أفكر جدياّ بالطلاق لكن أريد المشوره!

أفكر جدياّ بالطلاق لكن أريد المشوره!

بسم الله الرحمن الرحيم ..
أخواني أنا عندي مشكله بحياتي الزوجيه وارجو منكم المشورة لأني أخاف اني اندم او اني اكون غلطانه بتحليلي للأمور فأظهرت نفسي مظلومه وانا الجانيه ..

انا متزوجه بيصيرلي سنه .. بدون مبالغه فقط كنت مرتاحه بالزواج اول 3 اشهر ومن بعدها بدت المشاكل اللي لاتعد مع زوجي ..اسبوع زعل واسبوع رضى واسبوعين زعل وعلى هالمنوال..وحاليا زعلتنا الاخيره صارلها شهرين .. هذا باختصار الوضع اللي حاصل وراح اشرح طبيعه مشاكلنا ..واتمنى مساعدتي بايجاد حل وعسى الله يفتحها عليكم دنيا واخره يارب..

أول صدمه اكتشفتها انه زوجي مايصلي الا صلاة الجمعه او اذا كان جدام الناس..نصحته بأول زواجنا كان احيانا يستحي منى ويصلي بس بعدين ماقام يهتم لي ..اصبحت احاول ان اصلي أمامه وطبعا انا دائمه الدعاء له بالهدايه..
زوجي عصبي لدرجه موطبيعيه ..لدرجه انه يسب ويتلفظ بألفاظ جارحه لي ولكياني كانثى..ولأسباب بسيطه او وهميه ..
أعطيك نموذج عن تلك المشاكل..مثلا مره مر علي 3 ساعات فقط واهوا خارج البيت ماتصلت عليه ..فقام اتصل علي وشرشحني .يقولي انتي ماتسألين عني ولا ترفعين السماعه .. ادري بتقول الموضوع بسيط وانا بعد شايفته بسيط بس والله قعد ايام مايكلمني .. السالفه ماكانت على دلع ويوم فتحت معاه الموضوع عصب وهزاني وقام يهدد انه يذبحني ..والله كل مشاكلنا على هذي الشاكله ..مره وداني اقعد مع امه واخته ..وصلني عند الباب ومشى ..بعدها جت وحده من خواته ودخل زوجها معها وجا خاله مع زوجته ..وانا كنت لسه عروس وداخله عند أهله بروحي ..فقلت له يافلان ليش ماتدخل معاي؟؟ماابيك تقعد بس ادخل وسلم واطلع ..لانه شكلنا راح يصير حلو ليما ندخل مع بعض..طبعا عصب وسب وقال انتي ماتبين أهلي وراح أذبحج..والله انه ليما يعصب يخليني بالايام بروحي بالشقه ولا يسأل اذا ماكله ولا شاربه ولا ناقصني شي ولا حتى ميته ..
انا طبعي هادي وماارد عليه ..لكن والله اخر الشهور صرت عصبيه مثله لأن اذا عصب تذكرت الوضع اللي راح اصير عليه من حرمان وعذاب نفسي فاصبحت ادافع عن نفسي بهذي الطريقه اللي خلته نوعا ما مايتمادى معاي كثير ..
بس دكتور ماخلصت المشاكل ..دكتور جم مره يكرر لي كلمه انه مو مرتاح لي وانه تعبان نفسيا وانه امه تصبره على الزواج ..وذا كنا متزاعلين يقولي انا كرهتج مابيج ..
والله تعبت ..يستعمل معاي انواع تعذيب نفسي ..مايكلمني ..مايسأل عني ..أذا كلمني كلمني بحده ..مايقولي كلمه تطيب الخاطر من هالكلام اللي يصير بين الزوجين ..واذا ماقربت منه مايطلب معاشرتي!

مره طلعت من البيت ورحت بيت أهلي ..ادري غلطاااانه بس والله بسبب هالمعامله اللي أثرت على نفسيتي واهوا ولا هامه يدخل ويطلع وينام..
طبعا ابوي ناداه عشان يكلمه فقام وحط كللللللل أغلاط الدنيا على راسي ..بنتك موقد المسؤليه والشقه دايما وسخه ..معني يادكتور اصبحت أحرص على تنظيفها لأن اكثر من مره صارت بينا مشاكل كبيييييييره والسبه دقته في كل شييييييي بالشقه ..ويقول لوالدي حقوقي الزوجيه اخذها منها بالغصب..
معني والله الشاهد عي ولا مره حرمته من هالحق ..وغيرها من الاشياء
انا استخرت ربي وقررت العوده والرضوخ لشروطه اللي من اهمها انا العلاقه بينا راح تصير جديه لا ضحك ولا غشمره ..وانه راح يطلعني مره وحده بالاسبوع بعد ماكانت هالشغله مفتوحه .. أنا اعتبر عروس واحنا عندنا العروس دايما تخرج مع زوجها ويتفسحون ونا قاعده والله كاني بسجن وانطر السجان يطلعني كل اسبوع ..والله ماافرح بالطلعه..
في قضيه ثانيه واهيا قضيه الانجاب ..مره واحنا متزاعلين قالي ماتشوفين انا مابي منك عيال؟لأني مومرتاحلج..
وذا كنا متراضين قال خل ناجل هالموضوع بس مايدري متى ..يقول ليما نعرف بعض أكثر وناخذ على بعض..

