أنا ايش فيني بالضبط ساعدوني؟

أنا ايش فيني بالضبط ساعدوني؟

السلام عليكم ورحمة الله وبركاته

قصتي من سنتين صارت مشكلة بيني وبين زوجتي وكنت عصبي وصارخت
وبعدها طلعت من البيت وانا زعلان وكان وقتها بالشتاء

وطلعت من البيت ومدري وين اروح وغسلت السيارة وانا جالس انتظر السيارة تخلص جاني تنميل برجلي اليسار
وتركته قلت من الجلسة
خلصت السيارة ركبتها ومشيت
ووانا بالطريق زاد التنميل إلى يدي اليسار
وبدون مقدمات جتني دوخة وقلت هذي الجلطة
وصرت اسوق بسرعة ابي اروح للمستشفى وكنت خايف مرة
وكنت ماني عارف ايش اسوي وافكر اوقف السيارة واطيح بالشارع على شان الناس يشوفوني ويودوني للمستشفى

المهم وصلت للطوارئ ودخلت عليهم وقبت انا جالس اموت ساعدوني
وماكنت قادر انام على السرير احس اختنق واحس بيغمى علي واموت

سويت تخطيط مخ وقلب
وجات دكتورة وحطت اصابعها داخل ايدي قالت اضغط بقوة وضغطت وصرخت
وقالت ارفع ايدك فوق وابي انزلها لتحت وانت امنعني ومنعتها

قالت مافيك شي
وانا عندهم حسيت بلوعة واكرمكم الله رجعت شي بسيط وحسيت ارتحت ومافيني شي


وبعدها بدت معاناتي طول السنتين
كل يوم اعراضي هي

1- ضيق تنفس
2- احس شي بحلقي واقف
3-كتمة
4-دوخة ودوار دون اغماء
5- تنميل كامل الجسم واحس مو قادر اقفل اصابعي
6- خوف من الموت والامراض الخطيرة والاورام دايم
7- الم تحت الصدر وفوق المعدة ويمتد للظهر
8- نظرة سوداوية واحس بموت
9- عصبية ومزاج متقلب
10- الشعور بالا واقعية وكأن على راسي قدر
11- غازات فضيعة تضغط على قلبي وصدري وظهري غازات محشورة
11- خوف من النوم وإذا حسيت اني بنام اصحصح اخاف انام واموت بعدها
12- مكتئب اوقات استغرب من الناس واقول شلون مبسوطين وكيف لهم نفس ياكلون ويضحكون وبعدها بنموت ؟


اوقات اذا جتني الحالة احس ابي اطلع اركض واهرب من اللي انا فيه

اقول في نفسي هذي اعراض الهلع وإذا راحت الاعراض اضحك واقول إذا رجعت الاعراض ابي اصبر نفسي
مجرد انها تجيني الاعراض تذبحني وما اقدر اسيطر عليها ابد

استخدمت سيركسات وسبرالكس وقماتين وعلاج اسمه تقريبا سنيتافيا
وسببت لي ضعف جنسي وتركتهم كلهم

رحت للدكتور بمستشفى الحبيب د محمد جلي
وسوى تحليل للغدة وسليمة
وسوى لي اشاعة للبطن وقال عندك غازات

واعطاني بس ميفوكول للغازات


اليوم بعد ماطلعت من صلاة الجمعة حسيت بشي فضيع دوخة وتنميل وخوف من الموت واحس ان اذاني شبه مقفولة

