|
بوو
بوو ما ارتعتو يلا ارتاعو انا اختفيت لاني استحيت متغير اسمي وكذا بسم الله صرت عفريته وه بس ياحلوي يازين العفاريت كلهم وياشين الانس كل شي يحطونه علينا الله ياخذهم 😂 بس ترى الصدق الصدق في الوهلة الاولى بسم الله قل اعوذ برب الفلق احس كني خفت من اسمي (لحظة تفكير~~~~ ) 🤔 يامدير مدير. يعني انا ودي اغير اسمي مرة اخرى هالمرة اخر مره صدق 😅 على فكرة انا مانمت الا ساعتين مع اني سهرانه يومين ونص متواصله صايره ما انام كني خفاش☹ |
هلا هلا بالعيون المتفائلة وقطاوتها 💕
الله يعينك على فعل الخير. ويعطيك على نيتك يارب ❤ حلوة الكلمات اللي نقلتيها معبره وانا اعتذر اذا كلامي ذاك اليوم زعلك كنت منفعله شوي |
|
السلام عليكم
هلا فوفو مبروك الاسم الجديد ما عندك مشكلة أهم شي ان الاسم معجبك و ممكن ناخذها من زاوية عفرتة يعني شقاوة و خفة دم و مرح ، مو شرط معناه القريب لأن لكل اسم معنيان : قريب و بعيد سبحان الله مقطع أنثى حمار وحشي تلد مولودها فتعرضت لحالة إغماء بسبب الآم المخاض الشديدة، فما كان من الذكر إلا أن قام بإعادة إفآقتها حتى لا تموت ويموت الجنين معها، وبعد أن عاد لها وعيها ساعدها في إخراج المولود. لكن بعد إنتهاء الولادة وبشكل مفاجئ هاجمت الأنثى صغيرها في محاولة لقتله كونه سبب الألم مما دفع بالذكر “الأب” من جديد إلا إنقاذ صغيره وهذه المره من ركلات أمه الغاضبه، وبعد أن هدأت وجد الأب بأن صغيره لازال في غيبوبة ولَم يستيقظ فقام بمحاولات إنعاش له حتى نجح في الأخير من إنقاذه، في مقطع مذهل لعالم الحيوان الذي تمتلئ به العاطفة رغم حيوانيته. https://youtu.be/k2lgykuFf5E شاهد انثى حمار الوحش يغشى عليها اثناء الولادة |
اقتباس:
انا ارغب بالمعنى القوي اللي ينخاف منه ماينخاف عليه 👹 هاهاهاها لازم ضحكة شر بفخامه 👹 |
عيون صوري لنا قطو من قطاوتك
مدري فجأة صرت احب القطاوه مع اني اصلا ما ادانيها بس صور تكون سليمه بدون اصابات ارجوك مو واحد مفضوخه عينه والا مقطوعه يده نبي قط سليم من الاصابات عندك قطو اسود😅😂 وش الالوان |
انا في الواقع
اي شي كبير متحرك وله عيون اخاف منه يومي صغيره كنت اربي ارانب بس ما المسها ولا اشيلها ونعم التربيه 😂🙂 اعطيها خس وانا ماده يدي من بعيد بس |
هلا فوفو
انا قطاوتي معظمها قطط بلدية ، نفس اللي تشوفين في الشارع مثلا عندي الشكل البقري : يشبه البقر يجيك ابيض و اسود ، او ابيض و مشمشي و الابيض و الاسود اكثر فيه عندي اناث كاليكو يعني ثلاث الوان ابيض و بني او مشمشي و اسود ، و سبحان الله كل اللي تشوفين ثلاث الوان يجن اناث ابحاول افتح الجوال القديم و أطلع بعض من صورهم ان شاء الله سبحان الله طبيت في مقطع باليوتيوب حنان الاب الحمار الوحشي مع ابنه اليتيم بعد وفاة أمه مع ان الحيوانات مو مثل البشر ، الحيوانات ما عندهم ابوة ، فقط وظيفة الاب الانجاب ، و الأم هي اللي مسؤولة عنه من يوم الحمل لبعد الفطام هذا المقطع https://youtu.be/sEgGeGzuWeY هل سيبقى مع ابنه اليتيم ام مع زوجاته مشهد مؤثر |
اقتباس:
