يكفيني حيره .. وألم

يكفيني حيره .. وألم

بسم الله الرحمن الرحيم

أنا مثل الذي تايه وينظر من بعيد سراج
فلا نوره وصل دربي ولا ملقاه دفاني

الله يمسيك بالخير دكتور..
اتمنى انك ماتحل مشكلتي ولكن ترشدني للطريق الصح.
بدت أزمتي النفسيه من حوالي 3 شهور من وقت انخطبت على شخص جامعي عمره 32 سنه وعمري 25 سنه
وقبل اتخذ اي خطوه استخرت ربي والحمد لله ارتحت وتمت الملكه لكن بعدها بكذا يوم تغير هالاحساس وصار مزعج يوم ارتطمت احلامي بصخرة الواقع
مو هذا الانسان اللي كنت ابيه
من ناحية اسلوب التعامل وطريقة التفكير.
ماتحملت
صارحته من البدايه وقلت له : حنا نمر بأجمل مرحله يفترض إننا نستمتع بكل لحظاتها..
جاوبني : انا شخص صريح اللي بقلبي على لساني مابي بيوم بعد الزواج تجيني وتقولين أنت خدعتني بكلامك المعسول.
اشلون يعني الصراحه هالزمن صار معناتها زرع بذور الحقد والشك من بداية الإرتباط؟؟؟؟؟؟؟؟؟؟

مقتطفات من كلامه:
بيوم قالي غريبه ماعمري شفتك ولاسمعت صوتك ونا دوم عند جامعتكم؟
>>> والله يوم قال هالعباره على بالي يمزح ما أهتميت لها <<<
ومرات يقول:
حنا بمرحلة الشباب وعارفين تصرفات بعض علميني وش المواقف اللي مرت عليك؟ وش قصة الحب اللي عشتيها؟؟؟؟
>>> كنت اكتفي بعد الرد عشان يفهم ان كلامه تافهه<<<

بعدها تطوور الوضع وصار يناقشني بأمور ماديه
>>> عرفت وقتها انه أختارني لأني موظفه<<<
ونا ما اعترض على التكافل بين الزوجين لأن الحياة تعقدت نوعا ما بس الأهم يكون بين الزوجين ود بعدها التكافل والتضحيه..

ومرات يقول:
عطيني تقرير يومي مفصل من اول ما تفتحين عينك الين تنامين
>>> بحكم اني اعيش من مجموعه من صديقاتي بسبب ظروف الوظيفه بعيد عن هلي <<<
وإذا قلتله وش هالكلام الله يهديك بس، قال: لاتحديني أراقبك وأعرف كل تفاصيل حياتك وإنتي ماتدرين والله لو أحطها براسي أسويها..

وأخرتها يقول:
بأخذك من عند صديقاتك بدون علم هلك ونروح أوتيل لمدة يومين ثلاث عشان تتعودين على النوم معي،،، وأحاول مايصير حمل ؟؟؟؟؟؟؟
>>> والله ي دكتور نزل علي هالكلام مثل الصاعقه ماتخيلت أبد يوصل لهالمرحله ،،أدري إني زوجة شرعاً بس التقاليد والعادات تخالف بعض الأفكار الغريبه<<<
ماقدرت بعد ذي أسكت وقمت أتكلم عليه وأنتهى كلامنا على هواش
ولي تقريبا 3 اسابيع ما ارد عليه

دكتور يجوز طريقتي بإجتياز الخبرات السئيه فيها نسبه كبيره من الغلط وهي العزله بالنفس بس مااعتبره هروب بقدر ماهو ترويح عن النفس
الحين حياتي تمر بمنحنى خطير، والله كل وقتي صياح وبكى وأدعي ربي اذا هالشخص فيه خير لي ان الأمور تتيسر والعكس بعد.

بلغت أهلي إني مو مرتاحه بس للأسف ماوجدت عندهم أي تقبل لكلامي
أقول يمه ساعديني مو مرتاحه معه تقولي: انتي بتموتيني والا بيجيبن لي المرض ودك تفضحينا وتطلقين ترى ماعندنا هالكلام ولاوحده بعيلتنا سوة مثلك حسبي الله عليك من بنت كل البنات اللي بعيلتنا يحمدون ربهم على ازواجهم..

