عــــلاج مجـــاني وحقيــقي وليــس وهمي للــرهــاب بــإذن الله

عــــلاج مجـــاني وحقيــقي وليــس وهمي للــرهــاب بــإذن الله

بسم الله الرحمن الرحيم

بداية السلام عليكم ورحمة الله وبركاته جميعا

الموضوع مثل ماهو مكتوب بالعنوان عــــلاج مجــــاني وحقيــــقي وليـــس وهمــــي للــرهــاب بـــإذن الله واستميــح الإدارة عذرا لأني راح اتكـــلم بشكـــل مـــوضــوعي وبكل شفافية عن تجربتي مع هذا المــرض فإتمنى من الإدارة انها ما تدقق على الموضوع

بداية اعــرفكــم عن نفسي اخوكم ......... ابن محمد ابن مختار وربما يكــون الله سبحــانه وتعـــالى إختـــارني لأكون سبب في شفــــائكم من هذا المرض النفسي الخبيث الذي عانيت منه لسنـــوات طوــيلة ربــما تــصل إلى 18 سنة او اكثــر , الأن عمــري 28 سنــة

ولكن اسمحــولـــي قبل لا اتحدث عن تجربتي ان اوضح بعض الأمور والنقاط الي تدور حول مرض الرهاب والي يخطئ كثير من الأخصائيين وغيرهم في الإجابة عليها

فعلى سبيل المثال عندما تطرح سؤال بسيط في اي منتدى بعنوان / ماهي اسباب مرض الرهاب ؟ تجد مئات الردود والإجتهادات والنظريات ربما في بعض الأحيان تكون الردود من قبل اشخاص لم يعانوا من هذا المرض وربما من قبل اشخاص لم يسمعوا اطلاقا بالرهاب
فلبعض يقول بأن سبب الرهاب هي المعاملة القاسية من قبل الآباء والأمهات في الصغر والبعض اللآخر يتحدث عن ان العادة السرية هي المسببة للرهاب والبعض الأخر يتحدث عن العزلة الإجتمــاعية وإلى اخره وفي الحقيقــة
غالبية هؤلاء مخطــؤن و مصيبــون في نفس الوقت يخطؤن عندما يرجعون سبب مرض الرهاب إلى عامل واحد فقط ويصيبون عند ذكر ذلك العامل
بعــــبار اخـــرى يا إخـــــوان الرهـــــاب مــرض متعـــدد الأسبـــاب هنــــاك اسباب كثيرة تؤثر على نفسية الشخص فيبدأ بالإنغلاق وبالتفكير الكثير و الكثير وتظهر عليه اعراض الرهاب ,

والأن راح اكلمكم عن تجربتي

بداية الوالد حفظه الله كانت طبيعته عصبية وكان تعامله معنا ونحن صغار فيه قسوة وشدة وطبعا كان يتوقع ان هذي هي الطريقة الصحيحة لتربية الأبناء مثله مثل بعض ن الآباء هداهم الله , انا كنت اخاف من الوالد كثيرا بحكم طبيعتة القاسية واذكر إلى اليوم قبل مايرجع والدي من العمل او من اي مكان كيف كانت تبدأ علي آثــار القــلــق والإضــطراب لأني كنت اخــلق هــواجس وافكار كثيرة بداخلي مثال اذا سويت ايش راح اتعــرض للضــرب من والدي إذا رفعــت صوت التلفزيون ولا اذا طاح مني كاس الشاهي ولا اذا رفعت صوتي وهو يبي ياخذ راحته وينام المهــم كنت افكــر في هذي الامور حتى اتفادى عقاب الوالد واذا وقفت امامه كنت اتصرف بناء على الأفكار الي حطيتها براسي وعندها تظهر علي اثار الرهاب مثل الم البطن وإرتجاف الأطراف واللعثمة وغيره من اعراض الرهاب الي تعرفونها .

