|
أعاني من مرض عضوي + الخوف
السلام عليكم ورحمة الله قبل الكلام أتمنى واحد مختص يبتدي معاي لأني فعلاً أحتاج نصيحة قبل ماأتدهور أكثر مو عارفة كيف أبتدي بس بأعرفكم بنفسي أنا عمري 32 سنة خريجة بكالريوس تربوي وعندي خبرات عمل كمعلمة كنت متفوقة في دراستي كثير وتفوقت لما أستلمت التعليم لفترات مقطوعة وتميزت لكن الآن كنت بصدد وظيفة ولكن تراجعت بعد حالتي اللي بأكتبها لكم تحت نقطة التحول من 14 سنة أتخرجت من الثانوي وببداية أول يوم دوام ماقدرت أدخل الكلية كان السبت اللي يوم الخميس قبله حضرنا زواج وأغمي علي فيه أغمى علي عند باب الكلية بعد في أقل من 48 ساعة مرتين إغماء لفيت لفة طويلة على الشيوخ والأطباء ومابقيت ولا شيء بالأخير بعد سنتين إلا شوي قرروا لي الأطباء مرض اسمه الوهن العضلي Myasthenia gravis ياليت تقرون عنه هنا أو بقوقل كود:
http://knol.google.com/k/%D9%85%D8%B1%D8%B6-%D8%A7%D9%84%D9%88%D9%87%D9%86-%D8%A7%D9%84%D8%B9%D8%B6%D9%84%D9%8A-myasthenia-gravis#المهم هذا المرض يسبب ثقل بالعضل كله بالجسم حتى جفن العين تقريباً أنا بخير وماعندي مشاكل كثير مثل المرضى للهم لك الحمد والله يديمها نعم ويحفظها من الزوال والعلاج اللي بنآخذه عبارة عن بنزين يمشي الجسم وقت الضرورة مو علاج كعلاج لأن المرض نادر وماله علاج شافي هذا المرض مع تجربتي وكلام المرضى عنه عدوه الخوف لما نخاف الرجفة اللي تجي تسبب شلل أكثر وأكبر طوال السنوات وأنا تمام ماعندي مشاكل تذكر حتى ماجاتني نكسة قوية إلا مرة كان سببها نفسي وهي زعل كبير كتمته كتمته وأنفجرت بنكسة أجلستني بالمستشفى أسبوع وتعافيت أهلي واللي حولي مقتنعين إنها عين صابني بعد الزواج وصادفت التفوق والكلية وووو لكن بداخلي حبيت أصدق إنه مرض عضوي عشان ماأتعب وماأتعلق بوهم ومشايخ متشيخة !! قبل أطلع مشوار أخذ حبة وأطلع أروح سوق وأتمشى وأقضي شغلاتي وحياتي مو ناقصها شيء ومو باين إني مريضة أصلاً لأن المرض مايبين بالشكل من ثلاث سنوات زدت الحبة إلى ثنتين لما أطلع مكان برى البيت وأخذ العلبة معاي لو أحتجت << ماأرتاح نفسياً إلا وهي معاي هنا بدت الحكاية بشويش صرت أخاف حتى لما أكون أقدر أمشي لازم أخذ حبة !!!!!! ليه طيب ؟؟ أنا أقدر أمشي !!حاولت أقنع نفسي ومانفع حاليا ومن أربع أشهر صار علينا حادث ماصار لنا شيء الحمد لله لكن ونحنا بنصدم في اللي أمامنا الخوف كله نزل بركبي تشهدت وسألت عن اللي معاي وماكان فيني شيء بس ماقدرت أنزل ومسكت حالي ونزلت وطلعت مع أخوي رجعنا البيت وماقدرت أنام صرت ماأحب أطلع من البيت ليومنا هذا يمكن مرات قليلة طلعت عشان علاج أمي للسكر وبس مارحت السوق ناقضني أغراض وماقدرت أروح خوووووف لما أسمع صوت السيارة برى قلبي يدق بسرعة ولما أطلع أبلع حبوب كثيرة والحبوب الكثيرة تضرني تسبب إسهال وأنتم بكرامة تسبب رد فعل عكسي للمرض ويزيد التعب !! مع معرفتي لهالأمر لكن عجزت أبطلها كنت أقدر أطوف وأسعى عادي ماقدرت من شهر أطوف إلا بكرسي وغصبوني أهلي على مشوار مكة لأنهم شافوني متضايقة كلهم سألوني وش صار فيك وماقدرتِ ؟؟ الصوت العالي يشلني الصراخ يشلني ماأحب حتى أمي تناديني صوتها وأنا تعبانة يشلني لولا خوفي من الله صرخت عليها لكن أكتم ماأبغاها تخاف علي أكثر من خوفها الحالي لاحطوني الصغار أولاد أخوي كنت أطلع أمشي معاهم ونروح الملاهي وماأتعب ومارحت معاهم ولما أمشي شوي لبيتهم أتعب !!!!!!!!! أنا متدينة وأعرف الله وأصلي ومنتظمة ع الأذكار مرتاحة ببيتنا وأشتغل بالبيت وأطبخ وقايمة بأموري كلها ومحبوبة وإجتماعية بشهادة الكل أنا ناجحة ومحط أنظار بكل مكان أكون فيه أمي وأبوي كبار بالعمر معتمدين علي كلياً حتى أروح معاهم لمواعيدهم وأنظم أدويتهم صرت أخاف لما يطلبون مني طلب وماأنفذه أو أقول ماأقدر وأرتجف ويضيق تنفسي أنشلل من الخوف الخوف الخوف الخوف الخوف وبس عارفة مشكلتي ومن لما لاحظت إني لازم أزيد الحبات بديت أطور نفسي وأكتب كلمات أيجابية وأشحن داخلي وأسوي إسترخاء وأهدي نفسي لكن الآن مايفيد عجزت أسيطر على نفسي يمكن أنا شخصت حالتي وحاولت أحلها وللحين ماشية على العلاج النفسي !! إن صح أنتم أهل الخبرة أحاول أهدي نفسي وأطنش وأقرأ وووو لكن بأقول لكم وش أحس يدق قلبي بسرعة أحس أحد يمسكني بقوة ويدفعني لتحت تنفسي يضيق أعرق بكفوفي رجفة ومع الوهن يادوب أوقف !!! أو أطيح لما أطلع الدرج وأنا بهالحالة المعالج اللي امي تجبرني أروح له وعشان خاطرها أروح قال عين ثانية دخلت مع الأولى ومعاهم مس عاشقها ههههه وشغلات مرعبة كثير أحتاج مشورتكم لأني أثق إن حتى الشيء الروحي علاجه نفسي أكيد إني وصلت لحالة متطورة وأملي بربي أن يرفع عني ماأبتليت له شكراً لكم |
مرض الوهن العضلي هو مرض مزمن وكان الله في عونك ولا يوحد له سوى الأدوية التي توفر المادة العصبية اسيتايل كولين والاكثار من هذا الدواء قد يسبب برود عصبي واكتآب وتوتر عضلي انا لا أعتقد ان مشكلتك الحالية هي مرض الوهن وأرى ان الغالب هو الوسواس والمخاوف والتوقعات المحبطة وعدم القدرة على الثقة بالنفس ممكن تستخدمي دواء مثل سيبراليكس بجرعة 10 ملجم يوميا واستمري عليها 6 أشهر وان شاء الله تذهب المخاوف والوساوس وتابعي معي وان شاء الله خير |
^^
أعرف إن الوهن ماله علاقة أنا اللي مخربطة وحساسة من كل شيء اليوم رحت عيادة خاصة سبق ورحت لها من كم سنة لأني تعبت لما 2 من أخواني تمشكلوا مع بعض وتأثرت أنا وكتب لي اليوم السيبراليكس قال لأنك كل مرة تتعبي من القلق وماشريته للحين قلت أستشيركم بأشتريه وأشوف |