مستمره بالرفس تبي تقتل ولدها!! مو رفسه لحظة غضب وخلاص لا تبي تقتله حيوانه وين عاطفه الامومه شي مافهمته انا عموما ياعيون ما احب اشوف مشاهد كذا لانها تضايقني وتقهرني |
|
عيون اشوف تحطين مقاطع للحمير الوحشيه 😅
لاتقولين غيرتي ميولك و بتجمعينهم بدال القطاوه لا لا ياعيون 😅😅 انا الخيول تجوز لي ويشدني منظرها فيها عزه وشموخ 🐴🐴 مدري احس الحيوانات اكلات اللحوم شكلها مفترس يخوف احب اللي ياكلون عشب وخضار بس يعني القطوه مثلا البعض يشوفها كيوت وحلوه لا انا اشوفها شريره ومفترسه https://m.youtube.com/watch?v=IWKO7p6VlnQ |
فوفو
خليتيني اموت من الضحك لين دمعت يوم تقولين شكلك بتغيرين نشاطك و تمشين و تقشين من الحمير الوحشية بدال البسوس انا يوم أعرض شي ما هو عشان مفتونة بشكله الخارجي مثل باقي البشر مع إن خلق الله كله حسن في نظري حتى القرود يشهد الله انا أضعه بسبب معناه ، يعني المضمون مو القشرة هزتني رحمة الاب بصغيره و ام صغيره يوم ساعدها على الولادة و ساعد صغيره على التنفس و انقذه من امه المتالمة اول شي بدال تكرهين أمه و تسبينها احمدي الله على نعمة العقل اللي ميزك بها عنهم و فضلك بها على سائر خلقه ، لو لاحظتي الام من شدة الوجع اغمي عليها ،يعني ولادتها كانت متعسرة و مفضية لهلاكها ، و لأن ربي حرمها من نعمة العقل شعرت ان ولدها تسبب في ايذائها و تبي تعاقبه ، تدرين ان فيه من القطط اللي اولدن عندي تشرد عن عيالها بمجرد الولادة و لا حتى تقطع الحبل السري و لا تاكل المشيمة ، تشرد ما غير غبارها ، و أنا القط فيهم من الارض و اقص حبالهم السرية اللي ناشبة في المشيمة ، و يوم سألت الأطباء و الخبراء و قرأت ، طلع ان الوحدة فيهم يوم تتألم و تتعسر ولادتها من شدة الألم تشرد عن عيالها ظنا منها أنهم سبب ألمها و تخاف منهم و تهرب و لا يمكن ترضعهم و أنا اللي ابلش فيهم ، و على فكرة تلقينهن بكريات أول ولادة لهن ، و تلقين انثى الحمار الوحشي كانت اول ولادة لها ، و على فكرة القطط حديثة الولادة اللي ما كملت عشر ايام ما تعيش لو ما جبت لها ام بديلة ، مهما اسقيتيهم حتى من الحليب المخصص لهم اللي عليه صور قطط من محل مستلزمات القطط ما يعيشون سبحان الله من تجاربي و تجارب الآخرين ، لذلك لازم احصل لهم ام بديلة بأسرع وقت و الا يموتون بسبب الحليب الصناعي او الجوع لكن لا كملوا اكثر من عشر ايام و فتحت عويناتهم يبي يناسبهم الحليب المخصص |
و الواحد لازم يوسع مداركه و ينظر لهذي المخلوقات كوسيلة تقربه من ربه و يذكر الله و يسبحه يوم يشاهد تصرفاتها و يحمد الله اللي فضله عليها و على سائر خلقه بنعمة العقل و غيرها من النعم
اما اوصفها بذي الاوصاف اللي لا تليق بنقصان عقلها مثل شريرة و ما فيها عزة هذا مو منطق ، ما خلقوا انفسهم ، ربي اللي صنفهم اللاحم و غير اللاحم العشبي ، ما صنفوا انفسهم شكلا و مضمونا مدري ليش بحكم اني كنت معلمة في القطاع الخاص مدة ست سنوات و درست كل المراحل من الابتدائي للثانوي ، قد تكونين طالبة ثانوي ، اسلوبك يذكرني بهن و قد لا الومك في هذا ربي يحفظك و يبارك فيك |
اقتباس:
