صباح الخير للمتواجدين والغائبين
يا جماعة الخير ليش جده ومكه معقدين المعاملات بالذات شرط العمر وشرط التحاليل
حتى المعقبين مايقدروا يمشوها لا حول ولاقوة الا بالله
طيب العمر وتنحل بالانتظار لين تعدي العمر المطلوب
والمرض وفيه نسبة شفاء
نوقف عند نتيجة حمل للصفه الوراثيه بنسبه ضعيفه تتعرقل هنا كيف الانسان يقدر يغير خلقت ربه
وراثيه وراااااثه جينات نسبة انتقالها للاطفال مستقبلا ضعيفه جدا وبالذات لو مافي قرابه
يارب ياكريم الطف بحالنا مستحيل اتخلى عن خطيبي عشان صفه وراثيه لاهوا مر خطير ولا هيا جريمه ارتكبها
والرسول صلى الله عليه وسلم قال : (من اتاكم ترضون دينه وخلقه فزوجوه )
يااااااارب وانت اعلم بالحال وماباليد حيله يسر ولا تعسر
انا مستعده اقدمها من منطقه ثانيه ولكن كيف احصل ع تعريف العمده بالسكن وكيف وهوا عمله بجده راح يبان في تعريف الراتب
وشهادة الميلاد
احسها صعبه من نواحي كثيره
وامارة الرياض لازم حضور ولي الامر وتعريف بالسكن
انا في جده ماطلبوا ولي امري وقالولي احتمال ضعيف يطلبوه وممكن مايجي الا للمحكمه
ولو كان بنفس مدينتي ولي امري يجي عادي ولكن محد بيتعب نفسه ويسافر مسافات عشان معاملتي
دعواتكم والله نفسيتي تعبت
والمشكله بيني وبين خطيبي حب سنييييين ما نقدر نتنازل ومانقدر نستمر على دا الحال نبغى الحلال لاحول ولاقوة الا بالله

الف مبروك عزوز انا كنت اتابعكم زمان وافتكر انك قدمت استثناء ولمن رحت الشرطه قالولك حسب التعليمات عشان العمر اظن كان شرطه 30 وقتها صح؟
الله يوفقكم ويخليكم لبعض
حابه اسألك كم سؤال اذا ممكن ...
كم جلست بعد حفظ المعامله ورحت قدمت من شروره
وكيف اتصرفت في تعريف الراتب والسكن والميلاد الطلبات يعني وكيف التحليل الله يسعدك
والنفسيه .. اي واحد يقدم ع معامله ضروري يدخل في دوامه النفسيه لانه تفكيرر وخوف وقلق وتوتر مستمر وهدي 100% لها تأثير على نفسيتنا
والحمدلله على كل حال

حنووونه الله يسعدك طمنيني عل تحاليكم متى تستلموها

ي حياتي ي لمحه احزني كلامك اسال الله ان يفرجها عليك وعليه وع جميع المسلمين هنا المشكله ماطلبنا الا الحلال ليه تعقيدات وشروط مدري وشو لاحول ولاقوة الا بالله العلي العظيم اتوكلي ع الله وقدمي من الرياض او المدينه المدينه ماتحلل الفول.. خلي خطيبك يستاجر لا ابوك ويحجز له طيران يمكن يتشجع اكثر او يسافر اوسياره هو وخطيبك خلي خطيبك بعد يتحرك لاتتظرون اكثرحتى لو تو حفظت معاملتك وقدمتي من مدينه ثانيه مافي مشكله اختي قدمت من مكه وجده وجتها بالرفض وقدمت من جازان والحمدالله عقدت .. اسالوو انتو وين اللي يبعون عقد اجار ووين العمده خلي حتى خطيبك يجيب اثبات سكن ان من الرياض او المدينه....
واتوكلي ع الله احسن من انك تتظرين الفراغ وتتعذبين
الله يفرح قلبك ويريح بالك وجميع المسلمين..♡

اكيد هي اذا خرجت من الداخليه تروح للاماره وتدخل الاقسام واذا فيها موافقه تتحول للمحكمه
واذا فيها ملاحظه او ناقصها اوراق اعملي حسابك انها راح تصير معامله[/QUOTE]


اممممممم حسب فهمي منهم ان بس خطاب يرسلون الى الاماره...¡
يالله طفشت انتظار

الله يبارك في حياتك ان شاء الله وعقبالك يااارب

الله يبارك فيكي وان شاء الله تفرج على كل شاب و شابه طالبين الحلال باذن لله

الله يبارك فيكي اختي لمار
بالنسبة ل أعمارنا
أنا 28 أجنبي
خطيبتي 25 سعوديه
بالنسبة لمدة المعامله
طولت معاي بسبب الأوضاع الي صايره في نجران بداية المشاكل 😰

