|
الله يوفقك اخوي بدر ويكتب لك الخير .
ابو نجلا اسكت اليوم مانيب صويحيه جايتني دوخه مطفشتني مع اني امس وش زيني مدري هو من اني مانمت زين امس والا فيني شي مدري |
|
اقتباس:
العقال يا رجال ما أدري من اللي في باله اني مخليه سبيل و لا رجعه طيب خذه و رجعه بس عادة الأخوان مع ان ما في البيت الا أخوي المعرس و الآخر الصغير اللي توه مخلص الكليه و أشك انه هو بس سجل يا مدير واحد فدى وش نسوي حتى الطاقيه من عرفت ان العقال ما تيسر لي حذفتها عادتي ألبس الشماغ من دون طاقيه تصدق منتظر مفعول السركويل و انام لا يفوتني موعد علاج cpm آه يا الدنيا اللي حدتنا ع غير ما نبي يلا خيرة |
قطرات الندى تقوي و الله يقويك
شكلها من متأرجح ههههههههههههه طيب نامي زين ما تعرفين ان النوم رقم لا يستهان فيه من أرقام الصحة النفسية و الجسديه ما تشوفين شر و الله يبعد عنك الضيقة و الدوخة عاجلا عاجلا إن كنتي ضايقه للحين فما في داعي تحطين حرتك فيني إذلفي المطبخ و حطي حرتك بالصحون و الأكواب أهم شي انك تخربين و تكسرين الله لا يكسر لك عظم و يجبر كسرك نامي و تصبحين على ألف ألف خير |
|
لحظة تعال يا عاالى وين بتروح ............. قربك امان وبعدك خطر
انت وانا طول الزمن ما نفترق .............. لو الجروح كبار الجبال |
ابو نجلا لا والله ماني متضايقه بس دوخه قريت قران وهذا انا اتحرك كني روبوت الي لعنبوها ياكرهي لها تموج بي والمشكله ماعرف اوصفها .
الدكتور قالي اغلب الاعراض النفسيه مايعرف الشخص يوصفها للدكتور مثل الدوخه ومشاعر الاكتئاب والام المعده وكذا . تصدق عاد يابو نجلا اني حاسه انك بتطيب وبتغدي حصان بتقولي ليه حسيتي بقولك مدري بتقول تبين تجبرين خاطري اقولك لا بس كني حاسه بمواري العافيه فيك وقل ان شاءالله ماعلى الله بعيد . |
لا والله مو من متأرجح يابو نجلا بالعكس امس كنت رايقه يوم سألته وقالي ماتخوف بس مدري يمكن نظلت نفسي 😃
|
ابوهذاااااااااااااااااااال كيف اموووووووووووووورك عساااااااااااك بخير يا غاااااااااااااالى
================================================== ==== اعيد الشيلة هذه اكثر من عشر مرات صرت اتلذذ بتعذيب نفسي واخاف يتطور الامور لبعد من كذا سبحان عشرين سنة مرت ومدري كم بااااااااااااقي تصدقون كثير من الاحيااااااااااان الى جاني عقوبة من ذنوبي يا رب مغفرتك ورحمتك لوم النفس ذبحني https://www.youtube.com/watch?v=3CH12jlYAhs |
أخي الكريم أبو نجلا،
داني بوي Danny Boy اسم لأغنية قديمة جدا و أشهر من نار على علم، بلغتنا من الممكن أن يكون معناها "ولدي داني أو يا ولدي داني"، الأغنية هي على لسان أم داني فهي في البداية تودع إبنها داني الذي سيهاجر لبلاد بعيدة للعمل و هذا الوداع في الحقيقة هو وداعهما الأخير في هذه الحياة الدنيا، تغادر أم داني الحياة و هي كلها ثقة بحب إبنها لها و كذلك كلها أمل على أنها ستلتقي و تجتمع به في الحياة الآخرة، هذا طبعا حسب فهمي