ماقلنا شي الحمد لله على كل حال بس اللي تقول لأهلها مابي هالشخص يعني بتفضحهم سبحان الله على عقليات البشر
والله مومرتاحه اشلون افسرها لهم؟؟؟؟

تخيل دكتور النظرة الشرعيه رفضوها بحكم أنه عيب محد سواها عندنا
>>> الله وأكبر صار شرع الله حسب العادات <<<
>>>اللهم لاتؤأخذنا بمافعل السفهاء منا<<<
يعني حرموني من أبسط حقوقي اللي من خلالها يحصل تقارب أو تنافر
مع إنهم تاركين بدون محرم أكثر من 3 سنوات بسبب الوظيفه ولا أشوفهم إلا بالإجازات وأنت تدري إن البنت بغربتها محتاجه محرم .
بهالفتره وصلني كلام من مصادر ثقه عن هالشخص مو زين أبد ونا أقول السبب ان هلي ماسئلوا عنه زين اكتفوا بالظاهر..
دكتور عشان لا اضلمه معي حاولت أدور عن إيجابياته لأن اكيد أي شخص فيه الزين وفيه الشين مالقيت غير شي واحد
إنه يضحك بإستمرار وأحياناً يصل لدرجة القهقه وقتها بس تأكدت انه مستهتر بقوه....

الله سبحانه وتعالى يقول>> لتسكنوا إليها<< لكن اللي حاصل معي إني بسكن معه مو له يعني بيكون بالنسبه لي رفيق سفر
اعتبر موضوع الزواج حساس جداً وإذا تعكس من أوله خلاص مايصلح الأفضل مايكتمل لأن القاعدة بتكون هشه وبيجي يوم وينهدم البناء عشان كذا أقترح على نفسي أنفصل الحين ولا بعدين .

لكن هلي مثل ماقلتلك مو مقتنعين بوجهة نظري ولا ودي أخسرهم
أخاف اتحمل عشان أمي وأكون جنيت على نفسي...
واخاف اوقف بوجهها وتمرض بسبتي وتغضب علي..
وبالنسبه للوالد مريض مايستوعب كل شي..


أنتظر تعقيبك دكتور
a::2
تحياتي:
صمــ الدموع ــت




وأخيراً ......... لا أستطيع الا أن أشكركم على جهودكم الواضحة

المصدر: نفساني

أختي العزيزه صمت الدموع.بعد التحية والتقدير
لقد قرأت رسالتك بتمعن وأقول لك ان الزواج هو شراكة بين طرفين يتحمل كل طرف منهما الذي يلزمه من المسئوليات.لكن من سردك عن طبيعة العلاقة مع هذا الرجل فإنه يجعلني أشعر فعلا أنه متقدم لأهداف متعدده ولكن المادة هي الأهم فيها وهذه مشكلة كبيرة سوف تعانين منها لاحقا مع هذا الرجل.هذا شيء والشيء الثاني أنه يتعامل معك من مبدأ الشك في تصرفاتك وماضيك ولعلمك فلن يتوقف عند هذا الحد بل سيزيد وسيكون بشكل أعنف وأشد وسيجتر أي معلومة تتحدثين معه عنها.سيكون الوضع صعب للغاية.ثم ان تهديده لك بالمتابعه من دون علمك يشير الى ان ذلك الرجل يعاني من إضطراب في الشخصية.
أختي العزيزة رأيي أن هذا الرجل قد لا يكون هو الرجل المناسب لك خاصة مع هذا الإختلاف الواضح بينكما وبشكلا كبير.لا أحب أن أكون متشائما ولكن نفسي لا تميل الى مواصلة مثل هذا المشروع.وأرى أن النزول من أسفل السللم خير من أعلاه.وأخيرا فإن محاولاته لأخذك للفندق فيها بعضا من قلة الأدب التي لم يراعي فيها رأيك على الأقل.أختي العزيزة الإنفصال قبل أن ينفض الخاتم أفضل وسيعوضك الله خيرا منه انشالله وشكرا.