يوميات المكتئبين تعال نسولف

https://

المشاركة الأصلية كتبت بواسطة قطرات الندا

هلا وغلا لوليتا
كلنا ماجانا نوم وماغير نهوجس وندور على اقسام المنتدى
اسلم طريقه جربتها بالارق اني ما اجبر النوم واقعد انقلب لان هالحاله تطيره زود وتجيب قلق .
ان ماجاك نوم غيري وضعك تصفحي بالنت شوفي فيلم اقرأي سوي اي شي بس لاتحاوولين تنامين .
العقل الباطن شي حساس جدا وماتدخل له الاوامر بالاجبار

هههههههه
عاد تصدقين سلمت عليكم وقلت خلني اغمض شوي ارتاح وجاني النوم بس متقطع شكلي دايم بسلم عليكم اذا ماجاني نوم
المشكله االي مطير نومي هو القهوة والقلق

المشاركة الأصلية كتبت بواسطة محمد البدراني

هلا لولو هلا قطرات

عجزت لا اناااام ما بقى شي الا وسويته

قمت قبل شوي ونقعت مرة وسويتها غرغرة للحلق

سمعت ان الجوافة حلوة للكحة

هلا بك محمد والف سلامه عليك والله يعينك
والله انا صحيت من النوم اليوم حلقي يوجعني
بس انت حاول تسوي مرق وتضيف له فلفل اسود وعصرة ليمون واشربها تنفع هذي الاشياء للكحه والزكام
انا تاثر سمعي اخر مره جاتني كحه قوويه واذني تقفلت والى الان مالي خلق اروح اعالجها كافي العلاجات والمراجعات اللي اخذها مليت صراحه
الله يشفيك ويشفيني ويشفي الجميع

المشاركة الأصلية كتبت بواسطة عيون متفائلة

السلام عليكم أخواني أخواتي الكرام و الكريمات

يارب يسعد لي صباحكم و كل أوقاتكم


سلامتكم يا اخواني الغاليين محمد و قطرات و لوليتا و الجميع


اخوي محمد ورق الجوافة ممتاز للكحة و لكل داء و فالك العافية يارب

سبحان الله تقريبا نفس اللي مريت فيه أخوي محمد مر فيه أخوي والتشخيص فصام مع أنه ماشاء الله شرواك أطيب ما رأت عيني و أنقى سريرة و كل طبع جميل فيه ، لدرجة أنا أتعلم منه مع إني شبه إني ربيته ، لأن أمي طولت ما أنجبت بعدي و انجبته يوم صار عمري ثمان سنين و كنت أحس إنه ولدي مو اخوي ، حتى و هو صغير كان يناديني أما بتشديد الميم زي لهجة المصارية و ينادي أمي ماما

مع إني ما طلبت منه يناديني كذا ، هو نطقها أول ما نطق كلمة ماما

كنت مسؤولة عنه من الرضاعة لين تبديل الملابس و الأكل ، يتبعني في كل مكان أكثر من امي ، يوم يمرض كنت أقلق عليه و أروح معاه المستشفى مع الوالد و اشيله و كان وقتها مفروض علي إني اغطي وجهي من الصف الخامس و يوم ادخل صالة الإنتظار الخاصة بالنساء ياشرون علي الحريم يقولون شوفوا أم صغيرة و يسألوني بتعجب ولدك ؟ أقول اخوي لأن شنطة اغراضه و الرضاعة معي و اناوله اياها
حتى يوم كان يمرض و هو نونو و يستفرغ علي ما كنت أزعل بينما كنت استغرب أن أمي تتضايق و تعصب و تهاوش

يمكن اللي قربنا من بعض أننا حساسين و نكره الصوت العالي و الصراخ

أحيان أشك أن بيننا و بين الوالدة بلاء ، حواجز شاهقة و أسوار و بروج

و اللي يخليني ما أزعل منها أنها انجبته ، يمكن لو أنا انجبته ما كان بهذي الطباع ، أنجبت اللي خلاني اعرف أن فيه بياض في البشر و أن فيه لون ابيض غير السواد و المرض اللي ملى قلوب البشر

