ازاي نساعد نفسنا !!! الكل يجمع هنا

ازاي نساعد نفسنا !!! الكل يجمع هنا

صباح الخير على كل الأخوة والأخوات في ملتقى اصحاب الوسواس

ايه رأيكوا نبدأ تحدي ايووووه تحدي نتحدى نفسنا ونحاول نسيطر على أفكارنا ونقف وقفة قدام كل المخاوف اللي مضيعة حياتنا على الفاضي .

اول حاجه معظمنا عنده وسواس الاحلام والارقام والإشارات والعلامات والخوف من الموت المفاجئ
أو المرض

ازاي نسيطر على خوفنا من الاحلام ؟؟

اولا لما نحلم حلم بلاش نسترسل يعني مقولش انا حلمت كده علشان اكيد هموت أو هيحصل حاجه وحشه بلاش ارعب نفسي بنفسي بلاش اخوف نفسي وافسر أو ادور على الحلم وتفسيره واتوتر اكتر لو لقيت كلام مش ظريف

الحل اتفل على يساري ٣ مرات واستعيذ من الشيطان واسمع قرآن وبإذن الله تعالى مش هيضركوا حاجه .

الاشارات والعلامات والارقام :
انا اكتر واحده عانيت مع الوسواس ده هو ووسواس الاحلام حلمت زمان بموبايل ١٠١٨ سوني اريكسون وكان مكتوب عليه الرقم ومن ساعتها وانا خايفه ده يكون تاريخ ويحصلي فيه حاجه ضيعت ١٨ سنة من عمري على الوسواس والخوف من توافه ممكن بعون الله متتحققش
لو سمعتوا آية تفكروا فيها واقروا تفسيرها في ابن كتير استشعروا عظمة القرآن بلاش خوف وهلع من اي آية أنا بحزن اني بخاف من كلام ربنا .. بحزن اني بخاف من الموت ولقاء الله .. بحزن لاني شاغله باللي بغيبيات لا يعلمها الا الله ..

وسواس الخوف من المرض :

مش اي وجع معناه مرض خطير ..
فكروا نفسكوا بكده ، انا بخاف جدا لو حاجه وجعتني ويومي كله بيقفل وبرسم في خيالي سيناريوهات بشعه
بس بإذن الله مش هيكون في حاجه معظمنا عندنا توتر والتوتر بيعمل صداع وتنميل في الرأس ورعشه في الرجلين متخافوش ده مش مرض خطير ، واكيد بردو معظمنا عندنا القولون والقولون بيعمل الم في البطن بسبب الغازات ورغبة في القيء وضربات قلب سريعة ، ده غير الأعراض النفسجسمية المصاحبة الوسواس ، هنحاول نهدى خالص ونكتب في ورقة حسينا بإية والاعراض اختفت بعد قد ايه من الوقت واهم حاجه نتجاهل حتى لو الأعراض قوية ..

نوبات الهلع :
من خلال تجربتي محدش يقاوم النوبة عارفه انها مؤلمة ودقايق بس كأنها سنة بس متقاوموش مقاومة نوبة الهلع بتزيد حدتها وبتتعب اكتر خصوصاً لو كنا بره البيت

اللي هنحتاجة ورقة وقلم
نكتب فيهم كل المشاعر السلبية اللي جوانا .

تمارين استرخاء هاتوها من ع اليوتيوب .

نكتب اي خوف أو وسواس أو حلم جالنا وعملنا ايه علشان نتغلب عليه واتغلبنا عليه في وقت قد ايه .

نطمن بعض ونحاول نساعد بعض علشان نخرج من النفق المظلم ده

الوسواس مجرد أفكار وحشة جوا دماغنا بس ملهاش وجود على أرض الواقع احنا اللي موجودين مش الأفكار المكتومه جوانا واحنا اللي هنغيرها وهنتغلب عليها .


احنا أقوياء بالله ومش هنستسلم

المصدر: نفساني

موضوع جميل ربنا يشفينا جميعاً ويعينا علي انفسنا
بالنسبة لموضوع الاحلام حكايه ان الشخص يتفل ويستعيذ بالله من الشيطان ده بيكون بعد الكابوس او الحلم اللي من الشيطان لاذهاب اثر الشيطان لكن الرؤيه الحقيقيه من الله حتي لو تفسيرها سيئ كده كده هتقع سواء اتفلت او لا او سواء فسرتها او لا هي هتقع

إن شاء الله يا اختي الله يكتب لك الأجر على موضوعك المفيد
ويعيننا ويصبرنا آمين 🌹

الله يشفينا جميعا يارب .
كل واحد وكل الموسوسين تجلهم فكره انه مختلف عن الاخرين .
او عند وجود اي فكره جديده يقولو يمكن المرادي حقيقه غير كل مره .عشان كده بنفضل في نفس المخاوف والدوامه.

المشاركة الأصلية كتبت بواسطة زهره الالام

موضوع جميل ربنا يشفينا جميعاً ويعينا علي انفسنا
بالنسبة لموضوع الاحلام حكايه ان الشخص يتفل ويستعيذ بالله من الشيطان ده بيكون بعد الكابوس او الحلم اللي من الشيطان لاذهاب اثر الشيطان لكن الرؤيه الحقيقيه من الله حتي لو تفسيرها سيئ كده كده هتقع سواء اتفلت او لا او سواء فسرتها او لا هي هتقع

الرؤى يا زهرة كلها خير إن شاءالله مش معقول احلامنا المرعبة دي رؤى أكيد مخاوف ونغز من الشيطان ويارب كل الرؤى اللي تشوفها تكون خير وتتحقق وتسعدنا وربنا يبعد عنا كل الشر ويشفينا ويعفو عنا جميعاً اللهم آمين

المشاركة الأصلية كتبت بواسطة أم محمد حكيم

الله يشفينا جميعا يارب .
كل واحد وكل الموسوسين تجلهم فكره انه مختلف عن الاخرين .
او عند وجود اي فكره جديده يقولو يمكن المرادي حقيقه غير كل مره .عشان كده بنفضل في نفس المخاوف والدوامه.

بالظبط هي حلقة مفرغة بنلف فيها بلا نهاية بس إن شاءالله احنا اقوى من الخوف والهواجس وهنعيش حتى مع كل اللي تاعبنا ده هنقدر فكروا أن في ناس كتير تعبانه بأمراض لا شفاء منها ومتفائلين وعندهم أمل وبيحاولوا .. لازم نحاول وطالما عندنا النية هنقدر

المشاركة الأصلية كتبت بواسطة أبو عبادي

إن شاء الله يا اختي الله يكتب لك الأجر على موضوعك المفيد
ويعيننا ويصبرنا آمين 🌹

اللهم اشفنا جميعاً شفاء لا يغادر سقماً عاجلاً غير آجل

حسبي الله عليه توكلت وهو رب العرش العضيم

الله يشفينا يارب

الله يشفينا

حسبي الله عليه توكلت وهو رب العرش العضيم