البسيط و المتواضع للغة الانجليزية. سبب اختياري لهذا الاسم هو فيض الرحمة و الحب اللذان غرسهما الله سبحانه و تعالى في قلب كل أم في هذه الدنيا سواء أكانت من البشر أو الحيوانات لصغارها، لن تجد أبدا في هذه الحياة الدنيا حب أنقى و أخلص من حب أم كابدت الحمل، الوضع، الرضاعة و السهر من أجل أن تعيش و تراك سعيدا فقط لا غير. للأسف الشديد الدنيا الآن لم تعد كالسابق قبل زهاء مئة عام عندما ظهرت اغنية داني بوي إلى الوجود، في الماضي كان الكبير في السن معززا مكرما و مصدرا للخير و السعادة في بيته و مع أبنائه، يعتنون به و يقومون بما يحتاجه حبا و كرامة حتى يغادر هذه الحياة الدنيا و هو مرتاح و راض عنهم أما الآن فيقومون بإرساله إلى دار المسنين طبعا بعد أخذ كل ما يملكه من مال و عقار و لا يتواجدون إلى عند الدفن و العزاء، عليهم من الله ما يستحقونه و لا أريد أن أقول أكثر من ذلك. هذه هي اغنية داني بوي https://youtu.be/-Jgma--0WYU و هذه صفحة ويكيبيديا عن اغنية داني بوي https://ar.m.wikipedia.org/wiki/داني_بوي_(أغنية) |
محمد وشفيك امس كنت رايق شوي شكلنا نظلناك ..
ماتشوف شر وان شاء الله تعدي هالغمامه يارب |
السلام عليكم
هلا بكم أخواني أخواتي الكرام و الكريمات سلامتكم جميعا من كل بأس و يارب تلقون في حياتكم كل خير ربي يوفقك أخوي بدر و يجعل الخير مفروش قدامك و تحقق اما لك رائعة أبيات الإمام الشافعي اخوي داني و هذي أعتبرها شمعة تنور طريقي سلامتك أختي الغالية قطرات من الدوخة و من كل بأس سلامتك اخوي محمد البطل المكافح و أزمة تعدي مثل ما عدت غيرها يا كريم ربي يجعل ما شفته اخوي أبو نجلا طهور و رفعة في درجاتك و ربي يزيل الامك و تنعم بالصحة و العافية بالنسبة للضعيفة أبو نجلاء تراها صماء لا تسمع لأن عويناتها كل وحدة لون ، هذا النوع يجي كذا لأن كل عين لون سبق تبنيت وحدة نفسها لأنها بيضاء سميتها فلة و اخوها سميته مشمش لأن لونه مشمشي ، انقذتهم رضع مرميين بالشارع مع انهم نفس فصيلة اللي عندك تصدق ما كنت اعرف ذي المعلومة اللي تخص الصمم ، كنت يوم اناديهم الكل يجري باتجاهي ما عدا فلة و دايم مطيرة عويناتها متفاجئة خايفة بعدين قرأت المعلومة و عرفت لأن عويناتها كل وحدة لون ، وحدة عسلية و وحدة خضراء و هذي الشارع خطر على حياتها لأنها ما راح تسمع أصوات السيارات و تنتبه لها لذلك فيه حساب انقاذ بالشرقية يرعاه أخ فاضل شرواكم اسمه محمد الفرج يعرض في حسابه اللي بالإنستجرام القطط المتخلى عنها و المريضة للتبني بس ترسل له صورتها و مكانها و رقمك للتواصل و يارب يسخر لها أطيب خلقه و اوفاهم أما بالنسبة للضعوف الرضع اللي تبنيتهم مؤخرا واحد منهم مكسور ذيله و ساقط على الارض يسحبه و مايل على جنب ميلان كامل و وحدة من رجليه يسحبها سحب شكله طفل داعسه بالغلط في الشارع ، لأن لو كان اللي داعسه بالغ كان زمان انفرم حبيبي بعيد الشر عنه على طول يبكون ، تحسهم عشان فاقدين أمهم ، صدق من قال : اللي من غير أم حاله يغم مشكلتهم و لا نوع حليب عاجبهم مع أنه مخصص للقطط ، ما غير اقطره تقطير في حلوقهم غصب عنهم ، حتى و أنا اقطر لهم يصارخون و يبعدون افواههم ، مساكين جوعانين و لا يعرفون وش يسوون. أدعي ربي متى يكملون شهر حتى اعطيهم فتافيت الدجاج المسلوق و ارتاح من الرضاعة و همها و هم يرتاحون وين اخونا محمد الأمين شاطىء الراحة عسى ربي يطمنا عليه |
