قلبي بيتقطع من الحيرة كيف اتصرف يانااااااس

قلبي بيتقطع من الحيرة كيف اتصرف يانااااااس

ما ادري كيف ابدأ مشكلتي ومن وين لأني ماني عارفه العيب فيني او في زوجي

انا متزوجه من 4 سنين وعندي طفل وحامل
انا انسانه حساسه جدا وللاسف غيوره جدا وزوجي يضايقني بهالشي وانا مادري بصراحه اذا معاه حق او لا ؟؟؟
لأني لما اتكلم عن غيرتي يزعل ويحاول يثيرها
حصلت لنا مواقف كثيررررررررررره ومشاكل لها اول مالها اخر زوجي كويس لكن مشكلته يلعب بذيله اوقات بس على خفيف مثل الشات ومواقع الصداقه هي ماتستمر مجرد نزوات لكن المشكله اني كم مره فتشت وراه واحصله عامل عمله وابين له اني حاسه بشي وينكر طبعا وازعل واتنكد ونتنكد اثنينا وتحصل مشكله
واجي انا اتأسف منه بحكم اني ما ابي اخرب بيتي ولا يرجع مثل اول لا يكون مزاجه سئ ويعاملني بصمت
(( حاسه ذهني مشت ماني عارفه اكتب ))
المهم انا تعبت من لعباته وانكاره لكل شي هو صحيح مايتعمق لكن ليه البدايه اصلا والله اني اسأله عن نفسي يقول انتي مافيك عيوب انا المشكله عندي
انا اعترف اني ماعرفت اكسبه اعصب دايما واشك فيه لأني عجزت اثق فيه ودايما احنا على هالموال نفسيتي مره تعبانه ماني عارفه كيف اتعامل معاه زوجي صعب جداااااااااااااااااا ومنزوعه من قلبه الحنيه مايحن علي لما ابكي ويضيق صدري

اللي حاصل اني كنت مسافره انا وهو وهو دايما ماسك الجوال وحسيت انو وراه شي (( ماسكه مسجات مو مكالمات )) وقلت له انت عندك شي وانكر
واخذت جواله من دون لايدري (( وياليتني ما اخذته )) الغلطه الكبيره اللي اجبرني عليها بليس وشفت مسجات من بنت بس جايه من شات حقت الاتصالات مثل ابواب يعني ترسل له بس ماتعرف جواله بس نيك نيم
المهم ضاقت بي الدنيا وتنكدت مررررررره ولاقدرت اخفي ضيقتي وقلت له انا حاسه وراك شي قلبي ناغزني وقال لا مافيه شي ومن هالكلام
ولما رجعنا بيتنا قلت له (( انا شفت منك كثير نزوات لكني تسامحت وسكت اذا شفتها مره ثانيه انا بطريق وانت بطريق والله يعوضني بالرجال اللي يستاهلني ))
سكت وانا رحت بيت اهلي زياره بالدمام وجلست يومين وكان مايرد على مكالماتي ولا رسايلي قلت اكيد زعلان مني واليوم رجعت بيتي انصدمت انه مو موجود قلت يمكن طالع مشوار وارسلت له قلت انا في البيت ودق علي بعدها وقال انا مسافر برا الرياض وتفاجأت كيف ؟؟؟
ودار بينا حوار انه تعب من كثر النقاشات على نفس المواضيع (( ياناس مشكلته هو اللي يبدأ الغلط هو اللي يلعب بذيله )) انا صحيح اني اغلط بمراقبتي له والتدوير وراه لكن انا مادورت الا اني عارفه انو فيه شي .
وهو يبي يجلس بروحه فتره يفكر بينه وبين نفسه قلت له تبي ننفصل ؟؟
قال اذا تمينا على هالوضع الشك والغيره والنقاشات اللي مالها داعي انا ماراح استمر معاك وباقرب وقت ابي الوضع يتغير او انفصل عنك .
والله مادري ايش اسوي وفتحت الكومبيوتر قبل شوي لقيته مسجل بموقع زواج وكاتب انو يبغى زوجه تعالجه من الجروح والله دارت فيني الدنيااااااااااااااااااااا مادري ايش اسوي ؟؟؟؟؟؟