اثنين في حياتي يوم تسود الدنيا في وجهي و أكره اهلها و يوم يطرون علي أحس أنها بخير جدتي الله يرحمها و اخوي الله يحفظه

مرة حبيبي ضعيف متعلق فيني لدرجة ما أبين له إني مريضة حتى ما يقلق و يشيل همي فوق مرضه يارب يعافيه

سبحان الله ربي ابتلاه و ابتلاني في أعز ما عندي

كسرتني الدنيا فيه و قهرتني عليه بمرضه و وقف حاله

كانوا الشغالات يوم يشوفون تعامله معي و تعاملي معاه يقولون هذا ولدك مستحيل يكون اخوك لأني كمان اخاف عليه خوف فظيع حتى يوم يزيد عليه الوسواس يطلب إني ارقيه ، يقولون بالله اعترفي لدرجة يوم يطلب مني أي أحد كنية اتكنى باسمه أم فلان ، حتى ملامحنا كربون من بعض

دايم يعذبني التفكير في المستقبل اخاف لا قدر الله ما يتزوج و أنا ودي له بضنا يشيلونه و هذي حالته ، و ما أحد يبي يعطف عليه غير عياله

لذلك دايم اخوي محمد أدعي لك مثل ما أدعو له و يهمني امركم و شفاؤكم و التقدم في حياتكم

و ما على الله بعيد

أسأل الله الكريم رب العرش العظيم الشفاء العاجل لكما و لجميع المسلمين

ماشاء الله عليكي ياعيون مشاعرك مشاعر ام
ذكرتيني باختي الكبيره الله يكون بعونها ويصبرها على ماهي عليه
ويخلي لك اخوكي ويخليكي له وربي يفرجها عليكم

مدري انا يتهايلي والا اللي احس فيه حقيقي
صرت افهم تصرفات الناس تجاهي على انه استغفال
احسهم ينظرون لي بنظره اني غبيه وماعرف اتصرف
وان مالي لزمه بعد وفاة ابوي واحسهم الا يبغو يتخلصو مني
مدري هذا حقيقي والا انا صرت حساسه
مررره تضايقت اليوم من تصرف وحده قريبه لي وندمت
اني تقربت منها

شوفي لوليتا حبيبتي موت الاب هو اليتم الحقيقي للبنت انا مثلك بعد مامات ابوي صرت حساسه وافسر اي تصرف انه تقليلا من شأني بعد ماكنت انا الكل بالكل .. تلاشى هالشعور لأني اتعامل مع الجميع باخلاق طيبه ومن يحترمني احترمه ومن يتجاهلني انساه ولا كأنه موجود بالحياه وبصراحه ارتحت

معاكي حق قطرات فقد الاب شي عظيم ولا حد بيشعر به الا اللي جربه
هو المفروض اطنش واخلي الامور تمشي بس ماعرف صرت اتاثر وازعل واتضايق واسال نفسي ليش كذا
شكلي بدات افقد الثقه بنفسي للاسف

مرحبا بالكل

ما تشوفي شر لولو اجر وعافية ولا تحسسي زيادة لانه بيدخلك الى القلق

==========================================


هلا قطرات صدقت ما فيه احد يعوض غياب الاب والام عسى الله يرحم ابوي ويطول بعمر والدتي وامهاتكم اجمعين

قبل شوي حسيت بعافية وتحسن من الانفلونزاا والكحة

دقيت على خوي الروح ظافر وقلت تعااال جاء البيت وشغلت السيارة

وانا اروح لورشة السبح في حي المستودعات طبعا اهم ما ينامون الا الفجر

وصلنا واخذت سبحتي جاهزة عندهم استلمتها وشربنا الشاهي وسوالف

ظافر قاااال يالله دق سلف نبي نرجع وراي دوام رجعنا والحين معي قهوة وعلى النت والانستقرام

