يجون البيت أحيان في الويكند و يعطوني العلوم أخواتي الكبار و إلا أنا و الله ما دورت
لما تركت الأدويه صرت وحش عليهم و لا اجتمع معهم و مشاكلي معهم كثير خصوصا وحده من أخواتي الكبار و صاروا كلهم يخافون مني من حالة العصبية من أتفه و أدنى حاجه و أنا أصلا ما أبغى أشوف رقعة وجه أحد و جتني حالة شعور الطرد من البيت ثم صارت النوبه القويه و رجعت غصب للأدويه .

بس تصدقين لما تركت الأدويه كنت ما أنسى شي أبد ، عقلي يعيد الذكريات و القصايد و الأحداث و صار سيّال يرد بسرعه و عندي سرعة بديهه و و ما أخاف أبد شجاع و أرتب الغرفه و غسلت أرضيتها ثلاث مرات و مشاعري العاطفيه عاليه ، بس المشاكل طغت بشكل كارثي على الإيجابيات

شوفي غرفتي الحين مكركبه بشكل جنوني ملابسي مرماه من كل جهه و أغراضي بعد

و نسيان شديد

و تبلد

بس تبغين الصراحه أهم شي هداوة الأعصاب و المزاج و النوم هذا هو اللي أنشده

باقي الخوف و العزله صح تقهر بس لازم ما أعطيهم أكبر من حجمهم يكفي المزاج و هداوة الأعصاب و النوم

😂🤣 الله يخلي لك والدينك . ههههه

و الله يا بخير أتمنى المنتدى يقبل مقاطع التك توك و الكيواي و الصور دايركت مثل تويتر و الفيسبوك ، فيه مقاطع حلوه و مفيده و معبره ، ياليت و الله ما فيه إلا اليوتيوب و تحميل الصور متعب مرات تنحذف من مواقع التحميل

مرة شفت الصور اللي أبثها هنا في المنتدى إلا و الصورة مطموسة و عليها عبارة :- أنت محظور من إستخدام الموقع ، أحسب ان المنتدى حظرني 😂🤣 إلا هو من موقع الصور الكلبي ههههه قبل شوي بعد شفت العباره ثم ظهرت

الله يسعدك يا بخير

شفت تصويرك للطبيعه في ديوانيتك جدا أعجبتني صدق انك محترفه بسم الله عليك تبارك الله •

هنا كلٍ و ما أملاه عليه زمانه و لحظاته
هنا تختلف كينونة كل عقل و تتنيكه و شخصيته
هنا أقف و لا أقف


شكرا لك بخير .

أها عندك شهادة بكالوريوس 🤭🤔 هههه كفشتك ، دعواتي لك الله يوفقك

ما عندي خبره

قدمت على كذا مدرسه أهليه و لا قبلوني و لا قبلتني الخدمه المدنيه و لا قبلني وزارة العدل مسمى الوظيفه كاتب ضبط ثلاث مرات و في وظيفه ناسيها ما قبلوني مع ان أجوبتي صاروخيه بس يبغون واحد يشجع نادي النصر ، وش دخل الكورة في الوظيفه ، واحد من قرايبي ما عنده ما عند عنز هايدي بس عشانه يشجع النصر قبلوه ، و في وظيفه ثانيه بعد ناسيها

توظفت سواق باص سنتين ثم توظفت وظيفه لشركه باكستانيه مقاولات كبرى مثل المصانع و المطارات راتبها حلو بس كنت تعبان بجد و خلوها لي سعوده ثم توظفت وظيفه بغيت أطعن نفسي بسببها من الناس اللي فيها و الحالة النفسيه اللي خيسوها مع ان راتبها حلو و كانت هذي الوظيفه صدمة علي صدمة ماني متخيلها .

و الله دخلت الجامعه و لا في نيتي التدريس و أصلا كاره التدريس برمته

ما أقول إلا يالله تعين

من شافني قال ذا مسحور و أنا همومي تباريني • لعنبوها دنيا •

زين جبت طاري لهالموضوع .. أنا كنت أفكر أترك الدواء بعد رمضان بشكل تدريجي .. أبي أوصل لقناعة تامة إما بالشفاء أو ضرورة الدواء في حياتي بشكل مستمر .
آحس أني ما أخذت فرصتي .
والدكتور قال استمري علية للأبد .
..
عطني رأيك تعتقد أني بندم على هذي التجربة ..؟ 🙄

جرعتي بسيطة بس مع ذلك ما آحس أني أنا الإنسانة اللي قبل . نوم كثير .. وخمول .. ومافي دافعية للعمل .. وقلق دايم .. وفهاوه .