وفصفص وخل نسولف ،،، شوفي ياعيون اكيد انا فاهمه انه شدك المشاعر واحساس الاب مو الحيوان نفسه لاتفهميني غلط انا في البشر ما اطالع الشكل وش بستفيد من المظاهر بس في الحيوانات يعني لو بنتقي حيوان يشدني الشكل عشان كذا احب الخيول والارانب وعشانهم ياكلون عشب وخضار ههههه احب النباتيين ترى انتي ياعيون هدفك غير لانه انتي هدفك خيري انتي تربين عشان تنقذين على فكره القرود احب اتفرج عليهم يشبهون حركات البشر كثير وحركاتهم تضحك |
وعادي اختلاف اراء واذواق
مو حرام لو فضلت شكل حيوان عن اخر وانا ماسبيت ياعيون ذكرت صفات مثل الافتراس واكل اللحم تختص بها حيوانات معينه القطو مثلا انا اخاف منه مااشوفه اليف بالنسبه لي انا بس هالشي ممكن العله فيني زي الاكل مثلا الناس لهم حرية رغباتهم واهوائهم لاتتضايقين ولاتزعلين خذي شمي هالورده 🌹🌹 تصبحون على خير 🌹🌹🌹 |
اقتباس:
او علم حيوان حسيت عندك معلومات وثقافه عن الحيوانات وانا ترى الدنيا عطتني كفوف عشان كذا قررت اخذ الدنيا بضحك ووناسه ومزح لا اكثر احاول اضحك على اي شي عشان انسى الهم ما انظر للدنيا بجديه ابدا |
تسلمين على الشاهي و الفصفص
تخصصي آداب و علوم إنسانية ، بعيد كل البعد عن العلمي ، ليتني تخصصت بيطرة كان رحمت هؤلاء الضعوف من الجزارين و المرتزقة و كان صدق فرفرت بسيارتي و عالجت الضعوف المشردين في اماكنهم بالشوارع ، تدرين ترى مو كل اللي عالجتهم بالشارع قشيتهم عندي ، أنا صحيح اخذتهم للعيادة و كملت علاجهم عندي في البيت لمدة اسبوع او اكثر ثم رجعتهم اماكنهم بالضبط اللي اخذتهم منها لانهم يبون يكونون حرام تعودوا على حاوية معينة و بسطوا نفوذهم عليها بعد معارك ضارية مع القطط الاخرى ، و اذا رجعتهم شارع بعيد ياخذون وقت لين يلقون لهم حاوية يتقاتلون من جديد عليها و يبسطون نفوذهم على المكان طبعا اللي ارجعهم اماكنهم يكونون قطط كبيرة و اصابتهم ماهي معيقة او تعافوا من مرضهم ، اما الصغار و أصحاب الاعاقة اخليهم عندي لين يقضي الله امرا كان مفعولا |
أما بالنسبة للكفوف مين ما عطته الدنيا كفوف و سفلت فيه و اوجعته بصدماتها و الحمدلله على كل حال
كم عاقل قلبه من العقل مليان فاجاه من عقب السكات التهذري دنياك ما تصفو لحي بالاحسان الا سقته من الشرى السقطري تدرين بالعكس انا مو جادة ، انا أجمع المتناقضات ، حسب الموجة ، تلقيني مع العاقل رزينة ، و مع المجنون عبيطة ، و مع الطفل بريئة ، ماني بشخصية وحدة و لا طبع واحد تدرين سبحان الله شدني المقطع الثاني و عدته كذا مرة ، أسرني عطف الاب على ابنه اليتيم يوم ماتت امه ، ظل هو و ولده حول جثة الام ساعات طويلة حتى انتفخت و جات الطيور تاكل منها ، و الولد الضعيف يقلب في امه الميتة ما هو يائس و نظرات ابوه كلها حزن و ما تحرك و لا لحق إناث القطيع اللي بالقوة و المعارك الدامية الطويلة اللي ممكن تمتد شهور طويلة بينه و بين الذكور حتى يستطيع حيازتهن و مع ذلك تركهن يرحلن و جلس يواسي ابنه ، و بعد مرور الساعات الطويلة لحقهن بعد ما ابعدن لو انه اب بشري تلقينه عشان زوجة وحدة يجيبها لايتامه حتى ما يدقق في مدى جدارتها و استحقاقها للرقي في أن تكون ام بديلة لأبنائه الأيتام ، قليل اللي يدقق سبحان الله |
