ما زلت برحلة العلاج ، للفائدة فقط

ما زلت برحلة العلاج ، للفائدة فقط

السلام عليكم جميعا

أنا تصفحت كثير هالمنتدى الي كنت استفيد منه مرات وأحبط منه مرات ( يعني مرات تشوف شخص كاتب بموت وكذا وتحس انك فقدت الامل هههههههه) ف قلت دامني تحت العلاج حاليا ، بكتب ايش صار معاي علها تخفف للبعض او يكونوم بالصوره في ايش رح يواجههم خصوصا للي مثلي الي فيهم الهلع المصحوب برهاب الساح.

طبعا بدا موضوعي من اكثر من شهر اعتقد بدا موضوع الرهاب في 21 اكتوبر السنه هذي يعني اكتشفته وانا جديد وهذي اعتبرها ايجابيه لان الاغلب يدري بعد شهور او سنوات انه هلع، ف الحمد لله. بدأ معاي طبعا وكنت وقتها توني جديد من اسابيع شخصوني بالسكر. كان الموضوع اوك ماشي لكن في يوم 21 اكتوبر، وانا بالعمل كنت رايح طالع من الحمام وانتم بكرامه للمكتب وانا ماشي طبيعي حسيت بنغزه بصدري والتنفس ضاق وقلبي يضرب بقوه وعيوني زغللت ف قلت بنفسي مستحيل هبط السكر وانا مالي ساعه وشوي مفطر، ف رحت اركض للكافيتيريا وشربت عصير ومشى الحال وقلت اف من علاجات السكر. ولما خلصت رحت ادخن. وانا ادخن جتني نفس الاعراض وقلت وش فيه السكر هذا ورحت متوجه للكافيتيريا وانا بالطريق زادت علي وفجأه دخت وصرت كاني بطيح وكان روحي بتطلع وصرت اصرخ لاي احد وجوني الموظفين وسلامات وايش فيك وانا اقولهم ابي اقيس السكر بسرعه ورحت العياده بالشركه والمفاجأه انه مرتفع اصلا !!!! هنا انا صرت مو عارف وش فيني ودايخ مره واحس راسي بينفجر والله بغيت ابكي ونقلوني باسعاف الشركه للمستوصف ولا فيني شي بعد الفحوص. ما تطمنت وكلمت واحد اخذني لمستشفى كبير خاص وبرضو مافيني شي، تخطيط قلب وتحاليل دم وانزيمات وكل شي. رجعني الشخص ذا البيت وانا خايف ماني عارف وش فيني وجتني النوبه وانا بالبيت وع الطوارئ ولا في شي ، واليوم الي بعده الصبح جتني وبرضو ع الطوارئ ف قالو اسمع بنرقدك يومين تحت الملاحظه ونشوف. وقعدت فعلا يومين عندهم والطبيب المشرف علي كان معاه متدرب كل شويه يدخل علي هو والمتدرب ، والطبيب يقول مافيك شي ومن هالكلام لاني كل شويه اقول بموت. المهم صرفوني للبيت وعطوني مراجعه بعد ثلاث ايام وبالوقت ذا صرت ماني قادر اطلع من البيت رعب مو طبيعي ومستحيل اطلع لو عند باب الشارع. وكنت مرعوب وقت الموعد كيف اروح ما بروح ومن هالكلام لين جا الموعد وراح البيت كله معاي هههههههههههههه. المهم راجعته وكالعاده انت مافيك شي ومن هالكلام، ولما جينا نمشي ، جاني المتدرب الي كان معاه وقالي ها كيفك قلتله نفس الشي قالي بيني وبينك انت فيك قلق لا اكثر، انصحك تروح طبيب نفسي لان كل الاعراض اعراض قلق وخوف. وهنا هو فتح مخي وصرت اقرأ عن هالمواضيع وقتها تعرفت ع المنتدى تبعكم. المهم رحت الدكتور النفسي في 2 نوفمبر وطبعا ك العاده العائله كلها معاي ومليون مره كنت بدوخ عليهم احس قلبي بيطلع من مكانه ونفس مافي لين جا موعدي ودخلت عند الطبيب وقلتله القصه من الالف الى الياء. قالي انت عندك قلق بسيط وان شاء الله بوصفلك علاج يرفع مزاجك ، قلتله اوكي ووصفلي باروكسات 20. طبعا للناس الي وصفولها ادويه حطو ببالكم الاعراض الي تجيكم عشان ما توقفون الدواء

غثيان
دوار
قلق
تخدر
اسهال وانتو بكرامه
صداع وثقل بالراس مو طبيعي
تحس لما امشي كانك ماشي على البحر مدري كيف اوصف
تسمع صوت عالي تحس انك بتموت

وبعد كم يوم تجي عليك اوقات يضيق خلقك وودك تضرب راسك بالجدار ، تفقد الامل وتحس ودك تبكي، الخوف الي تبي تتعالج منه يزيد عندك لدرجات اعلى بكثثثثثثير !!