أتفق مع أقتراحك وأؤيد .. 👍
شكرا على الإطراء 🙂

أكمل الفراغ الآتي .. أقف ولا أقف
الحل:
أقف إحتراما ولا أقف مؤيدا ..
العفو 😄

لاااا كيف عرفت 🤣🤣
ضحكت على وظيفة نادي النصر طيب شجع النادي لاتشخصنها معهم 😁 نادي عالمي ومعهم كريس .

فعلا أتفق بيئة الوظيفة أهم من الراتب .. إذا ما كانت مريحة فهي خساره لصحتك ونفسيتك .

أنا من الحماس حتى وظيفة جندي قدمت .. مع أني ما افضلها ولا اعتقد أنها تناسب حالتي الصحية . .
بس ما أدري رزقي وين مكتوب .
لذلك أقدم حتى لو ما أعجبني المسمى الوظيفي .

سؤال
يزعجك إذا رديت وعلقت في موضوعك ؟

ما ادري و الله يا بخير حتى أنا يجيني هاجس إن بعد فتره معينه و أجزم إنها طويله إلا أن يشاء الله بقربها و هي إني إذا شفت إني متعافي فعلا عندها بكلم الدكتور على خطة التدريج في ترك الدواء لكن المشكلة العويصه عندي هي النوم ( الأرق المزمن ) و ليش أترك الأدويه لأني كاره التبلد و البرود بس هنا ثلاث نقط و هي إني للآن منعزل و أكلم نفسي كثير و القهر موجود بنسبه ضئيله فإذا راحوا عني هذولا كلهم كلمت الدكتور يسوي خطة لترك الأدوية و لست بيائس بنعمة الله و عافيته العاجله

ليت في أدويه مثل المضادات الحيويه فتره وجيزه ناخذها و نتعافى و نتركها و ما تجينا إنتكاسه

ما أقدر أحكم لك تتركين أو تواصلين أخاف تتركين و تلعنين خيري 😂 مثلي حطيت الشرهه على عضو هنا ما عنده إلا سب في الأدويه و هناك موضوع معروف للعضو المتعافي الجديد و كنت أتصور إن مرضي مثل مرضهم لكن ما أقول إلا يا حظي 😂

شوفي المقطع هذا

https://youtu.be/n4RzxcnoUcc?si=mMJ8kZQ95i28qe0z

العفو يا السنافيه •

😂😂😂😂😂😂😂 محاضرة فيزيائية في جامعة تونس 😂🤭

الله يوفقك

بالنسبه للنادي هم قالوا لي وش تشجع قلت مالي في الكورة بس أجوبتي أجوبة واحد متعلم و مثغف 😂 إنتظرت الشخص اللي من جماعتنا و قلت له قالك وش تشجع قال ايه و قال له نادي النصر و إنقبل .

دعواتي لك إن الله يسهل حياتك و يفتحها بوجهك بوظيفه تلقين منها و فيها ما يسرّك في دينك و دنياك ، اللهم آمين

الله يفتحها بوجهك الله يفتحها بوجهك على قولة شايب لما شافني دعى لي بهذي الدعوة الحلوة •

أبدن المحل محلك و الله يا بخير بس عندي تأخر عجيب في الرد مثل ما كان في فترة تناولي اللارجكتيل جرعة 200 و الحين الديباكين مع المضاد الذهاني اللي اسمه طلاسم صعب مع البرانزا تفاعلوا مع بعض و جابوا الخاصية اللي كانت مع اللارجكتيل

أرجو رجاء خاص إنه ما يجيك الملل من تأخري في الرد و أنتي تعرفين إن بالأساس عندي عقدة في اللسان فكيف بتصير ذي العقدة مع خفض القدرة المعرفيه اللي جايبتها أمثال اللارجكتيل

نرجو منكم تفهم الوضع من معاليكم و أن لا يرمى الملف الأخضر في الدرج و تأكله دابة الأرض 🤭😂 دابة الأرض لها إسم و هو ( الرِّبْيَه ) 😂

الله يسلمك من كل شر يا بخير •

بروح أصلح لي شاهي

و الظاهر بكره بيسوون أخواتي حفله أشوفهم ناموا عندنا

هذي الشيلة بكيت عليها أمس و طلعت من البيت و مشيت و شفت لي براحه و أقعد فيها و نزلت دمعاتي

صدق نبغي شيء بس هالشي ما يبغانا ( قابوس ) قصدي كابوس

https://youtu.be/VOXhjuRlPCY?si=aeX26xvsagNzDBCR