يمكن تشوفيني جادة عشان التدريس اسبغ علي شيء من الوقار ، بحيث إن المعلم لابد أن يكون جاد داخل قاعة الدراسة معظم الوقت حتى الطلاب يتقبلون منه ، لكني بالعكس لو عاشرتيني تلقيني بسلاسة طفلة و لطافة قطة
أما بالنسبة للقطيع ، القطط و فصيلة السنوريات كلها الاسود و النمور و الفهود و القطط ما تعيش في قطيع ، تعيش القطط كعائلة تضم الام و الابناء لين مرحلة الفطام فقط ، حتى الابو ما هو حولهم ، بعكس الاسود الوالد يكون حول عائلته سبحان الله ، و القطط من عشرتي لها نفس الاطفال الرضع ، أحس كأن حولي أطفال رضع ما تجاوزوا الأربع أشهر ، نفس التصرفات سبحان الله ، فقط انهم باذيال ، لدرجة مرة كتبت في الاويه الخاص بالواتس هذي الجملة : القطط أطفال و لكن باذيال ، و كل من قراها دخل علي و قام يضحك يفكروني أمزح ، و انا من جد أحس كذا و تدور الأيام و اطب في معلومة حسب دراسة اجنبية تقول ان مستوى ذكاء القطط نفس مستوى ذكاء طفل بشري عمره ما بين شهرين و أربعة أشهر ، و الكلاب ما بين ست شهور الى عامين ، اذكى ماشاء الله الكلاب عشان كذا يستطيعون تدريبها على الحراسة و الصيد و غيرها |
يتم اجراء أخطر وأدق العمليات الجراحية في أهم عضوين من الإنسان في مخه وقلبه و عليهما تتوقف حياته؛
يجريها طاقم طبي يرتدي ملابس فضفاضة و يغطون رؤوسهم و يرتدون كمامات على وجوههم و قفازات أيدي و لم تك عائقا لعمل دقيق و خطر👌🏻 ثم يأتي من يقول الحجاب و النقاب من عوائق العمل والتطور والتحضر!! عجبا!!!! قرأتها و أثرت فيني ، فعلا اللي يبي يتعلث ما راح يحتار اللهم احفظنا بالإيمان |
جفاني النوم مع إني صاحية من قبل الفجر ، و انواع القلق البارح ، و الحين أنواع الصداع شكلها بداية زكام و الحمدلله على كل حال
وينك يا عفريتة نتعلل لين يداهمنا النوم |
اقتباس:
جالسه اسمع : خلقت في الدنيا وانا ما معي شي . . وبروح منها ما معي شي منها سجة مع الهاجوس طبيعة اللي .. طبيعة بموت ما جزت عنها أشكي على الخلاق وأرفع له ايدي . لا كثرت الافكار يفك منها ياجاهل الدنيا تراها كما الفي .. يا مخبل اللي في حياته ومنها إن ناحرت لك قامت تروح وتجي . . مثل الذلول اللي طويل رسنها وإن ادبرت خلتك طايح ومرمي .. وكم واحد له حاجة ما ضمنها. ( انا اشهد ) مسكين ياللي تحسب الواجد شوي . . والعافية لو تنشرى وش ثمنها لا بد ما نرحل عن المزح والغي . . ونسكن بيوت قبلنا من سكنها https://m.youtube.com/watch?v=YufKhHWrP-c |
وين الناس
ماتلاحظين انا عفريته من الجن وانتي وقطاوتك حنا تركيبه بكج متكونين من انس وجن وبهايم ثلاث عوالم بمكان واحد والله خطر هههههه هجو بقية الانس تبوني اطلع شغلو سورة البقره بالمنتدى😂😂🙂 |
اهداء يدل دربه
بالله ياريح ود لي خبر وعلوم https://m.youtube.com/watch?v=fhwqhpjmjyU |
فديتك انت و مصباحك يا شيخة
فعلا اول مرة انتبه للتشكيلة ههه القصيدة روعة يسلم لي ذوقك فعلا العافية ما مثلها |
|
عفريتة احبك حتى لو انك العفريتة مو بس فيك جني اسم الله عليك هههه
بس من جد من دلاختهم و مكرهم يتهمون ان الضعوف السود جن مع ان من عشرتي معهم يجون ألطف و أطعم القطط ، و مرغوبين برا كثير يكفي اللون فخامة |
