تجربتها الشخصية .. علاج الوسواس القهر

تجربتها الشخصية .. علاج الوسواس القهر

تجربتي في علاج الوسواس القهري





















موضوعي اليوم مش موضوع علمي مش هاتكلم عن الوسواس القهري كمرض وتعريف

هاتكلم عن تجربتي الشخصية لمدة 5 سنوات مع المرض وسنتين في العلاج

وعلاجي الحمد لله اللي ربنا من عليا بيه

وكتبت موضوعي دا علشان يفيد كل موسوسة في التخلص من مرض الوسواس القهري أو عذاب الوسواس القهري لأني عانيت فترة طويلة منه

عزيزاتي بداية حبيت أقول في بداية الموضوع


إني لقيت إن كتير في مجتمعنا موسوسين فلازم علينا نراعي شعورهم وإن دا أمر فعلا خارج عن إرادتهم

يعني مش بإيديهم إنهم موسوسين

وموضوع وسوستهم غير إنه بيكون تاعبهم جدا , بيكون الموسوس حساس جدا خصوصا تجاه مرضه

يعني مش بيستحمل إستهزاء من حد أو تريأه من اللي حواليه في المجتمع أو من أهله

ولازم تقفوا بجانبه خصوصا لو هو شخص بعيلتكم ماتضغطوش عليه إنه التصرف دا غلط ولاتتخلص منه و و و

مش كدا العلاج بالعكس كدا بتزودوا الضغط النفسي عليه وبتحرجوه فوسوسته بتزيد

فعلاج الوسواس محتاج هدوء وإن اللي حوالين الموسوس يتحملوا تصرفاته ووساوسه ومرات يحاولوا يقنعوه ومرات يخللوه يتمادى في وساوسه ويتغاضوا عنها لأن علاج الموسوس مش بيحصل فجأه ولا بالضغط








من 5 سنوات كانت بداية وسوستي

ماكنتش اعرف يعني ايه وسوسه أصلا وصراحة ماكنتش بعترف بالطب النفسي!!

وماكنتش أعرف إن الأعراض اللي بتحصل دي بداية مرض الوسواس القهري

كانت بداية وسوستي أشهر نوع وسوسة .. وسواس الوضوء والنظافة والطهارة

في خلال الخمس سنوات تنقلت بين أنواع وسوسة مختلفة

يعني ماكنتش ثابته على نوع واحد

يعني اختفى وسواس الوضوء ظهر وسواس الطهارة

اختفى وسواس الطهارة ظهر وسواس الصلاة وخصوصا في تكبيرة الإحرام

وهكذا .. يعني دوامة

لأن مادام باب الوسوسة مفتوح .. فالمريض بيتنقل بين الأنواع المختلفة

واستمريت على الحال دا 5 سنوات

فلكم أن تتخيلوا كم الوساوس اللي مريت عليها

وسواس بأكلي .. خوف من السحر .. خوف من الحسد .. أصبحت لا أحب الزيارات ولا الخروج

وسواس وضوء .. طهارة .. نظافة ..

وطبعا أي حد موسوس عارف تصرفات الموسوسين بتكون إزاي يعني تلاقيه مثلا مايعرفش يفتح قبضة الباب بيده يفتحها بكوعه أو يمسح الكرسي قبل مايجلس عليه أو مايمرش بشارع معين أو ماياكلش عن شخص معين و و و و

يعني التصرفات دي اعتيادية مع كل موسوس

ودا أقل شئ من معاناة الموسوس خصوصا عند تعامله مع المجتمع

فعلا أنا كان بيمر عليا ليالي ببكي فيها لأني مخنوقة .. كنت بحس إني زي السجين اللي حابس نفسه بيده مكتوف اليدين بجنزير حديد .. مش عارفه أعيش حياتي الطبيعية

5 سنوات ولم يخطر ببالي إن دا مرض وله علاج

بس الحمد لله أهلي تفهموا طبيعة حالتي وكانوا بيجاروني في وساوسي وأفكاري وكأن مافيش شئ غريب قدامهم

الحمد لله كانوا مقدرين إن وسوستي غصب عني ومتفهمين الوضع

صدفة .. قررت أروح لدكتور نفسي

ماكنتش مقتنعة إن فيه علاج للوسواس القهري أو كبسولات تعالجة مثلا

قاللي إن حالتي صعبة ومعقدة شويه لأني تأخرت أوي في إستشارة الطبيب

وهاحتاج علاج مدة كبيرة تقريبا سنتين

فكتبلي علاج مضاد للإكتئاب لأنه بيحسن الموصلات العصبية ودا بيساعد في العلاج

نوع آمن جدا إسمه سيبراليكس 10 cipralex10









وبدأ معايا جلسات بالكلام

فكرة الجلسات دي إن الموسوس بيكون في دايرة مغلقة نتيجة الأفكار القهرية اللي في مخه