بالنسبة لحساب الانستجرام المتخصص في تبني قطط الشرقية اخوي أبو نجلاء :
all_pmp |
اقتباس:
امـوري وللـه الـحـمـد طـيـبـه الـقـلـق لا زال مـوجـود لـكـن اذا طـلـعـت مـن الـبـيـت يـخـف عـلـي ولا تـنـسـى الـمـره الـثـانـيـه تـعـزمـنـي ولا بـنـعـطـيـك ( فـلـكـه ) انـا و ابـو نـجـلا ههههههه اللـه يـوفـقـك |
اللـه يـجـزاك خـير قـطـرات الـنـدا
اللـه يـجـزاك خـيـر عـيـون مـتـفـائـلـه |
ولأن الصباح بسمة رضا ونبض جديد بأنفاس جديده .. إِملأ روحك تفاؤلاً وإنظر الى يومك كأنه أجمل يوم في حياتك فالسعاده لا تُشترى انت من يصنعها .. صباحكم سعادة دائمة أحبتي 😊💕 |
هلا ظلو أسعد الله صباحك بكل خير يالغاليه
نور الصباح بطلتك 🌹 أسأل الله لك كل خير يا نور الصباح أنتي :)🌹 |
أقابلكم الظهر حاليا أنتظر موعدي
|
اقتباس:
و الله إنا نتمناله أبو حميد كل ما فيه سلوة عن اللي هو فيه و كذلك أتمنى لك يا بو هذال و الجميع و الله يقويكم و ينصركم و يسعدكم |
إفلقني ان كانت حقيقيه
هذي شفرة ما يفكها الا عقلي إكسيوزمي :) رحت الموعد و أول جلسة لي مع جهاز CPM الأمور تمام لكن الجلسات الأخرى هي اللي عليها الكلام و الله يعين كلمت الدكتور في الركض قال لا تستعجل الأمور حبه حبه حتى تثنيها بالكامل امممم طيب يصير خير يا رب كيف جوكم يا أهل الغربيه و الوسطى و الجنوب عندنا الشرقيه الجو مخلوط غبار أفقي علوي على سحاب و جانا رش لا يذكر من أمس العصر صاحي و لا لي نية في النوم الا الليل مع اني خذيت العلاج و قلت بنام لكن قبلها نمت نومة قوية و عشان كذا ما جاني النوم |
اقتباس:
مصير الوحدة يتبارى مع النصر و يفوز النصر عليه بإذن قوي قادر :) مصير وحدتنا ننتصر عليها بأي سبيل كان وان طالت الوحدة لا بد لا بد لا بد أن نترآئى ذلك و يتجلى لنا بوضوح آه يا أيها المصباح السحري أين أنت يا علاء الدين و مصباحك و جنيك تصدق أبو حميد ان فيه سحر ما يكفر صاحبه لو تعلمه و لا يقتل و لا يعتبر ذلك من الكبائر نفسي أتعلم السحر اللي على سبيل الفراسة و اللعب اللي ما فيه صرف و لا عطف و لا خراب بيوت سمعت هذا من العلامة الددو الشنقيطي و كلامه أقنعني ×*× إهداء يعجبك جتنا الصبح و عيونها ذبلانه حلفت يمين البارحة سهرانه مستاهله و الله حيل و الله و حيل روحي اشكي همج لليل .. لليل ذكرين من جنت أشتكي لك آنا ضحكين من جنت أشتكي لك آنا https://www.youtube.com/watch?v=sdSah2V4-2I |
اقتباس:
