الي الاخت لدي امل

الي الاخت لدي امل

السلام عليكم ورحمة الله وبركاته
اختي لدي امل انا قريت مشاركاتج بالمنتدي وعن حديثك عن العلاج النفسي وكيف فادك اكثر من الادويه 00 الله يعلم اني سعيد انج تحسنتي معا العلاج النفسي والله يزيدك ويشفيج تماما من الامراض والمعاناة اللهم امين 00
انا اخوج من الكويت اعالج من سنين طوال بالادويه من الاكتئاب والرهاب والتوتر والحمدلله علي كل حال لاكن انا مضطر اترك العلاج الان وفعالن تارك الادويه من 25 يوم لاكن اتناول مهدئ فقط لاكن الله يعلم بحالي بعد تركي للأدويه وشلون وضعي والضياع اللي احس فيه 00 بحثت عن معالج سلوكي بالكويت لاكن لم اجد او انا مشتت الفتره هاذي 00 لاكن اختي لدي امل اتمنا ان اعرف دكتورج اللي تاخذين عنده جلسات علاج نفسي ارجو ان تكتبي اسمه واي منطقه موجود بالكويت 00 او اذا كان في مركز ان تكتبي لي اسم المركز 00 اتمنا ان اذهب له عل وعسا ان يكتب الله لي التحسن من هالوضع الي انا فيه 0

المصدر: نفساني

هلا أخوي

بس أسألك أول لا تكون وقفت أدويتك فجأة؟؟ دير بالك على الطريقة اللي وقفتهم فيها لأن التوقيف الغلط يسبب انتكاسات وبعدين العلاج النفسي راح يكون صعب لأن أمور ثانية مسببة مشاكل اللي اهيا اعراض انسحابية من أدوية ومو بس المرض بروحه! ويمكن يقولك أرجعلهم ووقفهم صح!! أنا معاي دقق على هالنقطة ووقفتهم أبطأ بوايد من الطريقة اللي قالها لي الطبيب وعطاني اختبار اسوي كل يوم إلخ فمادري اشلون وياك واشلون موقف أدويتهم وحدة مرضك...

ثانيا بقولك نفس الكلام اللي قلته للاخت via في موضوعها بخصوص دكتوري وفي أشياء ثانية ذكرتها الله أعلم يمكن تفيدك في موضوعها بهالرابط
http://www.nafsany.cc/vb/showthread.php?t=66628&page=3

اللي اتعالج عنده الدكتور جاسم الخواجة شاااااااااااااطر ويهتم جد بشغله ومصلحتك وسلامتك وطيب وخبرة طويلة موجود في مكتب الانماء الاحد مسائي من 4 لـ 8 و الثلاثاء صباحي افضلك تروحله هناك بعد ما تحط موعد دق عليهم واطلب فاطمة دشتي من البدالة او قولهم حولوني لـداخلي 217 أو ممكن تكلمه بالتلفون بمركز الاستماع العصر من 5 لـ 8 بالرميثية وموجود بعد بالرقعي بمجمع المحاكم بإدارة الاستشارات الاسرية الصبح بس مادري أي أيام واشلون تحط مواعيد عندهم والروضة مسائي بس متى اي ايام وأي أوقات مادري (بصالة افراح زبن بدور ثاني)

وشي بالنسبة للروضة سامعه انه مواعيدهم صعبة!! والله اعلم يعني مو متأكده اكيد من المعلومه بس قريت لواحد بالانترنت يقول يشوف الدكتور هناك بالروضة ويقول ناطر جم اسبوع على ما يدقون عليه بخصوص موعد مفتوح

الانماء احسن من هالناحيه مادام حطيت موعدك اللياي بنفس اليوم بعد موعدك علطول عادة انت بخير الا لو نطرت ممكن تطير وتنطر اسبوع ولا اسبوعين إلا لو عندك استعداد الثلاثاء صباحي! بس يفضل على كلامهم الثلاثاء لاضطراري وانت شوف شنو يقولك بالبدايات اشكثر ومتى المرة الليايه تييله

قلتلك كــــــل الاماكن اللي انا اعرف اهوه فيها وما عندي خبر عن غيرها معقوله يدوام بأكثر من جذي الرقعي الصبح والانماء يوم صبح ويوم عصر والروضه مسائي والاستماع مسائي ولا تنسى محاضرات ودوام تدريسه بالجامعة وايد فمادري معقوله اكثر اتذكر مرة قال شي عن مكان بالدسمة او الشاميه بعد بس معقوله بعد مكان!

