صارت امنية حياتي أعيش انا و اخوي وجه الخير و اولادي بالتبني في بيت واحد و خل الدرعا ترعى لأني تعبت و هو كمان تعب من المشاكل
راح ارمز لأخوي الكبير الحبيب مريض الفصام بوجه الخير و اخوي الصغير بوجه المشاكل |
اولادي بالتبني بسوسي اللي انقذتهم صغار في سن الرضاعة و ارضعتهم لين كبروا و اصحاب الاحتياجات الخاصة منهم خلاص صاروا قطعة مني حتى لو فيه منهم يترددون للشارع اذا ربي أراد انقل مكان هم قبلي بحيل الله و قوته
|
بالنسبه للوالده ياعيون هم كذا الامهات
دايم يوقفو بصف اولادهم ضد البنات غلطان والا مو غلطان اصلا مايشوفو اغلاط اولادهم لازم تشوفه صح ومعاه حق واذا تكلمتي وقلتي شي تحملك الغلط وتسكتك وتقول عيب هذا اخوك انا امي تختلف عن ابوي بالمرررره مع انها حبوبه وطيبه بس مو مثل ابوي ابوي حنيته علينا كانت اكثر الله يرحمه فانتي اطيعي امك واصبري عاد مالنا حيله الا نطيعهم لان هم جنتنا وربي يخليهم لنا ويحفظهم من كل شر |
دارية قلبي حتى عذاب من لا يعقل أكيد لحكمة أنا بفكري القاصر اجهلها لكن اتألم كثير بشكل ما تتخيلين و استحضر و استعرض مراحل عذابهم و المهم بالتفصيل و اقعد أتخيل اني مكانهم و قد ايش تعذبوا و اتمنى وقتها اكون مكانهم و اخذ الالم عنهم للممات
و ما راح يفيد التساؤل ليش يصير معاهم كذا لأنها حكمة الإله مدبر الكون سبحانه لكني اتعذب كثير ودي أرتاح |
بس هذا لولو عنده قصور ذهني متوسط، هو صحيح شاب و طوله قرب للمترين ماشاء الله تبارك الله لكن تفكيره ما يتجاوز طفل ابو سبع سنين، يخوف مندفع بشكل يجيب الشلل، يماشي اي احد، يبلع اي شي يقدم له، يتصرف بدون تفكير، يعني رعية، انا كل رعبي يسحب بيوم في يده من يسطو علينا ماهي بعيدة عليه و ربي ميتة قلق
وش ذنبنا كلنا نروح غلطة بسبب من لا يحسن التصرف |
الله يرحم الوالد و يحفظ الوالدة لولو
تدرين لو ما عنده القصور الذهني ما كان خفت لأنه وقتها يتحمل ما يجيه و ذنبه على جنبه، لكن وش ذنبنا نروح كلنا غلطة بسببه و ذاك وجه الخير مريض الفصام بسبب ادوية الفصام على طول نايم ما يدري عن شي حبيبي ربي يعافيه، وش ذنبي انا و اياه يصير لنا شي من وراء ذاك الارعن و امه اللي تشجعه بالله انا تعبت من القلق و التفكير و الأرق |
هذا انتي قلتيها عنده قصور ذهني يعني مريض
يعنى تصرفاته مو بايده وطبعا امه بتكون معه لانه باختصار ابنها وهي ام طيب عشان ماتحتكين فيه وترتاحين وبما انك تحبي المساعده وقلبك يتالم اذا شفتي احد يتالم حاولي تعملي اشياء تطوعيه يعني اخرجي مع فرق تطوعيه راح تحبي هالمجال وتنفتح نفسك انا ودي اسوي هالشي بس شايله هم مين فاضي يودي ويجيب زمان كنت اشتغل بالجامعه بس ماكملت تصدقي انا امي صعب التعامل معاها صرت مدري ايش يرضيها وهي زعوول وانا اذا زعلت اظل الوم نفسي ليش وليش مع اني اكون سويت وحاولت ارضيها بس هي تعند الله يهديها ادعي لهم بالهدايه ياعيون |
لاتخافي ياعيون
الله يحميكم ويحفظكم من كل شر |
لوليتا 🌸🌸🌸
|
الله يعين لوليتا ما لنا وياك الا الصبر لكن إلا فيما يهدد الحياة و الأمن ، يعني الواحد يسكت لين نغرق كلنا ، ذاك وجه الخير حبيبي من كثر ما كانت تحرض الوالد الله يرحمه عليه من صغره جابوا له الفصام غير محاولات الانتحار من سن المراهقة