بعد اسبوعين تخف هالامور كلها باستثناء الدوار يبقى شوي والصداع وثقل الراس ( ثقل الراس مرات من الجبهه ، مرات من خلف الراس ومرات تحسه ينبض ومرات تحس كان احد شاد راسك مدري كيف اوصف)

بعد ثلاث اسابيع تنتهي هالامور ويبدا المزاج يتحسن

ف طبعا لا توقفو الدوا اذا اهوصف لكم وهذي اعراضه عشان تحطون هالشي ببالكم والي تحسونه تقولون فعلا هذي مجرد اعراض جانبيه لا اكثر.

طبعا المزاج يتحسن جدا والهلع يخف لدرجه انه ما عاد يجيك ان شاء الله لكن يبقى عائق الخروج. المشكله انك تربط الهلع بالخروج وهذي المصيبه. لانك بالبيت بعد الثلاث اسابيع وفي الاسبوع الرابع ما عاد يجي الهلع وتحس انك شخص طبيعي بس المشكله بالطلعه. طبعا راجعت الطبيب انا امس وزود لي الجرعه الى 30 وبعد اسبوع ارفعها ل 40.

لكن الي بقوله كالتالي، اولا انا لما رحت موعدي امس، صحيح اني حاولت قبلها اطلع من البيت مشي وادوخ واتعب وتجي النوبه وارجع لكن لما رحت المستشفى كنت اوكي ادوخ ع الطريق مع اخوي لكن ماحملها عادي وبما دخلنا كنت عادي قس دوخه لكن اطمن نفسي كل شويه. ف الدكتور قالي شوف يا ابني مشكلتك اذا ما طلعت وحاولت ما بتقدر تتعالج وبدا يشرحلي وقال

الهلع يجي مره وحده فقط لكن تصير نوبات بسببك لانك تحطها ببالك ف الهلع يجيك لانك رابط الفكره انها بتجيني ولما تربطها انها بتجيك ف جسمك يستقبل فكرتك ويبدا يرفع مستوى الخطر وتجيك النوبه، ف لما تحاول تطلع طبيعي انك تدوخ ويتسارع قلبك شوي لكن هذا طبيعي لانك خايف ولكن انت ما ليحصلك شي فقط لما تفكر ان الدوخه هي بداية نوبة الهلع جسمك يترجمها ويقول اصبت يا صديقي ارفع مستوى الخطر والانذار ويبدا الهلع. وايضا قال ان العلاج يساعدك انه يرفع مزاجك يعني يضبط مزاجك وانت الباقي عليك انك تبدا تواجه مثل ما جيتني انت اليوم تقدر تطلع ولكن خذ هالنصايح
- اطلع مع اخوك ولا تسوق هو يسوق او صديق لك من ثلاث الى اسبوع يوميا
- بعدها اطلع لاماكن التجمع مع الشخص مو لوحدك لازم تكون معاه
- بعدها بكم يوم اطلع معاه لكن انت اجلس انتظره وخله يروح يشتري شي واجلس انتظره
- ثم بعد كذا روح انت وياه لكن ارجع لوحدك بتاكسي


طبعا مدري كيف بنفذها لكن بحاول ههههههههههههههه

اليوم حاولت اطلع مع اخوي لكن كان مشغول ف طلعت لحالي على رجولي شوي لمدة ربع ساعه ما ابعدت عن البيت لكن النوبه جتني حاولت اتذكر كلام الدكتور وهدا وضعي شوي ورجعت البيت بخطوات بطيئة متعمد عشان اقنع نفسي ان مافيني شي.

للحق انا افضل من قبل لكن ان شاء الله ننجح بالعلاج وربي يشفينا ويشفيكم جميعا

وطولت الموضوع شوي لكن قلت يمكن الناس تستفيد ويكون عندها فكره عن ايش يتوقعون ببداية العلاج ويحتاطون بهالامور

اخوكم

المصدر: نفساني

وعليكم السلام ورحمة الله وبركاته
الله يتمم شفائك بخير وعلى خير ان شاء الله ، كلامك صح الانسان اذا اكتشف الموضوع في بدايته فهذا شيء ايجابي جدا ، الله يشفينا جميعا يارب

الله يشفيك اخي جميل انك لحقت نفسك من البداية والبلاء يحتاج صبر وانت قد ذلك بإذن الله واهم شي تكون عندك روح متفائلة انك بإذن الله ربي رح يرفع عنك القلق والخوف والهلع وادعي كثير صح ان التفكير في نوبة الهلع والخوف منها صعب وتحس احيانا مو قادر تسيطر ع حالك لكن انت وحاول وحاول وحاول قد ماتقدر انك تتجاهل اعراض الهلع وقول بإذن الله انا مافيني شي كله لهع وبيروح سواء طال او قصر
زي مايقولوا هونها وتهون ومهما تمر عليك وساوس تجاهلها واتوكل على الله
وربي يسسر لك امرك ويتمم عليك شفاءك ويفرج علينا وع الجميع يارب


سبحان الله وبحمده

امين يا رب والجميع ، وعسى نتطوق كلنا بالياسمين يكفينا صبار ....

والله يا وسوم فعلا الواحد صعب يشيلها من باله مع اني فعلا تكلمت مع المعالج وقالي هي تفكيرك هو الي يستدعيها

لكن عسى ربنا يكتب لنا الشفاء