ولكن حالة الرهاب هذي كانت تجيني في وجود الوالد , اما أمام غيره كنت اتصرف بصورة طبيعية والعب وكل شي . ولكن يوم وصلت ل 17 / 18 سنة ( سن البلوغ ) صرت انطؤائي و صرت امارس على العادة السرية وادمنت على مشاهدة المقاطع الخليعة وكنت بمجرد ما اشوف مقطع من هذي المقاطع مااقدر اتمالك نفسي و مباشرة امارس العادة السرية ويعلم الله كم كنت اعاني منها وماراح تصدقوني لو قلت لكم اني كنت امارسها يوميا ولمدة 8 سنين وبسببها اعتزلت الناس وبديت احس اني غريب عن المجتمع الي انا عايش فيه و غريب عن اهلي واخواني , وصرت احس كأني مو واحد منهم وصرت اواجه صعوبة في التعامل مع الناس وكل ما حاولت اتعامل مع احد ظهرت علي اثار الرهاب ويوم حسيت حالي مو قادر ادخل بالمجتمع ولا اقدر اتوظف ولا اقدر اخطو خطوة بسبت الرهاب قررت اني ابحث عن العـلاج , رحت يمين ويسار و ماتركت اخصائيين نفسيين ولادكاترة ولا رقاة واستخدمت حبوب كثيرة وجلست على هالحال سنين من دون فائدة وفقدت الأمل وقلت الرهاب هذا خلاص مالــه اي عـــلاج
ولكن سبحان الله مرة كنت استمع لمحاضرة بعد صلاة المغرب وكان المحاضر يتكلم عن الشباب ودخل بموضوع العادة السرية وذكر اضرارها ومن ضمن الأضرار الذي ذكرها للعادة السرية انها تضعف شخصية الإنسان الي يمارسها وتخليه ينجرف وراء الوساوس والأفكار , شكيت ان العادة السرية لها دور في الحالة الي انا اعاني منها لأنك تفكر كثير وتتخيل اشياء وانت تمارسها المهم حطيت المعلومة هذي براسي وقــلت خلني اعتــمــد على الله ثم على نفســـي وقررت ( اني اجلس و احلل اي حـــالة رهـــاب تحــصل معي )
وكـــانت اول حـــالة حللتها كـــالأتي / جو عنـــدنا مرة ضيــوف بالبيــت ودخلوا المجــلس وذاك الوقت انا بغرفتي , قمــت ابي اروح اســلم عليــهم جــتني فكرة بصدري تقــول انت الحيــن اذا رحت تسلم على الضيــوف يمكــن تقول شي غلــط وتحــط نفســك بمــوقف محــرج يمكن راح تتصــرف بطريقة خاطئة و يضحكــون عليك ويمكن ويمكن ويمكن ويمكن جلست بمكاني ومارحت سملت على الضيوف , وبعد شوي قلت يمكن هذي الأفكــار هي الي مسببتلي الرهــاب بروح للمجلس واسلم , ورحت وسلمت وجلست مع الضيوف و سولفت طبيعي بالأول وشوي إلا ورجعت الأفكار مرة ثانية بصدري ويوم صرت اركز معها بدت اعراض الرهاب تظهر علي فعلى طول تركت الضيوف ورجعت لغرفتي بــس يوم رجعت رجعــت لهــا وانا مستناس لأني عرفــت ويــــن عـــلتـــي الي اخرتني وماخلتني اتقدم خطوة بحياتي بها وأول شي سويته يوم رجعت لغرفتي سجــدت لله سجــود الشكــر ,,,,,,,,,



وش الي اكتــشفتـــه ذاك اليــوم اكتشفـــت ان فـيه افكـــار تجيني اذا بغيت اواجــه امر معيـــن وتجيني مرة ثانية إذا واجهة هألأمر و علشان اوضح لكم النقطة هذي راح اعطيكم مثال / انا طالب بمدرسـة واعاني من بالرهاب وعندي ظرف طارئ وابي ادخل على المدير وأستأذن منه للخروج من المدرسة إذا نويت اني اروح و اقابل المدير راح اسمع افكار بصدري تقول لي المدير ما راح يصدق ان عندك ظرف حقيقي ووما راح يسمح لك بالطلوع من المدرسة طبعا انا اذا اصغيت للفكرة هذي ماراح ادخل على المدير اما اذا تجاهلتها راح ادخل عليه والفكرة هذي راح تتلاشى , ولكن اذا دخلت على المدير راح تجيني افكار جديدة مثلا راح اسمع بصدري شئ يقول لي لازم توقف زين قدام المدير وعيب ترفع عينك بعينه وانا اذا صرت مشغول بالأفكار هذي راح تظهر علي اعراض الرهاب وراح اتلعثم بالكلام واعرق وارتجف



