يا مرحبا بالجميع و لا تسد

أشوفك لولو أخبارك يالغاليه يا رب تكونين بخير دووووووم

أبشر نفسي ثم أبشركم صرت أسوق الموتر !!
آه من عوقك يالركبه ما توقعتها كذا رغم الألم الحاصل لكن على الله يشفي الجرح و تطيب كل الجروح

أحد يبغاني أوصله مشوار

ما شاء الله تبارك الرحمن يا بو حميد حتى أخوي الصغير الرابع ملّك و ملكته يوم الجمعه الله يوفق العرسان و عقبالي و عقبالك و عقبال كل محروم

لا تنسوني من الدعوة عسى ركبتي تعود كما كانت الحين أثنيها شوي و إن شاء الله شوي شوي و أثنيها بالكامل أما التربع فما أقدر الألم واصل حده لما أتربع و بإذن الله بعد سنتين أنزع المسمارين إلى مزبلة التاريخ

نظراته تفطس ضحك و شعره جزل لله دره

https://www.youtube.com/watch?v=OzTl-W5Wu98

ربّع الله صدري اللي فيه كنه
والظلوع الناحله والمضمحله

كنت فيه وكان كنه روض جنه
ما تزله ذي البروق اللي تزله

الحشا قد فيه من فرقاك حنه
كل برق وكل طاروق يتله

ربع الله صدري اللي فيه كنه
والظلوع الناحله والمضمحله

ربع الله صدري اللي فيه كنه
والظلوع الناحله والمضمحله

كنت فيه وكان كنه روض جنه
ما تزله ذي البروق اللي تزله

علمو للغايب اللي ضقت منه
في محله ما حد حل بمحله

وان نشدكم ويش سوا قولوا انه
همه انت بخير ولا فيك عله

ربع الله صدري اللي فيه كنه
والظلوع الناحله والمضمحله

كنت فيه وكان كنه روض جنه
ما تزله ذي البروق اللي تزله

حنه حنه حنه الله يلعن اللي ما يحنه
حنه الله يلعن اللي ما يحنه
والله انه منك كنه فوق مله

ربع الله صدري اللي فيه كنه
والظلوع الناحله والمضمحله

ربع الله صدري اللي فيه كنه
والظلوع الناحله والمضمحله

كنت فيه وكان كنه روض جنه
ما تزله ذي البروق اللي تزله

https://www.youtube.com/watch?v=5Ov9cuxz1gQ

إهداء لكل مرجوج مثلي الله يعافينا و إياكم

تحياتي الحارة لكل من هو كذلك :)

https://www.youtube.com/watch?v=YpUWSTTiCAc

طفشان إلى اللقاء أراكم و أنتم بأحسن حال

يالله صباح خير

و الله لو بيدي وش أقول غير انك سبب رئيسي من أسباب مشاكلي يا والدي العزيز حسبي الله و نعم الوكيل ليتني ماني ولدك ليت ليت

الجو غيم و رشاش و خرب الجو طويل العمر ما أقدر أقول شي غير حسبي الله و نعم الوكيل

أشهد ان عمري سرق و السارقين كثر غير الله يقتص لي منهم بالدنيا قبل الآخرة

بع بع يا بو حميد و لا تنسى النصيفه :) الله يربحك و يشرفك هوايتك حلوة إستمر و لا توقف بهالمشروع و الله يقويك و يسعدك

هلااااااااااااااااااااااااااااااااااااااا عااااااااااااااااااالى

ما تشوف شر ترا المسئلة يببلها صبر شوي وان شاء الله تفك المسامير وتزبط الركبة او بدله وكالة لا تاخذ صيني ههههه

يسعد صباحكم بكل خير

هلا بك ابو نجلا
بتزين ان شاء الله بتزين
انت اللي زود عليك الضيق وجع الركبه كنك تقول فوق هم الليالي غرابيل 😄
بتزين الركبه وبيزين معها الخاطر ودايم خل في بالك انك سويت وسعيت بكل الطرق وماقصرت وبيجي يوم يفتح لك ربي باب فرج ماكنت تتوقعه ولا حسبت له حساب .
تفائل وحط في بالك الخير وبتلقاه ان شاء الله

و الشر ما يجيك يا بو حميد الغالي

صدقت المسألة يبغالها صبر و تريث أتذكر حكمة بسمة الغاليه و هي رب عجلة أعقبت ريثا

عاد أمس رحت المستشفى قدمت الموعد من عند مدير العيادات و قلت له عن الإلتهاب و ما قصر قدم الموعد و من بعدها رحت الصناعية أدور على ركبه مالقيت أصلي اللي عليه الكلام ههههه الله يسعدك لا و الله الله لا يحدني عليها . فعلا رحت الصناعيه أعبي فريون و بعدها تغديت يكفيني باليوم وجبه وحده ثم طفيت و نمت و ما صحيت الا تو و رجولي ثنتينها متعورة صليت الوتر جالس و دعيت ربي و بعدها خذيت كاسه كابتشينو من محطة قدام البيت ( وادي القهوة ) بعدها صليت الفجر و عقب ذا كله حاليا بالعزيزيه أنتظر الشروق و أحس بزهق و ملل لكن الحمدلله على كل حال

