ان شاء الله بتتخلصين منه يارب فعلا هو مش مسألة نشغل وقتنا بس لا المفروض حتى التفكير يتحرك من الوسواس لشي لثاني لازم نركز في شي ثاني وغلطتنا الكبيرة انه نحن نسترسل

نهمش الوسواس شوي بالزاويه وقولو كيف استعدادكم للعيد وش سويتي وش ماسويتو ..؟ نبي نبعد شوي عن مخاوفنا تبتهج النفس شوي.

وينكم اليوم؟

صبحكم الله بالخير يا أحبتي وكل عام وانتم بخير وصحة وسلامة يارب طمنونا عنكم جميعاً وماهي إستعداداتكم للعيد 😍😍😍.
للأسف عندي شوية قلقات من ناحية الأعياد والمناسبات العامة الله يتقبل منا ومنكم الصيام والقيام وصالح الأعمال آمين يارب العالمين أجمعين 🌹

هلا وغلا اختي تقهويتك يارب يعينك ويفرج همك ويسعدك والله دعيت لك خصوصاً ولكم عموماً إنه ربي يصرف عنا الشيطان و وساوسه ويفرجها عليك وعلينا أجمعين يارب العالمين 🤲🌹

سمعت اليوم كم خبر وكلام عن الموت وآيات قرآنيه
صرت اقول ليش نتعب احنا بالحياه ليش ننبسط ليش نفكر بأشياء تفرحنا
مو كلنا بنموت
معاي حالة يائس وشعور غريب وكرهه كل شي حولي

بسئلكم تجيكم رعشه اونفظه قبل النوم ايش سببها
لانها جاتني وسوست بعدها اخاف منها مرا

مرحبا خطى .. الحمدلله جهزنا شوي شوي هههههه بس باقي يعلنون العيد لانه في حد يقول الثلاث وفِي حد الاربعا الله يديمه علينا باليمن والبركات ، بتطبخين شي للعيد ؟ سويت شي ؟

انا بعد سمعت .. وخفت قبل صلاة الفجر خوف وكنت برجع لنقطة الصفر بعدين قلت وانا مالي !!! قعدت اسبح واستغفر
وجتني نفضه مع خفقان والنفضه اللي تتكلمين عنها هذه نوبة هلع اتجاهليها.. طبعا انا لما شفت المحفزات خفت ليش ؟ ليش شفت كمن محفز اكيد في شي بيصير وحسيت اني مخنوقه بس بعدين قلت !! وانا شو عرفني بأسرار الكون وقدر الله !! خلاص هذه اسرار الله له أمور كونيه هو اعلم بها ليش نشوف هالاخبار ليش تكرر علمها عند الله .. فقلت ليش ما اسلم امري لله. وأتوكل عليه وخلاص وفعلا ارتحت .. نحن متعبين نفسنا لانه نسأل في الغيب وفِي نظام الكون اللي هو اكبر منا بمليون مره !! انتي بما تقولين ليش نعيش وليش نتعب انتي قاعدة تسألين نفسج أسئلة كونية مالها جواب فقاعدة اتعبين نفسج .. عادي بسطيها خلي الامور اتعدي .. اعرف صعب وانا لين الحين فيني شوي خوف لكن شو اقدر اسوي ما اقدر اقول حق المحفزات لا تجيني .. وع فكره لو ما كنتي موسوسه كان الآيات مرت عليج عادي والأخبار ولا دريتي عنها اتذكري الفترة اللي ما كنتي موسوسه فيها ( هذه سارة الحقيقيه ) الحين انتي لست ساره انتي الوسواس نعم الوسواس يكتب عنك ويتكلم عنك ويتفلسف عليج الله ينصرنا عليه يارب