و كل ما جيت أتدخل صرت من المغضوب عليهم ، عشانه طيب و ما يحمل في قلبه مكر و اذى لمخلوق تسلطوا هم و الدنيا عليه . أنا متأكدة لو عاش في بيئة بعيدة عن المشاكل تبي تتحسن نفسيته ، لذلك صارت أمنية حياتي إني وياه نبعد عن المشاكل و الشحن النفسي اليومي اللي دمر كل شي فينا و نعيش ببيت مستقل لو جنبهم بس أهم شي أحس بالأمان و هذاك قلتيها العناد سبب كل الشرور و الدمار و المصائب لأنه يورث الكفر و العناد و الانتصار للرأي يعمي البصيرة عن النظر للعواقب و بالله تقولين اخرجي كيف اخرج و انا رهاب الخروج اللي غزاني من سنتين يبي يقضي علي ، انا داخل البيت اشعر بخوف من السطو كيف لو أخرج و تقولين عقله تعبان ما منه ضرر أقلك هذا لو ما يخرج ، لكن هي تسمح له بالخروج و يخالط كل من هب و دب و هذا اللي يرعب ، انت ما تشوفين يوم يجي من برا وش جايب معاه كان نشف دمك مكانك ، و اوريها اقول شوفي وش جايب تقول ما لك صلاح ولدي مو ولدك ، يشهد الله لو ما كانت بهذي الطريقة معاه ما صار كذا و تخرب كل علاقة طيبة ابنيها معاه ، لو نمشي انا وياه على خطة معينة بحيث يترك اللي يضره ممكن يستجيب لكنه ما يصمل فترة طويلة بسببها خربت خلاص عنده موازين الخير و الشر و اختلطت عليه الأمور يوم يشوف واحد يبني و الثاني يهد و ليس الذي يبني كمن شأنه الهدم انا مدري وش اقول حتى توصل الفكرة ، يعني لازم افضح فينا حتى يظهر أن الموضوع جلل ما هو بسيط ، يعني يوم تلقين بيوم علبة غرا موكيتات تحت سريره و ربي يوم اراد لقيتها ، هذا كله من اللي يماشيهم ، هل انتظر بيوم يجون يسطون علينا مثلا و اقول الأمور سهالات |
الواحد لو ما حس بالأمان في بيته وين يبي يلقاه
الأمن اللي من الحاجات الرئيسية الأربعة اللي يحتاجها أي مخلوق قبل فترة قرأت حادثة حصلت لعايلة بسبب خطيب بنتهم المجرم، تخيلي هذا و البنت بكامل قواها العقلية و البيت مليان رجال من أخوان و اب و مع ذلك سطا عليهم مع مجموعة و قتل و خرب حياتهم، هذا و هو خطيب ما هو زوج حتى كيف ذا اللي يسرح على كيفه بدون محاسبة كله لاجل اغاظتي و قهري و تدمير معنوياتي فوق ماهي مدمرة أنا عارفة و مقدرة انه اجتماعي و ما يطيق قعدة البيت، خلاص هذا طبع سيء و تعود عليه لذلك كنت اسوي برامج كثيرة له و كنت اخرجه في كل مكان بس الحين مع رهاب الخروج تقيدت ، حتى السيارة ودي اسوقها عشانه لاني غير إني راح أشبع فيه رغبته للخروج يبي يبعد عن كل من يحرضه على الشر من اللي يماشيهم و مستغلين قصوره الذهني حسبهم الله و نعم الوكيل اللي يقهر إن حتى الدخان ممكن يقطعه بالشهور الطويلة الحمدلله و احيان سنة و سنتين ما شاء الله بدليل انه مو ادمان عنده كن من يوم الوالدة تتدخل يخرب كل شي الولد يجي منه و بالتشجيع و المتابعة يتعدل لكن ما لقي حوله ناس تستشعر حجم المسؤولية و عظم الأمانة و يتكاتفون كلهم من اجل اصلاحه و ينظرون لمصلحته بدال العناد و الكيد اللي جرح قلبي و ملاه قيح و صديد و بنفس الوقت دهور سلوكه |
انا صرت زي الأم اللي ودها تشرد عن عيالها لانها تشوفهم يتعذبون من أب ظالم و ما بيدها حيلة تدفع الأذى عنهم و هذا الشي يزيدها عذاب لدرجة الهلاك ، بل على العكس يكيدها و يقهرها فيهم بزيادة التسلط عليهم لين افقدهم عقولهم
