حياة بلا اصدقاء !!

حياة بلا اصدقاء !!

السلام عليكم ورحمة الله و بركاته

الاخوان في منتدى نفساني تحيه طيبه مني لكم و بعد ..

بصراحه اجهل تماماً كيف ابدا موضوعي او قصتي او مهما يكن

في الحقيقة قبل فتره من زمن تعرفت على اصدقاء من المدرسة و ربطتني فيهم علاقة امتدت سنين .. حتى الآن ثلاث سنوات من ايام المدرسة حتى الآن الجامعة

المهم اصدقائي هذولا يعيبهم ان عقولهم صغيره جداً .. يعني احس اني و انا امشي معهم .. كاني امشي مع طفل صغير

اسلوبهم .. طريقة حوارهم .. كل شي يحسسوني انهم اطفال .. بالاضافة إلى انه يعيبهم البخل لكني اقول طلاب جامعة مو موظفين

المهم حديثت مشكلة بيننا نحن و كنت انا و صديق من ضمن هؤلاء الاصدقاء .. تعرفت عليه حديثاً من فتره تقارب الشهرين و لكني حسيت ان عقليته افضل من عقليتهم بكثير يعني اعجبت فيه بصراحه و اكن له كل المودة و الاحترام

ارجع لما كنت اتحدث عن بعد هذه المشكلة عزّمت اني اقطع علاقتي فيهم .. لان بصراحه من صداقتهم اللي امتدت سنين احس اني مستغل منهم .. انا اعرف بعضهم يقدروني و يحترموني لان و الحمدلله اعاملهم احسن معاملة بل و الله العظيم اني افضلهم على نفسي .. يعني لو كان معي اي شي و حسيت ان الشخص هذا بحاجه له اقول له يا فلان خذه تراني جايبه لك مع العلم اني كنت شاريه لي مو له لكن هذا طبعي احب اكون وفي لاصدقائي عشان اعزز من هذي الصداقه و اخليها تصير اقوى و اقوى

المشكلة اني اعزّهم و اودهم عشان العشره اللي بيننا امتدت سنين من ايام المدرسة لين الجامعة .. لكن بنفس الوقت داخل ما اثق فيهم .. يعني و بصراحه ما اقدر اذا كنت متضايق اني ارفع السماعه و اتصل على احد و اقول له يا صديقي فلان .. احس اني بصراحه بدون اصدقاء

ارجع مره ثانيه للي كنت اقوله اني قبل عدة اسابيع قطعت علاقتي معهم .. مو بشكل نهائي لكن احاول اني اتجنبهم بعد المشكلة اللي صارت .. لان خلاص الكيل طفح بسبب عقليتهم الصغيره .. و الاستخفاف فيني

يعني حالياً صاير إنسان وحيد جدا مثل اول قبل ما اتعرف عليهم .. كنت انسان دائماً اجلس لوحدي .. ما اجد شخص اقدر اشكي له همي ..

يعني حالياً صرت اشغل سيارتي و اروح اي مكان امشي لوحدي .. كل شيء اسويه لوحدي .. اكل لوحدي

حتى امس قلت خليني ارفه عن نفسي شوي و عزمت اني اشتري جوال جديد قلت من باب التغير و شريت جوال ب3000 ريال .. لاني ظنيت اني اذا شريته ابي اسعد نفسي

لكن تدرون وش اكتشفت ؟؟ ما فيه احد يشاركني فرحتي بهذا الجوال لذلك ماني مهتم بالجوال هذا هو جنبي لكن ما فكيت قراطيسه لاني ما احس اني باستفيد منه .. من اكلم بس ؟ تصدقون ان جوالي من اسبوعين ما اتصل علي احد الا اهلي .. قسم بالله ضايق صدري ولا انا عارف وش اسوي ابد

لكن احاول ارفه عن نفسي كل يوم باني اروح امشي يومياً باي مكان سوا في طريق الملك عبدالله .. اي مكان المهم اني امشي .. و المشكلة وانا امشي و لوحدي طبعا اجلس افكر في اصدقائي هذولا اقول .. ارجع لهم و الا لا .. بصراحه بيني و بينكم ما ودي ارجع لهم .. لاني اتضايق و انا معهم .. تصدقون ان حتى الصلاة دايم اقول لهم صلوا يا ناس يقومون يصلون لكن احس لو اني ساكت ما عندك احد .. باختصار هم ناس مع الخيلاء يا شقراء اذا شافو فلان صلى صلوا معه اذا شافو فلان راح يزعج بنات الناس و يقل ادبه معهم سوو مثله .. يعني بيني و بينكم ما ودي ارجع لهم .. لان جلستهم تضيق الصدر .. لكن احسها افضل من وحدتي الحاليه .. و الله اني منب داري وش اسوي بهالدنيا .. طفشان و تعبان و غير عن كذا احس اني وحيد و مالي احد ابد سوا كان هالاحد يفهمني و الا ما يفهمني

بصراحه فكرت اروح لمستشفى نفسي و اصير اراجع عند دكتور نفسي .. لاني احس انه الشخص الوحيد اللي اقدر افضفض له براحتي و اقول عن اللي بنفسي لكن اخجل بصراحه اروح لمستشفى نفسي مو عن شي لا لكن ما اعرف وش ابي اقول

و الله اكتب لكم كلامي هذا و انا ادمع ما ادري هل حسرة على نفسي لاني اكتشفت اني بدون اصدقاء .. و الا ايش بالضبط

اتمنى بس توجهوني و تقولون لي

برايكم هل اتصل عليهم و ارجع علاقتنا السابقه مع اني راح اكون كاره لهذا الشيء .. و الا وش اسوي بالضبط

و اشكركم جزيل الشكر سوا ساعدوتني و الا لا لاني احس اني طلعت هم كبير من قلبي
اخوكم
فيصل

المصدر: نفساني