شكراً
بأتابع هنا أكيد نسيت أقول بالرغم اليوم إني تعبانة وتوهمت ووو ونزلت لولد أخوي بالسيارة وأنا مختنقة تمنيته يقول مانروح وأرجعي هههه لكن أجبرت عمري ورحت صح تصرفي مو ؟؟ الغريب بالأمر إني بس نزلني وقال مري الطبيب وعندي شغلة أخلصها وأرجع لك بالعادة ماأروح لوحدي أخاف رحت ونسيت وأمشي بالممرات ولا كأني تو كنت أرتجف من جد أحترت هههه |
بأسألك الدواء هذا يزيد الوزن ؟؟ |
ممكن يزيد الوزن وممكن لا
يعني بعض الناس يزيد عندهم الشهية، وبعضهم لا |
آها حسبت مثل الكورتيزون النفخة إجبارية زين ماعليه الشهية مقدور عليها وأهلاً بك في الطائف ديرتنا :D << قريت إعترافك :$ نفسي أكتب كلام كثير أحسه وودي أستشيرك دامك الموجود بالموضوع وأستحيت لاحظت عدد القراء يزيد مين يقرآ !!؟؟ |
مبسوطة كثير!! هههههه 00``00` الحمد لله الحمد لله الحمد لله حمداً كثيراً طيباً مباركاً فيه ساعة وشوي وأنا ألف بالسوق ماتعبت ونسيت التعب وأشيل أكياس وأمسك ولد أختي وأسولف معاهم وأتسيوق !! كان حدي مشوار المستشفى عشان أجلس بالممرات على كراسي الإنتظار وأكمل بعدين يعني هالساعة وشوي إنجاااااز مع حالتي قبل !! صح مو مثلي أول لكن تطوووووور من بعد التعب من زماااااان عن كذا أتسيوق بسوق البلد اللي كله طلعات ودرج يا رب لك الحمد فقدت نفسي ماأدري كيف أحس أني من زمان ماأعرف نفسي ههههههههههه لما قلت لهم أبي السوق أول مرة أخوي مايقول بكرة قال طيب أنزلكم تقدرين ؟؟ قلت إيه بأقدر أحس إني أخف وفعلاً من طلعت من البيت مافكرت حتى وش السيارة اللي بتوصلني بالعادة أطلبهم سيارة نازلة !! طلعت الجيب عادي !!!!!!!! يووووووووه بغيت أبكي من الفرحة هههههههههههههه خلصت السوق ومريت الماركت مونت للبيت بعد من زمان مامونت ههههههه ماأدري ليه كتبت هنا بس فيني شيء تغير فيه شيء خلعته ماأدري وشو بغيت تفسير؟؟ !! وش تغير فيني من العلاج ؟؟ فيني بقايا خفقان وتوتر بس أهون شوي الله يتمها وأكمل كذا يا رب بالمناسبة نومي مخربط ..؟؟ كنت منتظمة صار يجيني أرق !! ليه ؟؟ |
اقتباس:
ولا يهمك أختي،، الموضوع مايطلع عليه الا الادارة والمشرفين والاخصائيين وكلهم أهل ثقة ان شاء الله اقتباس:
ممكن أختي يكون تحسن من الدوا رغم ان الفترة لسه قصيرة وممكن اللي يشتكي من اكتئاب ان يكون معرض لنوبة هوس وهي عكس الاكتئاب ويصبح صاحبها منطلق وسعيد مع توتر وأكثر جرأة وقد يصرف الفلوس بدون حساب ويكثر كلامه وأفكاره ويزيد نشاطه ويقل نومه مهم جدا أختي ان تفرقي بين ذهاب الاكتئاب والخوف وبين حالة الهوس والتي تمتاز بالمبالغة، اي تكوني مطمئنة لدرجة غير طبيعية، جريئة لحد الوقاحة تتكلمي لحد الثرثرة وازعاج الاخرين .. وهكذا فإن كان تحسنك