و بعض الاباء من زود الاجرام حتى يفقدون الضعوف حياتهم نكاية في الامهات و شفنا حالات كثير قرأنا عنها و صارت قضية رأي عام الدنيا تخوف و بعض الناس في سبيل المكايدة و العناد عندهم استعداد يسوون اي شي نسأل الله السلامة لذلك ما قيل العناد يورث الكفر من فراغ يا الله نطلبك من النكبات تأمنا و تحفظ علينا ما بقى من عقولنا و تهدي ضال المسلمين إنك على كل شي قدير |
لاحول ولاقوة الا بالله
ياعيون مدري ايش اقولك الله يكون بعونك ويحميك طيب حاولي تقفلي على نفسك الغرفه انتي واخوكي ولاتطلعي الا للضروره مع ان هذا غلط بس لانك خايفه على نفسك من اخوكي او ابني لك غرفه بعيده عنهم وقولي ابغى ارتاح الله لايضرك ان شاء الله يحميكم ويهدي لك اخوكي |
هلا لولو أطمئني قلبي ما هو لدرجة الاعتداء البدني لا لا
حتى عينه حبيبي ما يستطيع رفعها فيني ، الولد على الفطرة بحكم قصوره الذهني عرفت يعني يجي منه يوم يلقى نصح و توجيه و يميز هذا صح و هذا غلط الحمدلله، لكن ما دهوره غير التناقض في التربية و كونه يثق في كل مخلوق يعني مندفع، لو يجي اصغر واحد يقله ابلع ذا اتحداك يبلعه بدون تفكير يعني لازم ناصح أمين يرافقه و يخاف الله فيه و بنفس الوقت العين ما تغفل عنه نفس الاطفال بالضبط بالرغم من طوله الفارع و هيئته المهيبة و وسامته الظاهرة ماشاء الله بحيث تشوفينه من بعيد تقولين ما بوه شي لكن من يوم يهرج كلمتين تظهر الخوافي حبيبي ربي يعافيه و يجنبه الشر و الأشرار و يبصر الوالدة و يرشدها للتعامل معاه على الوجه اللي يرضي ربها و ضميرها و تتعاون معي على حمل الأمانة و مسألة السطو الله يكفينا شرها تبي تكون بدون قصد اكيد من شدة ثقته في اللي يسوا و اللي ما يسوا ممكن يتصرف تصرف غير محسوب يدهورنا كلنا هذا اللي مارقني و مزود علي الرهاب |
هو يوم كان الوالد الله يرحمه عايش كان يروح معه كل مكان، حتى يوم الوالد قبل وفاته بعام كان يبني بير في ديرتنا اللي بالمدينة لوجه الله كان مرافقه طول ذيك الفترة و فجأة لقي نفسه بالبيت
و أنا بعد وفاة الوالد الله يرحمه كنت تقريبا يوميا نروح وياه مع السائق فترة العصر نقعد عند شاطئ البحر معي سنارة الكروشيه و خيوطي و أحيك كل يوم قطعة و قدامي ترمس الشاهي و نصلي المغرب و نضوي للبيت انا حتى السواقين صرفتهم و اعتمدت على مواصلات كريم كله بسبب انهم يساعدونه على الشر و يوفرون له بكتات الدخان حتى يناصفونها بينه و بينهم و يدخنون على حسابه الله ينتقم منهم ما عاد أثق في أحد و حسبنا الله و نعم الوكيل الحين مع الرهاب تقيدت و قيدته معي ، ودي اسوق عشانه و الا المستلزمات نتصل على البقالة يوصلونها يعني سهالات |
شفت يا لولو لو كان ولدي و ما في تدخل يدهوره و يخليه يعجز عن التمييز بين الخير و الشر كان نفع نفسه و نفعنا بدال اتابعه و اخاف عليه
لأن قصوره الذهني ما هو ذاك الشديد، كأنك تتعاملين مع طفل ابو سبع سنين بالضبط، حتى يفرح بالحلويات و تسالي الصغار أجيب له منها و اطلعها له اذا أحسن التصرف و حنون على القطط ماشاء الله تبارك الله على الفطرة و قابل للتوجيه و التدريب و يوم انصحه و يعرف خطؤه يجي يقبل راسي لكن مهنا مساعد و الله المستعان |
السلام عليكم اذا أحسست بآلامك فأنت حيّ واذا أحسست بآلام الناس فأنت انسان بالتوفيق للجميع |
|
عز الله ما للمرض الا الدوا
اعجبتني ذي الشيلة من اليوم اسمعها مدري ويني عنها اول مرة اطب فيها ربي يعز الاسلام و المسلمين شيلة ياكنترول سجل لنا اقوی دخول https://www.youtube.com/watch?v=QzLC0yD7o3I |