بس الانماء أهدى واريح في العصر وأنا اروحله في الحالات الطارئة بس للرميثية مع تمنياتي ما يرفضني لانه له كل الحق هناك لأنهم بالتلفونات مو مقابلات طرقتهم هناك غير بس الحمد لله ما انقص ويهي ههه

في حال قالولك ما يصير تروحله لأي سبب من الاسباب لأنه عليه ضغط او شي حاول بالاستاذة بشاير الزواوي إذا يصير بس اصر على جاسم اول

اهوه الخواجة أحسن شي برحلة علاجي عندي ثقة عمياء بهالانسان ما أقدر أقول كفاية عنه اتذكر عدل شنو كنت وشنو صرت صج ان ما تحسنت مليون بالمية بس الفرق كبير وملموس فرررررق أنا حاسة فيه وما ارضى احد يقولي غير هالكلام لو مو رايحه عنده جان أنا وضعي مخيف ما أبي حتى افكر في شنو كان ممكن يصير اتخيل يا اكون مت او محجوزة بالطب النفسي هذا اللي اتصوره يعني

وترى 30% عليه وعليك 70% من الشغل لازم تشتغل وتطبق

وكل تركيزه على العلاج المعرفي أو المعرفي السلوكي عنده.. حتى بالنسبة للإكتئاب عنده كتاب كاتبة مفيد

وأي سؤال حاضرة

موفق برحلتك العلاجية أخوي وانشالله تضبط معاك الأمور بخير

مشكوره اختي لدي امل علي الرد
انا وقفت الدوا بتعليمات الدكتور عصام الانصاري بس خلاني علي المهدئ اللي اهو الزانكس بس بصراحه منهد حيلي وتعبان معا العلم اني الحين اشوا شوي من اول فتره تركت فيها العلاج 00
وعن الدكتور الي طلبت اسمه وماقصرتي اختي علمتيني عنه جزاج الله خير (جاسم خواجه ) انا عبالي بعياده خاصه طلع بمركز وبلاش اعتقد جذيه 00 والمركز اللي اهو فيه مكتب الانماء بأي منطقه الرميثيه اهو موجود ( تنصحيني اروح المركز اخذ موعد عادي ولا لازم اتصل تلفون عليهم 00 اختي سامحيني والله احس مخي متلخبط وماني عارف اشرحلج تكفين اختي 00 علميني الخطوات ببساطه المركز وين بالضبط المنطقه 00 وشنو الخطوه الثانيه اتصل عليهم ولا اروح هناك عندهم 00 ادري ثقلت عليج بس مااقول غير هدعاء لج اللهم يارحمان يارحيم اللهم يارحمان يارحيم ان تشفي اختي لدي امل وتتم عليها الشفاء ويشرح صدرك وييسر امرك وجميع من يقرا هاذا الدعاء اللهم امين 0

بروحله بمركز الانماء بس اي منطقه وراح يستقبلني ولا لا 00
وشلون الجلسات معاه اسبوعيه ولا كل متا الجلسه العلاجيه معاه 00
تكفين اختي00مركز الانماء علميني شلون اوصله هناك وبصطيلي الخطوات لاني والله مو قادر اركز كلش 0

لدي امل هل انتي موجوده

أولاً لا تحاتي لا ثقلت ولا شي انشالله تسأل أسئلة لباجر والله عادي ما تضايقني المسألة أبد بالعكس أحب أساعد ليش لأ

بالنسبة لمكتب الإنماء لأ ما يصير تروحلهم علطول لازم تدق وتحط موعد قبل لا تروحلهم نظامهم هناك بالمواعيد بس

دق على ........... راح يرد عليك مال البدالة اطلب منه إما التحويل للأخت فاطمة دشتي أو بس قوله أبي داخلي 217 (اللي ابسطلك الاثنين يوصلون للأخت فاطمة) اهيا المسؤولية عن مواعيد الدكتور