السلام عليكم
هلا بكم أخواني أخواتي

أرحب اخوي محمد عسى ربي يبارك لك في رزقك و يحفظ لك صحتك

هلا بكن خواتي العزيزات قطرات و لوليتا و الجميع

قطرات يسعدني إحساسك بي و رغبتك في مساعدتي ربي يرفع قدرك و يكتب أجرك صرت ما استغني عنك ربي يحفظك

بالنسبة لأخوي الله يشفيه عنده مرضين متداخلين مع بعض الفصام و اضطراب وجداني ثنائي القطب و على طول و باستمرار تحصل له انتكاسات متلاحقة و ميول انتحارية لدرجة ينومونه كل فترة

حالته صعبة و معقدة و الظاهر أيضا أنه يعاني مثل ما يعاني اخوي محمد من السحر الله يعافيهم جميعا

أسأل الله أن ينتقم و يحاسب كل مؤذ و مؤذية

و هذا اللي خلى الوالدة من صغرنا مخنوقة و متضايقة منا و تدعي علينا

لدرجة يوم كنا نمرض و حنا صغار نتمنى ما نمرض مدري ليش كان يزيد زعلها منا و تنكيلها فينا

و الوالد الله يرحمه ما ودي اتكلم عنه لأن ما يجوز على الميت إلا الرحمة

عشان كذا القسوة اللي الواحد شافها دمرت اوادم و مستقبلهم

حتى جدتي أم الوالدة كانت تستغرب من التصرفات ذي و تقول سامحيهم مو بحيلهم غصب عنهم بعدين يوم كبرت فهمت أنه قد يكون سحر إلا أكيد

كنت استغرب من اهتمام خالاتي بعيالهم اللي بعمرنا و حرصهن على اختباراتهم و حياتهم و فرحهم بنجاحهم و اقامة الحفلات و حنا و اخواني زي الأيتام ، ما نسمع غير الصريخ و التهديد و الاحتقار

عشان كذا التفينا حول بعض و حسوا إني أمهم حتى جدتي الله يرحمها هي اللي علمتني كيف أحضر رضعاتهم و أغير ملابسهم و الطبخ و غسل الملابس و كيها ، حتى إعداد الشاي و القهوة الوالد الله يرحمه من الصف الرابع الابتدائي

يمكن لو ما كانت جدتي موجودة في الحياة تمرضنا و تهتم فينا مدري وش صار فينا

لو ما شفت الحنان من جدتي الله يرحمها ما كنت أظن أن فيه شيء اسمه حنان في الدنيا

لوليتا صادقه في البدايه راح تشعري بهالمشاعر انا قعدت اشعر فيها بعد وفاته سنين لكن فهمت الدرس وفهمت كيف اتعامل مع الاقارب والنتيجه فاق احترامهم لي كل الحدود واعجبني هالشي استخدمت طريقة اني احترمكم واجلكم لكن ماني بحاجتكم .. طبعا بطريقه غير مباشره .
صدقيني راح تفهمي الحياه وقوانينها بالتدريج .. ربي معاك ويحميك ويساعدك .
محمد البدراني قل امين جعل اشين ايامك اليوم والجاي كله تساهيل وافراح وابواب رزق تنفتح لك من حيث لاتحتسب .. تستاهل كل خير ياطيب القلب . على فكره انا امي وابوي متوفين بنفس السنه بينهم ٣ شهور فقط لله الحمد على ما قدر . لكني يامحمد صرت قويه مسؤوله حفظت نفسي وفلوسي وما املك ومالعبت بنفسي الحمدلله وهذا الشي اللي كنت اقول ميد لوليتا اذا الدنيا ماعلمتك واستوعبت تراها بتوجعك عساها ماتوجعكم .
عيون متفائله كل ماقريت حياتك اتفائل لك بشي عظيم لكن لاتسأليني وشو واقسم لك بالله ماقولك هالحكي عشان اطبطب عليك او اريحك لكن كلي يقين ان ربي لازم يفرحك بيوم وهذا عهد اخذه على نفسه سبحانه .. ان بعد العسر يسرا .. هذا شعوري وصدقيه وراح تشوفين بس اعزميني بعرسك والا بعرس اخوك بحول الله ☺