هل هذا يعني انني اعاني من التهاب الاذن الوسطى؟


انا شخص مدخن
عمري 34

افيدوني جزاكم الله خير

ردوا علي الله يشافي جميع مرضى المسلمين

المصدر: نفساني

هلا أخوي
انت بالضبببببط تتكلم عن نوبات الهلع بعينها
وعشانك بالبداية عصبت مره فالأدرينالين تدفق بجسمك بشكل كبير و بسرعه
عشان كذا جاتك النوبه و انت ما تدري انها نوبه
ككككل الاعراض اللي قلتها هي اعراض نوبة الهلع
عادي بالبداية بتخاف منها وما تقدر تتحكم بنفسك
ولما تجيك تحس خلاص بتموت و أساسا مالها علاقه بالموت
ومحد قد مات من نوبات الهلع أبدا أبدا
نوبات الهلع كانت من أيام الحرب العالميه الثانيه
كانوا الجنود تجيهم نوبات أثناء الحرب بسبب اللي يشوفونه , فعادي هو شي متعارف عليه > كأني شطحت شوي :)
بس يختلف طريقة تعامل الشخص معها
كويس انك عرفت من وقت بدري انها نوبة هلع
احسن مننا اللي ما كنا ندري وش ذا ليين في الآونه الاخيره صارت النوبات شي متعارف فيه بين الناس خصوصا فئة الشباب
فصارت اغلب مواقع الطب تتكلم عنه و الأطباء يسوون مقالات عنه
المهم انك لازم تشيل الأفكار السوداويه عنك
فكر بإيجابيه و حاول ترتاح وتسترخي
وابتعد عن المشاكل والاشياء اللي تعور راسك وممكن انها تسبب لك نوبه
حسن من أكلك و نومك و شرب المويه
ومارس التمارين سواء مشي او تمارين الاسترخاء
وان شاءالله تخف




تحياتي

مشكور اخوي على الرد وجزاك الله خير
الله يشفينا شفاء لا يغادر سقما

انا اشوف كلما زادت الغازات فيني تزيد الاعراض


حاب اسأل عن فيتامين ب12 وش اعراض نقصة
وفيتامين d

هل تنصحوني ان اسوي تحاليل او منظار

لاني تعبت من الدكاترة من سنتين وطنشت طل شي

المشاركة الأصلية كتبت بواسطة سامي الهلوعي

مشكور اخوي على الرد وجزاك الله خير
الله يشفينا شفاء لا يغادر سقما

انا اشوف كلما زادت الغازات فيني تزيد الاعراض


حاب اسأل عن فيتامين ب12 وش اعراض نقصة
وفيتامين d

ممكن عندك قولون او شي
وكمان القولون اعراضه تشه الى حد ما اعراض النوبه

بالنسبه لفيتامين ب12 و دال مجربتها كلها
ممممم واعراض نقص ب12:
تنميل في الارجول واليدين / برودة في الاطرف / تساقط الشعر / حبوب حول الفم او داخل الفم ع اللسان او جدار الفم / جفاف في البشره / عدم القدره على التركيز و الاستيعاب والادراك / النسيان / فقدان الوزن / الاكتئاب / العزله / البكاء بدون سبب/ الحساسيه العاليه لكل شي / الم في أعصاب اليدين / تعرج الاظافر

اعراض نقص دال:
حرارة في الجسم خصوصا الصدر الظهر / حكه في الاقدام / صعوبة في البلع و كأن شي ناشب في الحلق / شد في العضلات سواء عضلات الصدر او اليدين و الارجول / فقدان الشهيه / ليونه في العظام / أفكار سوداويه / خوف / قلق / توتر / اكتئاب / تغير لون الجلد ممكن بقع حمرا صغيره جدا او بقع بيضا / عدم تحمل الازعاج و الأضواء / صداع / دوخه / دوار



ممم في اشياء كثيره بس مو فاكرتها
ابحث في المواقع الطبيه عن الاعراض والعلاج
والأفضل تروح تحلل عشان تتطمن على نفسك اكثر
والله يشفينا جميع

سامي صدقني علاجك الرقيه الشرعيه الي فيك مس بس مادري وش سببه مع الرقيه الشرعيه راح يبان كل شي بالحلم

المشاركة الأصلية كتبت بواسطة عصفورمفلوع بحصى

سامي صدقني علاجك الرقيه الشرعيه الي فيك مس بس مادري وش سببه مع الرقيه الشرعيه راح يبان كل شي بالحلم

