السلام عليكم ورحمة الله وبركاته
انا مادخلت في المنتدى هذا الا لاني جاي اعرض عليكم مشكلتي او بشكل ادق افضفض لكم
واسف اذا اطلت في الحديث [ واسف اذا كانت صراحتي راح تكون زايده ]
انا انسان ابلغ من العمر 18 عام
ومع بداية السنه هذا راح اكون في الثالث ثانوي
انا اغلب وقتي على النت من اول ما اقوم من النوم لين ارجع انام نادر ما اطلع من البيت ولي على الحال هذا من يوم ما انا في ثالث متوسط قبلها كنت اطلع للحاره
وصراحه مدري وش اقول لكن - ما احب اطلع من البيت مدري ليه بالضبط واكره الآسواق والاماكن الزحمة ، حتـى المستشفى ما احب اروح له الا للاشيء القوي وانا في النت اقدر اقول لكم اني ما اسكت اتكلم مع الجميع وعندي اصدقاء في مواقع وآلخ لكن في العالم الواقعي ، ماعندي اصدقاء ولا احب اطلع مع احد الا نادر ، وغالباً تكون مع شخصين محددين فقط ابن عمتي واحد اقاربي فقط ، واذا امي قالت ودي للسوق او اي مكان ، اطلع اي عذر عشان ما اوديها مهو لاني ما ابي لكن مدري احس ما اقدر اوديهاا ، واذا نزلت في مكان عاام احس الجميع يناظرون فيني وانا شخص اعيش في احلام - بقول معلومه اول مره اقولها في حياتي ، قد مررت بـ قصة حب فاشله مع فتاة ماكنت ابيها لأجل شهوه لكن كنت ابيها زوجة وكنت اتخيل اني متزوج منها لكن مرت الآيام واصبحت من اسوء إلى اسوء وزني نزل فوق ما هو نازل - وحالياً ما اقدر انام في مكان مظلم ولا اقدر انام الا لازم السماعات في اذني واشغل فيلم وثائقي واغمض ولين انام ، غير كذا يجيني آرق ولا اقدر انام - وما احب افكر في الماضي وافكاري دايم للمستقبل والحاضر ما اعيشه قوم من النوم على الاب توب واجلس عليه لين انام على نفس الروتين حتـى في رمضان نفس الحاله - ولا احب المناسبات والآعراس ولا اروح لها الا الشيء المغصوب عليه - وفي النت غالباً ما اتحدث بـ شخصيتي الحقيقة انتحل شخصية اخي الأكبر وعلى اني شخص موظف وآلخ - وابين لهم اني شخص قوي السان لكن في الحقيقة عكس ، صحيح معلومة نسيتها ، امي دايم تبيني اروح لـ طبيب نفسي لكن انا ارفض واكثر من مره تحجز لي موعد واخليه ما اروح مابي اروح له لاني اعرف نفسي ماراح اقدر انطق بحرف عنده - وحتى الحين وانا اكتب لكم الكلام هذا يديني ترتجف واكتب كلمات وامسحها واحس بمغص - ودايم تجيني افكار الحاديه واشياء كثيره وافكر فيها واقول ايه صحيحه هذي وكذا - وبعدين اروح ابحث عنها والقى الجواب اللي يردني إلى الحق - وانا شخص احب البحث وابحث كثيراً لكن غالباً تكون عن اشياء في نظر البعض تافهه وفي نظري انا تهمني ، مثلاً : عرفت بـ مغني جديد ابدا ابحث عن تفاصيل حياته الدقيقه واعرف عنه كل شيء متى انولد وحياته الاجتماعيه وآلخ - وهكذا ومرات ابحث عن اشياء مفيده . - ودائما اتمـنى اني ما انولدت في السعوديه اتمنى اني انولدت في كندا او امريكا - مرات اتمنى اني انولدت هناك حتى لو كنت نصراني - وانا اكلي دائما يكون وجبه واحده في اليوم او مرات تكون ثنتين وباقي اليوم اشرب قهوه او عصير - ايه صح انا شخص مدخن / ما دخنت لآن اصدقائي مدخنين بالعكس كل اللي اعرفهم غير مدخنين الا واحد طحت في الدخان لاني وجدت اني يسليني ، واتسلى فيه - مع انه سبب لي مشاكل منها حرقان المعده / وابي اطلع من السعوديـه بـ اي طريقـه كانت ما ابي اعيش باقي حياتي هنا لانه بشكل ادق اقدر اقول لكم انه كل اسباب مشاكلي في السعوديه . - مع العلم ان ابوي وامي مابينهم مشاكل كثيره يعني مشاكل عاديه ومو مقصرين معي الحمدلله - هنا اقدر اقول لكم اني ماعاد عندي شيء اقوله وشبه انتهيت ، واسف اذا طولت وادري ان الكلام غير منسق ومواضيع داخله في بعض لكن ما اعرف انسق ولا لي خبره في المنتديات -
ايه صح معلومه اخيره ، خالتي قالت لي استعمل إفيكسور إكس أر .. وانا الحين استعمله بدون وصفـه طبيه 75 mg - من بداية رمضان يعني اليوم بعد السحور راح اخذ الحبه 26 : واول ما اخذته جاني اضطراب نوم وانسداد في الشهيه وخمول واضطراب بول .. واستمرت معي الآعراض هذي لمدة اسبوع وشوي وبدأت تخف إلى ان اليوم ماعاد احس فيها واغلبها راحت ، وبيني وبينكم ما ادري هل انا استفدت منه ولا لا لكـن لاحظت شيء انه قبل امس طلعت مع خوالي وكنت اسولف واشاركهم في الكلام وما اتعتع (- كلمه عاميه .. وفيه نقطه آخيره هل استمر عليه ولا اتركه - وهل هو صدق ينزل الوزن او يزيده (- لأن فيه بعض المواقع يقولون يزيد الوزن وبعضهم يقولون ينزله
وشكراً لكم واسف مره آخره ، استودعكم الله الذي لا تضيع ودائعه