أشوف لي طير بعيد في البحر يغطس روحه مرة ثم يطلع ليتني ذاك الطير مستانس أغطس و أكل صيدي من البحر لين ما أشبع و معطي مشاكلي مع الحياة أشكل

أهلين قطرات الندا صباح الخير

أنتي صادقة أعوذ بالله ما أدري وش فيني هو لأن الخطوة قصرت أصلا أنا ما أمشي مثل ما تقولين ممشى واحد رياضي طول وقتي جالس متكرفس أو متربع مالي مشهى بالمشي من الخمول فكيف بالله يجي وقت يفرض علي نظام علاج كعلاج طبيعي لعضو من أعضا الجسم و هذا العضو حساس مثل الركبه ما حن بناقصين على قولة أبو حميد وجع على أوجاعنا

و الشي الثاني أضيق بشكل لا يتصور من قعدة البيت عندي كره من البيت بشكل ما تتصورينه ما أحب أجيه الا وقت النوم و بس تخيلي لو شخص مقعد و فرض عليه العيش في بيئه يكرهها ما راح يعيش حياته بياكلها تبن مو بس خابور و هوا

الحمدلله ماني مقعد و الله لا يقدر على أحد منكم و يكون مقعد لأني شفت بالمستشفى حالات الله لا يقدرها علي و لا عليك و لا على حد منكم شي شي الله وكيلك

نعم حاليا طلعت الشمس و أسمع صوت الموج الدافي

يا رب تزين و ان ما زانت يا رب ما نطق لها أي خبر :)

ابو نجلا تعلمني بالركبه انا من عشرين سنه قمت فجأه وطقت ركبتي ونسيتها وكنت بروح للحج ورحت مافيني شي ويوم الوقفه الا ركبتي منتفخه صارت كبر البعير وألم شنيع ماني قادره اتحرك واروح للدكتور قال الحين بالحج مقدر اسوي لك شي الا حبة مسكن واعطاني حبه سحريه واختفى الالم بثواني ومرت السنين وكنت مسافره لبلد بارد وتطخ ركبتي وش كبرها بغيت اموت من الوجع مابقى اشعات ولا تحاليل ويقولون مافيك شي وفجأه راح الالم والورم .. الزبده ان المها كان لايحتمل قدر انام ولا اكل ولا حتى اتنفس من وجعها وكنت في منطقه فيها ثلج وان صالت ركبتي قمت اعرق من الوجع شلون انت عمليه ومسامير وتعب نفسي واكتئاب والله مالومك لكن ثق وتأكد انها ماتضيق الا عند الفرج وبذكرك بحول الله .. وشفينا يارابطة مرضى الهلع والاكتئاب تقول خفافيش لانوم ولا هجده اعوذ بالله 😂 انا ماغير اطامر بهالمنتدى من قسم لقسم

انا بعكسك ان جتني نوبة هلع والا ضيق زبنت في بيتي ماحب اطلع ولا اقابل هالبشر الاصوات تزعجني ودي اكفخ اللي صوته عالي . ابو نجلا اشرب لك حلبه والله يقولون انها مثل الحديد تجبر العظام .. انا جربتها في ازمة حساسية الصدر يومين وكني مامرت علي ابد .
اذا تبي طريقتها جيب حلبه من العطار منظفه وزينه واطحنها وكل يوم الصبح خذ ملعقه متوسطه من الحلبه وحطها في كوب حليب دافي وملعقة عسل واشربها اسبوع وبتشوف الصحه وشلون بس يمكن تسمنك شوي .
اخو صديقتي صار له حادث وصار معه بعض الكسور في ضلوعه وودوه المانيا ولعبو فيه وشين وعما عين ويوم رجع أمه تفرغت له كل يوم مرقة لحم مع خضار والصبح وقبل النوم حلبه مع الحليب وشهر صار كنه جني مافيه الا العافيه .
جرب منت خسران شي ومالك الا العافيه ان شاء الله

ما تشوفين شر قطرة ندى أنا أقولك ماهي بسيطه الركبه أصلا أي كسر مو بسيط لكن تختلف كسر عن كسر مثلا كسور المناطق السفليه أشد من الكسور العليا زي كسر اليد مو مثل كسر الرجل و لو انها كلها عظام لكن المناطق السفليه هي اللي عليها حمل الجسم و تكون أصعب . أقولك و الله لو ان مزاجي شرح دايم ما تجيني نفسيه أبد كان قلت بالطقاق يالركبه و المشكه هي لا صارت هي اللي تقضي لزومك و حاجتك و أنا طبعي حامي حامي عجل ان ما جا الجواب بدري و الا هملته عساها خيرة و كفارة ذنوب و رفعة درجات

قد حجيتي قطرة ندى أنا ما سبق لي أحج

ما شا الله مين قدك راعية ثلوج أكيد روسيا و الا كوريا الجنوبيه :) الله يسعدك يا رب وين ما كنتي

