ذي الأيام بسبب مرضهم ماني قادرة أنام ساعتين على بعضها ، حتى الجوع ما أحسه و أن حسيته أتغصص الأكل كأني ابلع سم ، القلق و الخوف و تسلط أفكار الفقد أعوذ بالله ما تفارقني

متأرجح التأمل لاتتوقع انه سهل وبتدخل بسرعه في الاسترخاء سنه كامله وانا اسوي ميديتيشن لكني اتململ وما تسترخي يا اني ماعرفت تقنياته صح يا اني قلقه بزياده بس بحاول ارجع اسويه ان شاء الله ..
عيون حبيبتي عندي صديقه بجده لكنها اكبر مني بكثير لها ٢٠ سنه على مضادات الاكتئاب ومابقى شي ماجربته تقول ريحني شوي سيروكسات لكنه لعب فيني بالنوم والسمنه تقول وغيرته الى ويلبترين لها سنه الحين تقول جميل وخفيف ونزل وزنها ورجع نشاطها ماشاء الله .. لو ماجربتيه قولي لدكتورك اقترحي عليه لعل الله ينفع به .
سلامتك حبيبتي وجعلك ماتفقدين غالي يارب

الله يبشرك بالخير متأرجح ويسعد قلبك يارب.
انا مستمره على العلاج السلوكي وابشرك نوبات الهلع خفت كثير بس القلق عامل لي عدم توازن وارتباك لكن ان شاء الله راح اقدر اسيطر عليه بحول الله وقوته .
اولا واخيرا هي تجارب تصادفنا بالحياه وان شاء الله انها خيره وبعدها يسرين مو يسر واحد لي ولكم ولكل مهموم وتعبان يارب

هلا بك قلبي قطرات ، سيروكسات سبق تناولته كويس لكنه يزيد الوزن بشكل غير طبيعي و يسبب غيبوبة النوم المتواصل فوق عشرين ساعة ،

بالنسبة لعقار ويليبترين تكلموا عنه هنا و قالوا يزيد القلق و الأرق و أنا مو ناقصة

و إلا كنت ناوية اجربه

تصدقين شارية علبتين بروزاك من سنة تحسبا إني ابنحد على العلاج و للحين اتعوذ من إبليس مترددة ، بالله كيف أنام و أنا كل البيت على ظهري ، مسؤولية أمي و اخواني المرضى الله يعافيهم ، غير أن ما تدخل البيت قشة إلا بنفسي أحضرها من بداية التموينات لصيانة الأعطال لمشاوير المستشفيات و تسديد الفواتير و مراجعة الدوائر و قريبا بإذن الله السواقة ، مواصلات كريم نتفتنا

تخيلي بالرغم من كل ذلك رهاب الخروج قتلني

قطعيني بس لا تقولين اخرجي

أحس روحي بتطلع من يوم اضطر أغادر عتبة باب بيتنا

بالإضافة للقلق و الهلع الدائم و توقع المكروه

لدرجة من يوم أغمض عيني ابنام لو أحد كح قمت مفزوعة أتوقع أحد صابه مكروه

و الحمد لله على كل حال

ياحبيبتي عيون الله يكتب اجرك قولي امين .. تدرين لو اني منك بكون سعيده لاني ادري ان ربي بيكافئني على الشي بشي عظيم ماتحلمين فيه قولي ليه ؟ بر والدتك ورحمتك باخوانك اللي بحاجتك ورحمتك بهالبساس الضعوف .. تدرين ليه اقولك هالشي ؟ لان يوم الوالد والوالده تعبانين كنت مثلك كذا افتر كني اله من الصبح لليل بين امي وابوي على فكره انا ماعندي اخوان ذكور وانا شايله المسؤليه كني ولد اتعب وينهد حيلي ونسيت نفسي واشيائي اللي احبها وصاحباتي وشلت فكرة الزواج عشان خاطرهم لكني سعيده من داخل اني سويت جزء من برهم عساي الحقه والحمدلله ربي يفتح لي ابواب وابواب وماتضيق الا تفرج .
وانتي اعرف انك ماتشتكين الوضع بس لما يزيد الحمل ينهد الانسان وينسى نفسه لكن اصبري لأن هدايا الرحمن لك كثيره يابختك

هلا قلبي قطرات يا اللي ما في شي يخفف عني غير بلسم حروفك ربي يكتب أجر كل كلمة سطرتيها لإنعاش قلبي و فكري المنهك


سبحان الله المسؤوليات الجسام هذي كلها ما كانت تشكل لي هلاك لو ما كنت مصابة بالهلع و رهاب الخروج

إذا أنا افرح و افخر بنفسي يوم انقذ قط ضعيف لا حول له و لا قوة ، كيف أجل أهلي اللي هم قطعة مني ؟

المسؤولية لوحدها إضافة معنوية غير طبعا تقرب المسلم من خالقه

لكن يوم يكون الواحد بعمره مشتده أي منشغل ما يدري كيف يتخلص من قيد نفسه المدمرة و فكره المنشغل بالقلق و توقع المكروه غير تكبيل رهاب الخروج و أنت مضطر تقوم بالمهام اللي تتطلب منك الخروج لأنهم ضعفاء ما يستطيعون حتى ذهاب المستشفى بمفردهم

و فوق ذا و ذا تجدد عامل ثالث يقضي على ما تبقى من تماسكي و هو مرض أحد من الأهل او الضعوف ابنائي بالتبني

الله المستعان فقط ، منه الحول و القوة