عودة لمحور حديثي
,,,,,,,,بعد ما تأكــدت ان هذي الأفكــار هي الي مسببتلي لي الرهاب قررت انــي اتجاهلها وإني ارد عليها . طبعا في البداية صارت تكثر براسي وتزعجني اكثر ولكن شوي شوي ومع الأيام تراجعت والحمدلله و ماصارت تجيني باليوم إلأ مرة او مرتين واتجاهلها ولا اهتم بها . والحمدلله بهذي الطريقة اقلعت عن العادة السرية الي كنت مدمن عليها سنين وصرت ما أتأثر بالمقاطع والأفلام .

ملاحظة هذي الأفكار مثل الجار المزعج / تخيل ان لك جار مزعج وكل يوم يجيك في البيت ويشغلك بالسوالف وفي يوم من الأيام انزعجت منه وصرت ماترد عليه وماتفتح له الباب طبعا في اليوم الأول الي ماتفتح فيه الباب راح يدقدق عليك الباب طول اليوم وباليوم الثاني يمكن اقل وباليوم الثالث اقل وشوي شوي اذا اقتنع انك ماراح تفتح له الباب وماراح تعطيه وجه راح يطفش منك وماراح يزعجك

استنتجت من تجربتي ان الشـــئ الي يســـبب لنا الرهاب هو الأفكـــــــار الي تدور بصــدورنــا ورؤســنا وعلى قـدر إصغـــائـــنـــا لهذي الأفكــار راح تكون اعــراض الرهاب ( و كـــــل إنســــــان في العــــــالم يمــــكن ان يصبــح رهـــابي في لحظة من اللحظات اذا اصغى لمثل تلك الأفكــار والخواطـــــر ) .


خــــــــلاصـــة المـــوضــــوع /
عـــلاج الرهــــاب بإذن الله تعـــالى يكــمن في التالي : -

1- تجـــاهل جميــــــع الأفكــــاروالأصوات التـــي تدورفي داخلك , سواء اوحت اليك هذه الأفكار انك انت الشخص الذي تتحدث بها او ان شخص اخر يتحدث اليك , وسواء كانت على صورة نصائح او على صورة مخاوف او على اي صورة اخرى .

2- لاتصغي لهذه الأفكــار اذا نويت القيام بعمل شئ ما وأيضا لا تصغي لها بعد انجازك لذلك العمل.
وعندهــــــــــــــــــــــــــــــــــــــــا ستكتشف من انت و ستستعيـــد شخصيتك المسلوبة منك وستدرك كم كنــت غبيا طوال تلك السنين .

همســة في أذن مريــض الرهــاب : عندما تتعافى بإذن الله سوف تكتشف انك افــضـــل في النــواحي الإجتمـــاعية بل وفي كــل النــواحي من الشخــص الذي لم يصــب بمرض الرهاب لمـــأذا ؟؟؟؟؟؟؟؟؟ لأنك اكتسبت خبرة التعــامل مع الأخريـــن , وكما يقول المثل رب ضارة نـــافعــة




استراتيجيات خاطئة عند بعض الأخصائيين النفسيين وصاني طبيب نفسي اني ارد على الأفكار الي تجيني بأفكار اخــرى اكثر منطقية وهذا خطـــــأ كبيــــر يجب الحـــذر منــه لأنك إذا رديــت على هذي الأفكار راح تتناقش وتسترســل معها بالحديث وهذا راح يزيد الهواجس عليك وانا ما اعتبر هذي طريقة للعلاج .