سلامة راسك يا بعد راسي و ما تشوفين شر عليك بفيتامين ب المركب و في فيتامينات زينه جدا مثل رويال جيلي بس تخيري النوعيه الممتازه و في فيتامينات فيها حرف الباء و الياء و الواو و أظن الراء بعد أزريت أذكرها و عيت بس أجيب لك إسمها بعدين و الله يكتب أجرك لا تجهدين نفسك بالقراءة إذا شفتي نفسك و الدوخة استقوت خذي فترة راحة و رددي لا حول و لا قوة الا بالله إن شاء الله أطيب الله لا يعوق بشر و أغدي طير سابح سارح مارح و تطيب الجروح كلها بس خليني أشوف الألم ذا و الورم وش سالفتهم شكل زان الوضع لهم و على صكة بلوت و يتقهوون و مريحين تدرين جتني نية أشق محل الورم لأنه غادي منتفخ ههههههههه أعوذ بالله منها من فكرة مقروشني جد ما وده يغادر محله |
اقتباس:
اقتباس:
من قلتي لي انها صما كأني لاحظت فيها صمم بس ماني متأكد اللي خلاني أتردد في الحكم لأني من أكلمها كأنها تسمع بس الشغلة الثانيه اللي مخليني أقول انها صما انها تطالع كثير و تتلفت أي حركة قدامها طرقاس و الا شي يهفه الهوا توقف و و تعطيها وضعية الهجوم و كأن شي مكروه بيصير لها و بعد انها ما تحرك أذانيها تجاه مصدر الصوت ان كان من جانبها أو من خلفها ما أدري ما عندي خلفيه كافيه عن البسوس اللي قطع قلبي عليها ان ما لها ملجا سوى قراشيع على رصيف بيتنا من أكياس إسمنت و سيراميك في الليل تتخبى فيه و الى شافتني أقبلت تقبل علي و تماوي و تتمرغ فرحانه و دينها و دين تشوف قطو إما مارّ و الا رابض و إذا جا بس ملقوف و قرب صوبها تعطيها لغة إلزم حدك و لا يغرك اني وحيد و ضعيف و مسكين :) و الله مستعده للهواش بس ما تبغى أنهكها التعب و الجوع و الحر :( الله يعطيك العافيه لقيت حسابه و أرسلت له صورة البسه و رقم جوالي و موقعي مع معروض عن حالتها عساها يا رب لقت ملجاها عنده مشكورة بسمه لا هنتي و بيض الله وجهك |
شفت العشق شيسوي آه يا فلانه
شفنا العشق شيسوي آه يا فلانه آه يا غراب البين متى تفارق ؟! https://e.top4top.net/p_842gbams1.jpg |
|
اقتباس:
حي الله ذا القبال السمح رائع و خلوق جدا جدا جدا يا داني بوي لله درك تستحق قبلة بين عينيك الغاليتين على هذا الإختيار الغاية في الجمال أحب أسمع أجنبي لكن يكون على ذوقي و بشرط يكون مترجم أو حماسي طرب فقط أما غيرهم فلا أجيد اللغة الإنجليزيه رغم إنها لغة العصر و هنيئا لمن جمع بين لغته الأم و لغة أخرى لها ثقلها في هذا العصر كالإنجليزيه أمثالك أيها الكريم الطيب و الله شيء يندى له الجبين يا داني بوي دخلت دار العجزة و المسنين و سلمت عليهم كنت مآخذ أهلي يسيرون على ناس و الناس هذولا أمام منزلهم مسكن لدار العجزة و المسنين قلت خلني أشوف و شفت وضعهم يرثى له الله يكون بعونهم الله لا يجعلنا من هم سبب في شقاء والديهم الله سبحانه و تعالى دائما يذكرنا بالوالدين و يحثنا على طاعتهم و الإحسان إليهم و برهم و هل جزاء الإحسان إلا الإحسان يا رب ما نموت الا و والدينا راضين عنا تمام الرضا و العفو عنا عن تقصيرنا تجاههم عفا الله عنهم الحمدلله مع اني أقصر