خوفي والطبخ....خواتي...انصحوني

خوفي والطبخ....خواتي...انصحوني

السلام عليكم ورحمة الله وبركاته

بداية احب ان تعتبروني اخت صغيره لكم...مع اني ماني صغيره ماعلي عمري 26سنه

خواتي الجأ لكم بعد الله..ماادري فيني عقده او خوف ماادري...مشكلتي مع الطبخ يمكن تستغربون لكن رح اقول لكم...اتذكر البنات قبل ماادخل العشرينات وعقب.. الطبخ الطبخ بعبع ليه انا ماكنت افكر في الشيء هذا بس هم فطنوني جزاهم الله خير بس خلو الطبخ شي عظيم ويخوف...هم كانوا خايفين من الطبخ علشان إذا تزوجوا وش بيسوون ولو كنتي عند حمولة ولو يجون عندك وو من هالكلام هم معهم حق الوحده لازم تعرف الطبخ ..تدرون انا خايفه من الزواج بسبب الطبخ ..امي صراحه احس انها مدلعتنا على كيفنا نطبخ او لا ومعتمدين على انفسنا.. يعني وحده من صديقاتي لازم يوميا تطبخ ياعشاء ياغداء امها مجبرتها بعد هذا الشيء ماهو حلو...بس مثلاً بنات معليش تحملوني بقول لكم عن مخاوفي يمكن انا مكبره الموضوع..اكمل مثلاً الشعبيات مااعرف اصلحها....الوحده لازم تعرف تصلحها ولا ماتصير طباخه وسنعه مع اني مااقتنعت صراحه بها الأفكار...مع انها سهله بس إحنا ماتعودنا عليهااصلاً كثيرانا ماني من البنات اللي يطبخون يوميا او دايم على حسب مزاجي والأكله اللي احبها وامي إذا كانت تعبانه او مسافره انا اسوي الغداء ..والعشاء..احيانا اسوي كيكات حلى عصيرات...مره سويت برياني عجبهم بس خايفه احس اني مااعرف اطبخ مااحس اني مثل البنات انا صراحه لاتظنون ا ني امدح نفسي ماني من النوع اللي يقربع في المطبخ او مرتهشه ...رقيقه اتعامل مع كل شيء بهدوء وانا اعتبر غير ظفره...مثل مايقولون..إذا سويت أي شيء يكون حلو ومضبوط واهتم بالشكل ولااحب اسوي أي اكله اهم شيء اقتنع فيها واحبها..وبطيئه

خواتي اعذروني على تشعب افكاري بس تكفون الله يجزاكم خير خايفه ابي تساعدوني

اقول إذا تزوجت اول يوم وش رح اطبخ؟

لو مايعجبه اكلي؟

وحده من قريباتي اتذكر كلامها اطمن تقول ماهو مهم الطبخ المهم يحبك اول والطبخ مقدور عليه

بنات انا اعرف اسوي محاشي مثلا بعض الصواني االحلويات اعرف اعذروني ماادري وش فيني

الطبخ آخر اهتماماتي مع اني احب اتصفح كتب الطبخ واتمنى اسوي الآكلات اللي فيها..بس احس كل وقتي يروح في هواياتي اللي احبها والقراءة...وطبعاً التفكير والهموم اللي تمر علي....

إذا تقدم لي احد اول ماافكر في الطبخ احس اني مااعرف اطبخ مع اني اطبخ بس علشان مااطبخ كل يوم بس ايام معدودة يمكن احس بهذا الشعور ..

بنات مثلاً افكر لو اسوي اكل مايعجبه...او تخرب الطبخه...وش رح يكون موقفي..