اليقين يا اخواني وخواني اليقين الثقه بالله سبحانه .. اخذت دوره من سنه تقريبا عن عدم استجابة الدعاء وفهمت السر بعدم الاستجابه انه كلنا ندعي انا وانتو لكن بالعمق داخلنا ماحنا واثقين بالاستجابه صح والا لا ؟ كلكم بتقولون لا والله عندنا حسن ظن اقولكم لا محد فينا عنده حسن ظن ابدا والا ماكان هذا حالنا .
) الظانين بالله ظن السوء عليهم دائرة السوء ) وشهي دائرة السوء الحزن والفقر والمرض والضيق وكل شي شين بالحياه .. عطانا ربي الزبده وياحظ من كان راضي ومطمئن

الـسـلام عـلـيـكـم

صـبـاح الـخـيـر جـمـيـعـاً

اسـأل اللـه لـكـم الـعـافـيـه

الـيـوم عـنـدي اشـغـال لابـد اخـلـصـهـا

بـطـلـع الـثـيـاب مـن الـخـيـاط

وبـشـتـري بـعـض الاشـيـاء الـشـخـصـيـه

وبـطـلـع الـحـلاق اخـفـف الـدقـن واصـبـغ الـشـيـب

وبـغـسـل الـسـيـاره

وبـطـلـع الـمـلابـس مـن الـمـغـسـلـه

وآخـر شـي بـقـابـل الديَّـانـه واعـطـيـهـم فـلـوسـهـم

واللـه يـسـهـل امـري و امـر كـل مـسـلـم .

ما في شك أن ربي قادر يغير الحال في أقل من طرفة العين ، لأنه على كل شي قدير سبحانه

أنا الآن كل املي شفاء الوالدة و رضاها و شفاء أخواني

غير كذا ما هو أكبر همي

حتى الزواج يوم تقولين تتزوجين ودي تصدقين إني زاهدة زهد كبير في الموضوع ذا

لأنه حمل كبير و مسؤولية ، و أنا ما عاد عندي قدرة معنوية على المداراة و لا طاقة نفسية على التحمل

أحس إني استنزفت من الطفولة إلى هذا العمر

الظروف القاسية اللي مريت فيها طول حياتي خلتني دبلوماسية و اغض الطرف على حساب راحتي كله عشان أتجنب القسوة ، إلى أن وصلت لمرحلة ما عندي استعداد أتحمل و لا أبغى أتحمل

غير إني أخاف من التغيير حتى لو تغيير مكان فراشي ، ما في شي يريحني أو يستحق إني اغامر

تخيلي طفلة بالصف الرابع هذا البيت عبارة عن توقيعها في كل كتاب او ورقة :

و ظلم ذوي القربى أشد مظاظة على

النفس من وقع الحسام المهند ..

في ذاك العمر يوم سمعت ذا البيت فهمت معناه و أثر فيني بدون أحد يشرحه لي

و في الصف السادس شريت ديوان الشاعر طرفة بن العبد و قرأت قصة حياته اللي ما تجاوزت العشرينات و سبب كتابة هذا البيت من المعلقة المشهورة

و عليكم السلام

هلا بك اخوي بدر

ربي يسهل أمورك و يوسع رزقك و يمدك بالعافية


قطرات قلبي بالنسبة للتمرين اللي قلت عليه هل لازم اسويه بلحالي ؟

أنا متحمسة اسويه صراحة

و لكني أحتاج مجلدات عشان أكتب ما يوجعني

الفترة الوحيدة اللي برغم قسوتها لكن كان فيها شي يلطف لهيبها رحمة جدتي بنا و عطفها علينا الله يرحمها