هلا تقهويتك ماشي حالي شويه قلق بس ربي يعين وانتي طمنيني عنك عيني؟؟؟

اميييييييييين ياربببب

والله يا حجوره نصلح اطباق مختلفه للفطور? يعني احيان
مصابيب وبانكيك وخبز مخمور ومقلقل?النواشف والاجبااااان ...الخبز المسح والصااج والبلاليط مع البيض المقلي والفول ..والشكشوووكه...
التوست والصامون وحليب وقهوه وشاااي والاشياء كل وحده تجيب صنف صنفين وكذا .. انتي شلون عيدكم؟

ما يختلف عنكم يا خطى .. نحن عدنا بعد البلاليط ولازم طبعا القهوه والشاي وعدنا أطباق تراثيه لازم أتكون موجوده اللي هي انواع الخبز ( الخمير - الجباب... ). والعصيدة والخبيصه هههههه وبعد الفطائر والسويتات والحلويات ..

فيني ضيقه حجر ادعيلي ربي يزيلها عني حاسه بشعور يخوف

كل عام وأنتم بخير وسعادة يارب 🤲🏼❤️🌹

أنا مثلج البارحه كانت معركة صامته 😂😂 كل عام وانتي بخير وتقبل الله طاعتكم

وأنتم بخير وصحه وسعادة 🌹

الله يسلمك كيف العيد معكم وكيف نفسياتكم؟

كل عام وانتم بخير
اليوم لاحظت وحهي ماشاء الله مفتح ومنور
وخفت مرة تعرفون ليش مين صار له كذا

منور من الصيام وانقضاء طاعة كبيره وشهر فضيل وصبر صبرتيه ع البلاء لا توسوسين ويهج ما فيه الا العافيه
ما فيج الا كل الخير يارب
الحين الوسواس فاضي كل شوي بيطلعلج بشغله فاضيه
ما عنده شغل

مرحبا بو عبادي النفسية نص ونص الحمدلله ع كل الحال العيد اول يوم انقضى ع خير بفضل ربي سبحانه وتعالى ولكن فالليل جتني نوبة خوف وطبعا غلطه مني لأني استرسلت فالأفكار الوسواسيه ولَم أوقفها لين ما حسيت بخفقان وفجأه الدنيا سكرت فويهي اول شي سويته سكرت باب الغرفة عشان محد يحس وخفقان شديد شديد يعني اول شي بدى عندي خوف وسواس وافكار وسواسيه وأنتهت بالنوبه هذه .. حتى احترت فيها هل هذي نوية هلع ؟ نوبة الهلع تجي فجأه بس هاي لا كان في خوف وافكار قبلها .. المهم سكرت باب الغرفةً وقعدت ادور واستجير بالله وآخر شي قلت اوكي وبعدين !! انا بنسدح ويصير اللي يصير لا خله نشوف شو بيصير ولما كلمت نفسي بهالطريقةً بديت اهدى تدريجيا الحمدلله وماعرف كيف نمت 😂

هذه حركة جديده حاليا من الوسواس

باختصار يا بو عبادي انا اللي جبت لنفسي استرسلت فالأفكار

وانت بخير وصحة وسلامة يارب
لا لا بالعكس دام ماشاء الله شفتي وجهك مفتح كان تقولي بنفسك الحمد لله، ولاتلتفتي للوسواس لأنه مباشرة بيستغل الفرصة ويخرب عليك فرحة العيد، وتطمني هذي إحدى أساليبه السخيفة حسبي الله ونعم الوكيل فيه.

هلا هلا بحجر كل عام وانت بخير،
الله المستعان بس السؤال هنا وش شربتي واكلت نفس الليلة لأنه الخفقان هذا له مسببات مثل القهوة والشاي والدهنيات وغير كذا الإسترسال صح ممكن نغلط بس للأمانة مرات تلقى نفسك بالدوامة وانت ماتحس ولا تدري كيف استرسلت معاه بس عوافي إن شاء الله قدك تعرفت على احدى الطرق المناسبة لتجاهله، والحمد لله اثبت نجاحك ضده، إستمري وتوكل على الله وعليك بالحوقلة ففيها فرج كبير من الله وتيسير لأمرك بإذن الله تعالى.