معهم كثير بس بعدها تتسمح الأمور ما أدري أحس اني مقطوط بالشارع و لقطوني أدري انها أحاسيس سببها الوحدة و الوحشة و الكآبة التي كنت أعانيها منذ كنت صغيرا و ليس هذا فقط بل أجد في نفسي تأنيب للضمير لتقصيري تجاههم و ما في يدي حيلة هذا أنا بكل جهدي أحاول و لكن لا تأتي على ما أتمنى تجاههم حسبي الله و نعم الوكيل و لا حول و لا قوة الا بالله ماش رؤيتي للأمور ليست صائبه و لن تصيب إلا أن يريد الله بقوته و حوله و لا أي بشر كائنا من كان يصلح الأمر و الشكوى لله بس لا تقولون قلة ثقة بالنفس هذا أنا منذ عرفتها https://f.top4top.net/p_842dvgb81.jpg |
مساااااااااااااااااااااكم الله بالخيرات
ابونجلاء مشكور على الاهداء داني عندي سوال لوسمحت انت من اي بلد وش نوع علاجك ما شاء الله عليك اشوفك صابر ------------------------------------------------- تصدق يا عاااالى ادمنت شيلات فلاح المسردي ادمان عجيب بس مدري وش السبب الى يردني للاغاني الله يعلنها ======================================== اليوم صحيت على كحة والم بالصدر قسم بالله الم شديد وكحة عنيفة رحت الصيدلية وخذت دواء ومضاد حساسية عندنا الجو غباااااااااااااااار وامطاااااااااااااااار وش الدبرة يا خوان مع قل الشهية ادمان قهوة وشاهي على جوع |
|
اقتباس:
كح كح :) العفو يا بعدي فلاح المسردي ما تحتاج شيلاته تهول أنا ماني على موجة وحدة أهم شي الكلمات و اللحن و لو فيها آهات نبرة حزينه يا سلام سلم و سلامتك و الله يعافيك من الكحه والحساسيه إنتبه من تقلب الأجواء لا تقلب جوك سو حالة إستنفار للغرفة صك الدرايش و جلدها بجلاد و حط منشفه تحت الباب و جود الباب تجويد لا يجيك صاروخ و لما تطلع دق اللطمه ما تحتاج شوير و أنت المشير :) سلامتك و الله الزنجبيل سمعت انهم يمدحونه يمقن و يمقن سالفة الجوع شوف و أنا أخوك أكيد من المزاج لو تعدل مزاجك داخليا بحيث أخذت الخلايا راحتها و الأعصاب كذلك راح تشتهي الأكل أترك عنك لو تعدل مزاجك ظاهريا هو صحيح يتعدل ظاهريا لكن تبقى في أصلها متعبه و منهكه و هنا الكلام لازم تآخذ راحتك بالنوم ، ان كان المزاج نازل البطن يطلب شي و ما تلقى شي يملاه الا السوايل فانصحك تكثر من المويه البارده مو بارده ثلج لكن مقبوله تقطع عطشك و تخفف عنك كثرة الشرب من الشاهي و القهوة و خل جمبك مكسرات لوز و ما شابهه تكون نفسك فيه وقت الحاجه تسد اللزوم عندي زيبركسا مع السركويل يا رجال تقول جازورا بس المشكلة علاجك غير علاجي و الله يعينك يا رب تلقى حل جذري أدري اني فلسفت عليك لا والله لكن هذا اللي عندي :) |
ابو نجلا ومحمد البدراني وانا اكبر مشكله عندنا مراقبة اعراض الجسد وفي كل مره يحذرني الدكتور من مراقبة الجسد مثلا : جاك صداع عادي من اي سبب صغير قمت تفكر ليه اكيد ضغطي مرتفع واكيد فيني شي انا لي يومين غثيان ومالي نفس اكل دخلت بقصص وافلام ويوم طفشت قلت قولون من زود الوسواس واللي ربي كاتبه بيصير .