انا عارفه مستحيل اقول له شي او ابين له والا اكون جنيت على نفسي لكن اخاف تراسله وحده ويتفق معاها ويتزوجها ويتركني بسبب كثره ملاحقتي له
هل ارضى فيه واقبل بزوج صاحب نزوات ؟؟؟
اوانفصل عنه و اتركه واتشتت واضيع ولدي والبييبي كمان ؟؟

حيرااااااااااااااااااااااااااا اااانه كثير ابيكم تقرون كلامي زين وتساعدوني كيف اتعامل معاه لما يجي هو جاي بعد يومين

المصدر: نفساني

اختي / أم الحلو ـ..................سلمها الله
في الحقيقه الحياة الزوجيه في وجود الشك بين الزوجين ليست بحياة زوجية ، فهي حياة نكد وشقاء ، والذي يبدو عليك يا أختي أم الحلو أنك امرأة عاقلة رزينة ، يهمك مصلحة بيتك وأولادك فا الطلاق مشكلة يتبعها مشاكل اخرى ما بعد الطلاق وهو ليس بحل إلا إذا انسدت جميع الطرق الموصلة للحل ، وأنت يأختي عليك التريث والتفكير وتوقفي عن متابعة زوجك وملاحقته لأن هذا الاسلوب سيزيد المشكلة سوء ا واصبري عليه شهرا واحدا وانتظري فسوف يتغير لأن الانسان لديه ضمير يوجهه ، فالعاقل خصيم نفسه ولعل زوجك من هذه النوعية من الرجال الذين يرشدون أنفسهم بانفسهم إذا وقعوا في خطأ ، وأنا على يقين إذا كان يكن لك محبة في قلبه فإن هذا الحب سيمنعه عن التفكير في غيرك ، ولكن لاتستعجلي وسوف تتغير الأحوال إن شاءالله تعالى ، والرسالة التي ارسلها إليك رسالة بليغة تقول : إني ابحث عن زوجة للخلاص من النكد الذي انا فيه فلماذا لا تكوني أنت هذه الزوجة التي يبحث عنها زوجك باللطف والكياسه والكلام الجميل ونزع الشك من قلبك لئلا يتمادى زوجك فيه والله يحفظك ويرعاك .

المستشار / ابراهيم الدريعي

اشكرك يادكتور كل الشكر حاولت السير على نصيحتك وتركت زوجي ولم اتابعه وانا اعلم تمام العلم انه لازال يتراسل مع احد ما عن طريق الجوال
صبرت وتجرعت المر ......... الى ان حصلت المصيبه وهي بدون قصد سمعته يتحدث في مجلس البيت وكان مقفل الباب بالمفتاح وسمعته يقول ((( انتي مرات تبعدي ومرات تقربي )))) دارت بي الدنيا كان راح يغمى علي لكن حاولت امسك نفسي واقويها ورحت لأبعد مكان بالبيت حتى ما اسمع اكثر وانهار جيت سألته انت تحبني ؟ قال اكيد وقلت تفكر تبدلني بيوم او تبي تعيش معاي العمر كله .... قال وهذا سؤال تسألينه ؟؟ قلت ارجوك جاوبني ... قال ولا ابي غيرك
سكت وقلت مين كنت تكلم قال صاحبي .......... وعلمته بالكلمه اللي سمعتها من غير قصد وقال انتي غلطانه ولا تخلين الشيطان يلعب فيك ....... وسكت وحاولت اصبر وجلست اصلي وادعي ربي
ومن بكره حاولت اعدي الامور ولا كأن شي صار وهو طبعا ساكت لكن لازال يرسل مسجات مجهوله ويستقبل (( وانا اعرف زوجي مستحيل يرد على احد بالرسايل مايحبها ابدا ))
حاولت اكتم لكن تعبت وصابني ارق كم يوم وانسدت شهيتي تماما عن الأكل خفت على البيبي كثير وبينت له ضيقه صدري وجلس يقول وسعي صدرك ترى كل شي تمام وانا مادري اصدقه واكذب عيوني واذاني
او اسكت واعديها المشكله غصبببببببببب عني يبان علي ضيقه الصدر اتأثر فيها كثير والله تعبت منه
طيب دامك تحبني وراضي فيني ومقتنع وماتبي تغيرني ليش تلعب من وراي ؟؟؟؟؟؟؟؟

