28-01-2002, 04:46 AM
|
#1
|
|
عضو نشط
|
بيانات اضافيه [
+
]
|
|
رقم العضوية : 263
|
|
تاريخ التسجيل : 07 2001
|
|
أخر زيارة : 24-06-2002 (11:47 PM)
|
|
المشاركات :
91 [
+
] |
|
التقييم : 10
|
|
|
لوني المفضل : Cadetblue
|
|
يوميات فتاة جامعية !!!!!
الخامسة و النصف .. استفيق من نومي بهدوء .. أنظر إلى الساعة .. لا .. أطمر من الفراش مثل الملدوغ .. أركض أمي .. وراه ما قومتيني .. ترد أمي معليش راحت علي نومة .. أتوضأ في زمن قياسي ..أصرخ على أخواتي .. الصلاة .. المدرسة .. و أنا لا أعلم وش دخل المدرسة بالهوقت المبكر .. أخواني اللي توهم جايين من المسجد ينظرون لي بتعجب .. وش تبي ذي .. الحمد لله على العقل ..أرد بتحد .. لو راح علي الباص محد منكم بيوديني الكلية .. يطنشوني .. و يروحون يكملون نومتهم .. أصلي و أنا أفكر فيما سألبسه .... يالله الخيار صعب ليت عندنا مراييل كان أريح .. الساعة السادسة إلا ربع .. أبلع حبتين شابوره مع كاس شاي .. فجأة .. طاط طاط ..أصرخ واااااااااااو .. الباص جاء أجري مثل سوبر مان .. أمي تنظر إلى شكلي و تضحك .. و أبي يحوقل و يقول الله يخلف بنيتي .. انهبلت ..
أصل للباص و هو على وشك الذهاب .. الحمد لله ما راح .. ولا كان سمعت محاضرة من أبوي عن ضرورة الإنضباط .. و دقة المواعيد ..ركبت .. يقول السائق .. بكري الله يجزاك خير .. أعتذر في أدب .. آسفه ياعم .. أوقف دقيقة .. أتأمل الكراسي ..وين أجلس ؟؟ هنا تجلس مريم و شلتها .. يوه مزعجين مرة ما أتحملهم .. و هذا كرسي دلال المفضل أكيد بتجلس بجنبي و تلجني بحكيها .. سواق الباص طفش ..و مشي و أنا واقفة .. هوب ..طحت على وجهي .. البنات يتأففونن .. لأني أزعجتهم .. و سحبت عباة وحدة منهم لما طحت .. آسفة .. جلست على أقرب كرسي .. أغمضت عيني ..و استدعيت النوم الذي لم أكمله .. ركبت بنت .. نظرت إليها بطرف عين .. شكلها جديد علي ما عرفتها .. لازم أقزها اليوم في الكلية ..جلست بجنبي . نظرت بانزعاج .. وش جابها ذي هنا .. ما مر غير قليل من الوقت حتى أخرجت أسلحة الدمار الشامل .. حسيت بأني على وشك الإنهيار .. ياللهول .. إنها تمسك بيدها علكة مستكه .. عليه العوض و منه العوض مافيه نوم اليوم .. بدأ الإيقاع .. طق طق طق طق ..أحس دريلات تحفر في راسي .. خيل لي أنها أصوات قنابل ,, أو أي شي من هذا القبيل .. تعودت على النغمة .. ما عدت أشعر بالصوت .. الحمد لله وصلنا للكلية .. أنزل مسرعة ..و أدور على أقرب مراية .. عساي أشوف هالخشة و أعدل هالقذلة .. يالله وش هالزحمة كأننا في حج ..ما فيه و لا مراية فاضية .. لو بأحتري الدور .. قعدت نص ساعة .. يالله .. لازم نزاحم حتى هنا !! .. لقيت فراغ صغيرون ..خشيت عرض .. حسيت بتأنيب الضمير .. لو إني جايبة معي مراية مو كان أحسن .. قاتل الله العجز .. ماودي أجيب شنطة كبيرة .. أستاهل ..انتهت العملية .. خرجت وجدت الشلة متجمعة .. وينك متى جيتي .. لا أبد هاذاني واصلة .. نتجه للقاعة التي كانت شبه خالية .. وضعت عيني على الصف الخلفي أحب مكان لي .. ما أحب شغل الدفارة و الترزرز عند الدكتورات و أنا مدري وش السالفة ..باقي ربع ساعة و راسي صاكني وش رايكم ننزل نشرب كابوتشينوا .. الجميع أيد الفكرة بأغلبية ساحقة .. و لأول مرة نتفق على شي واحد .. طيران رحنا للكافتيريا ..و مع السوالف مر الوقت .. الساعة ثمانية و ربع .. و الله مب مدخلتنا الدكتورة .. و هات يا ركض عالقاعة .. الناس تنظر و تتحمد ربها عالعقل .. عند باب القاعة كل وحدة تدف الثانية إنتي أول .. و لأول مرة تطقني الشجاعة .. و أتقدم .. و أنا أدعي .. يالله يارب تحنن قلبها علينا .. دكتوره تسمحين ندخل .. ما بدري ماتأخرتيش كمان شوي .. ابتسمت بأدب جم .. سوري يا دكتوره ..