ابو نجلا يفكر بركبته ومحمد يفكر بالاكتئاب والكتمه وانا بالدوخه و حومة الكبد هههههه يارب ارفع عنا واشفينا ومتعنا بحياتنا |
عندما ينطق الحق فقل للباطل ( إخرس )
يا للأسف هل أصبحنا بزمن يقال له ( أُعلُ هبل ) لست أعلم سوى سلوة تسلينا مع نوح عليه السلام و ما آمن معه إلا قليل https://www.youtube.com/watch?v=XE2aQzkoy6E |
اقتباس:
بالعكس يالغاليه أنا لك ناصح إذا شفتي إنك راح تتأثرين بمشاركاتنا هنا و تحسين انها قاومتك فعلا فلك حق في اللي تتخذينه تجاه نفسك أما الركبه فبسولف فيها إلى أن يشاء الله :) سلامتك من الدوخه عزيزة و غاليه يا قطرات الندا ما أدري تشبهين لي بـ لميا الحزينه لما شافت الموضوع كله حزن في حزن سنترت عند الباب تطالع وش حنا نسوي :) طيب هذا حالنا نواح خنساء ترثي صخرها طول عمرها :) https://www.youtube.com/watch?v=eFRw0XcluLk |
😂😂😂😂😂😂😂 الله يرفع عنا وعنكم والله مالومكم ولا اتضايق منكم بس يوجعني قلبي عليكم شباب بعز شبابكم اكتئاب واوجاع لكن الله قادر يغير الحال بحوله وقوته
|
ما تنلامين و الله و سلامتك شعورك مريت فيه بجد و مجربه صدق أتمنى لك كل خير قطرات الندا
كوني بخير أخيتي الغاليه |
من هذا المنبر ما انسى أمسي على الأخت الطيبه الغاليه ( لميا الحزينه ) 🌹
اللهم آمين يرفع عنا و عنكم و يتجاوز و يعفو عنا أجمعين و يرحمنا برحمته و يلطف بكل روح مسلمة🌹 |
هلا عاااالى الله يسلمك من كل شر
والله ما عااد ادري من وش جات الكحة والتهاب الحلق بس سهالات الحمدالله اما الشهية والله ما اشتهي شي بس تو جبت شاوروما جامبو والحمدالله طلعت ورحت مشوار اجيب سبح لي من المزاد باقي احاسبهم ويحاسبوني على السبح الى انباعت ===================================== هلا قطرات لا يضيق صدرك المكتوب مكتوب لا مفر منه |
محمد التهاب الحلق كلنا والله انا توي اطيب غير العطاس والكحه والكتمه والصدر يصفر واذانيي مقفله عشان تغيير الفصور والغبار .. سلامتك ماتشوف شر
|
الـسـلام عـلـيـكـم
اسـأل اللـه لـكـم الـعـافـيـه جـمـيـعـاً تـونـي قـايـم مـن الـنـوم ابـو نـجـلا تـحـلـمـت انـي رايـح لـمـسـتـشـفـى الامـل وقـلـت لـهـم ابـي اتـنـوم عـنـدكـم واجـرب عـلاجـكـم فـي الـمـسـتـشـفـى لـعـل وعـسـى الـقـلـق يـروح رفـضـونـي الا بـمـوافـقـة ابـوي بـعـدهـا خـرجـت مـن عـنـدهـم وتـداخـل عـلـي اكـثـر مـن حـلـم . |
السلام عليكم