وإنه لازم يستجيب لها ويعملها

ولو ماستجابش لها بيبدأ التوتر والقلق ومش بيرتاح إلا لما يستجيب لأفكاره القهريه دي

يعني مثلا موسوس الوضوء بيبدأ الوضوء وبعدين لما يوصل لنصف الوضوء أو لآخره بيحس إنه لم يتم وضوؤه أو إنه لم يحسن وضوؤه أو إنه نسي عضو في وضوؤه فدي أفكار قهريه

هو متأكد إنه أتم وضوؤه لكن في خياله ومخه هو لم يتم أو لم يحسنه

فبيضطر علشان يتخلص من قلقه وحيرته دي بيضطر يعيد وضوؤه ممكن يعيد وضوؤه كتيرررر يمكن 10 أو 20 مره مثلا

وهكذا بيدخل في دايره مغلقة

فأساس العلاج هو كسر الدايره دي وإن المريض يقدر يخرج منها لأنه بيكون زي المسجون فيها

فالدكتور بيفهم المريض ايه هو الوسواس القهري وتعريفه وإنها مجرد خيالات والمريض أصلا عارف إنها خيالات وأوهام في مخيلته فقط

وإنه لازم يساعد الدكتور ويسمع الكلام علشان يطلع من الدوامة دي ويقدر يعيش حياته زي الناس الطبيعية

يعني مثلا لو واحد موسوس وضوء

وجاله وهم إنه لم يحسن وضوؤه وعايز يعيده

فالدكتور بيطلب منه كأمر إنه مايستجيبش للوهم دا ويكمل نفس وضوؤه ومايكرروش ويخرج

طبعا هايكون الأمر صعب جدا جدا جدا وهايكون تعبان

الأسهل للمريض طبعا إنه يعيد وضوؤه ويتخلص من التعب دا ويستجيب لدوامة الوسواس

وطبعا المريض هايفكر ويقول طيب مانا كدا وضوئي باطل يعني صلاتي هاتكون باطلة بالتبعية

العلاج .. لازم يكمل وضوؤه ومايعيدهوش ويطلع

طيب هايقول لنفسه طيب مانا وضوئي باطل؟؟ عاااااادي

طيب ماهي الصلاة هاتكون باطلة ؟؟؟ عاااااادي مش مشكلة صلي كدا بوضوءك الأول و ربنا هايسامحك

أول مره هايكون الأمر صعب جدا جدا

ثاني مره صعب جدا جدا والمريض هايحس إنه متوتر ومش قادر

المره العشرين مثلا هايبدأ المريض يقدر يطلع بسهولة من أوهامه

المره الخمسين أصلا مش هاتجيله الأوهام

شوفتوا ؟ يعني علاج الموسوس بيحتاج محاولات وفترة طويلة مش من مره ولا إثنين ولا ثلاث مرات

الأمر بيحتاج محاولات

ومرات بيوصل المريض في خلال العلاج لأسبوع بيقدر يتغلب فيه على أوهامه

وفجأة يحصله إنتكاسة يوم أو يومين لو تعرض لمشكلة مثلا أو ضغط نفسي أو مشكلة في حياته

بتخليه يحس إنه رجع موسوس تاني

في الإنتكاسة دي Drop المفروض المريض مايقلقش دا عااااااادي جدا ووارد حدوثه مرات كتير جدا في حياة الموسوس وبتبقى يومين أو 3 أيام وبتعدي

يعني حاجه طبيعية جدا جدا

وياما مرت عليا

كمان حاجه .. من تجربتي الشخصية لما كنت بعمل عكس أفكار وسوستي .. يعني مثلا زي لو وسواس أكل .. آكل الشئ اللي أنا مانعة نفسي منه .. طبعا بعدها ببقى حاسه بتوتر شديد جدا وقلق ولازم أروح أتقيأ علشان أرتاح

فكان الحل واللي الدكتور وافق عليه إني أروح أنام ..بعد التجربة لاحظت إني فعلا بقوم ناسية إني متوترة وكأن شيئا لم يكن وفي نفس الوقت عملت عكس وسوستي ومرت على خير

وبقيت لما اشتكي للدكتور بعد لما أعمل عكس أفكار وسوستي يقوللي روحي نامي ( :

طبعا مع العلاج كان تحسني بطئ جدا لدرجة إني مرات كنت بفقد الأمل إني هاكون طبيعية في يوم من الأيام بس الحمد لله أحسن من زمان

والحمد لله كنت راضية الحمد لله من قلبي

وكنت دايما بدعي ربنا يشفيني

وفي خلال علاجي روحت عمرتين بأول عمره دعيت كتيرررر ربنا يشفيني وسبحان الله ربنا ماقدرش الشفاء

أما ثاني عمره ديبرضه كانت في أثناء علاجي وكانت بالظبط السنة اللي فاتت

وأنا من طبعي دايما بكتب أسماء كل اللي أعرفهم من صغري في ورقة علشان أدعيلهم حتى لو مش طالبين مني الدعاء سواء عرفتهم في دراستي أو أقارب أو عرفتهم بالنت حتى لو مش عارفه أسمائهم الحقيقية

فخلصت ورقة الأسماء في الطواف ودعيتلهم

وأنا بالسعي ماما قالتلي دعيتي لنفسك والوسوسة !!!