((((ليش انتم كذا يا معشر الرجااااااااااال ماتملون من البنات او ماتشبعون منهم الحرمه فينا اذا حبت اخلللللللصت لكن الرجال لا يحب زوجته وماشي معاها تمام ومع ذلك يدور غيرها ؟؟؟؟؟؟؟؟؟ ))))

هو مره قال لي ان الرجال اذا ضايقته زوجته بغيرتها وشكوكها ممكن يخونها ولا يهمه انها تدري لأنها تعبته طبعا انا فهمته على طول ودريت انه يقصدني ومن وقتها حسيته انه جالس يخوني
لكن انا تعدلت الحين ................. والله ماصرت اسأله عن شي واحاول اريحه واشاركه بكلامه حتى لو هو مايعجبني لكن .............. للاسف انا خااااااااايفه انو يكون فات الفوت ويكون مستمر بعلاقه ومايقدر او مايبي يتركها ؟؟؟؟؟

ايش اسوي ذبحني التفكيييييييييييير

أختي /ام الحلو 0000000000000 وفقها الله

مشكلتك واضحة تماما ، وأنت تعرفين سبب خيانته لك ، وهو شكوكك الدائمة فيه ومتابعتك له ، وعدم ثقتك فيه ، وأنا قلت لك إتركيه شهرا واحدا ، وسيشعر أن مايفعله خطأ ولكنك واصلتي ملاحقته ومطاردته والتصنت عليه ، حتى إزدادت الحالة سوءا ، وأنا أعرف ياعزيزتي نساء تزوج عليهن أزواجهن ، فلما على ما قالوا طاح إلي في رؤؤسهم رجعوا لزوجاتهم وبأفضل حال ، فأنت لاتخافي ولا تحزني ولن يفوت شيء -بإذن الله - وسيعودلك زوجك ، فانت غترته وعقاله والباقي سراب ويزول ودعي عنك الشكوك والمخاوف التي تزيد الطين بله وكوني على اتصال بي الله يسعدك في الدنيا والآخرة ويعيد زوجك إلى رشده ، وأكثري له من الدعاء له في صلاتك لعل الله يهديه وتقبلي تحياتي الطيبة..

مشكور الف شكر يادكتور وبصراحه كلامك اعرف انه صحيح ومشكلتي اعرف انو هو الصح بس ما ادري ليش لما اجي انفذ ما اقدر
غصب عني اشوف ابي اتأكد هو وقف او لازال ؟؟؟؟
يارب يارب يريحني من شكوكي
اليوم تكلمنا واستشفيت من حواره انو يبيني اوقف ظنون وشكوك ويوقف هو لعب ........ وانا مقتنعه جدااااااااا بهالشي بس اوقات افكر زياده واقول اخاف يتمادى في فعلته وتوصل لمواعيد وانا واقفه انتظر ............. لحد ما يخف
واوقات يجيني تفكير واقول انا ما احب اكون الزوجه اللي متزوجها زوجها لأجل الجنس وتربية الابناء والطبخ ......... ابي اكون صديقته وحبيبته

يعني تعرف لما اكون اوكي ومزاجي كويس افكر حلو بس اوقات لما اشوفه ماسك جواله او رايح ومعاه الجوال تجيني موجه تفكير وحزززززززززن كبيره وتخليني اخرج عن طوري
ما ادري هل انا محتاجه علاج نفسي او سلوكي يرشدني للصح؟؟
وانا دايما ادعي له بصلاتي بصراحه هو انسان كويس بس مشكلته هالعناد ؟؟؟
يعني انا اعرف انو عندي مشكلة الشك وادري انه شي قاتل ... بس ليش لما انا اشك يروح يخون ؟؟؟؟ غريبه طبيعه الرجل
انا اشوف نفسي طالما انا احب زوجي وهو يشك فيني باحاول دايما اظهر له اني ما العب من وراه مو لما يكون يشك فيني اروح واخون ؟؟؟؟؟؟؟؟؟ سبحان الله