بالتحويل إذا ردوا عليك تأكد إنها الإخت فاطمة لأن مرات ترد وحده غيرها الظاهر بنفس المكتب أو شي بس بالعادة اهيا اللي ترد واصبر لا تستسلم لو اضطريت تتصل أكثر من مرة لأن مرات ما ترد

أنا حظي أوفر لمن أتصل بنص اليوم لا الصبح وقريب على الظهر يعني 10 او 9:30 مثلا احس تحصلها أسهل

المهم قولها أنا يديد ما عندي ملف من قبل عندكم وحابب أشوف إذا في مجال آخذ جلسات عند الدكتور جاسم الخواجة وشوف شنو تقولك وعسى أتمنى يااااا رب ما يكون في أي أشكال وأصر عليه...

والمواعيد بتكون مثل ما قلت قبل إما (الأحد العصر بين 4 لـ 8) أو (الثلاثاء الصبح بس متأخر يعني 8 ولا 9 الصبح مثلاً يكون لا 11 أو 12 بالعادة)

إذا قالت لك مافي مجال عند الخواجة إسألها منو غيره عنده جلسات علاج معرفي (أغلبهم هناك زينين...بس الخواجة أفضل)

أو كآخر بديل أنصح الأستاذة بشائر الزواوي بس اهيا بقسم ثاني لازم يحولونك للمسؤولة عن مواعيدها بس اهيا مو بالضبط علاج معرفي بروحه اهيا تدخل فيه شي اسمه علاج واقعي بعد وتنويم إيحائي مرات عندها كنت عندها بالاول لسنتين اعتقد عطت كل اللي تقدر عليه بعدين قالت ما تقدر تستمر بحالتي وحولتني لرئيسها اللي اهوه الخواجة

بس عسى من أولها يعطونك الأوكي على الخواجة...انشالله يااا رب

بالنسبة لعنوانهم أسهل طريقة لشرح مكانهم اهوه انهم ورا سوق الخام بالضبط بالديرة بظهر بعض اهما (سوق الخام والمكتب) وقبال متحف التراث اهوه المكتب عبارة عن مبنى طويل اعتقد 7 ادوار!؟ واهوه الخواجة بقسم العلاج الادراكي بالدور الثاني...

اممم هذه أسهل طريقة اعرفها عشان اشرح مكانهم... لو أعرف انت بتدش الديرة من أي صوب الشرح يكون أسهل

انا اروح للديرة من طريق الفحاحييل واروح صوب الدوار بالديرة المعروف اللي في مسجد بنصه (عرفته!؟) إذا كنت داش هالدوار من ناحية على اساس انك ياي من طريق الفحاحيل راح تاخذ يمين علطول في مبنى على يمينك علطول طويل (تحت عنده اللي اهوه مطبعة الحافظ بالاصفر) طوفه وبعدها بتشوف دخله لمصافط بسرداب طوفه وبعدها دخله لمصافط بره دش الدخله هذه على اليمين والمبنى لمكتب الانماء قباله علطول

وإذا موعدك صار الصبح انسى المصافط اللي بره واصفط بالسرداب علطول لأنه مواقفهم الصبح بره مستحيلة أصنصير السرداب بيطلعك لداخل سوق الخام من ورا اطلع منه وامش للمبنى اللي وراه (المكتب) والدخله للمبنى وقتها بتكون على اليسار على جنب المبنى

واذا ياي للدوار اللي المسجد بنصه من طريق المغرب دش الدوار وامش سيدا وبعدها نفس الخطوات الباجيه

عسى تكون وضحت الامور وشرحي ما كان معقد

وايي اهما مال الحكومة ببلاش

راح يستقبلك ولا لأ ما أضمن لك لازم تسأل مثل ما قلت لمن تدق بالخطوات اللي قلتها لك...