غير مبالغ فيه فالحمد لله واستمري على الدواء أما ان كان مبالغ فيه وتنقديه انتِ او من هم حولك فانتبهي، فقد يكون هذا بداية نوبة هوس. والهوس جميل لولا ان الشخص فيه قد يرتكب حماقات فالمرأة قد تصل الى ان تخلع عباءتها وتخرج تغني في الشارع وقد تصرف كل اموالها بدون فائدة وقد يصاحبه توتر يعكر علاقاتها بأهلها وهو يحتاج ان تأخذي علاج مثبت للمزاج اتمنى ان تردي علي حول الهوس وهل ماتشعرين به مبالغ فيه ام في حدود المعقول |
مرحبا .. لا مو مبالغ فيه عادي جداً !! ماوصلت لشيء أنقد على نفسي به أو ينقدون به أهلي الله لايجيبه يا ربي :( بس صرت أهدى أكثر من قبل يعني بالأول أنا هاديه ومو مزعجة ومو رجة فما لاحظت إني أنرجيت هههههههه هم يعرفون إني الدينمو حق البيت وكل شيء فوق رآسي وتعبي أثر فيهم كثير وأنبسطوا إني طلعت مرتاحة وماتراجعت كانوا مستغربين إني أتعب كثير بس وألغي مشاوير وأشغال -- أنا عندي إكتئاب ؟؟ وش أسبابه بحالتي ؟؟ بحثت الآن عنه وقريت ماعندي الأعراض نفسها !! هههههههههه بس الغريب إني من شهر صرت أستخدم أكليل الجبل عشان شعري ههههههه طلع يعالج الإكتئاب حلوة الصدفة وربي مرة قريت بكتاب أن تغيير الشكل والتجديد بأي شيء يخفف شعور القلق والتوتر بديت جلسات ليزر !! قصيت شعري اليوم !! يا رب يجدد بالنفسية : ) أخذت فستان ناوية بإذن الله أحضر أول حفلة ننعزم عليها على خير -- الشيء اللي بأقوله لأني لما قلته لصاحبتي قالت مجنونة أنتِ وأفكارك بس لما قلت لها حليها ماحصلت حل !! أنا أتعب كثير مو من الوهن بس لأن تعبي يأثر بأمي وأبوي ومن العقوق إني أشكي لهم وأبي برهم وماأشكي !! لكن هم معاي ويلاحظون تعبي !! أتحمل وأقول طيبة وبخير بس خوفهم عليّ يتعبني أكثر ويخوفني أرحم نظرات أمي وقلقها لما أتعب وهي صحتها ماتتحمل عشان تدخل بجو حياتنا لازم أقول لك أنا أخر العنقود جيت بعد أختي بمدة طويلة يعني ببساطة أخذت الدلع كله من أول ولازلت !! بالبيت أنا وأمي وأبوي وشغالتنا بس وحوالينا بيوت أخواني البعض من أخواني مو طيب قاسي شوي على أمي وأبوي الله يهديهم ويردهم رداً جميلاً والبعض الثاني طيب بدرجة إني لو أشكي يشيل وجعي عني باللي يقدر عليه الله يخليهم لي وماأشوف فيهم يوم مو حلو ويحفظهم ويفرحهم بأولادهم يا رب أمي عندها السكر وماتمشي كثير يادوب لدورة المياه وأنت بكرامة وأبوي بالثمانينات ويصلي ويرجع للبيت يفوّت وينسى .. يتضايق لما يشوفني تعبانة أفقدهم لما يغيبون شوي ويفقدوني لو أروح لبيت أختي ساعتين يتخربط نظامهم مايطلعون مكان إلا أنا معاهم أوديهم المستشفى والتماشي وأكل معاهم وأسولف لهم ماأحد يعرف أبرة السكر لأمي إلا أنا .. مايعرفون أماكن الملابس ولا المناشف ولا شيء لما تنتهي علبة المناديل