الله يبارك فيكي اختي لمحة خجل وباذن واحد أحد تنحل مشكلتك وتعقدون في اقرب وقت
صحيح كلامك وقتها قدمت استثناء بسبب العمر وجلست ثلاث شهور وفي النهاية رفض
طلعت قدمت في شروره بعد ما عرفت رفض الاستثناء
في البدايه طلعت نجران ومن نجران نزلت على شروره سويت كذا عشان أخذ فكره عن الأوضاع هناك كيف ومن هذا الكلام
عادي ورقة التعريف بالراتب جبتها من عملي هنا ومافي ورقة تعريف بالسكن
الي سهل وضعي اكثر اني من مواليد هنا الحمد لله وعندي شهادة ميلاد تثبت عطيتهم صوره منها من ضمن المعامله
لان الي من مواليد هنا أمير المنطقه بنفسه يعطي الموافقه ما يحتاج تروح للداخليه
بس فيه ورقه من الأوراق عطوني هيا محافظة شروره الي هي موافقة شيخ القبيله حق البنت مع اثنين شهود
وشيخ القبيله لازم يكون من نفس المنطقه الي أنتي بتقدمي فيها
وانا الحمد لله شيخ قبيلتهم في شروره رحت لمى عنده أنا وأبو زوجتي وكلمه على موضوعي و وقع وختم على الورقه
بس بصراحه وللامانة الي تعبني كثير المتاااابعه انهلكت هلاك بسبب لمى اتابع المعامله
تعرفي أنا في جده ومعاملتي في شروره وشوي في نجران وعلى هذا الحال ونكد في نكد لمى الحمد لله فرجت

أسال الله لكم التيسر في معاملاتكم
وباذن واحد احد تفرج على الكل
الله يفرج هم كل مهموم ياااارب
وباذن لله نفرح فيكم جميعا
الله يسهل لكم يااااااااارب

الي يسال كم اخذت معاملتي بالشؤون الامنيه اخذت تقريبا من 25 الي شهر ماتعدت الشهر انا مستغرب الحمدلله انها ماطولت لاني فلسطيني
بِــ̯͡سّ انا حاسس الي ساعدني موظف الشؤون لاني كنت نشبه كل يومين وانا عندو ھَھٍھَھٍھَ وممكن الي ساعدني الوكيل امارة الرياض الله يحفظو لانو انا اول ماقدمت رحت عندو وقعدت اشتكيلو انا هاذي تاني معامله اقدمها والله تعبت الي سنتين بالمعامله الاولي والان لي ثلاث شهور بالمعامله الحاليه طبعا وقع عليها وقالي تعال شوف كتب تسهيل امور المعامله طبعا البنت مطلقه وعمرها 24 وانا فلسطيني مقيم ومازالت المعاناة يارب تفرج بعد السنين والتعب واستفدت من الاخوان والاخوات هنا كثير شكرا لكم

الله يفرج عليك ويسهل أمورك بأذن لله

ماشاءالله تبارك الله عزيز الله يوفقك يارب ويتمم فرحة زواجك ع خير يارب|
كم جلست مدت معاملتك؟؟؟
الله يفرح قلوبنا جميعا وييسر امورنا....♡

السلام عليكم
اليوم كلمت الشوؤن الامنيه قالي انها من شهر تحولت للحقوق الخاصه واعطاني رقم يقول انو رقم سري طبعا من الصباح وانا اتصل محد يرد
طمنوني مين صار معاه كذا وايش اسوي

أمين يااارب
وعقبال نفرح بعقد قرانك ياارب

مدة معاملتي تقريبا من 7 الى 9 شهور تقريبا
بسبب بعد المسافه أولاً
المشاكل الي صارت في نجران ثانياً
لو عندك احد تعرفيه هناك
راح تخلص امورك بدري بدري

الف مبروك اخوووووي عزيز وربي يتمم فرحك على خيررررر ياااارب..



وزي ماقالت اخت لمحه الصفه الوراثيه نسبتها ضعيفه ويااخي احنا راضييين وش يبووووووون يعطونا موافقات واحنا مسوولين عن اختيارنا..،


انا خطيبي حلل بالدمام وكتبوله سليم خال من الامراض الوراثيه حامل للانيميا المنجليه ولامانع من اتمام الزواج اذا كانت الزوجه سليمه..

بس عدت سنه على هالتحليل وماعاد ينفع:(

واتخوفت الان اني احلل بجده اخاف يخلونه مصاب:(

شرايكم وين اقدم مضموووون بعد الله اكيد.؟؟

وكيف بالنسبه للطلبات كيف يبحثون للبصمات لازم يكون بنفس المنطقه.،



يااااااارب يسرلنا امورنا ولجميع المسلمييييين يارب مالنا غيرك افرجها علينا..