اخوي ابراهيم بغيت اسألك عن حاجه كيف اتعلم اني اتعامل مع زوجي بطريقه عاديه واتقرب منه وهو كل شوي يطالع جواله يشوف اذا جته رساله او لا ؟؟؟؟
ما اقدر غصب عني احس اني اكرهه واقول ليش يسوي فيني كذا ولما انا ارسل له ما يرد علي وهي بس ينتظر متى ترسل عشان يرد عليها .......... طيب مو انا كنت حبيبته بالأول والا لما خلاص وثق اني احبه وابيه طنشني ؟؟؟؟
مادري اوقات احسه مريض ويحتاج علاج على ملاحقته للبنات ؟؟

اختي /أم الحلو0000000000000سلمها الله
إذا تريدين رأيي ، فما دام زوجك قال لك إنني سأترك المكالمات واتفقتي معه على ذلك فارى أن تتمالكي نفسك وتتغلبي على شكوكك وتتركي له فرصة التفكير ليغير من سلوكه مع توقفك عن مطاردته وتضييق الخناق عليه ،المحبة الصادقه تمسح الخطايا وتعدل كل شيء ولايوجد رجل في العالم يحتفظ بزوجة لايحبها من أجل تربية أطفاله والطبخ له ما الذي يدفعه إلى ذلك هذه الأعمال تقوم بها شغالة (عاملة منزلية) الزواج حب وتفاهم وغفر للزلات من الطرفين أنت يمكن تخطئين ، فكيف تريدين من زوجك أن يصفح عنك وأنت لاتصفحين عنه ، إلا إذا كان الحب لايسيطر على حياتكما فلا داعي لاستمرار الحياة الزوجية بوجود شك يدمر ها وينغص حياتكما ولا تشعرا بحلاوة الزواج إلا بانعدام الشك ، يجب أن تتفقا على التخلص من مشكلتكما حتى تريحي نفسك وتريحي زوجك فهو شريك لك في المشكلة ولاشك أنه يعاني كما تعانين ولكن لايظهر لك ذلك والله يحفظ.ك

اعترف زوجي باللي فعله لكن طبعا ما علمني كل الحقيقه قال مجرد رساله ومافيها مكالمات وانا معترف اني غلطان المهم انا ماحبيت ازيد الكلام بس زعلت كثير وبينت له حزني وجلست يومين وبعدها بينت له اني بحاول انسى واعيش حياتي
وحلف لي انه منتهي من كل شي وماعنده اي علاقات وملفه صافي انا قلت اوكي والحياة حتعلمني اكثر

بس المشكله يادكتور كيف اساعد نفسي اني اثق بزوجي بعد اللي حصل انا اخاف يعيدها بيوم كيف اظمن انه معتبرها غلطه وندمان عليها ؟؟؟؟
اتمنى تساعدني في طريق التفكير السليمه اللي تقرب زوجي مني ومايعيد هالشي او بالأصح اني اثق فيه ؟؟

زوجي يعاني من الفراغ لما اتركه يومين ازور اهلي مثلا لازم يكون عامل عمله حتى لو كانت اوضاعنا مستقره بسيطه بس يحب يلعب وهذا اللي مخليني ما اقدر اثق فيه
وانا بصراحه محتاجه اطلع لأهلي يومين بس خااااااااايفه يكرر هالشي او يلعب براسه الشيطان ويعيده مادري ايش العمل ؟؟ اروح او ما اروح ؟؟

أختي أم الحلو المحترمه

الله يبشرك بالخير لقد سمعت منك أخبارا طيبة وستكون بإذن الله بداية لفتح صفحة جديدة لحياة زوجية مستقرة -بإذن الله - فالإعتراف بالخطأ نصف الحل ، معنى ذلك أن زوجك يحبك ولا يختار عليك أحدا وأن ما حدث مجرد نزوة وانتهت فهي من بقايا العزوبية وطيش الشباب ، والآن بدات حياة الاستقرا ر وترك اللعب من وراء الجدار ، وعليك يا أختي المحافظة على زوجك والحمد لله إنها وصلت الى هذا الحد ، واتركي عنك الشكوك ، واذهبي لإهلك يومين أو اسبوع ولا تخافي فزوجك صادق معك ولن يغير موقفه الإيجابي هذا والله معك 0