زوجي عنده 3 اخوان واختين ..2 من اخونه مطلقين وعندهم عيال والثالث مطلق زوجته مرتين..ووحده من

خواته تزوجت مرتين وتطلقت
مادري هل السبب بعايلتهم ..مادري لنه والدته تقول انه الناس حادسدينها

شسوي ..أصبر ؟
والله كله ادعي ربي انه يلهمني ..
وساعات أقول انا موخسرانه شي !
انسان مايصلي يعني مايخاف الله ..يقولي ماراح اقولج كلام حلو ليما احبج راح أقولج ..بالله عليك هذا كلام يقوله لزوجته والله حلل الكذب بين الزوجين!!
والعيال مايبي مني الا ليما تخلص مشاكلنا ..و مافي بيت من غير مشاكل ..واهوا طريقته على كل مشكله ولو صغرت يسوي ستوب

وعشان مااظلمه اهوا أنسان عنده اصدقاء كثر ومحبوب بينهم وبار بوالدته واهله وواصل لهم ..واول 3 اشهر كان دائما يضحك ويسولف معاي ويطلعني ودائم الاتصال وبينا مسجات ..
بس مع كل مشكله اصبحت تقل هالاشياء ليما اختفت نهائيا..
والله احسه انسان جاسي ماعنده قلب ..
وعلى فكره انا بعد أول 3 اشهر مومقصره بشي ومع كل مشكله التنازل يكون مني ..

مشكلتنا الاخيره صارلها شهرين من بعد مارجعت له من بيت اهلي ..اول يومين كان يكلمني بس بعدين لايكلم ويسأل وكله معصب ..ويوم كلمته قال مااقدر نفسيتي تعبانه منج واذا طلبتي الطلاق ترا أنا بسابقك عليه
!!!!!
وعلى فكره أنا مومقصره من ناحيه الاهتمام بنفسي ..وباهتمامي بالشقه ولكن مااحس يبين بعينه دائم الانتقاد لتنظيفي وطريقه ترتيبي ..
دايما يحسسنني اني مقصره بحق أهله ..مع اني عمري ماانتقدت احد منهم جدامه ودايما اقدر والدته واي شي اييبه حق والدتي لازم اجيبه حق والدته ..واتصل عليها بين فتره وفتره بس عمره ماذكر لي هالاشياء أحسه بس يتصيد علي ..يعني لو تمر 4 ايام مادقيت على والدته سواها مشكله ومايذكرلي باجي الايام اللي كنت اتصل فيها ومايذكر تقديري لها ..
دايما يعايرني انه مادفعت ولا شي للمساعده بالشقه وانا الله الشاهد انه اول ماتزوجنا عطيته مبلغ من المال وقلت خل هذا حق مصرفنا بشهر العسل ..رفض وقال خلي فلوسج عندج ..وانا اخذت الفلوس بدون علمه وقلت حق والدتي تكمل فيهم اثاث الشقه ..واهوا طبعا فاهم انه أهلي اهما اللي كملوا اثاث الشقه بفلوسهم ..ويوم العيد عطيته مبلغ من المال وقلت له هذي عيادي وزعها على الاطفال بالعيد وكذالك رفض ..وكل مااروح السوق لااااازم اجيب له شي معاي سواء عطر ولا تي شيرت وغيره ..وهم يعايرني ..شلون تعايرني وانته رافض مساعدتي؟؟..ومره قالي انه مفلس بس انا ماعرضت عليه فلوس لأنه أدري انه مثل كل مره بيرفض اخذهم وبعد فتره تفاجات انه يقولي اني يوم كنت محتاج ماقلتي خل اعطي زوجي بس الله لايحوجني لج وماراح اخذ منج ولاربع دينا حتى..بس ليما يعايرني استحي اجيب له هالمواقف لأنه احس الانسان عيب يقول انا سويت وانا سويت..حتى انه ساعات اقوله يله نطلع وانا عازمتك ..ومره رحنا الشاليه على حسابي ..واحنا رايحين الشاليه قعد يقولي كلام يغث من ضمنه انك مايبين بعينج وانا كنت اتسلف علشانج بس الحين اقولج انج موكفو اني اتسلف عشانج ..والسبب اني مااحب انه يطلع مع أصحابه الى الاماكن المزدحمه اللي يكثر فيها البنات ولكن طبعا ماامنعه اهوا ريال ويسوي اللي براسه بس لأني تضايقت وجادلته ابهالموضوع ..ولكن ماعمري قلت له لاتروح الدوانيه ولا لاتزور اصحابك ..

حاليا اهوا في مناوره عسكريه بالدوام لمده تقريبا شهر وطافت اول 3 أيام اذا مادزيت مسج مايدز .يعني مايبادر اهوا بالشي ..وامس كنت داقه على والدته جان تصدمني وتقول انه كان داق عليها ..انا لااقصد الصدمه انه كلم والدته ولكن لأنه بعدها ماحاول يكلمني ..قلت يله انتي الكبيره ورحت اتصلت ..اليوم مادقيت ولادزيت مسج ولا كلف روحه يسال عني ..

الله يخليكم ساعدوني ..هل هذا معناتها نظام تطفيش؟؟يبيني اطلب الطلاق ؟؟

المصدر: نفساني

الأخت الكريمة 123 سلمها الله

يبدوأن علاقتك بزوجك سيئة جدا ، وأنه ليس في قلبه لك محبة ، وتصرفاته تدل على ذلك ، والمثل يقول إلي مايبيك لاتبيه ، وأنا إذا تريدين رأيي إذهبي إلى بيت أهلك وسوف يعوضك الله بخير من هذا الزوج الذي لايقدر مسؤولية الزواج ، وهذه فرصتك طالما أنه ليس لديك أطفال والله يوفقك إلى سبيل الرشاد 00 ابراهيم الدريعي 00ش