وفي الخاتمة ابي اوضح نقطة مهمة انا استخدمت مصطلح ( الأفكار ) في الموضوع لأن هذا المصطلح هو الشائع عند علماء النفس وغيرهم وانا عندي تحفظ ووجهة نظرعلى هذا فأنا اعتبرها وساوس شيطانية وليس افكار تلقائية او غير ذلك لأنه إذا لأحظنا غالبية هذي الأفكار نجدها مجرد عقبات وحواجز توضع في امام تقدمنا في امور حياتنا و آخرتنا و كلنا مسلمين او مسيحين او يهود نعرف ان الشياطين اعداء للبشر ونعرف ان الشياطين تستخدم سلاح الوسوسة ضدنا كما قال الله تعالى ( قل اعوذ برب الناس ملك الناس إله الناس من شر الوسواس الخناس الذي يوسوس في صدور الناس ) وهذا نفس السلاح الي اخرج فيه ابونا ادم وامنا حواء عليهما السلام من الجنة (( فوسوس لهما الشيطان ليبدي لهما ما ووري عنهما من سوآتهما وقال ما نهاكما ربكما عن هذه الشجرة إلا أن تكونا ملكين أو تكونا من الخالدين ))




اعــذروني علــى تأخري في كتابة المـــوضوع وعلى التنسيق شوي شوية بلغة عربية وشوي بالعامية ,
واتمنى انكــم تطبقــون الكــلام الي ذكــرته في خــلاصــة المــوضوع وتبشرونا بالنتــائج
ومن يستفيد من تجربتي اتمنى ان يتصدق للفقراء

ادعــوا لي ولجميع المسلمين بأن يحقق الله امنياتنا وساعدوني في نشر تجربتي واسئل الله ان ينفعكم بها

وختاما اوصيكم ونفسي بتقوى الله وبالإلتزام بشرعه والمحافظة على الصلوات في اوقاتها والإبتعاد عن مايشغل القلب ويلهيه من الأغاني والمنكرات

المصدر: نفساني

نصــــائح اخرى : - 1- لا أحد يستحق أن تدفع جزءاً من صحتك لأجله!!!

2- طنش الناس مصلحتك في عملك وليس في الناس

3- الحياة مليئة بالحجارة فلا تتعثر بها بل اجمعها و اصعد عليها نحو النجاح


كـن مثـــل هــــذا الشخـــص الذي يقول عن نفســـــه : - لا افكر ابدا /

إلا عندما اريد ان اتقدم خطوه ( عندها ابدأ التفكير )

وفيما عدى ذلك .. اترك شخصيتى هى الى تتعامل مع الامور

السلام عليكم

جزاك الله خير ع النصح الطيّب وكلامك فعلا صحيح
انا مثلا ما اعاني من الرهاب لكن تجيني افكار سلبية يوم اوقف عند الاشارة بسيارتي
مابي احط يطالع فيني وتصيبني ربكة
فكيف حليت مشكلتي هذي ؟
عن طريق (عدم الرد لأفكاري) وما اعطي لمخي فرصة انه يفكر بهالشي واصرف نظري باي شي ثاني
يوم اصرف نظري عن التفكير بالناس الي حولي عند الاشارة .. فعلا ما احس بشي والامور كلها طبيعية
فالحل زي ماقلت انت .. هو عدم الرد على تلك الأفكار وركز بشي اخر
شكرا لك

الله يرحم مزنة .......مجرد تشويق زائف . انا كنت افتكر جايب لنا علاج قاتل ونهائي للرهاب وآخر شئ جبت لنا أسطوانة مكررة وأسلوب تجربي قديم . على العموم مشكور ولاتعودها ثاني مرة.

