تجربتي مع الرهاب + مشكلة

تجربتي مع الرهاب + مشكلة

السلام عليكم

قصتي ب اختصار قبل 4 سنوات كنت اعاني من نوبات هلع وكانت تأتيني بشكل نبضات قلب سريعه ودوار والله العظيم بعض الأحيان كانت تجيني وانا أسوق السياره لدرجة أوقف ع جنب وأنزل المقعده وتشهد وبعدها دخلت في نوبت اكتئاب حبيس البيت لا أخرج نهائيا واستمريت ع هالحاله طبعن غير توهم المرض واستشرت طبيب وصرف لي بروزاك وقال لي ( شوف علاج من دون خروج من البيت ترى ماحيفيدك 100 ف 100 ولازم التفكير الإيجابي استمريت ع العلاج شهرين وتوطفت والحمدلله 90 ف الميه خفيت وصرت اسافر وحدي وخرجات وكنت أكره البيت كره وتخذت خطوه للإمام قدمت استقالة وبسافر أكمل دراسه برى واقسم بالله حجزت التذاكر وزبطت وضعي وقدمت استقالة وجلست ف البيت لمن يحين موعد السفر وياليتني ماجلست الرهاب رجع وخمول قاتل وعدم اتزان ومابغى أخرج من البيت نهائي والله خلال 20 يوم تغيرت خمول قاتل توهم أمراض يعني أحس عندي مرض السكر لني كثير التبول والمشكله قبل 5 أشهر مسوي فحص شامل للجسم ومن ضمنها تحليل السكر والحمدلله سليم هذا الي يقهرني والحين خمول قاتل صرت انام أكثر من 11 ساعه كسلان عدم اتزان بالله الي عنده حل سريع يقولي وبذات في عدم الاتزان حتى صلاتي غ المسجد مقدر أصلي رحت شيك ع الضغط سليم وسفري بعد 4 أيام أفكر والله بنسبة90 ف الميه اكنسل أسفر تكفون مابغى ارجع للحاله الي اول لنها دمرتني والله

المصدر: نفساني

ولا ردد ؟؟؟

مو معقوله 53 مشاهد ولا رد
الي أعرفه المنتدى مشاركه ومساعده وطرح أفكار

وهذا المنتدى الي فيه يقرأ ويطلع كيف تبون تساعدوني أنفسكم وكل واحد همه نفسه ؟؟

طيب انت ماتأخذ علاج؟
اتوقع لابد من زيادة الجرعة ولازم تأخذ حبة مهدية طبعا عند اللزوم فقط

يمكن بس قلق وتفكر بالسفر

رح لدكتور وخذ علاج مافيها شي

أسال الله ان يشفيكك ي بعد تسبدي ،، انا كأخ لك بنصحك نصيحه ،، ونا خوك اعاني من احمرار ف الوجه ،، وهالاحمرار ملازمني ف كل مكان ،، لكن حصل لي موقف عرفت عظمة الله فيه ،، كان عندي مقابلة شخصيه لمدير شركه وفيه موظفين في المكان اللي بتتم فيه المقابله ،، المهم يعلم الله ي دحومن اني الليله اللي كان يليها المقابله ، كان ينتابني خوف موب طبيعي من ان يحمر وجهي ، قررت اصلي ركعتين وادعي الله فيها ،، ونا خوكك صليت الركعتين ودعيت الله بان يفرج همي وان يبعد هذا الاحمرار عني ، انتهيت من الصلاه وعطيتها نومه وصحيت الفجر صليت ف المسجد وانتظرت لوقت الموعد ومشيت ع الشركه ،، ونا بالسياره استغفر واسبح ومن هالذكر ،، يعلم الله ي دحومن احسست براحه وانا استغفر لا يعلم بها الا الله ،، صدق سبحانه عندما قال (( ألا بذكر الله تطمئن القلوب )) .. عموما دخلت الشركه وانا استغفر واسبح وادعو الله ان ييسر امري ،، نعم كنت احس بحراره في وجهي لكن في نفس الوقت اشعر بسكينه في نفسي مادري كيف اوصفلك ،، عموما دخلت ع المدير وجلست ع الكرسي ،، اصابني بعض الخوف ،، بطبيعة الحال لاني في مقابله شخصيه ،، لكن اللي وضع الراحه التااااااامه في قلبي ،. اني ما شفت النظرات اللي اشوفها من الناس يوم يحمر وجهي من نظرات استغراب وهكذا ،، ما رايت الا ابتسامه وترحيب ومعامله كمعاملة اي شخص طبيعي ،. علمت حينها ان هذا الاله العظيم الرحيم قد يسر امري وانزل السكينه والطمأنينه في نفسي ،، نعم كنت احس بحراره ، بقليل من الخوف لكن الوضع اللي كان يحصلي دايم ابتعد عني في ذاك الوقت .، تمت المقابله بحمد لله وخرجت وانا منشرح الصدر ،، الا يثبت هذا بان الله رحيم ؟ الا يثبت بانه مجيب ؟ ،، قم ونا خوك صل ركعتين واسال الله الشفاء والعافيه .. مااراد الله لنا هذه الامراض الا ليختبرنا وليمحصنا ،، فلنحمده ولنثني عليه ولندعوه بان يشفينا ويعافينا فهو القادر على ذالك ،، اسال الله بمنه وكرمه ان يشفيك ويعافيك وان يكتب لك السعاده في الدنيا والاخره ،،