زواج بسرعه وطلاق بسرعه بدون أسباب

زواج بسرعه وطلاق بسرعه بدون أسباب

السلام عليكم ورحمة الله وبركاته
انا فتاة عمري 35 متدينه والحمدلله تزوجت برجل عندهم تسعه من الاولاد ثلاثة من الزوجة الأولى المطلقة
وسته من الثانيه التي على ذمتها وهي مصريه ووافقت على الزواج لأنه ذكر أنه صاحب دين وعائله محترمه
وقاد على فتح بيت وكانت أحواله المادية جيده جداً على حد قوله اشترطت عليه الوظيفه وبيت مستقل
ووافق على ذلك وطلب النظرة الشرعيه ووافقت وتم الزواج..
وفي ليلة العرس اخذ يسأل عن طبيعة عملي وكم أمضيت وعن اسرتي.وعرفني على اولأده الكبارمن الزوجة
المطلقه .ودخل بي منذ اليلة الأولى وفي الصباح الأولى من الواج لم يقابلني بأبتسامه ولا بترحاب
بل عكس ذلك تماماوأول شيء قاله وش تبغين فطور. وافطرنا وماقال ولا كلمة غير سوي الشاهي والقهوه
..وتقهوينا واحنا ساكتين ماقال ولا كلمة سألته عن دراست اولاده الكبار وجاوبني فقط وبعدين انشغل
في التجهيز للعزيمة(الضيفه) ليلاً وشاركت مع اهله في التجهيز لهذي العزيمة وبعد ماراحوا قمت اشطب
على البيت وبعدين رحت اغسل ملابسه الي حطها في شبك الغسيل قبل مااجي البيت وماخلصت إلا الساعه 2 ليلاً
وهو منسدح على السرير ولا يقول ولا كلمة.
وفي اليوم الثالث بعد ما قمت من النوم على طول قالي ابي فطور وجلس يستهزء فيني و قمت جهزت له الفطور
وافطرنا سوى مع اولاده وبعدها راح يصلي الظهر ورجع يكمل القهوة مع عياله وانا رحت ابدل ملابس وتاخرت
شوي وراح هو وعياله وماجاء إلا الساعه 5 ومعه زوجته وعياله الصغار ودخل علي فجأه مع عياله الصغار
وعرفني عليهم وما قالي انه بيجيب زوجته من قبل وسألني ليه ماسويتي عشاء وهوما طلب مني اسوي شيء
رحت اجهز العشاء وكان يقول بسرعه سوي العشاء والشاهي وبعدين راح وماجاء إلا الساعه 9 في اليل
رحت اسخن العشاء واجهز الشاهي مره ثانيه وما تعشيت معه وبعد ما تعشى ورحت اغسل المواعين ناداني
احد عياله الصغار قال امي في الصالة وابوي يناديك ورحت اتعرف عليهاوكانت مسكينه متأثره لأنها
ماعرفت ان زوجها متزوج إلا هذا اليوم وجلست معها اهديها لاني تعاطفت معها مره وقالي روحي سوي الشاهي
والقهوه وبعد مارجعت قال لنا راح يكون بينكم تبادل زيارات كل مره عند وحده ..وبعدين راحت هي لعيالها
وانا رحت انوم وانا متكدر خاطري وهو جلس لحاله عندالتلفزيون...
ولما قمت الصبح لقيت عياله قاعدين في الصاله حظرت لهم الفطور والشاهي ورحت لغرفتي ما افطرت معه
وكل شوي يجون عياله يفتحون علي باب الغرفه واعطيهم حلاو بس ازعجوني كل شوي يجون تضايقت منهم وقفلت
باب غرفتي وجاء يطق الباب بقوه وفتحت له وكان معه عياله ودخلوا كلهم غرفتي وجلس يلاعب عياله
وما عطاني أي اهتمام ..
قلت له ابي اروح لأهلي ازورهم ووداني لهلي وماقال ولاكلمة.
جلست يوم عند اهلي ولما جاء اليوم الثاني اتصلت عليه وقلت ليه ماجيت قال منيب جاي انا معطى صده عنك
اتصلوا عليه اهلي وسألوه وش فيك وقالهم نفس الكلام الي قاله لي ..
وفي نفس اليوم جاب اغراضي كلها لبيت اهلي ...
ولحد الأن ما قال ولا كلمة ولا ترك لنا فرصة نسأل عن الاسباب ولا حتى قالنا انه بيطلق او لا.
------------------
ومن زواجي لحد الحين ما صار بيننا اي كلام او اي مناقشه غير الاوامر والنواهي وما شفت حتى الابتسامه
على وجه وحتى مارحب فيني وما كان عنده اي مراعاة لشعوري .
ومن اول ليله ما صارحني ماقالي انا معطى صده عنك او انا ما ابيك او اي شيء .
وهو وعدني ببيت مستقل وما اوفى بوعده.
-------------------
ابيكم ترشدوني وش اسوي هل الخطا مني ولا منه انا كل ما قال شيء اسمع كلامه ليه يسوي
فيني كذا نفسيتي مره تعبانه مع اني كنت متأمله فيه خير عشانه رجل ملتزم ويحافظ على الصلاة؟

----------- ارجوا الرد بسرعه

المصدر: نفساني

أعانك الله يا سيدتي:
فعلاً انت في مشكلة. هذا الرجل سيء الخلق رغم صلاته و تدينه. الدين المعاملة مع سائئر الناس و مع الزوجة اولى.
سيدتي وش صده و ش خرابيط. الرجل ما يريدك و لا يستطيع المواجهة و الإعتراف بذنبه تجاهك. هل هو حزن على زوجته.؟ هل هو خاف منها؟ هل هو خاف على عياله؟ هل هو ما يقدر على ما وعدك به؟ هناك أسئلة كثيرة لا يجيب عليها إلا هو.
الآن التعليق هكذا يضرك لا يفيدك. أرى أن يتصل عليه أحد إخوانك أو الوالد. و يقول له أن يتحدث معه عن نيته. لا نريد أن نعرف الأسباب بقدر ما نريد أن نعرف المصير. إن هناك رغبة في بقائك معه فمطلوب منه المعاملة الحسنة و الأخطاء يمكن إصلاحها. و إن لم يكن لديه رغبة فوالله لو فرشت له الأرض ذهباً و حريراً و هو بهذه الأخلاق فلن ترضيه.
الوضوح هو المهم هنا. و الإحترام لك و لأهلك الذي زوجوك إياه توسماً في دينه و خلقه و رجولته. عبادته لنفسه يا سيدتي. أنت لك منه حسن المعاملة و مخافة الله فيك و إحترام إنسانيتك و مشاعرك و أهلك.

وفقك الله و السالم.