بغرفة أبوي مايروح للشغالة يجي يقول لي ماعندي مناديل !! مع إن المناديل بالمستودع عادي يقول والشغالة بتجيب !! المطبخ مايعرفون فيه شيء لو أضطرت أمي تدخله أصلا نحنا ساكنين جديد لنا تسع أشهر أمي ماشافت المطبخ إلا مرة حتى تعرف درجة تعلقهم بي خذ هالموقف البسيط كنا نآكل وفي السفرة صحون لحم وسلطات وشغلات كثير فأمد لأبوي كل سلطة كل خبز كل كل كل لاحظت ماأكل لحم قلت أبوي خذ لحمة قال ماقلتِ لي !! أختي ضحكت قالت كله دلع ياأبوي مارد عليها بس قالت لي خربتيهم !! أو هم خربوني ماأدري المهم إننا مانستغني عن بعض .. مو متعبتني خدمتهم بالعكس هم دنياي ومبسوطة كثير بهالمكانة الغير عن أخواني وأخواتي وأنا بهالحالة مع المرض !! اللي متعبني خوفهم عليّ وتفكيرهم كله إن الحياة ماتستقيم إلا إني أتزوج ويتطمنون عليّ !! يبوني أتزوج !! وأنا ماأقدر مع تعبي ووضعهم أتزوج !! ماأقدر أخليهم وماأقدر أشرح لأحد وضعي ويقبلني وأقبل فيه !! عشان كذا أمي وأبوي سجلوا البيت اللي نحنا فيه باسمي بتقول وين المشكلة للآن !! صار لي بيت ملك غيري مو لاقيها !! وأمي وأبوي راضين عليّ المشكلة إني خفت أكثر حتى من أخواني لو أحد يتضايق من هالأمر وتجي مشكلة صح كلهم وافقوا لكن فيه كلام !! تأمينهم لحياتي وإحساسهم بشكري بهالشكل يخوفني تعلقهم فيني وأنا بهالوضع وإني الحيطة المايلة وهم ساندين عليّ يرعبني خايفة أعجز عن نفعهم وأفشل برد الجميل اللي طوقوني فيه بتمييزي عن أخواني بكل شيء وكل شيء يعني كل شيء حتى الحب !!.. أنا مريضة وأحتاج أحد يسندني ومو فايدة حالي عشان أفيدهم وأصير كل دنياهم ويسندون عليّ أول تعب لي أضيع أنا وإياهم تنومت مرة نص يوم بس ورجعت وهم مايدرون لما دخلت عليهم فجأة كانوا الأثنين جالسين يبكون !! كسروا خاااطري ليه ياأمي وليه ياأبوي تبكون !!!! أه بس أخواني الطيبين مو مقصرين وأخواتي كويسات بس أمي تقول أنا غير وفعلاً أنا غير بتعبي ماااااااااااااا أقدر أساعدهم وأسعدهم .. يا ربي هالشعور بالضعف يوجعننننننني خوفهم إن تأمين حياتي مادياً وبزوج على حساب أنفسهم هم شغلهم دايم تقول لي أمي نتحمل بس أنتِ بتضيعين من بعدنا أبوي لما يتعب مايوصي إلا بي .. أرحم أمي لما تبرر لكل وحدة تسألنا وش مرضها أو ليه مازوجتوها مافيها عيب ومو ناقصة ووووو يعددون الميزات !! بس هم مايعرفون تعبي !! وأهلي بالعينها وساكتين أحس فيهم حزن على ضعفي !! وتعبهم من هالحزن ينعكس عليّ .. ماحسسوني إني ثقيلة بقد ماحسسوني إني بأضيع بعدهم خوفوني من مستقبل ماأحد يدري عنه غير ربي !! بس حرص منهم الله يجعل يومي قبل يومهم يا رب ماتحسها مشكلة صح ؟؟ لكن والله إنها متعبتني تحت أي مسمى كانت .. أول مرة لغير صاحبتي أشكي هالخوف يمكن أحد بمكاني بيكون مبسوط بس أنا خايفة من ظنون أبوي تصير بعد وفاته الله يطوّل عمره وعمر أمي ماندري مين أطول عمر فينا خايفة أخواني وخايفة الناس ووو ولكن ربي مايخلق نفس ويضيعها هذا اللي أقوله ومؤمنة بقدر ربي ونصيبه لي وودي أريحهم من هالتفكير وأريح حالي معاهم بس ماقدرت كل كلمة وتصرف منهم يوجعني ويشل تفكيري بدل مايسرني !!!.. حتى دعواتهم لي الله يطمني عليك والله ييسر رزقك !! كلها ترجعني لنفس الحكاية .. المرض وحياتي وهم وأنا وماأدري كلامي مخربط !! فيه شيء أنفتح وأنا أكتب ماأدري وشو !! طلع اللي بداخلي ومضايقني !! كم مرة كتبت خايفة وخوف هههههههههههههههههههههههه -- أنا عتيبية ewrdwpjfc أستودع الله كل ماكتبت |
أنعم وأكرم بعتيبة دخلت على سريع أقول لك لاتخافي أختي على نفسك ماشاء الله كلامك متوازن وان شاء الله التحسن اللي عندك هو نهاية الأحزان لا أعتقد من تسلسل كلامك ان عندك هوس او بدايات هوس والحمد لله ولي عودة لمزيد من الكلام معك حول ماتعانين منه او تخافي منه وأعتقد ان حالتك قابلة جدا للتحسن وشخصيتك متماسكة بشكل طيب |
الحمد لله والله يسلمك أنتظر تعقيبك 234M4R32ED |
اقتباس:
|
مرحبا .. أستخدم الإكليل شراب مغلي !! ewrdwpjfc -- أكيد المرض مو عيب الشكر لله والحمد له أفضل من حتى مرضى الوهن اللي أعرفهم بس خوف أهلي على مستقبلي ماأحس إنه مشكلة !! لكن مجبورة مع المجتمع يحسسوني إني أكسر الخاطر وينتقل هالشعور لأهلي أنا مؤمنة بنصيبي وأحس إن الله يخبي كثير من الفرح مو شرط زواج !! \ بس مثل ماقلت لك أرحم أمي وأبوي وتبريراتهم وخوفهم عليّ مو كل الدنيا زواج فيه أمور أهم \ لكن لما وين ماتروح تنسأل والناس اللي يحبونك يبررون ويزيد خوفهم لأنهم مسؤولين عنك بتوفير حياة كريمة لك !! حتى طبيبة أمي ماتشوفني إلا تقول لأمي زوجوها الناس وجيرانا وجماعتنا نفس النغمة \ أنا آخذها بنكتة أقول أبي أحد يسكن معانا أو مافي أحد يستاهلني مثل مايقول أبوي !! وأعدي الموضوع بس أهلي عندهم التأمين للحياة زواج و وظيفة !! والظاهر الوظيفة وأنا بهالحال ماتجي مايصير أكون قدوة وعندي خلل ومضطربة فاقد الشيء لايعطيه ونفسي أطمنهم بأي حل طبعاً مابيكون الحل زواج !! - والله إني متفائلة ومتيقنة ببكرة أحلى على طول لكن هي مرات تفشل كل الإيجابيات اللي أعيشها إنها تتجاوز بي يمكن المرض وظروف أهلي والعمر !! شيبت وبديت أخرف الله يكبرنا في رضاه : ) جات مع بعض وأحبطتني ولاتفكر كلامي هنا إني متضايقة من عيشتي معاهم بالعكس لكن تفكير أهلي وحرصهم عليّ فتح خطوط تفكير أرعبتني -- كيف لايكلف الله نفساً يعني كل ذا متحملته أكبر مني ؟؟ ماأدري بس حياتنا تجبرني ماأفكر بنفسي بس و الوهن !! أمي وأبوي قبل نفسي أنا أروح برى البيت لأي أمر أمي ماتآكل لما أرجع !! ماتحب طبخ أختي ولا زوجات أخواني وأبوي كذلك يمكن ماأنحطوا في وضع يجبرهم إلا بشغلي أنا لكن هم كذا وش أسوي بكبودهم خخخخخخخخ نادراً أجيب من مطعم عشان ماأحبهم يآكلون من المطاعم كثير ولما نضطر يكون السبب عشان أنا تعبانة !! لما نضطر ترسل لنا أختي أو زوجة أخوي فيكون لأني تعبانة !! مايتأثرون ؟؟ مايفكرون في حالهم وحالي ؟؟ وأنا أسمع أمي كل ماأحد سألها تقول لولا الله ثم بنتنا كان ضعنا !! في نفس الوقت نفسهم أتزوج ويتطمنون عليّ !! مع إنهم عارفين إني فاشلة مع أحد مو عاذرني ومدللني مثلهم !! ولابيكون فاهم ومتقبل وضعي ووضعهم !! تعليقهم على أي موضوع يكون الخلل فيه بسبب تعبي يوجعني !! تعليقهم عن مستقبلي وزواجي وكيف بيكون بسبب تعبي يوجعني !! كله أكبر من طاقتي ؟؟ متحملة شيء أكبر بهالحالة ؟؟ يقدرون يعيشون بلاي ؟؟ وأقدر أعيش أنا بدونهم!!؟؟ لكن متحملته !! وإلا لا ؟؟ ماأدري :( ولاتقول عندهم أخوانك لاتهتمين هههههههههههههههه << هذي جملة صاحبتي وبعد جايبة لي فتوى إن البنت ماتكون مسؤولة عن أهلها هههههههههه الشرع واحد أنا بنتهم بعد شوي شوي تطلع لك عقد أكثر ههههههه أستغفر الله ربي أستودع الله كل ماكتبت شكراً لوقتك وأكيد بأتابع يعطيك العافية `111`1` |
ماشاالله عليكي ،، شكلك سريعة بالكتابة ومنطلقة ههههه يبغالي ساعة علشان أر عليكي خخخخ وماشالله سردك للكلام يدل على شخصية طيبة وواعية يابختك في بر والديكي ورضاهم عنك،، والله هذا شي كبيييير يبدو لي من كلامك شغلتين: 1) التحسس من عطف الناس (بمن فيهم أهلك) حول مرضك 2) التحسس من طاري الزواج والمستقبل صحيح أختي مثل ماقلتي ان الزواج والوظيفة مو كل شي لكن هذا مجتمعنا تصدقي اني ماتزوجت الا وعمري 36 سنة وماكنت ناوي اتزوج لكن تزوجت علشان أسكّت الناس واسئلتهم، هذا وانا رجّال كيف لو كنت حرمة؟ لكن مع هذا أقول انتي بحاجة انك ماتنظري لنفسك بأنك تكسري الخاطر حتى لو كان الناس يلمحوا بكلامهم او كلامهم يحمل هالمعنى وبالنسبة للزواج والوظيفة فهي سنة الحياة والآباء يبغو يتطمنوا على اولادهم وبناتهم اللي ماعندهم مشاكل كيف باللي عندهم مشاكل؟ بعدين مانفسك اذا تقدم بك العمر تلقي ابن او بنت تعتني بك؟ الا ادعي الله واطلبيه انك تلقي ابن الحلال عاجلا ليس آجل ويابخت اللي بياخذك،، والله انتي بنت حلال وتستاهلي كل خير ربي يوفقك ويسعدك234M4R32ED |
| الساعة الآن 06:19 PM |
Powered by vBulletin® Version 3.8.11
Copyright ©2000 - 2025, vBulletin Solutions, Inc.
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2025 DragonByte Technologies Ltd. Runs best on HiVelocity Hosting.
المواضيع المكتوبة لاتعبر بالضرورة عن رأي الموقع رسميا