البشر في الدنيا هذي . . . صَار ياكِلْهَا بشر

البشر في الدنيا هذي . . . صَار ياكِلْهَا بشر

السلااااام علييكم..
اخليكم مع القصييده !!
قصتي قِصَه مُفيده وقِلتْ : أكتبْهَا بسطور
ويا عسى مِن كانْ يقرى مِنَّهَا .. ياخِذ عِبَر

مغفره وذنوب , والساعه بلا تُوبَه تدور
السنه صَارتْ سَريعه حِيلْ , وأحْسِبْهَا شهر

عِذتْ أنا مِنْ شَرْ خَناسٍ يوسْوسْ بالصدور
وما بكيت إلا لوجه الله في ليلة قدر

تِختصر مَعنى حياتِكْ كيف تبني لِكْ قصور!
أحْتِرم رايك وهذي تُعتبَر( وجهَة نظر ) !

زين طيِّب .. دام تِدري إنَّ لِكْ رَبٌ غفور
ليه ما صَلِّيتْ لَجله وما رفعت إيدك شكر!؟

حَدِّث العاقِلْ بمَا يُعقَل ..وفي قلبٍ جَسُور
وإنْ خطيت بحق غيرك روح قدِّم له عذر

رافِقْ الشخص المِثالي اللَّي لو تخطي / يثور
وإن سِمَعت إسْمَعْ مِنْ اللِّي تِلقى في صَمته " دُرر "

وقبل تِسأل عَنْ حياتي وكِيف وجهي شَع نور
خلْ كلامي لِكْ وصيَّه وخلْ بعد عِندكْ خبر

ما نالْ في الدنيا أحَدْ يا سَائلي غير (الصبور)
والدليل إنِّي صِبرتْ .. وكانت أيامي تمر

لا تقول: الحَلْ إنِّكْ تِلقَى لِكْ,عاشِقْ غَيور
إنْ حَبِّتِكْ عِينه ترى ما حَبِّتِكْ عِين الدهر !!

مِثلِكْ أوَّلْ كان حَالي وضِيقتي ونفس الشعور
كِنت أقول : شمعنى قلبي في مشاريعَه خسر

ما دريت إنَّ الغِيابْ أحيَان أفضَلْ .. مِنْ حضور
لِين شِفت " الشمس " تشرق بعد ما يغيب ( القمر )

وما دريت إنَّ التواضُع كنز / ومَكرُوه الغرور
لِين شِفت إنَّ الغِنى .. في الآخِرَه مِثل الفقر !!

كِنتْ غافِلْ في حياتي وكِنتْ أجْهَلْهَا الأمور
لِينْ ربِّي له هدَاني .. وصِرتْ أدَوِّر لِي أجر

لا تقول: أعيش يُومي دامي في عمر الزهور
منت ضامِنْ عُمركْ الباقي .. وقَطَّافْ الزهَر

قبل لا تبدي الخطِيئه وتبْنِي لِذنوبك جسور
خافْ مِنْ ربِّكْ وفكِّر في وعَد يُوم الحشر

مَهْمَا كِنت إنسَان " راقي " وتعشِق أنواع البخور
التراب اللَّي يضمك بعد مُوتك والقبر !!

ياما قالوا الناس : خايف وقلت : ما فيني قصور
بَسْ شِفتْ إنَّ الشَّجَاعَه مَعنى ثاني للخطر

إيه خافْ وكُونْ سَالِم دام هالدنيا بحور !
والبحر مَهْمَا وفالِكْ طبعَه ( غدار ) البحر

وللشجر إن شفت هامه هذا مِنْ طيب الجذور
يعني أعمالك جذورك هذي هي بالمختصر

القضيه: ما هِي شخصٍ خالِفَه شِرطي المرور
البشر في الدنيا هذي . . . صَار , ياكِلْهَا بشر !
دمتم بود
من أختكم لمار
منقول

المصدر: نفساني

قصيدة رائعة سهلة المعاني
جزاك الله خيرا اخت لمار على هذه الحكم علنا نطبق منها شيئا ويكون هناك صدى لتلك الاحرف

المشاركة الأصلية كتبت بواسطة ثنائي القطبيه

قصيدة رائعة سهلة المعاني
جزاك الله خيرا اخت لمار على هذه الحكم علنا نطبق منها شيئا ويكون هناك صدى لتلك الاحرف

أنت الله يوفقك ويرزقك كل خير
أخي اسعدني حضورك كثير
بارك الله فيك

قصيدة رائعة ومؤثرة ومشوقة
سلمت يداكِ لمااااار الورد
تحياتي يا غالية...

شكرا أختي لمار على هذة الحروف المعبرة


عفاك الله