يوم راحت جدتي أخذت معها كل شي

ما لحقت أستمتع بحنانها و اغذي فكري بحكمتها

تدرين لولاها بعد الله ما كنت أعرف أن فيني مزايا

كانت طول الوقت تعزز ثقتي في نفسي من خلال اطنابها في وصف محاسني المعنوية من خلال وجهة نظرها

أقول من وجهة نظرها لأن المعاملة اللي شفتها أنا و أخواني خلتني أحس إني من أسوأ البشر

جدتي كانت عجيبة ما كانت تستدرجني عشان افضفض و يظهر انكساري و حزني

لا

كانت تسوي شيئين :

تمدحني عشان تلملم ما تكسر من شتات نفسي

و تذكرني بعاقبة الصبر و ما أعده الله للصابرين و أن الدنيا زايلة و لا بد الغيم أن ينقشع

سبحان من علمها و هي أمية لا تكتب و لا تقرأ

إلى الآن ماني قادرة أتوقف عن التفكير فيها كل يوم و أشتاق لرائحتها لدرجة دايم أحلم إني اضمها

تدرين من كثر ما اطريها كل اللي يعرفوني يفكرون أنها توفت من سنة و بالكثير سنتين و هي توفت من اربعطعش سنة

كل فرحة بعدها ناقصة ، ودي أروح لها

تدرين دايم أشوفها بالمنام أنها شابة ما تتجاوز الخامسة عشرة من العمر و لابسة أخضر و خدودها موردة و رشيقة لدرجة أن خصرها ضامر للداخل ناحل جميل

طيب كيف و أعمار أهل الجنة ما تتجاوز الثلاث و الثلاثين سبحان الله

ليش أشوفها في ذا العمر تحديدا

و أسأل الله الكريم أن يجعلها من صاحبات الفردوس الأعلى و والديك و أموات المسلمين

اللهم آمين

حسبي على اللي خان حبي وزمانه
بثوب الخداع اليوم شفته بعيوني
اهً على اللي كان عنده امانه
قلبً سقاه المر عنه إسألوني
عكس الهنا وياه عشت بإهانه
حبه شقى وهموم وايضاً طعوني
حسبي كثر ماقال اسمي بلسانه
خلاني وسط النار مظلم بي كوني


كني وحيد الناس ضيع مكانه
امشي ولاادري وين لو ينشدوني
إسقاني مر الكاس وارخص حنانه
بعثر دموعي فوق خدي مزوني
خطاي انا فيوم عليت شانه
وبيدي انا عطيته خنجر متوني
طيب وكل ظني يوفي لهوانا
خان الملح والزاد خيب ظنوني
انسى العتب ياقلب وانسى زمانه
مثله حرام يكون ساكن عيوني
خاين يجيله يوم ويلقى الخيانة
ومثلي يحس الجرح ويحتاج عوني

https://

كان الشاعر مفرح الظمني
يراجع احدى الدوائر وبرفقته ولده((بدر))وقد كان عمره انذاك 12 سنة وقد كان شاعرنا يشعر بالم في رجله فقال له ولده ((لماذا ياوالدي حتا العجائز اسبقتنا في المشئ))فأجابه بهذه الابيات




يابدر رجلي بالمسيـر عثرننـي
صارت هقاويها البعيـده قريبـه
نخيتهـا لا شـك ماساعدتـنـي
تمسى وتصبح في مرضها عطيبه
حاولت اطول شوحها واشلعتنـي
شلع الحنيش اليا تعاقـب خليبـه
عثرت حيـاة يابـدر صادفتنـي
العيش ضيق والليالـي رهيبـه
حتى العجايز بالطريق اسبقتنـي
غليبتـن ياكبرهـا مـن غليبـه