!!!!


تفاجئت إني نسيت تماما!!!

عارفين ليه؟ لأني كنت تعايشت مع وسوستي ووصلت لمرحلة مش بعتبرها مرض خلاص بعتبرها أسلوب حياتي الخاص

حتى مع علاجي كان تحسني بطئ وكنت بسمع كلام الدكتور وبطبق أوامره فقط لكن جوايا كنت فاقدة الأمل تماما

فدعيت ربنا وقتها وللآن فاكرة إحساسي مش قادرة أنساه

قلت ( يارب اشفيني من وسوستي ) وفي نفسي قلت ( والله يارب أنا راضية والحمد لله أنا مش معتبره مرضي أصلا إبتلاء دا نعمة منك يارب فلو شفيتني الحمد لله ولو ماستجيبتش دعايا وشفيتني والله يارب الحمد لله من قلبي دا وسوستي دي نعمة يمكن دي حاجه مميزاني )


كنت حاسه بكسرة في قلبي مش عارفه ليه و فقدان أمل إني ممكن أتغير لأن 5 سنوات كتيررر وخلاص تعودت وبقى أسلوب حياة فكنت راضيه من قلبي فعلا وتعايشت مع الوضع وشربت زمزم

وسبحـــان اللـــه

من وقتها اختفى الوسواس


بقى أكلي طبيعي .. الأفكار اللي كانت بتجيلي وتخليني موسوسة اختفت !!

لما قلت لطبيبي قاللي يمكن فترة بسيطة نتيجة الراحة النفسية مع العمرة وهاترجعي تاني موسوسة!!

ماكانش مصدق إني ممكن أكون خفيت لأن حالتي كانت شديدة وعلى كلامة معقدة فيها أنواع كتير من الوسوسة

بقالي الآن سنة وشهرين من العمرة الأخيره دي والحمد لله بديت أوقف العلاج تدريجي

بس لأنه بيتوقف على البطئ الشديد فللآن لسه بوقفه

مرات لو تعرضت لضغط نفسي أو مشكلة وتوتر ممكن بيجيلي أفكار الوسوسة تاني بس ممكن لمدة يوم أو يومين وبقدر أتغلب عليها الحمد لله وأتحاشاها والحمد لله أي وضع أحسن بكتير من قبل كدا

الحمد لله

الحمد لله

الحمد لله



حبيت أكتب تجربتي يمكن أقدر أفيد أي أخت موسوسة بتجربتي

كمان لأن دكتوري قاللي إني ممكن أساعد في علاج أي حد موسوس لأني إكتسبت خبرة منة في طريقة العلاج بحكم عملي كطبيبة

سواء مساعدة في طريقة العلاج أو متابعة


00``00`

المصدر: نفساني

سوف ارجع لموضوعك قراتة بس ممن جملة بسيطة ونفعني سارجع للموضوع مرة اخرى

طبعا جزاكى الله كل خير على ان حضرتك حبيتى تفيدى الجميع بتجرتك الشخصية واتمنى من الله سبحانه وتعالى ان يوفقك لما يحبه ويرضاه..لكن بعد اذن حضرتك انا عندى بعض التعليقات على حوارك لو تسمحيلى هقولها:

اولا انا زعلان منك لانك خصيتى البنات بالذكر وتركتى الشباب..ماهو اكيد الوسواس بردو فى الشباب والبنات على حد سواء..واكيد هما اخواتك بردو..ويستحقوا منك انك تخصيهم بالذكر..وماتبقيش عنصرية..دا اول كومنت حبيت اقولهولك
ثانيا كنت عايز اسأل حضرتك منين وعندك كام سنة وبتدرسى ايه دا بعد اذنك..وخلصتى الدراسه ولا لسه والوسواس جالك فى سنة كام بالضبط يعنى فى الاعدادى ولا فى الثانوى ولا فى الكلية..وسبب السؤال انى كنت عايز اعمل مقارنة بين حالتى مع الوسواس وبين حالة حضرتك يمكن يقدر الله واستفيد من التجربة..ويبقى لكى الاجر
ثالثا كنت عايز اسأل حضرتك اخبار الوسواس مع الدراسة..هل مأثر على المذاكرة ولا كان عادى..كنتى بتعرفى تتعايشى معاه وتذاكرى طبيعى ولا كان بيسببلك مشاكل فى التركيز والاستيعاب وخلافه وأثر على مستواكى الدراسى ولا لأ
واخيرا احب اشكر حضرتك جدا واتمنى سعة صدر حضرتك فى الاجابة عن الاسئلة

جزاك الله خير وربي يتمم عليك الشفاء