من يتزوج هذه البنت ؟؟؟

من يتزوج هذه البنت ؟؟؟

مقال ساخر كتبناه قبل أشهر ثلاثة مضت ، فوجدته مختبأ بين الأوراق ..
فوجدتها فرصة لإنزاله في المنتدى ، عسى أن يحوز على رضاء الفاهمين معانيه ..

نزل أحدهم على البدوي نجر بن محماس ( الله يذكره بالخير ) ضيفاً يريد الزواج من ابنته شمـّه الطالبة الطموحة ..!!
فقال له البدوي :
أنا عندي لك يا ضيفنا العزيز أسئلة إذا عرفتها زوجتك البنت شمـّة..
أنت مستعد يا وليدي؟
الضيف / تفضل يا عم .
البدوي / وش الشيء اللي يضرك إذا أرتفع وإذا أنخفض همّ ضرك؟
الضيف / هذا الله يجيرني وإياك والعروس شمـّة... مرض السكر والضغط .
البدوي / ما لك لوا ... هذا سعر البترول .
طيب ... من هم اللي يكرهون المطر ؟
الضيف / ما أحد يكره رحمة الله ياعم .
البدوي / فيه طال عمرك ... المسؤولين اللي في البلدية وخاصة في جده والدماموما أدري عاد الرياض عندهم كذا ولا لاْ!
الضيف / وش السبب ؟
البدوي / لأنه يزيد عليهم الشغل وتطلع فضايحهم والناس يدعون عليهم .
طيب ... من هو اللي يصلي النافلة ويترك الفرض ؟
الضيف / المجنون .
البدوي / صدقت ... هذي الموظفة اللي تخدم الناس وتضيع زوجها وأولادها وبيتها ( طبعا مو كل الموظفات يا أعضاء المنتدى النفساني ).
طيب ... وشو الشيء اللي تسمع به ولا تشوفه ؟
الضيف / هذول الجن والعفاريت , الله يحمينا وإياك والعروس .
البدوي / قرّبت ... هذي توحيد البطاقات بين مواطني دول مجلس التعاون الخليجي .
من هو الملك اللي نزل من عرشه وضيع شعبه وأشتغل سوّاق ؟
الضيف / هذا سؤال صعب وبصراحه ياعم مالي بالجغرافيه .
البدوي / أبداً هذا بسيط للي يعرف الواقع ... هذي الحرمة اللي تشرد من بيتها
وتطالب بسواقة السيارات .
وش الدولة اللي فيها رئيسين ؟
الضيف / ما فيه يا عم حتى الملعب وهو ملعب ما فيه إلا حكم واحد وعنده مساعدين أثنين وسراويلهم فوق الركبه ..
البدوي / شفت إنك ما أنت داري بشي ... هذي البيوت اللي ينادون بمساواة المرأة بالرجل يعني ( علمنه)
طيب ... إذا بغيت معنى كلمة عربية وين تدور عليها ؟
الضيف / في لسان العرب أو القاموس المحيط .
البدوي / ما عندك سالفة يا بو نسب , ما تشوف عمك بوش كيف فسر لنا كلمة (( إرهاب )) ؟؟ وكل العالم وافقوه إلا طالبان .
الضيف / أجل , الله يستر لا يجي اليوم اللي يفسر لنا فيه كولن باول معنى التوحيد والإسلام ؟؟
البدوي / أترك عنك الهرج ياوليدي ولا تقرب لوزارة الخارجية لايتهمونك من الخوارج ..!!
البدوي / طيب ... وش الوردة اللي ما تستخدمها إلا إذا ذبلت ؟
الضيف / أصلاً إذا ذبلت , ما عاد يصير لها قيمة !
البدوي / صحيح ... هذول بنات هالأيام ( إلا من رحم ربك), البنت ما تتزوج فيهن إلا بعد ما تكبرويصير عمرها فوق الثلاثين..!!
ويروح شبابها وهي تطرد ورى هالسراب اللي يسمونه المستقبل وتوفير الراتب !!
البدوي / طيب وشو اللي قيمته بسبعين ريال وما يطول عند المره إلا ساعه وثلث ؟
الضيف / والله ياعم مالي خبره بأمور الحريم بعدني ماتزوجت شمـّه..
البدوي / هذا يا ولدي مكياج هذا الزمن اللي تسميه بنيتي شمـّه مكياج السوق ..!!
البدوي / طيب وشو اللي تشتريه بخمسميه وتدفع عليه كل شهر آلآف مؤلفه ؟؟
الضيف / هذا العرواي موديل 79 يا عم هذا السؤال عرفته صح يا عم ؟؟
البدوي / هذه شريحة الجوال يا وليدي والله أثاريك دلخ ..!!
البدوي / طيب منو يا وليدي الشيخ اللي إذا مات ماترحموا عليه الناس ؟؟
الضيف / أعوذ بالله فيه شيخ إذا مات ماترحموا عليه الناس ؟
البدوي / أفا عليك وأنا عمك نعم فيه ..
الضيف / تكفى منو يا عم ؟
البدوي / هذا يا ولدي اللي مايخلص عمله وعلمه لوجه الله ويبي القريشات من الحاكم ، ويبيع دينه بعرض من الدنيا قليل ..
البدوي / طيب وشوالشي اللي يشربه الآدمي ويعرف أنه شراب مو زين ويضره ومع ذلك يشربه ؟
الضيف بإقتدار وثقة الشاب الطموح / هذا المالبورو القلاب يا عم الدخاااان ( أخونا واثق وايد)
البدوي / هذا السفن آب الدايت يا وليدي ما أتابع ال LBC ؟..!!
البدوي بعد ماثبت لديه عدم صلاحية هذا الشاب الخاطب / طيب وشو اللي ينقاله ضف وجهك إذا طلع لصقه وغبي وملق ؟
الضيف بثبات الشاب الخبير / هذا الذباب الذكر مو الذبانه النثيه يا عم ..
البدوي / والله هذا أنت يا وليدي قم وضف وجهك بلا مطرود ..‍‍‍
إييييه ... الظاهر يا ضيفنا العزيز إن ما لك نصيب في البنت لأن ما عندك (( فقه
بالواقع )) وبعدين البنت باقي تدرس وعمرها لا زال 35 سنة وباقي صغيرة على الزواج !!


أحمد العيسى
.....

المصدر: نفساني

( وش الوردة اللي ما تستخدمها إلا إذا ذبلت ؟ )
تستخدمها؟
تستخدمها؟
تستخدمها؟
....................................
وش الورده اللي ما تشمها الا اذا ذبلت مو افضل؟;)