مشتركة جديدة

بيانات اضافيه [ + ]

رقم العضوية : 47786  تاريخ التسجيل :  07 2014  أخر زيارة : 09-11-2014 (10:03 AM)  المشاركات : 41 [ + ]  التقييم :  10

لوني المفضل : Cadetblue

بسم الله الرحمن الرحيم

الحمدالله حمدا كثيرا طيبا يليق بجلال وجهه وعظيم سلطانه


انا الحمدلله قدمت معاملتي وتمت الموافقة واتزوجت

وحبيت اشارككم باللي صار معايا خطوة بخطوة علشان تستفيدوا

لاني لمن قدمت كنت ضايعة واتمنيت احد يعطيني قائمة زي اللي حاكتبها لكم في الاسفل

معلوماتي انا وزوجي: الاثنين فوق الثلاثين وانا الطرف السعودي وهو مولود ومقيم غير عربي وكلنا الاثنين من جدة وتم تقديم المعاملة في جدة

1. رحت المحافظة اللي في طريق المدينة لاصق في مكتب الامارة (تاخذي معاكي صورة من هويتك وصورة من هويته )
2. في المحافظة تطلبي (طلب موافقة زواج سعودية بغير سعوري مولود ومقيم)
3. حتطلب منك تكتبي خطاب للامير (انا عن نفسي كتبت الخطاب بنفسي سالت الموظفة ايش اكتب وقالت لي وكتبته، في ناس يقةلةا انهم برا في مكتبات جنب الاكارة تكتب الخطاب ب 100 ريال بس انا كتبته بنفسي)
4. تعبي الموظفة ملفك في السيستم وتقلك روحي وحتيجكي رسالة برقم المعاملة (الرسالة ما تاخذ 24 ساعة وتوصلك برقم المعاملة)
5. راجعت المحافظة ثاني يوم من وصول الرسالة واعطوني ورقة من عندهم برقم المعاملة وقالولي اروح لشرطة محافظة جدة في شارع التلفزيون جنب البنك الاسلامي (وانتي رايحة الشرطة خذي معاكي الاصل والصورة من هويتك وهويته وجواز سفره)
6. رحت الشرطة قسم الاتصالات الادارية وتابعت معاهم الين اتاكدت من وصول الملف(قسم الاتصالات الادارية برا جنب البوابة)
7. قسم الاتصالات الادارية يعطوكي رقم للمعاملة وتاخذي الرقم انتي وعريسك او انتي لوحدك وتدخلي للشرطة من البوابة الرئيسية وانتي داخلة اسالي في البوابة عن مكتب الزواج
8. في مكتب الزواج يعطوكي لسته بالطلبات اللي تعمليها وخطاب للمركز الاقليمي لتحليل ما قبل الزواج (القائمة تتضمن تعريف بالراتب لك وله وشهادة ميلادة مصدقة طبق الاصل وصورة الاقامة مع الاصل وصورة الجواز مع الاصل - الجواز الغير عربي مترجم للعربية- واذا انتي ربة منزل مشهد مصدق من العمدة وبرنت من الاحوال المدنية لكي وصورة بطاقتك مع الاصل)وكمان حيعطوكي يعطوكي طلب للتحقيقات الجنائية للعريس (يروح قسم التحقيقات الجنائية جنب مكتب الزواج ويعطيهم بصماته وتستنوا الموعد للنتيجة)
9. تروحوا عاد تجمعوا المتطلبات الباقية عبال ما يصدر تقرير الجنائية (في تحليل الزواج تروحوا سوا بس في النتيجة واحد منكم يروح عادي)
10. بعد ما تكملوا كل الطلبات ويصدر تقرير الجنائية ترجعوا قسم الشرطة وتدخلي قسم النساء في مكتب الزواج وتعبي اوراق يعطوكي هيا (انك عارفة عواقب زواجك من غير سعودي وانه تتعهدي انه المعلومات اللي وفرتيها صحيحة وكذا) ويعطوكي موعد (في نقطة مهمة لازم تكون اقامة زوجك باقي لها اكثر من 3 شهور للتجديد اذا لا من بدري بدري خليه يروح يجدد الاقامة)
11. لمن يجي الموعد تروحوا تراجعوهم يعطوكم رقم المعاملة الصادرة للامارة
12. تروحي تراجعي الامارة او تتصلي او تتابعي في الموقع برقم المعاملة الين توصل وتروحي لهم
13. الامارة حيراجعوا الطلب ويحطوه في السيستم وتعطيكي رقم مراجعة المعاملة مع الداخلية
14. تعطيها اسبوع تقريبا وتبدأي تراجعي مع الداخلية الين توصل لهم
15. في الداخلية تبدأي تتابعي بكل الطرق الممكنة (اتصالات والموقع انا بالنسبة ليا ما بقيت تحويلة في الداخلية ما دقبت عليها lol)
16. تاخذ وقت في الداخلية لا تقلقي بعد ما تصدر من الداخلية حيعطوكي رقم تتابعي فيه مع الامارة (تتصلي على الامارة وتتابعي في الموقع الييييييين توصل)
17. في هذي المرحلة خلاص قرار الموافقة او الرفض صدر من الداخلية الريدي الاجراءات المتبقية اجراءات ادارية فقط فتابعي الين تتصلي وباذن الله يقلك اتحولت للمحكمة وهذا رقم المعاملة (انا بعد ما قالي انها اتحولت للمحكمة زوجي راح لهم واخذ
18. يروح عريسك للمحكمة وياخذ موعد للعقد ويعطيهم تحليل الزواج
والف الف الف مبروك :)

نقاط مهمة:

1. اكثري الاستغفار طوووووول وقتك استغفري احيانا في ذنوب تمنع عننا الاشياء اللي نبغاها
2. صلاة الوتر لا تسيبيها حاولي قد ما تقدري تغلبي الشيطان وقومي
3. دعاء الوالدين (بما اني مريت في هذي التجربة انا اعرف انه لمن احد يدعي مثلا يا رب يختار لك الخير تحسي كانهم ما يبغوكي تتزوجي هذا الشخص انتي خليكي ايجابية واتقبلي الدعوة وابتسمي وارضي)
4. طوووووووووووووولة البال (حتقابلي ناس تحبطك وناس تستفزك وناس تكلمك بدون نفس خلي باااااالك طويل
5. واحد من اكبر الذنوب اللي احنا نعملها واحنا محنا حاسين هي سوء الظن بالله لمن نقول يوووه شكلها حتتعطل او شكلها محا تمشي خليكي ايجابية واحسني الظن بالله وان شاء الله ربنا يعطيكي الين يرضيكي

الله يتمم لكم كلكم على خير ياااا رب ويفرحكم ويسعدكم وعقبال مايشيلوا قرار طلب الموافقة دا او يسهلوه بدال الحوسة دي كلها

واذا عندكم اي سوال انا حاضرة وقت ما اقدر ادخل اون لاين واعذروني اذا ما قدرت بكثرة

كل اللي ابغاه منكم دعوه حلوه في ظهر الغيب

واجري على الله ان شاء الله

اللهم صل وسلم وبارك على حبيبي خير البشر محمد ابن عبدالله وعلى آل محمد عدد ما كان وعدد ما يكون وعدد الحركات وعدد السكون