مكبره الموضوع انا عارفه بس ساعدوني الله يجزاكم خير انه يكون صغير

صراحه انا فكري مشغول بأشياء ثانيه منها...عمري 26سنه افكر في نفسي احس بضغط نفسي علي الناس واهلي بالذات من الوالد... ..علشان إلى الآن مابعد تزوجت...ولا وظيفه ..إذا البنت جلست بعد التخرج وماتزوجت وتوظفت الله يعينها...على اسئلة الناس ونظراتهم..ماتوظفتي ..مابعد تزوجت...وبصراحه وماعاد صار احد يخطبني...الحمد لله على كل حال..ماابي امدح نفسي جمال واخلاق..بشهادة الجميع...حتى اختي تقول استغرب...بس الحمد لله هذا قضاء وقدر من الله وكل تأخيره فيها خيره...ومثلي كثير..اشوف صديقاتي..بس الرجا في الله سبحانه...وانا متفائله بإذن الله بس احياناً اضعف وإيماني يضعف كل شيء من الله هو الأفضل لنا ...ادعي الله بالزوج الصالح اللي يخافه ويحبه ويرجيه...بنات انا عارفه دخلت من موضوع لموضوع...بس انا عارفه إني رح القى ناس بيحسون بمشاعري ويتفهمونها..خواتي..دعواتكم لي الله يجزاكم خير...بالزوج الصالح..وإياكم

اتمنى انكم تساعدوني...ابي احس بشعور الإطمئنان والثقه...إني اعرف اطبخ...
لاتضحكون علي... :)
تحملوني جزاكم الله خير

المصدر: نفساني

حياك الله اختي ويسرني اكون اول من يرد عليك


كويس انك تقولين وتتعترفين انك مكبره سالفة الطبخ ..... وهي صغيره وع كلا اتصور شي طبيعي تخوفك لانك سمعتي الكثير من صديقاتك والظاهر اغلب الحوارات كانت تدور بينكم عن الطبخ وصعوبته وردة فعل الحموله وكيف بطبخ لهم و.. ... بس تطمني الموضوع اصغر بكثير من الحجم الي انت معطيته وسبحان الله بقولك شي عن نفسي
قبل لا اتزوج والله العظيم ما كنت اعرف اطبخ ولا اسوي شي اللهم كبسة رز وجريش لاني احبه ..... وبعد الزواج عشت في مجمع سكني مع حمولتي لي بيت خاص بس طبعا الغداء مع بعض والعشاء مع بعض وصدقيني كنت عايشه في اجواء اقرب الى المسلسل الكويتي القديم (خالتي قماشه)وبدون مبالغه وكان لازم علي وقت مايكون علي العشاء اطبخ ل22 شخص ما بين كبير وصغير واليوم الي مايكون علي فيه العشاء لازم اعمل صياني الحلى وانزل بالقهوه والشاي عند اهل (طليقي)لاني الحمد لله ربي عتقني وطلعت بسلام وانفصلت . المهم الحال هذا استمر سنتين ورغم انه كان عندهم حريم عيال غيري 2 الى اني صرت التوب وبدون مبالغه صرت طباخه من الطراز الاول وصرت اطبخ اشكال وانواع وصدقيني لو قلت مافيه طبخه اطبخها الا يرسلون عيالهم باوراق يطلبون الطريقه والمقادير ومو كذا بس كمان صرت فنانه في صف السفره وعمل الديكورات عليها وع بعض الطبخات والى الان طليقي يعترف اني طباخه من الطراز الاول ومافيه مني في كثير امور ..لكن هالشي ما منع المشاكل والانفصال .. وفي المقابل اعرف وحده كانت تسال امها وش طريقة الشوربه الشوفان سمعتها مره في عزيمه تقول فلان مشتهي شوربه وابي اسويها له بكره غداء قلت في نفسي سبحان الله فرق بيني وبينها انا كنت اطبخ اقل شي 5 اصناف ع الغداء لزوجي طبعا او طليقي ما بين شوربه وسلطه وطبق رئيسي وحلا وهي الغداء كله شوربه لا وتسال بعد عن الطريقه انا انفصلت وهي ماشاء الله تبارك الله اللهم لاحسد كل سنه في دوله والى يومك ما تعرف تطبخ الا ع خفيف وعندها الان 3 بنات ..
الرزق عند رب العالمين وله حكمه في توزيعه لا على زين ولا شين ولا سنعه ولا غيره وبالعكس البنت الميته الي حطني تلقاني .. في كل شي حظها يمشي مشي الصاروخ والبنت الي ماشاء الله عليها كامله والكامل وجهه الله حظها يتهاوى على عكازين ولكن تبقى حكمة رب العالمين والله سبحانه ما ينسى عباده ولو اطلع ابن ادم على علم الغيب لاختار ماهو فيه وتاخير زواجك الى الان فيه حكمه من رب العالمين وكثير بنات تزوجت صغيره وخذت واحد سيئ ولا يسوى وخل حياتها نكد وهم تشوفينها تقولين عمرها اكبر بكثيررر من العمر الحقيقي لها ..وبنات تزوجت فوق الثلاثين واعرف اكثر من وحده تزوجت متاخر والناس ماقصرو فيها والحش والكلام الي لا يودي ولا يجيب وربك فوق وعلى قول المثل الشعبي(الحكي رفاع) خذت شخص ماكانت تحلم انها تاخذه ومبسوطه ومرتاحه .. والي كان يتكلم عليها وعلى تاخر زواجها الان صار يقول والله تستاهل هذا المناسب لها .
اسال الله ان يرزقني واياك وبنات المسلمين بمن يخافه ويتقيه ويعوض صبرنا خير
واكثري الاستغفار نصيحه مجربه فله ابلغ الاثر ولا تنسي دعاء الليل