مو احنا عملنا التلوت قالو عشره ايام فمتى حيكون الاستلام ؟
والله مرا خااايفه دعواتكم ..

يقولو تسهلت الامور
وشفنا واحد يقول انه اي شي يخلصة الا التحاليل مايقدر عليها وسألنه توثق زواج بدون موافقة وهل فية عقوبات
قال فية عقوبات تنشال ان شاءلله والامور اسهل من التحاليل وناس كثير تزوجو زواج بدون موافقة بحضور الاهل كلهم وبموافقة الطرفين ووولي البننات وبعد فترة شالو ورقة الزواج الا هي ورقة من المأذون وراحو ظبطو امورهم بدون اي مشاكل
وظيفته تقريبا ممحامي بالرياض
بس قلت اسأل قبل كل شي

الله يبارك في حياتك اخت نوال وعقبال نفرح فيكي ان شاء الله

الف مبروك يارب يسعدك ان شالله بس بسالك يعني اعطوك الموافقة حتى بدون العمر المطلوب؟ لانه انا عمري 22 ولازم اكمل 25 عشان الموافقة وبرضو من جدة بس خايفة اقدم ع جدة و يخلوني استنى ع الفاضي فهل يمشي الموضوع هناك حتى لو عمري ماكمل 25؟

خلاص اذا مرتاحه للموضوع اتوكلي على الله
انا فقط انصحك ماتتزوجي بهالطريقه لان ماتدرين الايام ايش مخبيه لك
خليكي بالسليم احسن
وبالنسبه للتحاليل قدمي بمدينه ثانيه غير جده ومكه
لان هالمنطقتين مشددين عليها لان طلبات الزواج من غير سعودي كثيره
فيحاولوا يقلصو العدد ويحطو شروط صعبه شوي
الله يفرجها عليكم يارب

يفضل الاتصال بدري من 8 حتى 10 صباحا

وبالتوفيق لكم

اللهم امين جميعا ان شاءلله
انا مو مسألة مرتاحة يمكن بيني وبينك نقدر نقول أسلك لنفسي واحاول اتمسك بالي يقولونه واعطي نفسي شوية امل
بس الصراحة خايفة ومتردده ربي يفرجه علينا كلنا ي رببببب

الزواج بدون موافقة حيكون اخر حل
وان شاءلله ربنا ييسره لنا

الله يبارك في حياتك اخت ريما
وعقبالك باذن لله نفرح لك

أتوقع عمرك عادي
لان واحد قدم معاي وعمر خطيبته 23
وانا عمر زوجتي 25
والحمد لله كلنا تيسرت لنا وطلعت موافقتنا

وياااااارب عقبال الكل هنا باذن لله

اعرف وحده حتتزوج بدون موافقه اخوووووها سال ناس قله نبغى نزوجها بدون موافقه قال روووووووح زوجها مافيها شيء المكتب عندنا مليان ناس تبغى موافقات اتزوجت برى وشوفيها بعد كم يوم مسافره حتتزوج ..

عاد انا مااشجعك خليه اخر حل .. انا لواهلي يوافقووو كان سويتها ...


ربك يسهلك امرك ويسهل على كل مسلم يارب❤

اخويا انا الطرف السعودي والعمر المشروط ليا 25 يعني هوا قدم من جدة؟ امييييين يارب الله يسهلنا اجمعين والله شي يزعل انا مني فاهمة ليش كل دا من الدولة وموافقة وتاخير زواج وحالة لكن الحمدلله على كل حال.

محد بيحس بمعاناتي الا اللي واقع في نفس مشكلتي سبحان الله
احنا مشكلتنا المنجليه مو الفول
وصح كلامك خطيبي لو بادر ابويا اكيد بيوقف معاه
اختك قدمت في جازان نفسها والا بمحافظه فيها ؟؟؟ ممكن تكتبيلي اجراءاتها كيف كانت
وقبل كم سنه هالكلام
ووين حللت في جازان؟
الله يفرج همي وهمك والجميع يارب

الحمدلله اخوي عزيز ماشاءالله عليك صبرت فتره طويله ربي جازاك بصبرك وفرحك
غريبه ورقة شيخ القبيله للبنت وحلو ساعدك تواجدهم بنفس المنطقه
واللي ماعندهم شيخ قبيله ايش يسوي ههههه .... والله حاله
تعبت ونلت الحمدلله
الله يتمللك فرحة الزواج الكبيره
ويرزقكم بالذريه الصالحه يارب

صح كلامك كييييف البصمااااات والبحث لانه البحث الجنائي يسأل عنه على ماأظن
واحذررررررك من جده بالذات المختبر الاقليمي دا اللي كانه سجن يطلعوكم كانكم مسوين جريمه ههههه اعوذبالله منهم
100% يطلعوه مصاب وماشاءالله عليهم اذا شافوا النتيجه فيها شي عل طوووول دايركت عل الشرطه كانه قتل قتيل ويبلغوا عليه
حت المباحث مو زيهم ماادري ايش يحسوا فيه
مايحزنوا الواحد فرحان وقلقان ويبغى الحلال ورايح وجاي والله شي محزن