مبدئيا احس كمجرد احساس انك لك فرصة يستقبلك ومو رفض من أولها...يمكن تسألك عن حالتك شنو باختصار عشان تعرف يصلحك الخواجة ولا لأ

بالنسبة لجلساته اسبوعية ولا اشلون؟؟ اهوه بيقولك لمن تشوفه بأول موعد فلا تحاتي ويعتمد أولاً وأخيراً على تقييمه لحالتك شنو تحتاج.... أنا أول ما رحلته كانت المسألة أسبوعية

أحس كلامي غير مبسط بس والله حاولت ابسط وأسهل الشرح قدر الامكان واسأل اذا مو فاهم شي لا بتثقل ولا شيء عادي

عزالله ماقصرتي ووضحت الصوره لي وشرحج واضح وسجلت كل شي بورقه عندي 00 مااقول غير رحم الله والديج وبعطيج العافيه 00 راح اتصل باجر واشوف وانا وحظي يستقبلني ولا لا 00 مشكوره ماقصرتي
والمسجد اللي بنص الدوار ادله اعتقد يمه برج التحرير اذا اهو بفر اهناك واسال عن المركز
ومشكوره ماقصرتي جزاج الله الف خير 00 والله يتمم عليج الشفاء التام الي بأذن الله ماعاد تتاجين لآي دكتور او دوا علي مجهودج وتعبج معانا مشكوره

لا لا ما أظن برج التحرير بمكان وهذا الدوار بمكان انت بتروح مكان ثاني

تعرف المبنى اللي هناك التابع لوزارة الداخلية؟؟

والله ماادري ترا داخل الديره ماادل عدل هناك بس بسأل المركز اذا ردو علي عن مكانهم وراح يدلوني 00

شوف إذا تعرف وين وزارة الاعلام قديما او غرفة التجارة او وزارة الداخلية هناك اقدر ادلك على المكان من خلالهم...لو عرفت بس واحد منهم

أو

لو انك ياي من طريق الفحاحيل اقدر اقولك خطوة خطوة اشلون توصلهم

غير جذي هههه والله مادري لأن الديرة ما أعرف لها عدل همن يا دوب الصواير ومستشفى الاميري ومجمع بهبهاني والأماكن اللي ذكرتها الثانية اهني غيره انسى

أو تقدر تسألهم...كيفك

انا اذا بطلع لديره بطلع علي الدائري الخامس وزارة الأعلام جني ادلها قريبه من وزارة البلديه اذا اهي ادلها وغرفة التجاره الي قبلها محلات خام رجاليه اذا مو غلطان 00 اذا صح واذا لا لاتعورين راسج رقمهم عندي اكيييد راح ادل منهم عدل 00 والله النفسيه دودهتنا ماعاد الواحد يركز ويتذكر عدل الله المستعان

شوف هذا آخر ما عندي من شرح للعنوان لأن ما راح أعرف اقول اكثر منه صراحة

وزارة الاعلام قديما وغرفة التجارة يم بعض تشوفهم بنفس الوقت

في اشارة اذا وقفت عليها تكون وزارة الاعلام على يمينك بالضبط وغرفة التجارة لمن تطالع جدام وانت واقف على الاشارة تكون على اليمين لجدام

إذا عرفت هالاشارة

مجرد روحلها وكمل سيدا فيها وراح تشوف بويهك الدوار اللي بنصه المسجد هذا الدوار اللي اقصده

واخذ يمين من عنده وشوف باقي شرح العنوان بعد ما تاخذ يمين عند الدوار قلته بالموضوع فوق

بس هذا العنوان... مادام تعرف وزارة الاعلام وغرفة التجارة اتوقع راح تعرف اي اشارة اقصدها

والخام اللي تتكلم عنه قبل غرفة التجارة اهوه سوق الخام اللي اتكلم عنه المكتب الانماء بظهره بالضبط

بشر عرفت المكان؟

شكلك طلعت واكلم نفسي مو مشكلة هههه

تصبح على خير...اهوه صبح بس بالنسبة لي ليلي

هلا اختي
انا اسف ترا طلعت الصبح عشان انام علي اساس اصحا مبجر ماصحيت الا 5 المغرب يعني المشكله مو في المكان راح ادله ان شاء الله بس المشكله الساعه 9 و10 الصبح انا اكون نايم 00 بحاول اتصل واشوف وراح ابلغج شنو راح يصير معاي والله كريم 0 بس دعواتكم لي