رحلتي مع ضيق التنفس في الارض والجو..وخوفي من السفر

رحلتي مع ضيق التنفس في الارض والجو..وخوفي من السفر

بسم الله الرحمن الرحيم

الاسم/ فيصل
العمر/ على ابواب 33

الحالة الأجتماعيه/ أعزب


يمكن تستغربون هذي المعلومات .. لكن تعودت من خلال زياراتي لكذا دكتور في الداخل والخارج..

(ابكتب قصتي على اجزاء)

(الجزء الأول)

قصتي تقريبا بدأت قبل 3 سنوات وانا مسافر على السياره وكنت خارج المملكه

اول شعور/ كتمه في الصدر والم بالبطن وتعرق والكارثه( ضيق تنفس لدرجة الأختناق)

واستغربت من حالتي لكن الحاله استمرت تقريباً ربع ساعه وأختفت

ونسيت الموضوع كونه أول مره يصير ..لكن بعد اسبوعين عاودت لي الأعراض وخاصة (ضيق التنفس)


طلعت للطواري واخذت اكسجين وحسيت اني ارتحت

لكن الموضوع استمر يوم ورا يوم وطلعت لمستشفى خاص وشرحت له الوضع وعملت فحوصات قال عندك التهاب حاد في الرئه..!

وللمعلوميه انا انسان مدخن صرف لي بخاخ وحبوب حساسيه وتركت الدخان..

بعد فترة تقريبا شهر لأني ناسي بعد هالسنوات رجعت لي الحاله مره ثانيه

استخدمت ادويه شعبيه لكن مافيه فايده نهائياً

شربت زنجبيل قالو زين للصدر لكن مافاد(بالنسبه لي)

وصرت بين فتره وفتره اطلع للمستشفى واخذ اكسجين وارجع.. واستمريت على الحال فتره مو بسيطه..


(الجزء الثاني / معرفتي للفوبيا والهلع والنوبات و و و ألخ)


قررت اطلع للرياض بعد ماسمعت ناس تمدح بدكتور قلت نجرب وعلى الله .. وفعلاً حجزت طيران وكانت هنا الطامه الكبرى

مدة الرحله تقريباً ساعه وحنا بمنتصف الرحله وجالس اقرا بجريده وفجأة جلست افكر بموضوع ضيق التنفس

وفعلاً أختنقت ولا صرت احس بهواء يدخل او يوصل للرئتين

وارتبكت وجتني حالة التعرق والارتجاف والشعور بالدوران وحسيت حلقي ناشف وقمت اشرب من الماء لكن مافيه فايده

كان عندي شخص اردني سألني عن حالتي وبصعوبه قلت له وضعي قام وراح ماادري وين ورجع وقال كلمت الطيار ان فيه حالة اختناق

وبتنزل الطياره عن المسيار المحدد (طبعاً صدقت) لان بهالحاله تصدق اي شي وتسمع اي شي عشان تقدر تتنفس

وفعلاً حسيت اني ارتحت وبديت اقدر اتنفس بشكل افضل تقريباً لحد ماوصلنا الرياض..

كلمني وقال انا لا كلمت الطيار ولا شي انا بس مجرد دخلت الحمام (تكرمون) وطلعت بصراحه ماادري قال الطيار او المضيف..

وقال اللي فيك فوبيا لازم تشوف دكتور نفسي قلت انا طالع لدكتور صدريه قال بعد ماتفحص روح دكتور نفسي واعطاني عياده لشخص بالاردن...

بعد ماوصلت وارتحت يوم طلعت للدكتور الي في الرياض وشرحت له حالتي فحصني واعطيته الاشعه اللي مسويها قبل

قال انت سليم والحمدلله لكن اللي فيك حالة هلع طبعاً ماصدقته واعطاني بخاخ وقلت بس قال عشان ترتاح نفسيا فقط!!


الى هنا واوقف لان قصتي مع هالمرض او الحاله طويله

ولي عودة بأذن الله واتكلم عن رحلتي الى (الكويت+الاردن+البحرين+وختاماً المانيا)


والعذر منكم اذا طولت او كان اسلوبي غير جيد لكن اللي صار معي سر مايعلم فيه الا الله ثم اللي زرتهم وانتم

والسلام عليكم رحمة الله وبركاته

00``00`

المصدر: نفساني