سهام الليل لا تخطى ولكـــن ..... له امد وللامد انقضاء

اعذرني ع الاطاله ولكن لعلي بكلماتي البسيطه استطعت ولو بالشي القليل ان اسليك واخفف عنك

اممممممممم ودي ارد بس ماشاء الله خواطر قالت كل الي كنت بقوله

الله يعطيها العافيه ويعوضه بخير

تقبلي مروري

أهلاً بكِ يا THE HOPE
لا أدري من خِلال الأصناف التي تُجيديها أرها تخُولكِ بأن تكوني طباخة .
أعتقد بأنها مخاوف تكرست لديك وتهويل من بجوارك لها .
جعلك تخشين الفشل فيه .. صدقاً المثل السائد بين الناس :
الوصول لقلب الرجل معدته ..
و لكن ؟ الرجل الحقيقي بمعنى كلمة رجولة .. لن يعلق سبب الفشل على عدم معرفتكِ بالطبخ .. ربما يرغب بهِ و بالتأكيد سيأخذ بيدك لذلك .

كوني على ثقة دائمة بنفسك .

خواطر والله انك حقيقه ام واخت وكاتبه وتصلحين رئيسة دوله بعد << ابرشحك !!!
اما اختي العابرة اسمحي لي بصراحة بصراحه بصراحه هاجسك ذه مر علي يوم من الايام لاسيما اني غير البنات الحمدلله والشكر (( يعني شي اسمه طبخ وخياطه ماعندي خلفيه مسبقه ولا معلنه ، ماعدا التنظيف وتصليح الانوار واسطوانة الغاز وفك السيارات مع والدي سابقاً )) <<< هههه يمكن تستغربون بس هذا الواقع !!
المهم صباحية العرس تخيلي حتى بيالة شاي والا حليب والا بيض مسلوق مااعرف ؛؛ احترت ضليت كني وحده بمستشفى الصحة النفسيه متوترة وحالتي حالة .. ابي بس مسكنات مع اني ماني متعوده انام بره و مع " غريب " خخخخخ << شوي يسطرني كف يوم قلت له هالكلمة امممم طبعا كنت مو سهله !!!!!!!!!!
وكلها اسبوع واسبوعين ماشالله طلع الرجال حكيم مع انه ماعجبه الوضع بس اهو تحمل وصبر وعلمني اشياء انا استغربت منه كرجل << بحياتي ماشفت رجال يعرف يطبخ !!!!!!
طبعا هذا زمان الحين " امسح بوزي " يشوف المطبخ الا نادراً << وي عليه ظلمته !!
يعني الخلاصة : لاتفكري ولاتحتاري المهم تعرفي شي بسيط عالاقل شي بيوكل ان شالله لو " بيض عيون " ،، وانتي ماشالله تعرفين مو ماتعرفين ماشالله ربياني على قولتك هذا يكفي << اترسي بطنه غدى وعشاء حتى يحب اصابعك منهااااا ترى الرجال من صفاته انه اذا تعود على الشي بالبدايه مايحبه وبالنهايه يرضخ له غصب عن أم الي بتحبه !!!!
وان شالله نفرح فيك عروس مع زوج يصونك و يونسك

ترى صار خطا بالاسم : الحديث موجه لصاحبه الموضوع THE HOPE

اختي العابره استمحيك عذرا ترى خطا عقلي << خلطت بين الاسماء

تسلمين جود ما قصرتــــــــــــي


ام عبدالله بالله رشحيني وانت نائب الرئيس من الان ........