مدري ليش الخلايق كلهم نياما و الا انا اللي نومي ملخبط
معقول كلكم عندكم مدارس و دوامات حتى عسل ما جات اليوم اكمل علاج خدها مع اني امس نومتها عندي و رغم ذلك يوم صحيت ما لقيتها و ان حكرتها على الاقل كم يوم على بال يبرا جرحها اخاف تضوي و لا عاد اشوفها لانها من النوع الزعول الخواف و المشكلة الخراج غاير تقعد تحكه و يصب دم الله يستر عليها و يردها سالمة |
يسعد صباحكم وكل أوقاتكم ...
|
أهلاً بسمه كيف حالك وحال البساس ؟
يقولوا القطط لها عين يعني تنحت بلهجتنا اذا مثلا كنت تاكل وهو يشوفك نقول : عطوه عن عينه . هل هدا صحيح ؟ |
صباااااااااااااااااااااحكم سكر زيادة
هلااااااا عيووووووون انا مثلك صاير كائن ليلي وهذا الشي غلط ودي اعدل نومي بس كل ما تعدل اخرتب هلااااااااا ابوعلي وشلونك انت حي لو ميت وينك تراااااااا الشتاء جانا على الابواب ما ودك بشاهي كرك بدال دجاتين اليوم احس بعضامي مكسرة وخفه في الراس وقلق شديد طبعا هذي اعراض تخفيف جرعة السيروكسات من 50 ملغ الى 25 ملغ الحمدالله من قبل ومن بعد خذيت تو نص حبة لوكستانيل وارتحت شوي |
هلا بو حميد ، والله معاكم وأتابع بصمت . هههههههه مافي دجاج خلاص . عزلنا ..
|
هلا بكم اخواني ابو علي و البدراني
سلامتك محمد معليش بس الايام الاولى بعدين يبي يخف الشعور المزعج ذا بإذن الله اخوي ابو علي بغض النظر عن النحت اي كائن حي معرض للجوع لابد الواحد يطعمه قبل ياكل لو كمية صغيرة لأن أصلا ما يجيه نفس ياكل و غيره يطالع و يحتسب الأجر في ذلك تخيل ميت جوع يطالع و ريقه يصب و يمكن ينحت بدون قصد حتى الطفل ينحت لو نفسه في شي طبعا كل ذا بغير عمد الكل ينحت عند الجوع بالذات فعلا لا قالوا مقابل الجيش و لا مقابل العيش : ) |
ههههههههه ابوعلي اجل خلاص من حبكم يا زين عزلنا
ما شاء الله يا بوعلي اشوفك متحكم في الاكتئاب ومتزن في الكلام الله يبارك لك لا تخاف مانيب انحت لاني مب قطوة |
لا محمد القطاوة ما ينحتون لا تطلعون ذي السمعة عليهم ترى ما أسمح
: ) ما ينحت و يؤذي و يستقعد و يشمت غير البشر و الله المستعان |
هههههههههه ابو حميد ، انا مشكلتي الاساسية مو اكتئاب رغم اني في السنيّ الأخيره يجيني هبوط مزاج ،وفعلا الله يكون في عون المكتئبين ،،
|
هلاااااااااااااااااااااااااا عيوووووون
ان شاء الله تزول الاعراض يا رب والله اول مراااااا اسمع انه الحيوانات تصك عين بس اكيد بوعلي يمزح او سهران |
بالنسبة لي رغم اني اموت بالشاورما لكن ما يجيلي نفس اكل و هم يشمون اقوم أفرغ لهم الساندويتش بالعافية عليهم حبايبي و استمتع بأكل باقي الخبز المشبع بمرق اللحم
مرة كنت اعتمر و شفت عايلة محرمين يتعشون من مطعم البيك في ساحة الحرم عددهم فوق عشرة ماشاء الله تبارك الله و احدى القطط تحوم حولهم تجي عندهم واحد واحد و تماوي و سبحان الله حتى ما احد فكر يرمي لها جناح دجاجة و هي تدور من ورا ظهورهم تستعطفهم و هم لا يسمعون و لا يشوفون عند مقابل العيش و الله المستعان اعجزوا عن جناح الله يحنن قلوبهم بالله جناح مين ياكله |
بس مسكين له عين وشهوه يقعد يطالع عيونه تتحرك مع اللقمه من الصحن للفم ،، والواحد والله مقصر جدا ولا يدري ايش العمل اللي يدخله الجنة . الله يرحمنا برحمته .