أسعد الله جميع أوقاتكم بكل خير سلامتكم محمد و الغالية قطرات ما تشوفون شر الظاهر كل الخلايق قاعدة تعاني من الانفلونزا حتى الحيوانات الضعيفة من أمس و أنا حرارة بحلقي و كثير من قططي يعاطسون و يكحون و البعض تطور لالتهاب شديد و ارتفاع حرارة و امتناع عن الأكل ، اثنين قاعدة اعالجهم بحقن المضاد و حقن خافض الحرارة و ثلاثة بمضاد شراب اطفال من الصيدلية البشرية المشكلة أربعة منهم خوافين تطير عقولهم من يوم أقرب الإبرة منهم لدرجة كل شوية اسحب دوا جديد من القارورة و غير أنهم ما يدانون أقرب الشراب من افواههم ، يمكن لو تقولون من نص ساعة إلى ساعة إلا ربع تدوم المعارك بيننا و معي اخوي الصغير ماسكهم تفكرون أبالغ المشكلة ما يمرضون غير اللي ما يستطيع الواحد السيطرة عليهم كذا واحد ماتوا من حقين الشارع من اللي ما ينمسكون بسبب الزكام لأن الزكام يقولون البياطرة فيروس أشد فتكا من طاعون القطط لو ما تم علاجه الله يحميهم و يحمينا وياكم |
الله يشفي الجميع
بعد معاناة 14 سنة عشت بين الادوية والعيادات والمشايخ الحمدلله شفيت ، اكتئاب قلق توتر وساوس هلع رهاب . المشكلة طلعت عين وحسد انا كنت املك كل شيء تتمناه اي بنت وفجأه صداع اخر الرقبه واحيانا شقيقه وضيق وبكاء من غير قلق ولا اعرف السبب ثم دخلت دوامة الإكتئاب والهلع والرهاب الإجتماعي ثم الوساوس . اخذت ادويه اتحسن عليها جدا واذا تركتها انتكس ، قلت فيه شيء اقتحم حياتي فيه شيء مو طبيعي حصل معي وللأمانه تعالجت عند معالجه وعلى ما اظن كانت مخاويه هي من ساعدتني وخلال يوم كل شيء انسحب مني .. بفتره كنت اسمع رقيه كنت اتأثر اتعب لكن لما استمريت لمده 21 يوم اكملت الكورس شعرت ان معظم ما اعاني منه يخف وبدأت استرجع وضعي السابق ولكني لم استمر ولم اقرأ الاذكار رجعت لي الأعراض الا ان تعرفت على هذه المعالجة . طرحت الموضوع حتى يتفكر الجميع معي ........ قبل فتره مريت بموقف كسرني وسبب لي اكتئاب وهلع بسيط امام من حصل امامهم الموقف ، جربت الحرية النفسية نتائجها رائعه ومذهله . الان اداوم على الاذكار والاستحمام بالماء البااااارد والملح الخشن والحمدلله اشعر بتحسن سواء من اكتئاب اي موقف او عين حاسده ، انا انسانه اعوذ بالله من من هم حولي ناس حاسده حاقده جدا جدا انا والحمدلله امتلك كل شيء وهم احيانا من باب المزاح او المديح يقولون لي هذا وبعضهم والله قالها لي احسدك على تعيشينه ..... الموضوع بإختصار عين حاسده وطاقات سلبيه ، اختصار معاناة 14 سنة . الحمدلله الحمدلله الرقية الشرعيه والماء البارد والملح وايضاء خل التفاح والحجامه والحرية النفسية نعم من الله . |
| الساعة الآن 06:27 AM |
Powered by vBulletin® Version 3.8.11
Copyright ©2000 - 2024, vBulletin Solutions, Inc.
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2024 DragonByte Technologies Ltd. Runs best on HiVelocity Hosting.
المواضيع المكتوبة لاتعبر بالضرورة عن رأي الموقع رسميا