يا صبركم على البيوت أنا خير شر ما أداني البيت

معي حلبه مطحونه آخذ منها شوي و أكب عليها شوي مويه بحيث تكون مثل العجينة كورة صغيرة و ألقمهاو استمريت عليها كم يوم ثم تركته

صادقة يسمن

كسر الظلوع أشين من غيره الحمدلله انها ركبه

أعرف ولد جارنا جاه حادث و تفتت الركبه عنده و سوى العمليه في المواساه و كانت نتيجة العمليه انها فاشلة فسواها في المانع و ضبطوها له

هههههههههههه الله يجزيك خير نقضي أوقاتنا بهالمنتدى مالنا سلوان الا فيه عسى الله يصبرنا و يسقي بذور التوفيق للتفاؤل و يقسم لنا الحظوظ الجزلة و لا حول و لا قوة الا بالله

ياللـي علـى شـان معكـازي تبيـن لــي
رجلـي علـى حالهـا وانـا عـلـى حـالـي
والكسر ما هوب في رجلي علي كلي
وانت السبب في الغرابيل اول وتالي
تكفـي مراسيلنـا العـجـلات يــا خـلـي
عن مخذ الاخبار والا شوف الازوالـي
قلبي وقلبـك توصـل لـك وترسـل لـي
والله انها اشد من موجـات الارسالـي
ردن سلامـي عليـك وجـن وقالـن لـي
انـك ترحـب وانـا فـي خاطـرك غالـي
ليـت الغرابيـل جتنـي مـن عــدو لــي
إن مـا تقاضـيـت والا بيتقـاضـى لــي
لـكـن مــن واحـــد ذكـــره غـنــاة لـــي
مـا زلـت احبـه,, وابـا احبـه ولا ابالـي
لامـــر طـــرق بـخـدراتـه ســـلام لـــي
كـنـه يـسـلـم عـلــي بـصـوتـه الـعـالـي
خلوني اسج عن موضوعه احسن لي
والا الغلا,, والله ان يبطـي هـو غالي

https://m.youtube.com/watch?v=EIlEpvAp9bw

حي الله الشاكر كيف حاااااااااااااااااااااااااالك

ابونجلاء ان شاء االله فترة وترجع زي اول باذن الله

وين عيووووووووووووووووووووووووووووووون

وين شااااااااااااااااااااااااطئ


https://www.youtube.com/watch?v=cfPh6oLBwn4

السلام عليكم كيف حالكم

عالي اذكر يوم كنت بدوره العسكريه 2013

كان معانا واحد المدرب كان حاط عليه دايم يعاقبه

واذكر انه اكسرت عضمه الفخذ وقدم استقاله ورفع قضيه ع المدرب

هذي ثاني مره يقدم استقاله ماادري المدربين اشفيهم عليه مع انه طيب اكثر من لازم

بعدها بكم سنه شفت اخوه وسالته عنه قال انه راح المانيا يتعالج والحين ماادري عنه شي انقطعت اخباره

ابو حميد كيف حالك يالغالي بشرنا عنك حصلت ليركا ولا لا

https://youtu.be/ZQPlSyaqmII

الوقت قاسي

السلام عليكم ورحمة الله
حياكم الله جميعا إخواني أخواتي
اعذروني على الغياب الطويل
بعد التحسن الملحوظ في بداية تحولي من الفليوكستين إلى الباروكستين دخلت في حالة اكتئاب شديدة جدا بعدما تمت رقيتي على يد شيخ (قال عندي مس وسحر)
وربما لم تعد جرعة 20مل من الباروكستين (سيروكسات)كافية

مرحبا باختي صامده يالله حيها اهلا برجعتج

ابو نجلا لا والله مارحت لا لكوريا ولا روسيا بس ودي اروح كوريا لولا هالخوف من الطياره اللي حاني وكبلني .. كنت في بريطانيا وابشرك ايه حجيت يارب لك الحمد الله ينولك حجه مقبوله ان شاء والله وتقضيها وانت ماشي على رجيلاتي وركبتك طيبه ومتعافيه قل امين

صامده حبيبتي الله يفرج كربك وتعدين النوبه وتعدين هالمرض بكبره مافي شي بعيد عن الله .. فرجي عن مسلم وبيفرج لك ربي اسعي بكل الطرق والله مايضيع سعي مخلوق . طمنينا عنك

اهلين ابو نجلاء انت االي اخبارك
انا مرضت وجاني وسواس كل شوي اوسوس بمرض
مره اقول اشبه وجهي منتفخ شكل معاي كذا ومره اتوهم ان يدي متغير لونها واقول شكل فيني كذا هههههه
ماقول غير يااااللله الشفاء من عندك يارب

لوليتا كان عندي موعد اليوم مع الدكتور النفسي يقول مشكلة الناس القلقين تركيزهم على اجسادهم ٩٥ بالميه ويراقبون اجسادهم وينسون العالم الخارجي تماما وكل ماراقبو كل مازادت الاعراض وكأنكم تنادونها .. صحيح كلامه انا من اصحى وانا اترقب وافكر حتى باظافري 🤣