|
طيب ليش ما ترمي له ابو علي من اللي تاكل و تريح ضميرك و تكسب اجر
هم كمان حبايبي بسبب اكل الشارع تلقاهم يعانون من الديدان المعوية اللي تنحت كل ما ياكلون اول باول و يتعرضون لفقر الدم ثم الموت عشان كذا احتفظ بعلبة علاج الديدان و أسقط في حلوقهم من حبة حبة كل فترة |
هههههه أرمي له مستحيل أتركه أعوذ بالله ...
|
ايه و الله عيونهم تذبح و هم يناظرون خاصة اكثر ما يجوع المرضعات و الحوامل عشان كذا سووا احصائية وجدوهم اكثر القطط معرضين للدهس بسبب انخفاض السكر يدوخن و ما ينتبهن للسيارات ربي يلطف بضعوف خلقه
|
تعرفي صرت اجيب له نقانق هوت دق وجوانح دجاج وفيه بس ثاني أسود بس غير مستانس ويخاف منه كثير لأنه يضربه،،
|
جزاك الله خير انا دارية ما تقصر يا ابن الاجواد ربي يجعله في موازين حسناتك
|
انا ودي اعرف
ليش الى اخترع مهدئات نفسية مثل زاناكس وفاليوم ولوكستانيل ما اخترعهم بدون ما تسبب ادمان ولا تعود --------------------------------------------------- عيوووووون الله يجزاك خير على ما تقومين به من عمل ------------------------------------------------ مرااااااا من المرااااااااااات ايام الرقية قبل يمكن 12 سنة قبل ما اعرف الادوية النفسية كنت اطلع ادخن عند باب البيت 2 في الليل واشوف قطوة مسنترة عند الباب سودا قلت يا ولد بس جني واهش وانش فيه ولا يروح ابن الذين مسنتر وشكله عود المهم مرت الايام وانا كل ما اطلع ادخن احصله قلت لخوي السالفة قال خلاص بمرك وقت تواجد حضرته يوم جاني الا والقطو موجود ونفس النظرات قال خوي هش واركب معي السيارة بسرعة وخذوا مطاردات من حارة الى حارة والله يا جماعة انه انقطع ولا عااد رجع |
لأن مافي شي كامل يا محمد ، الدنيا نفسها دار نقص ..
|
اقتباس:
|
أذكر زمان يوم كنا في بيوت الطين البس الشقي المخرب يسمونه مسوي بكسر الميم والواو وسكون السين هذا الله يسلمكم يحبلون له بحباله خاصه بالقطط ويرمونه في ديره ثانية تصدقون ان بعضها يرجع لنفس البيت بعد كم يوم !
|
الساعة الآن 06:11 AM |
Powered by vBulletin® Version 3.8.11
Copyright ©2000 - 2024, vBulletin Solutions, Inc.
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2024 DragonByte Technologies Ltd. Runs best on HiVelocity Hosting.
المواضيع المكتوبة لاتعبر بالضرورة عن رأي الموقع رسميا