اكتب لكم وانا ارتجف

اكتب لكم وانا ارتجف

السلام عليكم
كيفكم طيبين ان شاءالله

اقسم بالله اني امر بحاله صعبه اقولكم حقيقه تعبت كثير

تفكير وسواس كل شوي يرجع

كل شوي اخاف من شي جديد
المرض مسيطر على مخي وهو وسواس الايدز

دايم أتحسس يدي وشوف فيه جرح
او شي امس مسكت جهاز قياس الطول المتر
وكنت افتح وسكر وشوفه قالي واحد من العيال فيه دم
انتبه يوم فتحته شفت في الأطراف وخفت كثير
قلت اكيد جرحني او دخل بجرحي دم وانتقل لي الايدز
سالت صاحب المتر وهو ولد عمي وقالي هذا مو دم
هذا صدى ورتحت وقلت عشان أتأكد بجيب دبوس
وجرح نفسي بسيط وحطه بالمتر وشوف الفرق
طلع فيه فرق كثير وعرفت انه صدى شوي
وسوست وقلت شكل يوم جرحت نفسي وحطيته بالمتر
اختلط دمي مع الدم اللي في المتر وجاني إيدز
وخوف ورعب مع ان ولد عمي أكد لي انه صدى
ولو دم كان اسود والمتر حديد اكيد يصدي
وللحين متخوف وشوي وأبكي توني مخلص الجامعه
ودور وظيفة وخاف يصير شي ولا أتوظف وتصير سمعتي
شينه مره وش اقول لمي وأبوي وخواني 💔💔💔

تعبت والله العظيم وذا تكلمت لأشخاص اثق فيهم استحقروا
افكاري ويقولون انت موسوس خالص

وش اسوي والله تعبت
اقول بنفسي لو فيني وسواس الموت ارحم
من وصمة عار بتكون فيني طول العمر 💔💔💔💔💔

المصدر: نفساني

لا ياخوي لا تسوي بنفسك كذا لا ارجوك اذهب وسوي الفحوصات واطمئن وتأكد دون ان تعيش في وهم وتخسر ساعات وايام وشهور تتندم عن ذهابها دون ان تستغلها في يخدم حياتك ومستقبلك.

دامك الحمدلله متأكد ما سويت شي مو كويس بعيد الشر
والدم قليل يحصل فيها الانتقال خلاص لا اوسوس
ولا تقول وسواس الموت ارحم :(
كل الوساوس متعبه
تخليك تعيش يومك وانت خايف وما تحس فيه
وما تحس بطعمه
طول وقتك خايف يصير كذا او كذا
كلها متعبه الله يعيننا

سويت فوق 70 فحص خلال سنتين
كل انواع الفحوصات
والحمدلله سليمه لكني اطلع من شي
وادخل بشي الله يكون بالعون يارب 💔

انت علاجك عند دكتور نفسي روح تعالج مو عيب ولا حرام

ولا تفكر بالايدز مافيك الا العافيه

لاتقلق ياخوي طالما انك عملت فحوصات كثيره تعوذ من الشيطان الرجيم هذه وساوس

اسم الله عليك سلامتك من الرجفة و هالخوف الله يآمن قلبك و يكشف عنك الضر و ينور بصيرتك
طمنا عليك كيفك دحين إن شاء الله أحسن ؟

عبدالاله انا أوقات أقوم من النوم القى بقع في يدي و جروح
و اواقات وانا صاحية عادي اغسل يدي القاها تحرقني القى في خدوش بأصابعي
عادي تصير معانا كلنا أوقات نمشي ننخبط تجرحنا ورقة او سكينة ما نحس فيها خفيفة او نكون منشغلين او غافلين عادي

حتى لو الصدى هذا دم ماراح ينتقلك الايدز انت سليم بإذن الله
وسمعتك طيبة و حلوة صدقني .. ربي يحفظك و يوفقك

الله يسعدكم على الكلام ياخواني

انا اتعالج عن طبيب لي فتره ولاحسيت بتحسن
ابدا يارب اكشف عني وعن اخواني المصابين بالوسواس الضر
وامنحنى حياة سعيده يارب

والله وسواس الموت مو ارحم ترا كل الوساوس اصعب من بعض .. انا جربت جميع الوساوس صدقني ومنهم ويواس مرض الايدز .. ترا وسواس الموت اصعب .. وهلا ماسكني وسواس مرض السرطان والله لا يفرجيك حجم الافكار والتهيئات الي براسي ..شي مرعب .. ولسه الاكتئاب ابشع من الوسواس بالف مره
افحص فيتامين د اغلب الي عندهم وسواس عندهم نقص بهاد الفيتامين ..ربي يشفيك ويشفينا

وعليكم السلام ورحمة الله وبركاتة

هذا وسواس والوسواس من الشيطان يفرح اذا شافك مهتم وضايق صدرك
واذا استمريت معه بتمر بوسواس ثانيه ويجلس يتفرج عليك ويضحك

{ إنما النجوى من الشيطان ليحزن الذين آمنوا }
انت شخص سليم. شريف لاتخلي الشيطان يلعب عليك
بتقول وش الحل؟

الحل اوشي التجاهل تتجاهل جميع الوسواس بتعاني بالبدايه لكنها سهله بس الشيطان يصعب عليك

واذا بدى معك الوسواس استعذ بالله منة وتجاهله وابتسم " واشغل نفسك بالذكر او مجالسه الاهل



واهم شي اترك التحليل لان هذا من الاستجابه لوسواس الشيطان

وحافظ ع صلاتك والاذكار


شفاك الله وعافاك ورزقك بالزوجة الصالحة والحياة السعيدة
ووفقك


تبشرنا قريبا بشفاءك وزواجك


ان اصبت فمن الله وان اخطات فمن نفسي والشيطان

الله يسعدكم يارب

تصدقون اليوم سويت تحليل بمستشفى الدكتور سليمان الحبيب
والحمدلله النتيجه سلبيه
وسوست بان تكون الابره ملوثه 💔
أقسم بالله أفكار صعبه

اشكر لكم استجاباتكم

الله يهديك

ليش تستجيب للوساوس؟؟؟,!!

ماراح تتخلص منها مادام تستجيب لها

ادعولي تكفون

الله يشفيك اخووي ويعافيك
انا جاتني فترة وسوست ان معاي سرطان ثدي بس الحمدلله ماطول ولااستمرت الحاله لان طنشت بالاخير
وقلت لنفسي لن يصيبني الا ماكتبه الله لي ومافيني الا العافيه يعني حاولت اطمن نفسي واجيب كلامي ورسائل ايجابيه والان الحمدلله مافيني الا العافيه
حاول ماتفكر بالمرض هذا لانه الي تفكر فيه شي مو معقول متر وابره تخليك توسوس لهدرجه لاتفكر زي ماقالت احد الاخوات وهذا من الشيطان قول الحمدلله ورددها وتعوذ من ابليس وحاول تسمع قران راح يريح اعصابك والهي نفسك باي شي بس لاتوسوس بالمرض هذا الله يجيرنا منه يااارب