فعلا..هي اساسا مشكله بالعقل الباطن ووحلها بيد الله ثم المريض نفسه لاغيره
كلامك اكثر من راااائع يعطيك الف عافية وربي يديم عليك الصحه ومن نجاح لنجاح

كلامك رائع
و اهنيك على قووووة شخصيتك و على قووة عزيمتك

الشيطان ضعييييف و هذا الشي معروف
و انت ماسمحت لنفسك ان تكون أضعف من الشيطان
التوكل على الله و الايمان بالله يعطيك القوه انك تتغلب على هذي الافكار

أستغرب كيف يستسلم الشخص لهذي الافكار !؟
ليه يسمح للشيطان يسيطر عليه و يحتويه !؟

الله مقدم لنا الحمايه بس بمجرد اننا نذكره ... اذكروا الله يذكركم

اي شخص يعاني من هالمرض و فقد الامل في الادويه و في الاخصائيين اسأل نفسك هالسؤال :
قد ايش انت مؤمن بالله ؟؟

اسأل الله ان يشفي كل مريض و كل مبتلا
و اسأل الله ان يهدي كل شخص بعيد عن ذكره و يثبته على دينه


شكراً لك على هذا الموضوع

وعليكم السلام ورحمة الله
صراحة كنت متوقع تسحب علينا ولا تنزل موضوع :)
الوساوس هي اللي سببت لي المشاكل أول ماتخرجت من الثانوية كنت متحمس أشتغل وجمع دورات
وكذا بعد المغرب وانا من سدح طفشان فجأة تجيني وساوس وخوف اني بنحرج هناك وتصير لي مواقف محرجه وأشياء
ومن بعدها صرت ما ابي شغل ولا شي ولا كملت الجامعة ولاشي ولي سنتين منعزل لا شغل ولا مشغله حتى السيارة ما أعرف اسوقها بسبب الوساوس
وأيضاً الصراف الألي ما أعرف أستخدمة بسبب الوسواس أفكر أقول يمكن المكنة تبلع البطاقة واتوهق >>> يعني االوساوس مثل ماقلت هي السبب

لكن الحين بتصدى لها بإذن الله وبستخدم دواء وأرجع أمارس حياتي وبإذن الله اذا تعافيت بتهور وأقدم على العسكرية _
أسأل الله العلي القدير أن يشفينا جميع
وهذا المرض بسيط جداً لكن يحتاج عزيمة قوية وبالتدرج راح نتخلص منه
اليوم اسلم على جاري بكرا أتقهوى معه في بيته وكذا لي نكتسب مهارت إجتماعية :)

الله يهديك بس

بالفعل اذا استطاع الانسان التخلص من الاوهام واحلام اليقظة سيخطو خطوات كبيرة نحو الشفاء سيتحكم بافكاره وسيستطيع التخلص من الرهاب والعادة السرية وغيرها من الامراض المصاحبة كالارق وغيره وشكرا على الطرح وجزاك الله خير

تصدقون بديت اشك ان الشيطان له علاقة بالزكام وله علاقة بالكحة وله علاقة بجميع الأمراض العضوية والنفسية..تصدقون بديت اشك ان الشيطان له علاقه بكل شي يصيبنا في هذه الدنيا من سوء...امس سيارتي خربت ما اشتغلت احاول اشغلها وماتشتغل,,شكل الشيطان ابن الكلب فاصل سلك البواجي او مفضي البطارية حقتي!!!!!!

المشكلة ان المشكلة في الافكار يا ناس انا متاكد من هذا الشي صحيح ان صعب تتحكم بافكارك بسهولة خصوصا لما تظهر الاعراض لكن ان شاء الله مع الوقت رح يكون اسهل

أنا مقتنعة تماما بكلامك ولكني لم أستطع تطبيقه

حلووووووووو....

بس التطبيق صعــــب

جزاك الله خير 

يعنني جبت علاج جديد
المرض هو عدم تطبيق تلك الافكار والا لما كان الرهاب

المشاركة الأصلية كتبت بواسطة رهابي كووول

يعنني جبت علاج جديد
المرض هو عدم تطبيق تلك الافكار والا لما كان الرهاب

ههههههههههه...رهابي كوول مالنا انا وانت الا نعالج بعضنا..انا اعالجك وانت تعالجني ماعاد في الا هذا الحل