موقف صار لي اليوم

موقف صار لي اليوم

انا معي اكتئاب وقلق من 8 سنوات جاني بعد انهيار سوق الاسهم لأني خسرت مليون وثمان مية الف ريال وانا الحين ما اخذ علاج نفسي صار لي 3 سنوات موقفه لأني مو مقتنع فيه ولا استفدت منه المهم اليوم كنت مع الشباب في الاستراحه وجانا واحد نعرفه كان شجاع وكريم و و راعي فزعه ومحبوب من الجميع وعقله يوزن بلد و دخل علينا شكله يروع ثوبه وصخ ولحيته طويله وبيضا وشعره طويل وجلس في الزوايه ويسولف مع نفسه ويضحك قام عامل الاستراحه وصب له قهوه وبعدها شاهي وجلس شوي وطلع من الاستراحه قلت عيال فلانه وش فيه ليش صاير كذا طبعآ انا لي 7 سنوات ماشفته قالوا فلان طاح في الحشيش والكباتقون ومن سنتين ضرب عقله وصار مجنون انا بعد مدري وش صار فيني جتني حراره بصدري و دوخه و لاعت كبدي وصار تركيزي ضعيف وقلبت نفسيتي وبعدها طلعت من الاستراحه ونفسيتي زفت وجلست افكر فيه وخفت اصير مثله مع العلم اني والله العظيم ماعمري رحت للخراب لا حشيش ولا كبتاقون ولا مخدرات ولا غيره بفضل الله سبحانه وكل اخوياي ناس عاقلين ومحترمين وسمعتهم طيبه ،،،، ابي اعرف انا ليش انعفست كذا وحسيت بهالشعور !؟؟؟ الظاهر اني احتاج علاج نفسي لكن المشكله انا ما اثق في العلاجات النفسيه لأني جربتها كلها خرابيط في خرابيط ،، وش الحل ابي مشورتكم

المصدر: نفساني

تعوذ من الشيطان و صل بعدها و ارفع كفيك

ياخوي احمد ربك ما وقعت في الخياس و الخراب و الزبالة ياكم راعي مخدرات زاغ قلب اللي يشوفه ما تنلام و الله المخدرات تلحس مخ صاحب الصاحب مهوب الرجال نفسه اللي معه و الله صرت أي واحد راعي مخدرات اصد وجهي عنه ماهوب كبر حشى و كلا و يشهد علي ربي لكن بيلحس مخي من منظره

روح دربك خضر :)

و معاوض خير يا خوي محتري الفلوس تروح و تجي لكن العافية اذا راحت فهي عزيزة نادر ما ترجع

طبيعي لا تحاتي.. هذي يسمونها شخصية إيحائية أو Suggestibilty وهي انه الشخص يسقط ما يراه من امراض، اقدار سيئة عليه.
الشيء اللي كان لازم تسويه انه تظل جالس وما تطلع وتسولف وتلتهي مع الشباب وتقوّي قلبك هذا العلاج مو كل شيء يلزمله ادوية ومعالج نفسي

اتذكر هذا الانهيار كل شوي اشرب عصير خوف من الجلطه امشي بصعوبه ياريت راحت كل الفلوس ولا راحت النفسيه بسوق الفلس اخذ الفلوس والصحه وانا اقول ليه الناس بعد انهيار 2006 تغيرت

مالومك انت فكرت انك تصير مثله لانك تعبان


وانا كذلك مايخفى عليك تجيني هالافكار



عليك تقيس راسك تشوف فيك فري ولا لا واذا فيك فري عالجه وحجم راسك كل شهر

كلنا نفس الشي لما نشوف شخص نقول يارب ارحمنا

انا اتاثر سريع باللي قدامي واتعب احس بحراره وغصه وتعرق ورجفه
والله حاله اللي فينا مكفينا مدري منين طلع لنا ذا الشي اللي هو اننا نتاثر بااللي نشوفه

اللي مر عليك يالغالي شيء طبيعي جدا ... انت بس حساس شوي زيادة ولا ألومك الموقف صراحة مؤثر جدا


طبعا كثير من الشباب لما يجي طاري الأمراض يتضايقون ويقولون فكونا من طاري الأمراض وهم ناس طبيعيين جدا .. فقط يتعبون من طاري الأمراض ويخافون .. واللي ملاحظه انه في الغالب يكون مع مرضى القولون

لله ما أخذ ولله ما أعطى والله يخلف عليك كثير ناس اغتروا وراحوا ضحيه هالسوق الله يجعلها غصه في حلوق الهوامير الظلمه

لاتذكرني فيه السوق أغلبنا تأزم في ذلك الوقت واللي هون علينا ان أغلب الناس نفس وضعنا
والحمدلله عل كل حال
لا يالغالي ماتحتاج دام الحمدلله موقف علاجك لك 3 سنين وغير ذلك تقول ماأستفدت منه
هذا موقف عابر ولو يتكرر عليك بتلقى نفسك تقبلت الوضع عادي
أنت لاتفكر فيه ولاتربطه فيك أو في شي أخر

هذي صدمة طبيعية يعني بتتذكر وضعه اول فوق الممتاز وفجاءه اتغير
انا لو مكانك بجلس ابكي طبييييييييعي لاتقلق