حنووونه باقي لكم 3 ايام بإذن الله يوم الخميس تطلع نتيجتكم اخوكي او خطيبك يروح يستلمها واذا فيها شي مايسلموكم يقولولكم فيها كذا وكذا وراح نرسلها للشرطه
وان شاءالله تكون سليمه وتبشرينا بأخبارك الحلوه يارب
ولا تقلقي حاولي بقد ماتقدري تكوني ريلاكس
الله يطمن قلبك

لا قدمنا في شروره بس الظاهر انهم ما يدققو في العمر
لان احنا الطرف الأجنبي في الموضوع
وزوجاتنا هم السعوديات
وحده عمرها 23 والثانيه 25
والحمد لله تيسرت الأمور
وان شاء الله بقدرة قادر تتيسر لك أمورك وتفرحي ونفرح لك ياااارب

آيه والله اخت لمحة المدة الي صبرتها سنه ونص من وقت ما خطبت اللين ما طلعت الموافقه في شروره
والحمد لله على كل حال ما راح تعبنا على الفاضي ربي أكرمنا وعقبال عندكم ياااارب
بالنسبة لورقة الشيخ اذا فيه احد معرفي لكم هناك ممكن تمشي الأمور
ترى والله يا جماعة الخير فرق بين السما والأرض بين جده و شروره
جده معقدين لأبعد درجه 👎

أمين يااارب ربي يتمم لي ولكم على خير باذن لله
يشهد الله أتمنى لكل واحد و وحده فيكم في هذا المنتدى
ربي يسر لكم اموركم ويفرحكم عاجلا غير آجل ياااارب

دعوااااااتكم الان رائح للجامعه عندي إختبار
الساعه 10:30 ص

الله يفرحكم جميعا ياااااارب
بالتوفيق للجميع

انا حقدم بعد سنة ان شالله ههههههه لانه اهلي مو راضيين غير بعد ما اتخرج من الجامعة بس قلت اخد فكرة قبل والظاهر جدة ماعليها امان شكله لما يجي وقتها بقدم من مكان تاني ان شالله. والله يوفقك باختبارك اليوم ويسهلك ان شالله.

مرحبا .. الله يبارك فيكم ابغى رقم التحويلة لقسم الحقوق الخاصة؟ اتصل مايردوا ولا يخلوا السماعة مرفوعة
تحياتي. .

كانك تبغين النصيحه لاتقدمين بجازان راح يشفون مصدر بطقاتك غير جازان استحاله يوقع الوكيل الجديد وجازان يحللون انيمياء المنجليه
اختي كانت قبل الوكل الجديد ومن نفس جازان قدمت انا هنا ماطلعت موافقتي من جازان

حللنا في مستشفى الملك فهد اختي اخذت مقيم وراحت لداخليه جلست معاملتها تقريبا 7اشهر

بس يدققوا في مصدر البطاقه؟؟؟؟؟؟
عادي اروح اطلع بدل فاقد من جازان وكاني من سكانها
عندي وحده اعرفها ساكنه في محافظه هناك قالت تسويلي تعريف السكن وكدا بس هما ماعندهم عمده!!!
وتحاليلهم للانيميا المنجليه يرفضوا المعامله زي جده والا يمشوها زي الرياض والمدينه

ام فهد انتي من اي مدينه ؟
وايش مشكلتك ؟

بالتوفييق يارب

اخواني استفسار بسيط
يوم غدا موعدنا في المحكمة لعقد القران اليوم كنت عندهم وسألني تحليل الزواج معاك قلت له نعم قال لي مر عليه سته شهور قلت لا .
المهم رجعت البيت بتأكد من تاريخ الفحص لقيته إنه متأخر عشرة ايام يعني راحت السته شهور وزيادة عشرة ايام .
السؤال هنا هل الشيخ يرفض عقد القران بحجة إن التحليل عد عليه عشرة ايام .
اذا حصل هذا الشي لا قدر الله ايش الإجراء هل رايحة ترجع للأمارة مره ثانية ولا ايه حاسونا وتعبونا .علما ان تحليلي ان الطرف السعودي هو المتأخر.
والخطيبه باقي لها اربع اشهر.

والله ماادري ي قلبي
اذا تشوفي كذا وراضيه توكلي ع الله...

اتوقع ان راح يمشونها عاد انت لاتعلمهم تقول زاد 10 ايام ع التحاليل اسكت عطهم وانت ساكت لاتفتح عيونهم الله ييسر امرك.....