اتفضلي انتي و هي بس دي آخر مره أسمع بالكلام ده .. أوكي .. اتجهنا دايركت على ورا .. حطينا الرحال .. اللي فكت شعرها و عادت تصفيفه .. و الثانيه توزع علك .. أما أنا و اللي بجنبي كل وحده طلعت دفتر و قلم و هات يا سوالف ..فجأة .. انطلقت صرخة مدوية .. مصدرها الدكتورة الماثلة أمامنا .. إنتي اللي لابسه وردي إطلعي برا .. و اللي على راسه بطحا يحسس عليها .. قلت و بصوت مبحوخ .. و دموع على وشك النزوح .. دكتور ما قلت شي .. مش انتي يابنتي .. اللي أودامك ..أنا سمعت الكلمة و الا لا ..عاد الدم لعروقي .. و قلت خلاص خل نكمل هالمحاضرة على خير .. خلصت المحاضرة .. إفراج يالله نطلع قالت وحده من الشلة بصوت مرتبك .. يابنات نسيت البالطو ..و لو ماجبت بالطو بيحرموني اليوم المعمل .. و بدأت رحلة الشحادة و البحث عن بالطو ..الحمد لله و الله فزعولنا البنات و لقينا .. رحنا عالمعمل صرحت المعيدة ببيان خطير اليوم الشغل طويل و منا طالعين غير اثنعش و نص .. يوووووووووه .. حرام ما أمدانا نفطر .. الشكوى لله ..يبدأ الكرف و القرف ..رائحة الكلوروفورم تجيب الصداع .. أحس بضيق تنفس .. و اللي يقهر إني في قروب و الباقين في قروب ثاني .. يالله أشعر بالغربة في المعمل وحيدة .. قدمت لي العينة اللي المفروض أبدأ بتشريحها .. يالله عندكم تشريح ((( صرصار ))) ياللهول ماجبت .. مين ما جابت معها صرصار .. أول المعترفين .. أنا .. ليه ؟؟؟ مالقيت وشلون مالقيتي ما تدرين إن العينة عليها درجة .. أحسست بالقهر .. رديت و بكل شجاعة .. من وين أجيب لكم صرصار .. بيتنا ما فيه دورت في الحدايق حتى حمامات المساجد .. و واجهت الإستهزاء من الكل في سبيل هالصرصار النادر لكن مالقيت ..قالت المعيدة كيفك ناقص درجة .. و أول مرة أرد على أحد بهذه الصورة قلت كيفكم نقصوا ..أخذت أنظر و أتفرج على البنات .. و لم أشعر إلا بالمعيدة قد أحضرت لي عينة و قالت الحمد لله لقيت لك عينه .. تمنيت إني (( ....... )) معليش ما أشجع العنف ضد المدرسين .. المهم دارت معركة حامية الوطيس بيني و بين هالمحترم .. و انتهت بتفتيته لأشلاء .. و للأسف ما شفت فيه و لا جهاز ..بعد ما طلعت من المعمل و كبدي حايمة .. صلينا الظهر و يالله يا محاضرات .. الحمد لله شبكة .. أحسن من غيرها .. مسكين الدكتور يدهر و محد معاه .. و الله إني أرحم دكاترة الشبكات .. و لو إني دكتور لرفضت إني أدرس بنات .. و السبب المهانة و التطنيش اللي يعانيها ..الساعة الثانية و النصف .. الحمد لله سمح لنا بالربع ساعة الباقية .. و أشكال البنات مأساوية ..كأنهم ذباب مبخوخ بفليت ..دخلت البيت الثالثة و الربع .. الشغالة تنافخ انتا غدا في المطبخ .. ما أدري ليه أحس إني ودي أصفقها .. و أصفق كل من تقع عليه عيني .. ما أصلي العصر إلا و أنا كالجثة الهامدة على الفراش .. أستيقظ الخامسة و النصف ..حرام عليكم ما قومتوني .. بكرة عندي امتحان .. و باقي طباعة البحث .. و رسم في دفتر المعمل .. و تخطيط ملازم .. أعتكف في غرفتي و ما أطلع إلا الساعة العاشرة .. قال لي إخواني .. حشا كل ذي دراسة ؟؟ لا أرد فليس لدي وقت .. الجوع سوى سواياه .. أرجع و أكمل مذاكره .. باقي ملزمة أكملها بالباص .. نمت بدون مقدمات .. و ما حسيت إلا بأمي تدق الباب الفجر الثاني يالله قومي صلي و البسي .. و يبدأ يوم جديد و كرف جديد ..
بعد كل هذا .. هل حياة الجامعة حلوة .. و سهلة .. و ممتعة .. مثل ما يقول الناس ؟؟ و أنا أنتظر جواباً ..
|
|
|
|