كل عام وأنتم بخير وجميع المسلمين يارب العالمين
خذوا عيدياتكم 🍬🍬🍬🍫🍫🍫🍰🍰🍰😁☺️😝😝🙈

اوه اليوم كله كان عباره عن قهوة وشاي وسكريات مخربطه

واتوقع الإرهاق له دور

ينعاد علينا وعليكم كل سنه وكل حول يارب

ي جماعه وسوست من الشغاله شاكه انها سوت لي شي لان كانت بغرفتي وحطت شي وكانت متوتره لما سألتها وش حطيتي والحين خاييييفه شسوي عشان اتاكد واتطمن ):'

اقولك كانت تجيني افكار وسواسية طووول اليوم وانا اطنش اطنش اطن
وكنت مع اهلي ومبسوطة حمدلله بس نفسيتي شوية مخربطة بسبب الوسواس ومشكلة عائلية أمر فيها
المهم دخلت الغرفة واحس بضيييق وافكار وسواسية تزيد عليا مدري ايش جاني
حتى احس مالي نفس ادور حلول للمشكلة حقتي

هلا تقهويتك عساه طيبه اختي عيدج مبارك

نعم حاول جدا الله يخزيه يحاول يطلع ع اشكال ثانيه .. لكن الله المستعان والأعراض الجسدية نغزات فالصدر ودوخه بس أتجاهل

الله يسلمك ويسعدك اختي تقهويتك كيف الصحة والعيد معاك؟

سؤال عام وسريع كيفكم مع نبضات القلب والخفقان؟

بو عبادي انا النبضات عندي تنقسم قسمين نوبة هلع بدون سبب مثلا وانا فرحانه عادي او متحمسه او حتى بعد الاكل وبدون شي فجأه خفقان ونبضات سريعة وع طول طوالي استرخاء وبابونج وتروح

والقسم الثاني اللي انا سميتها نوبة الخوف انا اوسوس اوسوس اوسوس لين تزايدا النبضات من الخرف ورجفة في كل الجسم وخفقات ورعشه وحرارة في كل الجسم وطبعا اضطراب كبير في الجهاز الهضمي والتصرف الوحيد معها هو اخليها لين تروح

عموما كلها أعراض كاذبه

يا جماعة قبل لا يجيني الواسوس انا كنت فعقله يعني اسوي الطاعات بس مب بخشوع وفِي ذنوب وبعد الوسواس تركت الكثير من الذنوب اللي كنت أشوفها عاديه والتزمت اكثر وحتى الذكر الحمدلله صار عندي عاده والقوآن صار لي ورد يومي .. وطبعا الوسواس جاني فالفترة اللي بديت فيها احفظ قرآن

فأنا شوي متخوفه اقول ليش اتغيرت وليش التزمت وليش زدت فالطاعةً هل بيصرلي شي ؟؟ فاهمين علي ؟؟ هل هذه المشاعر تأتيكم ، انا اعرف ما انا فيه الآن من طاعةً هو خير من رب العالمين وأريد الاستمرار ولكن اتعبد وانا خايفة وكل مضصطرة استغفر لانه في راحة كبيره وانا كنت قبل مقصره فالذكر

فطمنوني ؟ اعرف انه المفروض ما افكر بالهطريقه لكن الوسواس وعلومه

‏أحسن الله عزائي في موت قدرتي على تعبير ما أشعر به):

انا كمان لما جاني الوسواس التزمت اكتر واصبحت محافظه علي صلاه قيام الليل وبصلي السنن الاول كنت اصلي الفروض بس وايوة فيه خوف من الالتزام بس انا بنظر لموضوع زياده العبادات انه الحسنه الوحيده للوسواس لان الموت اكبر واعظ للانسان والخوف منه يدفع الانسان للالتزام
والله هتستغربو مني لو قلتلكم اني احيانا احس ان الشخص اللي يفكر في الموت افضل من اللي يعيش في غفله لان التفكير في الموت معناه الخوف من ارتكاب الذنوب