اقتباس:
ويمكن اتطور اصير مارده بدال عفريته 😚🤗 |
اقتباس:
انا احسب ان بعض القطاوه السودا فيها جن متلبس البعض سمعت شيخ يقول كذا ومدري عن صحة الكلام اللون الاسود فخم في الملابس والفساتين. حلو يعطي طله اما في الاغراض الثانية والاثاث ما افضله احب الفواتح |
ابي حل وعلاج
للأرق 😕 صايره ما انام مدري ليه وهالشي يشتتني ويتعبني شربت لبن ثقيل عشان يكبس علي و انام كلت بنادول نايت ومافيش فااايده مفيش فايدااااه مانيش رايدااه في البعد عاشئاه وفي القرب عاشئاه زي العسل على ئلبي هواه زي العسل 🎤🎤🎤🎤🎧🎼. اختي سمعتني وانا اغني تقول ياحظ الصقهان 🙈 |
عيون بما انه صار بينا عيش وملح اقصد فصفص وشاهي
وش اسمك انا اسمي هديل جدتي هي اللي سمتني بطفي النور كود اخمد قود نايت 🌹🌹 |
يا رب لطفك بعبادك
الله من هم سكن قلبي الله من كرب شد علي الله من شدة قصمت ظهري الله المستعان |
للبدل او البيع
جسم انسان متهالك استخدام مرا سيئ الراس مخبط ومبوش فقرات الرقبة احتكاك المعدة قرحة قولون عصبي ارتفاع ضغط للبدل بجسم انسان ممتاز مع دفع الفرق لصالحه او البيع مستجعل |
اقتباس:
اكيد خلصت مسابيحك بعتها و انتهيت منها لا تستسلم للحزن و الهم و تغوص فيه كل اللي ذكرته في مواصفات البيع موجوده في اغلب الناس ليه ما ذكرت ان قلبه نظيف و كبير و روحه حلوه و اجودي و وسيم و ابن قبايل و عيله تبيض الوجه و اصيل و نشمي و فيه عزه نفس و جبال من الصبر و دورب من الكفاح عاد انت بيعتك هذه ماهي بحق و انا جيت اخربها عليك . الله يشرح صدرك و يفرج همك و يكشف الضر عنك |
هلاااااااااااا خلوووووووود
اشكرك على كلامك الطيب لكن احس نفسي غريق واخذني السيل احاول بكل ما اقدر بس للصبر حدود ما عاااد لي طااااقة |
انا اطلب الرحمة من الله
انا اطلب العفو من الله انا اطلب الجنة من الله انا اطلب المغفرة من الله انا اطلب الموت من الله |
محمد مالك قرايب ولا اصحاب في مكه ولا المدينه ولا جده
جرب تعال بالسياره قضيها سفره و عباده و تغيير روتين جده رايقه هالايام الاحظ مافي زحام زي عاده كل صيف صحيح الجو حار لكن تعال حاول تغير الحق خذ عمره ولا خذ زياره المدينه تريح النفس . |
اقتباس:
سمعت من الصبح حدا بنادي اللي عندو جسم متهالك وقديم للبيع قولون عصبي للبيع وللبدل يا فتاح يا عليم يا رزاق يا كريم كنا نسمع في اثاث قديم للبيع صار الجسد للبيع دنيا غدارة ما الها امان هههههههههه 😁😱 صدقني اذا بعت رح تندم اللي ما الو قديم ما الو جديد هههههه 😂 صباحك رضا وعافية حمود يا عنوان الصبر والصمود الفرج جاي ثق بالله يا غالي 🌷🌷 |
لا تظن أن دُعاءك لا يُستجاب،
الله يسمعك ، يُدبر أمرك ، يكتب لك كل خير ، و يصرف عنك الشر برحمته ، اطمئن الله لا ينساك 💖 |
hopless life that is what i have cry2
|
| الساعة الآن 05:29 AM |
Powered by vBulletin® Version 3.8.11
Copyright ©2000 - 2024, vBulletin Solutions, Inc.
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2024 DragonByte Technologies Ltd. Runs best on HiVelocity Hosting.
المواضيع المكتوبة لاتعبر بالضرورة عن رأي الموقع رسميا