تسلمين الغاليه ع كلامك الحلو الله يحفظ لك ابو عابد واخوانه وتشوفين برهم

المشاركة الأصلية كتبت بواسطة ام عبدالله الاحسائيه

خواطر والله انك حقيقه ام واخت وكاتبه وتصلحين رئيسة دوله بعد << ابرشحك !!!
اما اختي العابرة اسمحي لي بصراحة بصراحه بصراحه هاجسك ذه مر علي يوم من الايام لاسيما اني غير البنات الحمدلله والشكر (( يعني شي اسمه طبخ وخياطه ماعندي خلفيه مسبقه ولا معلنه ، ماعدا التنظيف وتصليح الانوار واسطوانة الغاز وفك السيارات مع والدي سابقاً )) <<< هههه يمكن تستغربون بس هذا الواقع !!
المهم صباحية العرس تخيلي حتى بيالة شاي والا حليب والا بيض مسلوق مااعرف ؛؛ احترت ضليت كني وحده بمستشفى الصحة النفسيه متوترة وحالتي حالة .. ابي بس مسكنات مع اني ماني متعوده انام بره و مع " غريب " خخخخخ << شوي يسطرني كف يوم قلت له هالكلمة امممم طبعا كنت مو سهله !!!!!!!!!!
وكلها اسبوع واسبوعين ماشالله طلع الرجال حكيم مع انه ماعجبه الوضع بس اهو تحمل وصبر وعلمني اشياء انا استغربت منه كرجل << بحياتي ماشفت رجال يعرف يطبخ !!!!!!
طبعا هذا زمان الحين " امسح بوزي " يشوف المطبخ الا نادراً << وي عليه ظلمته !!
يعني الخلاصة : لاتفكري ولاتحتاري المهم تعرفي شي بسيط عالاقل شي بيوكل ان شالله لو " بيض عيون " ،، وانتي ماشالله تعرفين مو ماتعرفين ماشالله ربياني على قولتك هذا يكفي << اترسي بطنه غدى وعشاء حتى يحب اصابعك منهااااا ترى الرجال من صفاته انه اذا تعود على الشي بالبدايه مايحبه وبالنهايه يرضخ له غصب عن أم الي بتحبه !!!!
وان شالله نفرح فيك عروس مع زوج يصونك و يونسك

<<صح لسانك
أختي تعالي عندي أعطيك درووووس :) <<أقتصاد منزلي هههه


الله يسعدك يااارب

اختي حزاطر العشاق.........مدري وش اقولك........صراحه كلامك شجعني....ماقصرتي الله يجزاك خير.....انا اكيد بسبب الكلام اللي سمعته صار الموضوع بالنسبه لي كبير...حتى لو كنت اعرف اطبخ......صراحه كلامك يدخل القلب الله يجزاك خير ويوففقك يارب ويعوضك ويخلف عليك بزوج افضل من الأول....مشكوووره كثير على النصايح...مارح انسى تجربتك ولاكلامك....الف شكر لك ماقصرتي في الرد اللي يطمن القلب...




اختي العابره جزاك الله خير على ردك...كلامك صح 100%


ام عبدالله........اشكرك...على ردك وكلامك عن تجربتك..منكم نستفيد.........الله يجزاك خير....

العفو اختي وما سوينا الا الواجب ...... ويشرفنا تكونين بينا في نفساني نستفيد منك وتستفيدين منا

في انتظار مشاركاتك


ولا تنسين تعزمني على زواجك عن قريب ان شاء الله بس قاعدة ممنوع اصطحاب الاطفال لا تطبق على عبود ولدي عشان خالته العروس .....

تمنياتي لك بالتوفيق