السلام عليكم ورحمة الله وبركاته
اسأل الله الكريم الشفاء و العافية لنا وياكم و لجميع مرضى المسلمين

ابشركم الوالدة كتبوا لها خروج بكرة بإذن الله تعالى من المستشفى

بالنسبة للقاح كورونا لو ادري انه كذا ما تناولته

إذا اللي صابني ذاك مو كورونا أجل وش هي كورونا ربي يلطف بعباده و يعافيهم و يجنبهم كل سوء و مكروه يارب

قبل كم يوم زي ذا الوقت كنت ما اطلب غير الموت و الراحة من اللي كنت فيه بعد التطعيم ، كل الأعراض المؤلمة في حياتي جات مجتمعة في وقت واحد مضاعفة مئات المرات و طوال الوقت ، المسكنات كأني أبلع ماء و لا لها أي أثر ،. بل على العكس زادت الغثيان غثيان و جمر بطني جمر ، كل سنتيمتر من الجسد في حالة غليان من الحرارة اللي ما تنزل عن أربعين من جهة و من الآلام الفظيعة من جهة ثانية
ربي لا يكتب اللي شفته على مسلم و لا يعيده علي مرة ثانية

حتى التطعيم ما كان في الحسبان و لا على البال اصلا ..

في البداية كنت مع اخوي مريض الفصام ربي يعافيه الأحد الماضي نراجع بخصوصه ، و تذكرت من زود اللقافة بعد ما انتهينا من الصيدلية إن فيه مركز صحي خلف المستشفى ابغاهم يسوون لي تحليل عشان اتطمن على نفسي في مشكلة ما ، و رحت انا و اخوي و يوم وقفنا عند أحد الأبواب شفت الخلايق متجمعة من جميع الجنسيات قلت بنفسي اكيد عشان يوم أحد اول ايام الاسبوع ، و طلبوا منا نوقف في الطابور قلت بنفسي عادي يمكن عشان زحمة لابد ينظمون الوضع ، شوي يوم وصلنا للمنتصف قالوا سجلوا ارقامكم اللي مسجلين بها بتوكلنا و صرت اسأل نفسي غريبة ليش ، و صرت ادقق في الخلايق و هم طالعين من العيادات مادين يديهم و عليها لصق ، الا اسأل إحدى الممرضات هذا تطعيم . قالت ايه و انا رايح عن بالي تطعيم كورونا ،. قلت كورونا استغربت و قالت ايه ،. انا وقتها ارتجفت حسيت اني طالعة سيارة متجهة لمنحدر بأعلى سرعة و مافي شي اقدر اسويه الا اغمض عيوني لسببين اول شي لاني آخر وحدة بالكرة الأرضية اللي مستعدة اني اتطعم عن كورونا لكذا سبب ما يسعني ذكرها ، ثاني شي لاني ما صليت استخارة و انا لازم اي شي مهم زي كذا استخير ، و صرت استخير في سري و انا بمكاني ارتجف و ابلع ريقي من الخوف لين فجأة قالت هاتي يدك و يوم احقنت الإبرة بصراحة ما حسيت انها اصلا غرزت الإبرة لين قالت خلاص من شدة خفة يدها لدرجة شكرتها و قلت لها ما حسيت ، و قمت عادي و رحت اتطمن على اخوي قلت كيف قال عادي
و كل ذاك الوضع كان طبيعي جدا لدرجة مريت و جبنا غدا و تغدينا و عينا من الله خير لين طب المساء و صليت العشاء و دخلت نمت عادي لين بنص الليل قمت ارجف و اون و دموع عيوني تصب حارة و طفيت المكيف ما تحملته و بدت رحلة الآلام و الحرارة المرتفعة اللي ما نفع معها شي و استمر الوضع ثلاث ايام
لين تحسنت اليوم الحمدلله

يا الله
الحمدلله على سلامتك وسلامة الوالدة
انا حجزت موعد لقاح كورونا وهونت بعد كلامك
ليش يكذبون علينا يقولون مالها تأثير
الله يعين مدري وش بسوي إذا صار كل شي اجباري محصن
وش نوع اللقاح اللي اخذتيه فايزر ولا اكسفورد

الله يسلمك اخونا بكرة أجمل و ربي يجعل كل ايامك أجمل و اكمل

اللقاح كسفورد

تصدق ما زلت في حالة وهن و نعاس و رغبة في النوم و تعب لأقل مجهود

هو فقط الحرارة الحمدلله زالت و هذا اهم شي

لكن متى افوق من الخدر اللي انا فيه ، كأني بين الحلم و اليقظة طوال الوقت و مالي خلق و لا طاقة اتحرك

يارب انها أعراض مؤقتة

ربي يحفظنا وياكم و جميع المسلمين من كل شر و أذى

السلام على الجميع الحاضريين و الغايببين
اتمنى تكونوا جميعا بخير انتم و اهاليكم
الاخت بسمة ب اذن الرحمن ما عليك بأس ربي يجعلها بردا و سلاما عليك وعلى كل مسلم و مسلمة
لكم وحشة كبيرة لكن المزاج و الظروف ما تخليني اشارك كثيرا
صاحب المظافة و جماعته و بعض الاخوة و الاخوات دايما على البال

الله يشفينا جميعا
سلام

مهما بلغَ مقدارُ البـُـعـد عن من نحبّ
فَ قلوبنا تبقى تخفقَ بالمحبة والوفاء لهم

وحشتوني جميعا ❤❤

اهلا ظل والله يا اختي كنت افكر فيك وكنت خايفة عليك لما كان الحرب في فلسطين الحمد لله انكي بخير

.اهلا فيكي حبيبتي
تسلميلي غاليتي
انا بخير الحمدلله
وشكرا كتير اني كنت ببالك وتفكري فيني
ربي يحفظك من كل مكروه ⚘❤

محمد البدراني وابونجلا مالكم حس ؟

ان شاءلله انكم بخير

يتقطع قلبي على حال محمد البدراني العضيد و السند

هلا إبن بطوطه يسعد مساك يا غالي

ما عندي شي و الله
اللهم دعواتكم ربي لا يحرمني منها و منكم

الحمدلله على سلامة والدتك يا بسمة الله يجعلها آخر الأحزان و يطول بعمرها
و الله ينفع بالجرعة و لا يوكلكم عليه

كيفكم الحين و كيف أخوك يا رب أشوى