يا صاحب الهم إن الهم منفرج

تجربتها في الاستغفار



السلام عليكم ورحمته بركاته


راح أدش في الموضوع بدون مقدمات وبدون ما أطول عليكم ...

قدر الله علي ومرضت تقدرون تقولون مرض نفسي أكثر منه عضوي . كنت أحس بضيقه شديده , وإكتئاب , وتنمل في الأطراف , الأرق وقلة النوم .كنت ماطيق زوجي , حتى بيتي كرهته , وعيالي مدري عنهم ,متى ياكلون ويشربون , متى ينامون ويقعدون .....



تخبرون أن الواحد لما يمرض نفسيا اللهم ياكافي , هذا الشئ مو بس يؤثرعلى حياته , بل على حياة
المحيطين فيه سواء (أهل , أقارب , زوج ) وينعكس على صحته العامه ويتوهم أن فيه مرض
خبيث .... أرد لموضوعي بعد ما استمرضت ما خليت طبيب ولا مستشفى إلا ما رحت له
وما بقى تحليل ولا أشعه إلا وسويتها . كلهم يقولون أنت طيبه ما فيج أي شي .
تميت على هـ الحال تقريبا 6 شهور ..... المهم بالأخيرأنصحوني الناس أروح حق المشايخ عشان يقرون علي ,,,
رحت لكذا شيخ وقروا علي . حد يقول فيج حسد وعين , والثاني يقول فيج من اللي أعوذ منهم .
لا أنكر أن بعضهم تحسنت على علاجه ....نسيت أقولكم ...وصفوا لي علاج عباره عن ماي مقري عليه , وزعفران وماي ورد , وسدر و....إلخ .

في يوم ,وأنا كالمعتاد متضايقه وأبكي جتني رساله ع الجوال من وحده صديقه لي , طبعا كانت عارفه عن حالتي .كانت الرساله تقول :
( لا تشغل بالك ... واجعل الفرح شكرا , والحزن صبرا , والصمت فكرا ,والنطق ذكرا .
لاتشغل فكرك ...ربما ساءتك أوائل الأمور , وسرتك أواخرها ,كالسحاب أوله برق ورعد وآخره غيث هنئ ... وأستغفر فالإستغفار يفتح الأقفال ويشرح البال .
ولا تنسى ( حسبنا الله ونعم الوكيل ) فإنها تطفئ الحريق , وينجو بها الغريق , ويعرف بها الطريق ..
وداوم على (لا إله إلا أنت سبحانك إني كنت من الظالمين )فسرها عجيب وبعدها للدعوات من الله مجيب .... فإذا استد الحبل انقطع وإذا أظلم الليل انقشع وإذا ضاق الأمر اتسع , فتوكل على الله )

طبعا قريت الرساله أكثر من مره , وقلت في نفسي ليش ما أستغفر وأشوف شراح يصير لي , ماني خسرانه شي . وقررت من يومها أني أستغفر بعد كل صلاه أصليها 100 مره وأقول ( أستغفر الله العظيم وأتوب إليه ,حسبي الله ونعم الوكيل , لاحول ولا قوة إلا بالله ,لاإله إلا أنت سبحانك إني كنت من الظالمين ) وكل ما ركبت السياره مع زوجي في مشوار , وأنا أشتغل في البيت , وأنا على التلفزيون , وأنا انتظر في استراحه كنت أستغفر . أيضا وصيت زوجي أنه يستغفر وكنت أشجعه وأحثه عليه ...

ظليت على هالحال تقريبا شهر وزياده ... يمكن ماراح تصدقون ياأخواتي لو قلت لكم أني تغيرت , وكل الأعراض اللي كنت أشتكي منها خفت ,,, لا ويمكن زالت بعد . رديت زي أول ويمكن أحسن .

نفسيتي تحسنت , والضيقه والأكتئاب راحوا مني , والتنمل اللي في أطرافي اختفى سبحان الله . اللهم الأرق ساعات يجيني ,أصلا أنا طول عمري نومي قليل .

أحمد الله وأشكره أني خفيت وتشافيت , عشان جذيه أوصيكم بالأستغفار ثم الإستغفار ثم الإستغفار , فإنه علاج لكل الأمراض إلا الموت .فإذا كنت تريد أن تحقق أمنيه أو شئ شبه مستحيل أو أي شئ في بالك , لطلب النجاح , توبه , مال , زواج , ولد صالح , تفريج هم , تنفيس كربة , دفع بلاء , شفاء من أي داء فقط ...... ((( أستغفر )))
هذا وأسأل الله لي ولكم الصحه والعافيه