لا تقعد توسوس بالرجال !
اوكي الواحد يرقي نفسه بس مو تشككه بنفسه انه ممسوس!!!
اذا انت ما جربت نوبات الهلع ونقص الفيتامينات لا تشخص الحاله بكيفك !
ان شاءالله مافيه شي مجرد نوبات هلع ويقدر يسيطر عليها
والأرجح قولون و نقص فيتامينات و ممكن جرثومه

انا لي سنتين وزود وانا بالحاله من خوف ودوخة وتنميل وغيرة
واكثر شي يخوفني مو الموت لاننا كلنا راح نموت

انا والله اخاف الا ما بعد الموت من حساب وقبر ومقابلة الله بالتقصير

المشكلة اني كتوووووم مرة
اوقات تجيني دوخة واطنش

دوخة فضيعة وتنميل احاول اصبر نفسي
الخوف اللي يجيني احس ودي اهرب او اغير مكاني


اشوف الحمد لله اني ارتاح كثير إذا استخدمت (المباركة) اخذها من العطار
كل يوم استخدمها لمدة شهر واوقف

هذي تسبب مغص خفيف بس تنظف القولون والمعدة


الله يشفينا شفاء لا يغادر سقما

المشاركة الأصلية كتبت بواسطة سامي الهلوعي

انا لي سنتين وزود وانا بالحاله من خوف ودوخة وتنميل وغيرة
واكثر شي يخوفني مو الموت لاننا كلنا راح نموت

انا والله اخاف الا ما بعد الموت من حساب وقبر ومقابلة الله بالتقصير

المشكلة اني كتوووووم مرة
اوقات تجيني دوخة واطنش

دوخة فضيعة وتنميل احاول اصبر نفسي
الخوف اللي يجيني احس ودي اهرب او اغير مكاني


اشوف الحمد لله اني ارتاح كثير إذا استخدمت (المباركة) اخذها من العطار
كل يوم استخدمها لمدة شهر واوقف

هذي تسبب مغص خفيف بس تنظف القولون والمعدة


الله يشفينا شفاء لا يغادر سقما

كلنا والله نفس الشي
هذي نوبات الهلع كذا تسوي
بس وش المباركة هذي اول مره اسمع فيها ؟؟

فعلا هذه نوبات الهلع أحيانا تجي مع كثرة الوساوس على العقل فيعكسها على صورة قلق وخفقان وكتمة وصداع وغيرها

( المباركة ) هي طب شعبي وعبارة عن احجار مثل المرة او الصبرة والعنزروت
فوائدها تنظيف القولون والمعدة وعلاجها إن شاء الله

المشاركة الأصلية كتبت بواسطة سامي الهلوعي

( المباركة ) هي طب شعبي وعبارة عن احجار مثل المرة او الصبرة والعنزروت
فوائدها تنظيف القولون والمعدة وعلاجها إن شاء الله

وبرضو اللي فوق ما اعرفها بس اعرف المره فمنعا للإحراج مارح اسأل :)
طيب كويس اذا تريحك يمكن علتك تكون بالمعدة او القولون
مجربه القولون يسوي مثل اعراض النوبة واحيانا تجي النوبة بسبب القولون -_-

ما فيك الا العافية أخي الكريم

حسب متابعتي لمشاكل الأعضاء

اغلبهم متل حالتك بتكون مشاكلهم بالمعدة والقولون يعني التهابات ومن هذا القبيل

وبعملوا فحوصات للمعدة منظار وتحاليل..وفعلا بتكون هي المشكلة بكل هالأعراض

ومع الأدوية المناسبة ارتاحوا

اسأل الله لك الشفاء التام اخي ...

الله يجزاكم كل خير
والله يشافينا ويشافيكم ويشافي جميع مرضى المسلمين

اللهم صل وسلم على نبينا محمد

الاخ سامي الاعراض التي ذكرتها كانت تأتيني سابقا وطلعت المشكله من المعدة والقولون وترى التدخين يزيد الاعراض وخاصة تهيجات القولون مثل الغازات والمغص ووالخ.